Ta ko Kwõmaroñ Katak Jãn Al in Roñjake ko an Doulul In?

Ta jet iaan al in roñjake ko an doulul in me em̦m̦an ippam̦? Etke? Kwõj ke kile bwe pija ko ilo al kein rej ekkejell̦o̦k ñan men ko rej wal̦o̦k ilo mour ko ad kajjojo raan? Kõn an lõñ taitõl̦ in al ko im an eokkõtaktak kõjañjañ in al kein, ewõr al ñan kõj kajjojo. Ijoke, al in roñjake kein im pijain al kein el̦apl̦o̦k tokjãer jãn ad baj roñjaki wõt.

Kajjojo al in roñjake kein ewõr men ko raorõk ie me jemaroñ kõjerbali ilo kwal̦o̦k naan im wãween ad mour. Jet iaan al kein rej kwal̦o̦k kõn karwainene, bõrokuk, m̦õttãik doon, peran, yokwe, ak tõmak. Jet iaaer rej kwal̦o̦k kõn an juon jepl̦aak ñan Jeova, kwal̦o̦k jeorl̦o̦k bõd, an juon dãpij wõt an tiljek, im an juon kal̦apl̦o̦k ijo kun̦aan ñan jerbal ñan Jeova. Joñan ewõr al in roñjake me ej kwal̦o̦k kõn wãween an wõr joñan ad kõjerbal jeel̦boon ko nejid. Bar ta ko jet raorõk em̦õj am̦ roñjaki ilo al kein me kwõmaroñ ekkatak jãni?

ALWÕJE PIJAIN AL IN ROÑJAKE EO ETAN JUST AROUND THE CORNER, INNEM UWAAKI KAJJITÕK KEIN ITULAL̦:

• Ta jeraam̦m̦an eo ilju im jekl̦aj me rũtto rein ilo pijain al in rej l̦õmn̦ak kake?​—Jen 12:3

• Ewi wãween ad kõkajoorl̦o̦k tõmak eo ad ilo maroñ eo an Jeova ñan kajejjet kallim̦ur ko an?

• Iien ta ko rekalañlõñ renaaj wal̦o̦k ejjab to jãn kiiõ?

• Ewi wãween an kõjatdikdik eo kõn Aelõñ eo jipañ kõj ñan kijenmej kõn apañ ko jej iiooni?​—Rom 8:25