Ewi Wãween Am̦ Maroñ Jar im bwe Anij En Eo̦roñ Eok?

JAR ÑAN JEOVA ANIJ ILO ETAN JESUS

“El̦aññe kom̦ naaj kajjitõk kõn jabdewõt men ippãn Jema ilo eta, enaaj lewaj ñan kom̦.”​—Jon 16:23.

Naan ko an Jesus rej lukkuun kaalikkar bwe Jeova ekõn̦aan bwe jen jar ñane, ejjab ikijjeen ekjab ko, saint ro, enjel̦ ro, ak ro me em̦õj aer mej, bõtab ekõn̦aan bwe jen jar ilo etan Jesus Christ. Ñe jej jar ñan Anij ilo etan Jesus, jej kwal̦o̦k ad kile jerbal eo an Jesus me elukkuun aorõk. Jesus ear ba, “Ejjel̦o̦k en̦ ej ilo̦k ñan ippãn Jema el̦aññe ejjab kõn ña.”​—Jon 14:6.

JAR JÃN BŨRUOM̦

“Kom̦win kwal̦o̦k bũruomi im̦aan.”​—Sam 62:8.

Ñe jej jar ñan Jeova, jen kõnono ippãn ãinwõt ad nãj kar kõnono ippãn juon jemãd me el̦ap yokwe ippãn. Ijello̦kun ad riit jãn juon bok ak ãlijil̦o̦k jet naan ko me em̦õj ad kiili, jen kõnono ippãn ilo kautiej im jãn bũruod.

JAR EKKAR ÑAN ANKILAAN ANIJ

“Jabdewõt men eo jej kajjitõk kake im ej ekkar ñan ankilaan, ej roñjake kõj.”​—1 Jon 5:14.

Ilo Baibõl̦, Jeova Anij ej kwal̦o̦k ñan kõj men ko me enaaj kõm̦m̦ani ñan kõj armej ro im ta ko ekõn̦aan bwe jen kõm̦m̦ani. Bwe Anij en buñbũruon kõn jar ko ad, jej aikuj in jar “ekkar ñan ankilaan.” Ñan kõm̦m̦ane men in, jej aikuj in katak Baibõl̦ bwe jen maroñ kal̦apl̦o̦k ad jel̦ã kajjien. Ñe jenaaj ãindein, enaaj buñbũruon kõn jar ko ad.

TA KO JEMAROÑ JAR KAKI?

Jar kõn Aikuj ko Am̦. Jemaroñ jar ñan Anij kõn aikuj ko ad kajjojo raan, ãinwõt m̦õñã, ballid, im jikin ad jokwe. Jemaroñ bar jar bwe en letok ñan kõj mãlõtlõt ñan kõm̦m̦ani pepe ko rejim̦we im kajoor bwe jen maroñ kijenmej wõt ium̦win wãween ko reppen jej iiooni. Jemaroñ jar kõn tõmak, bwe en jol̦o̦k ad bõd, im kõn jipañ eo An.​—Luk 11:3, 4, 13; Jemes 1:5, 17.

Jar kõn Ro Jet. Rũtto ro me rej kea kake ajri ro nejier rej m̦õn̦õn̦õ ñe ajri ro nejier rej yokwe doon. Jeova bareinwõt ekõn̦aan bwe ro nejin ijin ioon lal̦ ren kea kake doon. Ekkar bwe jen jar kõn eo pãleed, ajri ro nejid, baam̦le eo ad, im ro m̦õttad. Ri-kal̦oor Jemes ear je im ba, “Jar kake doon.”​—Jemes 5:16.

Kwal̦o̦k Kam̦m̦oolol. Ikijjeen ri-Kõm̦anm̦an eo ad, Baibõl̦ eo ej ba: “[Ear] kõm̦m̦ani men kein rem̦m̦an, ear lewaj wõt jãn lañ, leen keinikkan ilo iien aer kalle, im ear lewaj kijemi ekkan im koobrak bũruomi kõn lem̦õn̦õn̦õ.” (Jerbal 14:17) Ñe jej l̦õmn̦ak kõn aolepen men ko Anij ear kõm̦m̦ani ñan kõj, men in enaaj kõm̦akũt kõj ñan kwal̦o̦k kam̦m̦oolol ñane ilo jar. Ejjab men in wõt, ak jej aikuj in bar kwal̦o̦k ad kam̦m̦oolol ikijjeen wãween ad mour.​—Kolosse 3:15.

