Etke Anij Ejjab Uwaake Aolep Jar?

Jeova Anij, eo Jemãdwõj ilañ, ekõn̦aan im em̦õn̦õn̦õ in roñjake jar ko ad jãn bũruod. Bõtab ewõr men ko me remaroñ kõm̦m̦an bwe en bõjrak jãn an uwaake jar ko ad. Ta kein, im ta ko jemaroñ l̦õmn̦ak kaki ñe jej jar? Er kein ej jet iaan naanin jipañ ko jãn Baibõl̦.

Juon kumi in armej ilo juon m̦õn jar, rej riiti im ãliji juon jar jãn juon bokin jar.

“Ñe kom̦ij jar, kom̦win jab ãlijinmen.”—Matu 6:7.

Jeova ejjab kõn̦aan bwe jen ãliji jar ko me jekiili naan ko ie ak riitl̦o̦k jar ko jãn kobban bokin jar ko. Ijoke, ekõn̦aan bwe jen kõnono ñane jãn bũruod. L̦õmn̦ak kõn ewi wãween am̦ nãj kar eñjake el̦aññe ear wõr juon m̦õttam̦ me ej ãliji ejja naan ko wõt ñan kwe aolep raan. Ro repaake doon rej kwal̦o̦k bũrueer im rej m̦ool ñan doon. Ñe jej jar ilo naan ko ad make, jej kwal̦o̦k ñan Jemãdwõj ilañ men ko me rej itok jãn bũruod.

Juon em̦m̦aan ej reilõñl̦o̦k ke ej jeere juon peba jiddik bwe en lale ñe enaaj wiini juon jããn el̦ap.

“Ñe kom̦ij kajjitõk, ejjab lewaj ñan kom̦ bwe kom̦ij kajjitõk kõn un ko rejjab jim̦we.”—Jemes 4:3.

Ealikkar bwe jeban kõtmãne bwe Anij en uwaake jar ko ad el̦aññe jen kar kajjitõk ippãn kõn men ko me jejel̦ã bwe ejjab kõn̦aan bwe jen kõm̦m̦ani ak bwe en wõr ippãd. Ñan waanjoñak, Jeova enaaj ke uwaake juon ri-kããm̦bõl̦ me ej jar im kajjitõk bwe en jeraam̦m̦an, meñe em̦õj An kaalikkar bwe jen jab arõk im tõmak bwe juon emaroñ jide im jeraam̦m̦an? (Aiseia 65:11, UBS; Luk 12:15) Jeban kõtmãne bwe Jeova enaaj uwaake kain jar rot in! Bwe Anij en uwaake kõj ñe jej jar ñane, jej aikuj in lale bwe kajjitõk ko ad ren ekkar ñan men ko me ej jiroñ kõj kaki ilo Baibõl̦.

Juon ri-tõlin kabuñ ej jar kõn kumi in rũttarin̦ae eo.

“El̦aññe kwõjjab pokaki kien ko an Anij, innem enaaj kũtõtõik jar ko am̦.”—Jabõn Kõnnaan 28:9, UBS.

Ilo tõre ko ilo Baibõl̦, Anij ear jab uwaake jar ko an ro me rar jum̦aik kien ko an rewãnõk. (Aiseia 1:15, 16) Ejjañin oktak wãween an eñjake. (Malakai 3:6) Ñe jekõn̦aan bwe Anij en uwaake jar ko ad, jej aikuj kate kõj joñan wõt ad maroñ ñan mour ekkar ñan kien ko an. Bõtab, ta el̦aññe ear wõr men ko jaar kõm̦m̦ani m̦okta me rebõd? Men in ej ke mel̦el̦ein bwe Jeova ejjãmin roñjake kõj? Ejjab ñan jidik! Anij enaaj kwal̦o̦k yokwe ilo an jol̦o̦k ad bõd ñe jenaaj ukot mour eo ad im kate kõj joñan wõt ad maroñ ñan kabuñbũruon.—Jerbal 3:19.