“Aolep Renaaj Jel̦ã bwe Kom̦ij Ri-Kal̦oora”

1. Ta eo armej ro rej kile ñe rej kobatok ilo kweilo̦k ko ad? (Bar lale pija eo.)

PIJAIKL̦O̦K m̦õk an ruo rippãlele etal ñan juon iaan Im̦õn Kweilo̦k ko an Ri-Kõnnaan ro an Jeova, im ej kab tõn kein kajuon in aerro kobal̦o̦k ilo kweilo̦k ko ad. Relukkuun bwilõñ im m̦õn̦õn̦õ kõn an ro jeid im jatid lukkuun karwaineneik er im kõn wãween aer kwal̦o̦k yokwe ñan doon. Innem ke erro ej ro̦o̦l ñan m̦weo im̦weer ãlikin kweilo̦k eo, kõrã eo ej ba ñan l̦eo ippãn, ‘Elukkuun oktak armej rein, ear lukkuun em̦m̦an aõ kar pãd ippãer.’

2. Etke em̦õj an jet l̦õkatip?

² Yokwe eo me ewõr ippãn ro ilo eklejia eo elukkuun jejuwaan im kabwilõñlõñ. Meñe ãindein, ak Ri-Kõnnaan ro an Jeova rejjab weeppãn. (1 Jon 1:8) Kõn men in, el̦ak l̦apl̦o̦k am̦ jel̦ã kajjien ro ilo eklejia eo, enaaj l̦apl̦o̦k am̦ kile likjab ko aer. (Rom 3:23) Ekabũrom̦õjm̦õj bwe em̦õj an jet kõtl̦o̦k bwe likjab ko an ro jet en kal̦õkatipi er.

3. Ta eo ej kõkal̦l̦en Kũrjin ro rem̦ool? (Jon 13:34, 35)

³ Bar lale m̦õk eoon eo me ej unin tõl eo an katak in. (Riit Jon 13:34, 35.) Ta eo ej kõkal̦l̦en Kũrjin ro rem̦ool? Ej yokwe, im jab aer weeppãn. Jej bar kile bwe Jesus ear jab ba ‘Kwõnaaj jel̦ã bwe kom̦ij ri-kal̦oora.’ Ak ear ba: “Aolep renaaj jel̦ã bwe kom̦ij ri-kal̦oora.” Innem Jesus ear kaalikkar bwe ejjab ri-kal̦oor ro an wõt ak bareinwõt ro ilikin eklejia eo renaaj kile ri-kal̦oor ro an rem̦ool ikijjeen yokwe eo em̦ool rej kwal̦o̦k ñan doon.

4. Ta ko ro jet remaroñ kõn̦aan jel̦ã kõn Kũrjin ro rem̦ool?

⁴ Ewõr jet me rejjab Ri-Kõnnaan ro an Jeova remaroñ l̦õmn̦ak im ba: ‘Ewi wãween an yokwe kwal̦o̦k wõn ro rej ri-kal̦oor ro rem̦ool an Jesus? Ewi wãween an kar Jesus kwal̦o̦k yokwe ñan rijjilõk ro an? Im ewi wãween ad maroñ anõke joñak eo an Jesus ilo raan kein?’ Em̦m̦an ñe Ri-Kõnnaan ro an Jeova rej kõl̦mãnl̦o̦kjen̦ kõn uwaak ko ñan kajjitõk kein. Ad ãindein emaroñ jipañ kõj ñan kal̦apl̦o̦k ad kwal̦o̦k yokwe, el̦aptata ilo iien ko me ro jet rej kõm̦m̦an likjab.​—Eps. 5:2.

ETKE YOKWE EJ WÃWEEN EO WÕT ÑAN JEL̦Ã WÕN RI-KAL̦OOR RO REM̦OOL AN JESUS?