KIJENMEJ WÕT IM WÕNM̦AANL̦O̦K WÕT ILO AM̦ JAR

Jet iien, jemaroñ bũrom̦õj kõnke kar jab kajju uwaaki men ko me jaar lukkuun jar kaki jãn bũruod. Kõn men in, jej aikuj in ke bõk l̦õmn̦ak eo bwe ejjel̦o̦k an Anij itoklimo kõn kõj? Ejjab ñan jidik! L̦õmn̦ak kõn waanjoñak kein me rej kaalikkar bwe men eo me jemaroñ aikuj in kõm̦m̦ane, ej wõnm̦aanl̦o̦k wõt im jar.

Steve, eo me kar kwal̦o̦k kake ilo katak eo jinointata, ej kwal̦o̦k m̦ool im ba, “El̦aññe en kar jab men in jar, in kar kajejtokjãn mour e aõ wõt etto.” Ta eo ear kõm̦m̦an menin an oktak? Ear jino katak Baibõl̦ im ear katak kõn aorõkin ad jar im ad aikuj niknik ilo jar. Steve ej ba, “Ij jar ñan Anij im kam̦m̦oolole kõn aolep yokwe im jipañ ko jãn ro m̦õtta me rejitõnbõro ippa. Kiiõ, elukkuun l̦ap aõ m̦õn̦õn̦õ jãn kar m̦okta.”

Ak ta kõn Jenny, eo me ear l̦õmn̦ak bwe ejjab juon eo me ej tõllo̦kũn bwe Anij en eo̦roñ an jar? Ej ba, “Ilo tõre eo iar l̦õmn̦ak bwe elukkuun ejjel̦o̦k tokja, iar jar im akwel̦ap ñan Anij bwe en jipañ eõ ñan mel̦el̦e etke ij bõk eñjake in.” Ewi wãween an kar men in jipañe? Ej ba, “Ilo aõ kar kõnnaan ippãn Anij, men in ear jipañ eõ ñan kajim̦we wãween aõ l̦õmn̦ak im ñan jel̦ã bwe meñe bũruõ emaroñ liaakel̦o̦k eõ, ak Anij ejjab. Jar ear bar jipañ eõ bwe in jab ebbweer ak bwe in kate wõt eõ.” Kar ta tokjãn men in? Ej ba, “Jar ear jipañ eõ ñan kile bwe Jeova ej juon Anij, Jema im M̦õtta me em̦ool an pãd im el̦ap an yokwe im kea kake eõ, im bwe imaroñ atartar ioon aolep iien im enaaj jipañ eõ toon wõt aõ kate wõt eõ ñan kõm̦m̦ani men ko me ekõn̦aan bwe in kõm̦m̦ani.”

Bar l̦õmn̦ak kõn waanjoñak eo an Isabel. Ke ear bõro̦ro, taktõ ro an rar ba ñane bwe niñniñ eo nejin enaaj l̦otaktok im l̦ap an nañinmej ak utam̦we. Ear lukkuun bũrom̦õj kõn men in. Ekar bar wõr ro jet me rar ba ñane bwe en m̦an lo̦jien. Ej ba, “Iar l̦õmn̦ak itõn mej kõn an kar lukkuun eddodo bũruõ, kõn aõ kar bũrom̦õj im inepata.” Ta eo Isabel ear kõm̦m̦ane? Ej ba, “Iar jar im bar jar bwe Anij en jipañ eõ.” Tokãlik, ear kõl̦otake l̦adik eo nejin etan Gerard, im ear utam̦we. Isabel ej ke l̦õmn̦ak bwe Anij ear uwaaki jar ko an? Aet! Ewi wãween? Ej ba, “Ñe ij kalimjeke an l̦adik eo nejũ, eo me ej kiiõ 14 an iiõ, m̦õn̦õn̦õ meñe ewõr an nañinmej, men in ekõm̦m̦an aõ kile bwe l̦adik eo nejũ ej uwaak eo em̦m̦antata ñan jar ko aõ im bwe ej jeraam̦m̦an eo el̦aptata Jeova Anij ear letok ñan ña.”

Naan kein an rein, ekõm̦m̦an ad l̦õmn̦ak kõn naan ko an ri-jeje sam eo, me ej ba: “O Jeova Kwaar roñ kõn̦aan ko an ri-jorrããn; Kwõnaaj kõkajoor bũrueer; Kwõnaaj roñjake.” (Sam 10:17) Men kein rejjab ke un ko rem̦m̦an ñan kõj bwe jen wõnm̦aanl̦o̦k wõt im jar?

Ilo Baibõl̦ eo, jemaroñ lo elõñ iaan jar ko an Jesus. Bõtab, jar eo me elõñ armej rejel̦ã kake, ej jar eo me ear katakin ri-kal̦oor ro an. Ta ko jemaroñ katak jãn jar in?