Jen Anõke RũKanaan ro Ãinwõt Nahum
1. Ta eo jej katak jãn bok in Nahum?
1 An jorrããn im jeepepl̦o̦k jikin kweilo̦k Nineva ej kajejjet men ko Nahum ar kanaan kaki. Men in ej kam̦ool bwe Jeova ej n̦aon̦ean rũkõjdat ro An im jekdo̦o̦n ewi joñan aer kajoor im lãj ak ejjel̦o̦k juon iaaer emaroñ jum̦aik E. (Na. 1:2, 6) Ilo ad naaj lukkuun etale kanaan eo an Nahum, elõñ men ko jenaaj ekkatak jãni ilo ad kõm̦m̦ane jerbal in kwal̦o̦k naan.
2. Ewi wãween ad kwal̦o̦k ennaan ko rem̦m̦an ñan armej ro ñe jej kwal̦o̦k naan?
2 Lel̦o̦k Kaenõm̦m̦an im Kõjatdikdik ñan Ro Jet: Ñe jej kõpel̦l̦o̦k Baibõl̦ im riiti jinoin bok in Nahum, jenaaj lo bwe el̦ap wõt an kõnnaan kõn an Anij naaj kar ko̦kkure Nineva, kiãptõl̦ eo etto an aelõñ in Assiria. (Na. 1:1; 3:7) Bõtab, men in ear juon ennaan em̦m̦an ñan armej ro an Jeova. Nahum, eo me mel̦el̦ein etan ej “Rũkaenõm̦m̦an,” ear kakajoor RiJu ro m̦õttan bwe m̦õttan jidik enaaj jako rũkõjdat ro aer! Ear wõnm̦aanl̦o̦k wõt im ba bwe Jeova ej ãinwõt ‘juon em̦ ekajoor ilo raan in jorrããn.’ (Na. 1:7) Ilo ad kwal̦o̦k naan, kõj bareinwõt jej kwal̦o̦k kõn nuuj eo em̦m̦an ñan armej ro im rõjañ er ñan pukot Jeova, eo im enaaj kõjparok er ilo iien jorrããn.—Na. 1:15.
3. Ewi wãween ad maroñ anõk Nahum ñe jej kõjerbal waanjoñak ko?
3 Kõjerbal Waanjoñak Ko: Jeova ear kõm̦akũt Nahum ñan keidi joñan jorrããn eo enaaj wal̦o̦k ñan Nineva ñan jepeebl̦o̦k eo an jikin kweilo̦k Thebes (No-amon) ilo Ijipt. M̦oktal̦o̦k, Assiria ekar ko̦kkure jikin in. (Na. 3:8-10) Ñe jej kõnono ippãn kajjojo armej kõn jem̦l̦o̦kin naaj jukjukun pãd in enana, jemaroñ kwal̦o̦k ñan er kõn kanaan ko ilo Baibõl̦ me rej kwal̦o̦k bwe Jeova ej kam̦ool aolep naan ko an. Ñan waanjoñak, ke RũBabil̦on im RiMidia ro rar item tarinaiki aelõñ in Nineva ilo kar iiõ eo 632, ear wõt mijeljel im kõm̦m̦an an ibwijleplep im to̦o̦rl̦o̦k Reba eo etan Tigris im rube jet jikin ilo wõrwõr ko reppen an Nineva. Im ekar m̦õkaj aer bõk RiNineva ro ãinwõt an kar Jeova kanaan kake.—Na. 1:8; 2:6.
4. Ewi wãween ad maroñ kõm̦m̦an bwe en alikkar im pidodo an armej ro mel̦el̦e ñe jej kwal̦o̦k naan ñan er?
4 En Alikkar im Mel̦el̦e Men ko Kwõj Ba: Wãween an kar Nahum je naan ko elukkuun alikkar im mel̦el̦e. Boin ko me ej kajjioñ in ba el̦ap aer alikkar. (Na. 1:14; 3:1) Kõj bareinwõt jekõn̦aan kõjerbal naan ko me epidodo an armej mel̦el̦e kaki. (1 Ko. 14:9, UBS) Ilo iien eo jinointata kwõj kwal̦o̦k naan ippãn juon armej, en alikkar am̦ kõmel̦el̦eiki kõn unin am̦ lol̦o̦k. Ak ñe kwõj katak ippãn kajjojo iaan rũkkatak ro am̦, jipañ er ñan kal̦apl̦o̦k aer lõke Jeova im Naan eo an im kile aorõkin an katak kein maroñ jipañ er ilo mour ko aer.—Rom 10:14.
5. Ta naan in keeañ eo an Anij ilo kanaan eo an Nahum me ej kaenõm̦m̦an kõj?
5 Ilo bok eo ilo Baibõl̦ me ej etn̦ake etan Nahum, elukkuun alikkar an kar Nahum lõke naan ko an Jeova me rar jejjet kitieer. Ilo an epaaktok jem̦l̦o̦kin jukjukun pãd in an Setan, el̦ap ad bõk kaenõm̦m̦an jãn naan in keeañ eo an Anij me ej ba: “Jorrããn eban bar wal̦o̦k.”—Na. 1:9.