5. Jouj im kõmel̦el̦e naan ko an Jesus ilo Jon 15:12, 13.

⁵ Jesus ear kaalikkar bwe ri-kal̦oor ro an renaaj yokwe doon ilo juon wãween ejejuwaan. (Riit Jon 15:12, 13.) Jesus ear kakien er im ba: “Kom̦win yokwe doon ãinwõt aõ kar yokwe kom̦.” Ta mel̦el̦ein men in? Ãinwõt an kar Jesus kõmel̦el̦e tokãlik, men in ej mel̦el̦ein ñan yokwe ro jet el̦apl̦o̦k jãn am̦ yokwe kwe make—joñan, yokwe in ej kõm̦akũt juon Kũrjin ñan mej kõn rũttõmak ro jein im jatin ñe emenin aikuj.b

6. Ewi wãween an Naanin Anij lukkuun kaalikkar joñan an aorõk yokwe?

⁶ Naanin Anij ej lukkuun kaalikkar joñan an aorõk yokwe. Ñan waanjoñak, erkein ej jet eoon ko me relukkuun em̦m̦an ippãn elõñ armej: “Anij yokwe.” (1 Jon 4:8) “Kwõn yokwe ri-turum̦ ãinwõt am̦ yokwe eok make.” (Matu 22:39) “Yokwe ej kalbubu elõñ jerawiwi.” (1 Pit. 4:8) “Yokwe ejjãmin likjab.” (1 Kor. 13:8) Eoon kein ekoba eoon ko jet rej lukkuun kaalikkar joñan an aorõk ñan ejaake im kwal̦o̦k kadkad in eaiboojoj.

7. Etke Setan ejjab maroñ katakin armej ro ñan yokwe doon im bõrokuk ippãn doon?

⁷ Elõñ armej rej kajjitõk: ‘Elemen aõ jel̦ã ewi kabuñ eo em̦ool? Aolepen kabuñ ko rej ba bwe rej katakin m̦ool eo, ak oktak men ko rej katakin kõn Anij.’ Em̦õj an Setan ejaake elõñ kabuñ ko reriab, im men in ekõm̦m̦an bwe en pen an armej jel̦ã ewi kabuñ eo em̦ool. Ijoke, Setan ejjab maroñ ejaake juon doulul in Kũrjin ro ipel̦aakin lal̦ me rej yokwe doon ãinwõt jemjein jemjati. Jeova wõt emaroñ kõm̦m̦ane men in. Jejel̦ã men in kõnke yokwe eo em̦ool ej itok jãn Jeova—ikijjeen kajoor eo an im kõjeraam̦m̦an eo an. (1 Jon 4:7) Innem alikkar eñin unin an kar Jesus ba bwe yokwe eo em̦ool enaaj kõkal̦l̦en ri-kal̦oor ro an rem̦ool.

8-9. Ewi wãween an yokwe eo em̦ool an Ri-Kõnnaan ro an Jeova jelõt elõñ armej?

⁸ Ãinwõt an kar Jesus kanaan, em̦õj an elõñ armej kile ri-kal̦oor ro an rem̦ool ikijjeen yokwe eo em̦ool rej kwal̦o̦k ñan doon. Ñan waanjoñak, juon jeid im jatid em̦m̦aan etan Ian ej keememej iien eo jinointata ear etal ñan juon kweilo̦k el̦ap me ear wal̦o̦k ilo juon jikin me rej kõm̦m̦ani iien iukkure ko me epaake m̦weo im̦õn. Jejjo allõñ m̦oktal̦o̦k, Ian ear etal ñan jikin in ñan alwõje juon iien iukkure. Ej ba: “Armej ro ilo kweilo̦k el̦ap eo, ear lukkuun oktak aer kõm̦m̦an im m̦akũtkũt jãn armej ro ilo kar iien iukkure eo. Ri-Kõnnaan ro an Jeova rar jouj im karbõb, im ear lukkuun em̦m̦an m̦wilin ajri ro nejier.” Ej wõnm̦aanl̦o̦k im ba: “Men eo el̦aptata iar kile ej bwe armej rein rar lukkuun jokwane im aenõm̦m̦an—juon men me iar lukkuun kõn̦aan ilo mour e aõ. Ijjab keememej jabdewõt iaan katak ko ilo raan eo, ak wãween an kar Ri-Kõnnaan ro an Jeova kõm̦m̦an im m̦akũtkũt ej juon men iban mel̦o̦kl̦o̦ke.”c Em̦ool bwe kõm̦m̦an rot kein rej itok jãn ad m̦oolin yokwe doon. Kõnke jej yokwe rũttõmak ro jeid im jatid, jej kwal̦o̦k jouj im kautiej ñan er.

