Anij Ej Ke Roñjake Jar ko Ad?

ANIJ EJ ROÑJAKE.

“O Kwe kwõj roñjake jar, ñan Kwe kanniõk [ak armej] otemjej enaaj itok.”​—Sam 65:2.

Jet armej rej jar kõnke rej ba bwe ej kõm̦m̦an bwe en em̦m̦anl̦o̦k aer mour, meñe rejjab tõmak bwe ewõr en̦ ej roñjake aer jar. Bõtab, jar ejjab baj juon men jej kõm̦m̦ane bwe en em̦m̦anl̦o̦k ad mour ñan jipañ kõj kijenmej ium̦win apañ ko ad. Baibõl̦ eo ej kaalikkar ñan kõj bwe “Jeovaa ej epaak ñan er otemjej rej kũr ñan E, ñan ro otemjej rej kũr ñan E ilo m̦ool. . . . Enaaj bareinwõt roñjake aer lam̦õj,” ak kũr.​—Sam 145:18, 19.

Kõn men in, jemaroñ lõke bwe Jeova Anij ej roñjake jar ko an ri-karejar ro an. Ilo yokwe, ej ba: “Kom̦ naaj kũr ñan Eõ, im kom̦ naaj etal im jar ñan Eõ, im Inaaj eo̦roñ kom̦.”—Jeremaia 29:12.

ANIJ EKÕN̦AAN BWE KWÕN JAR ÑANE.

“Niknik ilo jar.”​—Rom 12:12.

Ilo Baibõl̦, ej rõjañ kõj bwe jen “jab bõjrak jãn [ad] jar” im ñan “wõnm̦aanl̦o̦k wõt im jar iien otemjej.” Alikkar bwe Jeova Anij ekõn̦aan bwe jen jar ñane.​—Matu 26:41; Epesõs 6:18.

Etke Anij ekõn̦aan bwe jen jar ñane? Baj l̦õmn̦ak: Juon jemãn enaaj ke dike an ajri eo nejin ba ñane: “Baba, kwõmaroñ ke jipañ ña?” Ejjel̦o̦k pere bwe juon jemãn emaroñ jel̦ã kadede kõn ta eo ajri eo nejin ej aikuji ak wãween an eñjake, bõtab ñe ej roñ naan kein, men in ej kaalikkar ñane bwe eo nejin ej lõke e im epaake e. Ejja ãindeinl̦o̦k wõt, ñe jej jar ñan Jeova Anij, jej kaalikkar ñane bwe jej lõke e im jekõn̦aan epaake e.​—Jabõn Kõnnaan 15:8; Jemes 4:8.

EL̦AP AN ANIJ KEA KAKE EOK.

“Likũt ippãn aolepen men ko kom̦ij eddodo kaki, kõnke ej kaorõk kom̦.”​—1 Piter 5:7.

Anij ekõn̦aan bwe jen jar ñane kõnke ej yokwe kõj im kea kake kõj. El̦ap an jel̦ã kõn men ko jej inepata im eddodo kaki, im ekõn̦aan jipañ kõj.

Ilo aolepen mour eo an Kiiñ Devid, ekõn jar ñan Jeova Anij im kajjitõk jipañ jãne im ear kwal̦o̦k l̦õmn̦ak im eñjake ko an ñan E. (Sam 23:1-6) Kar ta eñjake eo an Anij kõn Devid? Anij ear yokwe Devid im ear roñjake jar ko an me rellõñ. (Jerbal 13:22) Ejja ãindeinl̦o̦k wõt, Anij ej roñjake jar ko ad kõnke ej kea kake kõj.

“ÑA IJ YOKWE JEOVA, BWE EAR ROÑJAKE AINIKIÕ”

Naan kein rej an juon iaan ri-jeje ro an sam ko ilo Baibõl̦. Ear tõmak bwe Anij ear roñjake jar ko an, im men in el̦ap an kar jelõte. Ear kile an epaakel̦o̦k Anij im ear bõk kajoor bwe en maroñ kijenmej ium̦win jorrããn im bũrom̦õj ko ilo mour.​—Sam 116:1-9.

Ad tõmak bwe Anij ej roñjake jar ko ad, men in enaaj kõm̦m̦an bwe jen wõnm̦aanl̦o̦k wõt im kõnono ippãn. L̦õmn̦ak kõn bwebwenato eo an Pedro, eo me ej jokwe ilo Spain. L̦adik eo nejin me 19 an iiõ, ear jako ilo mej jãn juon ãkjitõn. Ilo an kar lukkuun bũrom̦õj, Pedro ear lutõkl̦o̦k bũruon ñan Anij im ear jab bõjrak an kajjitõk kõn kaenõm̦m̦an im kõkajoor. Ta eo ear wal̦o̦k? Pedro ej ba, “Jeova ear uwaaki jar ko aõ ikijjeen an kar Kũrjin ro m̦õttam̦ro lio pãleõ kaenõm̦m̦an im kõkajoore kõm̦ro.”

Meñe jar ear jab bar kõjepl̦aaktok l̦adik eo nejin Pedro jãn mej, ak jar ear jipañ e im baam̦le eo an ilo wãween ko rel̦l̦ap. María Carmen, lio pãleen ej ba, “Jar ear jipañ eõ ñan kijenmej wõt meñe iar lukkuun bũrom̦õj. Iar jel̦ã bwe Jeova Anij emel̦el̦e kõn eñjake ko aõ kõnke ilo kar iien ko iar jar ñane, iar eñjake aõ aenõm̦m̦an im ineem̦m̦an wõt.”

Baibõl̦ eo ekoba bwebwenato ko an armej, rej lukkuun kaalikkar bwe Anij ej eo̦roñ jar ko. Bõtab ebar alikkar bwe Anij ejjab uwaaki aolep jar ko. Etke Anij ej uwaake jet jar im jab jar ko jet?