Anõke Wãween an Jeova im Jesus L̦õmn̦ak

1-2. Ta mel̦el̦ein ñan yokwe Jeova, im ewi wãween an kar Jesus kwal̦o̦k yokwe rot in?

“KWÕN yokwe Jeova am̦ Anij kõn aolepen bũruom̦, im kõn aolepen am̦ mour, im kõn aolepen am̦ kajoor kab aolepen am̦ l̦õmn̦ak.” (Luk 10:27) Jesus ear kaalikkar bwe eñin kien eo eaorõktata ilo Kien Moses. Alikkar bwe ad yokwe Jeova ekitibuj bũruod, mel̦el̦ein bwe ekoba kõn̦aan im eñjake ko ad. Ej bareinwõt kitibuj aolepen ad, aolepen ad kajoor, im aolep maroñ ko ad. Bõtab ad yokwe Jeova ej bar kitibuj l̦õmn̦ak ko ad, mel̦el̦ein wãween ad kõl̦mãnl̦o̦kjen̦. Alikkar bwe jejjab maroñ lukkuun mel̦el̦e kõn aolep l̦õmn̦ak ko an Jeova. Ijoke, jemaroñ kal̦apl̦o̦k ad mel̦el̦e kõn wãween an Jeova l̦õmn̦ak ikijjeen ad katak kõn “l̦õmn̦ak ko an Christ” kõnke ejejjet im jim̦we an anõke wãween an Jemãn l̦õmn̦ak.—1 Kor. 2:16.

² Jesus ear yokwe Jeova kõn aolepen an l̦õmn̦ak. Ear jel̦ã ta eo Anij ear kõn̦aan bwe en kõm̦m̦ane im ear jek ippãn make ñan kajejjete men in meñe ear mel̦el̦ein bwe enaaj kar aikuj eñtaan. Kõnke Jesus ear l̦õmn̦ak wõt kõn an kõm̦anm̦an ankilaan Jemãn, ear jab kõtl̦o̦k bwe jabdewõt men en kõm̦ade jãn an kajejjete mejãnkajjik in an.

3. Ta eo rijjilõk Piter ear katak jãn Jesus, im ta eo Piter ear rõjañ Kũrjin ro ñan kõm̦m̦ane? (1 Piter 4:1)

³ Piter im rijjilõk ro m̦õttan rar jeraam̦m̦an kõnke rar maroñ jol̦o̦k iien ippãn Jesus im jel̦ã wãween an l̦õmn̦ak. Ke kar kõm̦akũt Piter ñan je lõta eo an kein kajuon, ear rõjañ Kũrjin ro ñan kõpooj er make bwe aer l̦õmn̦ak en ãinwõt l̦õmn̦ak eo an Christ. (Riit 1 Piter 4:1.) Ilo kajin Grik, ke Piter ear je: “Kõpooj kom̦ make,” ear kõjerbale naan ko me rej kõmel̦el̦eik an rũttarin̦ae ro kõpooje kein tarin̦ae ko aer ñan tarin̦ae. Kõn men in, ilo an Kũrjin ro anõke wãween an Jesus l̦õmn̦ak, men in enaaj kõpooj er ñan tarin̦aeik kõn̦aan ko renana im men ko ilo lal̦ in me Setan ej irooj ioon.—2 Kor. 10:​3-5; Eps. 6:12.

4. Ewi wãween an katak in maroñ jipañ kõj l̦oore naanin rõjañ eo an Piter?

⁴ Jenaaj etale wãween an Jesus l̦õmn̦ak im lale wãween ad maroñ anõke. Jenaaj lale ewi wãween jemaroñ (1) anõke wãween an Jeova l̦õmn̦ak, juon men me enaaj jipañ kõj bwe jen juon wõt ilo l̦õmn̦ak, (2) kwal̦o̦k ettã bõro, im (3) kõm̦m̦an bwe en jim̦we ad l̦õmn̦ak ilo ad atartar ioon Jeova ikijjeen jar.

ANÕKE WÃWEEN AN JEOVA L̦ÕMN̦AK

5. Ilo kar juon iien, ewi wãween an kar Piter kwal̦o̦k an jab anõke wãween an Jeova l̦õmn̦ak?

⁵ L̦õmn̦ak kõn juon iien me Piter ear jab anõke wãween an Jeova l̦õmn̦ak. Jesus ear ba ñan rijjilõk ro an bwe enaaj aikuj kar etal ñan Jerusalem, naaj liaakel̦o̦k ñan ri-tõlin kabuñ ro, naaj kaeñtaane, innem naaj m̦ane ñan mej. (Matu 16:21) Emaroñ kar pen an Piter tõmak bwe Jeova enaaj kar kõtl̦o̦k an Jesus mej—eo me enaaj lo̦mo̦o̦ren Israel im ej Messaia eo kar kallim̦ur kake. (Matu 16:16) Kõn men in, Piter ear bõk Jesus im kõjenolo̦ke jãn ri-kal̦oor ro jet im ear ba ñane: “Irooj, kwõn jab kõnnaan rot n̦e. Men kein reban wal̦o̦k ñan kwe.” (Matu 16:22) Kõnke Piter ear jab kwal̦o̦k l̦õmn̦ak eo an Jeova ilo iien in, ear jab juon wõt ilo l̦õmn̦ak ippãn Jesus.