⁹ Juon jeid im jatid em̦m̦aan etan John ear bar iioon ejja wãween rot in ke ear jino etal ñan iien kweilo̦k ko an eklejia, ej ba: “Iar lukkuun bwilõñ im m̦õn̦õn̦õ kõn an aolep ro ijo lukkuun jouj—joñan aer jouj, iar l̦õmn̦ak bwe reweeppãn. Yokwe eo aer em̦ool ear kõm̦m̦an bwe in tõmak bwe em̦õj aõ lo kabuñ eo em̦ool.”d Bwebwenato kein ekoba bwebwenato ko jet rej lukkuun kaalikkar bwe armej ro an Jeova rej kam̦ool bwe rej Kũrjin ro rem̦ool.

10. Ñããt eo epel̦l̦o̦k ñan ad kwal̦o̦k yokwe eo em̦ool? (Bar lale footnote eo.)

¹⁰ Ãinwõt kar kwal̦o̦k kake ilo jinoin katak in, ejjel̦o̦k juon iaan rũttõmak ro jeid im jatid reweeppãn. Ewõr iien ko me renaaj ba ak kõm̦m̦ani men ko me rej kainepataik kõj.e (Jem. 3:2) Ilo iien rot kein, ewõr juon iien epel̦l̦o̦k ñan kwal̦o̦k yokwe eo em̦ool ikijjeen wãween ad em̦m̦akũt ñan men kein rej ba ak kõm̦m̦ani. Ta eo jemaroñ katak jãn joñak eo an Jesus ikijjeen men in?​—Jon 13:15.

EWI WÃWEEN AN KAR JESUS KWAL̦O̦K YOKWE ÑAN RIJJILÕK RO AN?

11. Ta kadkad ko renana ear wõr ippãn Jemes im Jon? (Bar lale pija eo.)

¹¹ Jesus ear jab kõtmãne bwe ri-kal̦oor ro an ren weeppãn. Ijello̦kun an ãindein, ilo yokwe ear jipañ er ñan jol̦o̦k kadkad ko aer me rejjab em̦m̦an bwe ren maroñ kabuñbũruon Jeova. Juon iien, ruo iaan rijjilõk ro an me etaer Jemes im Jon, rar kajjitõk ippãn jineer ñan kajjitõk ippãn Jesus bwe en lel̦o̦k ñan erro jerbal ko reutiej ilo Aelõñ eo an Anij. (Matu 20:20, 21) Alikkar bwe Jemes im Jon rar kwal̦o̦k an wõr ippãer kadkadin utiej bõro im aer kõn̦aan bwe ren utiejl̦o̦k jãn ro jet.​—JK. 16:18, UBS.

12. Jemes im Jon rar ke ro wõt me rar kwal̦o̦k kadkad ko renana? Jouj im kõmel̦el̦e.

¹² Jemes im Jon rar jab ro wõt me rar kwal̦o̦k kadkad ko renana ilo iien in. L̦õmn̦ak m̦õk kõn wãween an kar rijjilõk ro jet em̦m̦akũt: “Ke rijjilõk ro joñoul rar roñ kõn men in, rar illu ippãn jemjein jemjati rein ruo.” (Matu 20:24) Jemaroñ pijaikl̦o̦k naan ko reddo me Jemes, Jon, im rijjilõk ro jet rar kwal̦o̦ki ñan doon. Bõlen rijjilõk ro jet rar ba naan rot kein: ‘Bwe wõn kwe bwe kwõn kajjitõk juon jerbal eutiej ilo Aelõñ eo an Anij? Ejjab komiro wõt ar buul̦ jerbal ippãn Jesus. Ebar tõllo̦kim ñan bõk jerbal ko reutiej!’ Jekdo̦o̦n ta ko rar ba, ak ilo iien in, rijjilõk ro rar mel̦o̦kl̦o̦k bwe aolep iien rej aikuj kwal̦o̦k yokwe im jouj ñan doon.

13. Ewi wãween an kar Jesus em̦m̦akũt kõn likjab ko an rijjilõk ro an? (Matu 20:25-28)

¹³ Ewi wãween an kar Jesus kõm̦adm̦õde apañ eo ear wal̦o̦k? Ear jab oktak im illu. Ear jab ba bwe enaaj kappok jet rijjilõk ro rem̦m̦anl̦o̦k me el̦apl̦o̦k an ettã bũrueer im renaaj kwal̦o̦k yokwe ñan doon aolep iien. Ijello̦kun an kar ãindein, ear kijenmej ilo an kar kõnono ippãer kõnke ear jel̦ã bwe em̦m̦aan rein rar kõn̦aan kõm̦m̦ani men ko rejim̦we. (Riit Matu 20:25-28.) Ear wõnm̦aanl̦o̦k wõt im kwal̦o̦k yokwe ilo an kõm̦m̦an ñan er, meñe elõñ alen aer kar akwããl kõn wõn eo eutiejtata iaaer.​—Mark 9:34; Luk 22:24.

