Kein Jipañ ñan Katak

Kal̦apl̦o̦k Am̦ Jel̦ã kõn Kadkad ko Rem̦m̦an an Jeova

Ñe jej riiti Baibõl̦ eo, elõñ kein jipañ ko jemaroñ kõjerbali ñan kal̦apl̦o̦k ad mel̦el̦e kõn men ko jej riiti. Bõtab jejjab kõn̦aan wõt kal̦apl̦o̦k jel̦ãl̦o̦kjen̦ eo ad kõn Baibõl̦ eo. Ak jekõn̦aan pukot boin ko raorõk kõn kadkad ko an Jeova me renaaj kõkajoore yokwe eo ad ñane. Ñan kõm̦m̦ane men in, jemaroñ kajjitõk ippãd make, ‘Ta ko eoon kein ilo Baibõl̦ rej katakin eõ kõn Jeova?’

Ñan waanjoñak, kwõmaroñ pukot mel̦el̦e ko kõn wãween an Jeova kwal̦o̦k an yokwe, mãlõtlõt, ekajet jim̦we, im kajoor. Bõtab, elukkuun lõñ kadkad ko jet an Jeova relukkuun em̦m̦an me kwõmaroñ katak kaki. Ia eo kwõmaroñ lo mel̦el̦e ko jet kõn kadkad kein An?

Ñan lale kadkad ko jet an Jeova, lale bok eo etan Bok in Jipañ Ri Kõnnaan ro an Jeova ñan Kappok Mel̦el̦e ium̦win unin tõl eo “Jeova Anij,” innem etal ñan unin tõl jidikdik eo “Wãween ko Rem̦m̦an Jeova Ej Kwal̦o̦ki.” Etale kõmel̦el̦e ko kõn kadkad ko an Jeova me rej ekkejell̦o̦k ñan eoon ko kwõj riiti.