WÃWEEN BWE EN MAROÑ BÕJRAK AN WÕNM̦AANL̦O̦K WÕT KÕJDAT

4 | Anjo̦ Ioon Kõjdat Kõn Jipañ Eo An Anij

Naanin Kakapilõk eo jãn Baibõl̦:

“Leen jetõb kwõjarjar ej yokwe, lañlõñ, aenõm̦m̦an, kijenmej, jouj, em̦m̦an, tõmak, ineem̦m̦an, im jel̦ã irooj iood make.”—GALETIA 5:22, 23.

Mel̦el̦ein Naanin Kakapilõk In:

Ikijjeen jipañ eo an Anij, jemaroñ kõm̦m̦an bwe en bõjrak an wõnm̦aanl̦o̦k wõt kõjdat. Jetõb kwõjarjar eo an emaroñ jipañ kõj bwe en wõr ippãd kadkad ko me jejjab maroñ make kaddekl̦o̦k ippãd. Innem ijello̦kun ad kajjioñ anjo̦ ioon kõjdat kõn kajoor eo ad make, enãj em̦m̦an ñe jenaaj atartar ioon jipañ eo an Anij. El̦aññe jenaaj ãindein, jenaaj bõk ejja eñjake eo wõt an kar rijjilõk Paul, eo me ear ba: “Imaroñ in kõm̦m̦an men otemjej ikijjeen eo ej letok kajoor ñan ña.” (Pilippai 4:13) Innem jenaaj maroñ ba: “Aõ jipañ ej itok jãn Jeova.”—Sam 121:2.

Men eo Kwõmaroñ Kõm̦m̦ane:

“Jeova ear ukot eõ jãn juon eo elãj ñan juon eo eineem̦m̦an.”—WALDO

Jar ñan Jeova im lukkuun kajjitõk ippãn bwe en lewaj jetõb kwõjarjar eo an. (Luk 11:13) Kajjitõk ippãn bwe en jipañ eok ñan kwal̦o̦k kadkad ko rem̦m̦an ilo mour eo am̦. Katak kõn ta eo Baibõl̦ ej ba kõn kadkad ko me remaroñ jipañ eok ñan jol̦o̦k kõjdat, ãinwõt yokwe, aenõm̦m̦an, kijenmej, im jel̦ã irooj iood make. Pukot wãween ko ñan kaddekl̦o̦k kadkad kein ilo mour eo am̦. Im kobal̦o̦k ippãn ro me rej bar kajjioñ kaddek kadkad rot kein ippãer. Kain armej rot rein remaroñ jipañ “kõketak [eok] ñan kwal̦o̦k yokwe im jerbal ko rekanooj in em̦m̦an.”—Hibru 10:24; footnote.

Bwebwenatoun Mour eo An—WALDO

Ear Anjo̦ Ioon Kõjdat im Lãj

Waldo ear dik im rũttol̦o̦k ilo juon wãween mour elukkuun pen me ear kõm̦m̦an bwe en obrak kõn kõjdat. Ej ba: “Ekkã aõ kõn ire ippãn ro rej wiakake men ko rekkajjoor . . . Juon iien, juon kumi in ri-nana rar kõl̦l̦ãik on̦ããn juon eo etijem̦l̦o̦k ilo m̦anm̦an armej bwe en itõn m̦an eõ, bõtab iar maroñ rõl̦o̦k im ko jãne, ijo wõt ke iar ikkinejnej kõnke ear n̦ate eõ.”

Waldo ear jab m̦õn̦õn̦õ ke kõrã eo ippãn ear jino katak Baibõl̦ ippãn Ri-Kõnnaan ro an Jeova. Ej ba: “Iar lukkuun dike Ri-Kõnnaan ro an Jeova, im elõñ alen aõ kar bũroñe er im kwal̦o̦k naan ko reddo ñan er. Ak aolep iien rar uwaak ilo jouj.”

Ãlikin jet iien, Waldo ear bareinwõt jino katak Baibõl̦. Ej ba: “Ekar jab pidodo aõ jerbali men ko iar katak kaki. Iar l̦õmn̦ak bwe ilukkuun ban maroñ bõjrak jãn aõ illulu im lãj.” Bõtab juon men me ear katak jãn Baibõl̦ ear kõm̦m̦an bwe en wal̦o̦k juon oktak el̦ap ippãn.

Waldo ej kõmel̦el̦e im ba: “Juon raan, eo me ej katak Baibõl̦ ippa, Alejandro, ear kajjitõk bwe in riiti Galetia 5:22, 23. . . . Alejandro ear kõmel̦el̦e im ba bwe ñan aõ maroñ kaddek kadkad kein ejjab pedped ioon kajoor eo aõ make, bõtab ej pedped ioon jetõb kwõjarjar eo an Anij. Mel̦el̦e in em̦ool ear lukkuun ukot wãween aõ l̦õmn̦ak!”

Waldo ear maroñ lo tõprak ñan kabõjrak an wõnm̦aanl̦o̦k kõjdat ilo mour eo an ikijjeen an kar atartar ioon jipañ eo an Anij. Ej ba: “Ro m̦õtta kar m̦okta im ro nukũ rejjab maroñ tõmak kõn ewi joñan aõ oktak.” Ej wõnm̦aanl̦o̦k im ba: “Jeova ear ukot eõ jãn juon eo elãj ñan juon eo eineem̦m̦an.”