14. Ewi wãween an kar rijjilõk ro an Jesus dik im rũttol̦o̦k?

¹⁴ Ejjel̦o̦k pere bwe Jesus ear keememej bwe wãween an kar rijjilõk ro dik im rũttol̦o̦k ear jelõt er. (Jon 2:24, 25) Ke rar dik im rũttol̦o̦k, el̦ap an kar ri-tõlin kabuñ ro kwal̦o̦k bwe eaorõk bwe juon en utiej im buñbuñ. (Matu 23:6) Ejjab men in wõt, ak el̦ap an kar ri-tõlin kabuñ rein utiej bũrueer im l̦õmn̦ak bwe rem̦m̦anl̦o̦k jãn ro jet.f (Luk 18:9-12) Jesus ear mel̦el̦e bwe aer kar pãd ibwiljin armej rot kein, emaroñ kar jelõt wãween aer watõk er make im ro jet. (JK. 19:11) Ear jab kõtmãne bwe rijjilõk ro an ren jab kõm̦m̦an bõd im ear kijenmej ippãer ñe rar kõm̦m̦an likjab. Ear jel̦ã bwe em̦m̦an bũrueer, kõn men in ear kijenmej ilo an kar jipañ er anjo̦ ioon aer utiej bõro im kõn̦aan bwe ren utiejl̦o̦k jãn ro jet, im ear jipañ er bwe ren kwal̦o̦k yokwe aolep iien.

EWI WÃWEEN AD MAROÑ ANÕKE JOÑAK EO AN JESUS?

15. Ta eo jemaroñ katak jãn men eo ear wal̦o̦k ippãn Jemes, Jon, im rijjilõk ro jet?

¹⁵ Elõñ men ko jemaroñ katak jãn men eo ear wal̦o̦k ippãn Jemes, Jon, im rijjilõk ro jet. Ear bõd men eo Jemes im Jon rar kõm̦m̦ane ke rar kajjitõk ñe remaroñ bõk jerbal ko reutiej ilo Aelõñ eo an Anij. Bõtab rijjilõk ro jet rar bar bõd kõnke rar kõtl̦o̦k bwe apañ in en ko̦kkure aer bõrokuk. Meñe ãindein, ak Jesus ear kwal̦o̦k wõt jouj im yokwe ñan aolep rijjilõk rein 12. Ta eo men in ej katakin kõj? Jej katak bwe ejjab aorõk wõt men ko armej rej kõm̦m̦ani ak ebar aorõk wãween ad em̦m̦akũt ñan bõd ko im likjab ko aer. Ta eo emaroñ jipañ kõj? Ñe jej illu ippãn juon iaan rũttõmak ro m̦õttad, jemaroñ kajjitõk ippãd make: ‘Etke el̦ap aõ abn̦õn̦õ kõn men eo ear kõm̦m̦ane? Men in ej ke kaalikkar bwe ewõr juon kadkad enana ij aikuj jol̦o̦ke? Armej eo me ej kainepataik ña ej ke iioon apañ ko? Meñe ij eñjake bwe ewõr unin aõ illu ak imaroñ ke kwal̦o̦k yokwe ikijjeen aõ jol̦o̦k an bõd?’ El̦ak l̦apl̦o̦k ad kwal̦o̦k yokwe ñan ro jet, enãj l̦apl̦o̦k ad kam̦ool bwe jej ri-kal̦oor ro rem̦ool an Jesus.

16. Ta eo jemaroñ bar katak jãn joñak eo an Jesus?

¹⁶ Joñak eo an Jesus ej bar katakin kõj ñan kajjioñ mel̦el̦e kõn rũttõmak ro jeid im jatid. (JK. 20:5) Em̦ool bwe Jesus ear maroñ jel̦ã ta kobban bũruon armej. Bõtab kõj, jejjab maroñ. Meñe ãindein, ak jemaroñ kwal̦o̦k ad kijenmej ippãn ro jeid im jatid kõn aer jab weeppãn. (Eps. 4:1, 2; 1 Pit. 3:8) Enaaj pidodol̦o̦k ad kõm̦m̦ane men in ñe jenaaj kal̦apl̦o̦k ad jel̦ã kõn er im wãween aer kar dik im rũttol̦o̦k. L̦õmn̦ak kõn juon waanjoñak.

17. Ewi wãween an kar juon jeid im jatid em̦m̦aan me ej lol̦o̦k eklejia kar bõk tokjãn jãn an kal̦apl̦o̦k an jel̦ã kajjien bar juon jeid im jatid?

¹⁷ Juon jeid im jatid em̦m̦aan me ej lol̦o̦k eklejia ilo East Africa ej ememejtok juon iien me ear l̦õmn̦ak bwe juon jeid im jatid em̦m̦aan ej juon eo ejjab jouj. Ta eo em̦m̦aan in ej lol̦o̦k eklejia ear kõm̦m̦ane? Ej ba: “Ijello̦kun aõ jab el̦l̦o̦k ñane, iar pepe in kal̦apl̦o̦k aõ jel̦ã kajjien.” Ke ear kõm̦m̦ane men in, ear maroñ katak jet men kõn em̦m̦aan eo jeid im jatid kõn wãween an kar dik im rũttol̦o̦k im wãween an men in kar jelõte. Eo ej lol̦o̦k eklejia ej wõnm̦aanl̦o̦k im ba: “Ke iar jel̦ã kõn joñan an kar lukkuun kate ñan kõm̦m̦an oktak bwe en maroñ jem̦jerãik ro jet im joñan oktak ko em̦õj an de kõm̦m̦ani, iar kile bwe ej juon joñak em̦m̦an. Tokãlik, kõm̦ro ar lukkuun epaake doon.” Aet, ñe jej kate kõj ñan mel̦el̦e kõn ro jeid im jatid, ekkã ad lo bwe epidodol̦o̦k ñan kwal̦o̦k yokwe ñan er.

18. Kajjitõk ta ko jemaroñ kajjitõk ippãd make ñe juon rũttõmak jeid im jatid ej kainepataik kõj? (Jabõn Kõnnaan 26:20)

¹⁸ Ewõr iien jemaroñ eñjake bwe jej aikuj kepaake juon rũttõmak jeid im jatid me ear kainepataik kõj. Bõtab, m̦okta jãn ad kõm̦m̦ane men in, em̦m̦an ñe jej kajjitõk ippãd make kajjitõk kein: ‘Ij ke lukkuun mel̦el̦e kõn men eo ear wal̦o̦k?’ (JK. 18:13) ‘Armej eo emaroñ ke kar jab kajjioñ in kõmetak eõ?’ (Ekl. 7:20) ‘Em̦õj ke aõ kar kõm̦m̦an bõd rot in?’ (Ekl. 7:21, 22) ‘Ilo aõ kepaake armej in, inaaj ke kõm̦m̦an bwe en l̦apl̦o̦k apañ eo?’ (Riit Jabõn Kõnnaan 26:20.) Ñe jej bõk iien ñan kõl̦mãnl̦o̦kjen̦ kõn kajjitõk rot kein, jemaroñ lo bwe yokwe eo ad ñan eo jeid im jatid emaroñ kõm̦akũt kõj ñan kõjekdo̦o̦ne bõd eo an.

19. Ta eo kwõj jek ippam̦ make ñan kõm̦m̦ane?

¹⁹ Ãinwõt juon kumi, Ri-Kõnnaan ro an Jeova rej kam̦ool bwe rej ri-kal̦oor ro rem̦ool an Jesus. Kõj kajjojo jej kam̦ool bwe jej m̦oolin ri-kal̦ooran Jesus ñe jej kwal̦o̦k yokwe eo em̦ool ñan rũttõmak ro jeid im jatid meñe rejjab weeppãn. Ilo ad ãindein, jemaroñ jipañ ro jet ñan kile ewi kabuñ eo em̦ool im ñan kobatok ippãd ilo ad kabuñ ñan Jeova, eo ej Anij in yokwe. Jen jek ippãd make ñan wõnm̦aanl̦o̦k wõt im kwal̦o̦k yokwe eo me ej kõkal̦l̦en Kũrjin ro rem̦ool.