6. Ewi wãween an kar Jesus kwal̦o̦k bwe ear juon wõt ilo l̦õmn̦ak ippãn Jeova?

⁶ Jeova im Jesus rar juon wõt ilo l̦õmn̦ak. Jesus ear uwaake Piter im ba: “Kwõn ilo̦k jãn ña Setan! Kwõj kapañ eõ kõnke l̦õmn̦ak kan̦e am̦ rej an armej im jab an Anij.” (Matu 16:23) Jesus ear jel̦ã bwe ear aikuj eñtaan im mej bwe en maroñ kajejjet ankilaan Jeova. Kõn men in Jesus ear kõjekdo̦o̦ne naanin rõjañ eo an Piter, meñe Piter emaroñ kar kajjioñ in jipañe. Ikijjeen men in ear wal̦o̦k, Piter ear katak bwe ear aikuj kõm̦m̦an bwe l̦õmn̦ak ko an ren juon wõt ippãn l̦õmn̦ak ko an Jeova. Kõj bareinwõt elukkuun aorõk bwe jen katak men in.

7. Ewi wãween an kar Piter tokãlik kwal̦o̦k bwe ear kõn̦aan ukot l̦õmn̦ak ko an bwe ren juon wõt ippãn l̦õmn̦ak ko an Jeova? (Lale pija eo.)

⁷ Tokãlik, Piter ear kwal̦o̦k bwe ear kõn̦aan bwe l̦õmn̦ak ko an ren juon wõt ippãn l̦õmn̦ak ko an Jeova. Ear itok iien eo me Jeova ear kõtl̦o̦k bwe ri-aelõñ ko jet ren erom armej ro doon. Kar jilkinl̦o̦k Piter bwe en kwal̦o̦k naan ñan Korniliõs, juon em̦m̦aan me ear jab juon ri-Ju. L̦ein ear juon iaan armej ro m̦oktata jãn aelõñ ko jet me ear erom juon Kũrjin. Ri-Ju ro rar jab lukkuun kõnono ippãn ri-aelõñ ko jet, kõn men in jejjab bwilõñ bwe Piter ear aikuj jipañ ñan kõpooj e ñan an maroñ kõm̦m̦ane jerbal in an ekããl. Ke Piter ear kile bwe eñin ankilaan Anij, ear ukot wãween an l̦õmn̦ak. Kõn men in, ke Korniliõs ear kajjitõk bwe en lol̦o̦ke, Piter ear “jab m̦akoko” in etal. (Jrb. 10:​28, 29) Ear kwal̦o̦k naan ñan Korniliõs im armej ro ilo m̦weo im̦õn, innem rar peptaij.—Jrb. 10:​21-23, 34, 35, 44-48.

8. Ewi wãween jemaroñ kwal̦o̦k bwe l̦õmn̦ak ko ad rej juon wõt ippãn l̦õmn̦ak ko an Jeova? (1 Piter 3:8)

⁸ Elõñ iiõ ko tokãlik, Piter ear rõjañ Kũrjin ro m̦õttan bwe ren “bõrokuk ilo l̦õmn̦ak.” (Riit 1 Piter 3:8.) Ãinwõt armej ro an Jeova, jemaroñ bõrokuk ilo l̦õmn̦ak ikijjeen ad kõl̦mãnl̦o̦kjen̦ kõn l̦õmn̦ak ko an Jeova me ej kwal̦o̦k ñan kõj ilo Naan ko an. Ñan waanjoñak, Jesus ear rõjañ ri-kal̦oor ro an ñan likũt Aelõñ eo m̦oktata. (Matu 6:33) Jen ba bwe ewõr juon jeid im jatid ilo eklejia eo ad me ej pepe in bõk kun̦aan ilo jerbalin full-time ñan Jeova. Ijello̦kun ad ba ñane bwe en kããlõt juon mour me epidodol̦o̦k, jen nõbare kõn an kate kõttõpare mejãnkajjik in an im ba ñane bwe jem̦õn̦õn̦õ in jipañe.

KWAL̦O̦K ETTÃ BÕRO

9-10. Ewi wãween an kar Jesus kwal̦o̦k an lukkuun ettã bũruon?

⁹ Ilo boñõn eo m̦okta jãn an mej, Jesus ear katakin Piter im rijjilõk ro jet juon men eaorõk kõn ettã bõro. M̦oktal̦o̦k, Jesus ear jilkinl̦o̦k Piter im Jon bwe ren kõpooje jet men ñan kõjota eo an ãliktata ippãer ãinwõt juon armej. Jet iaan men ko rar aikuj kõpooji ej juon pejin im kein kõm̦õrã ko bwe ren maroñ kwal̦ neer m̦okta jãn aer m̦õñã. Bõtab wõn eo enaaj kar kõm̦m̦ane jerbal in ettã?

¹⁰ Jesus ear kwal̦o̦k an lukkuun ettã bũruon ilo an jab jenliklik in kõm̦m̦ane jerbal in ettã. Ejjel̦o̦k pere rijjilõk ro rar lukkuun bwilõñ ke rar lo an Jesus kõm̦m̦ane jerbal in me ekkã an ri-kõm̦akoko ro kõm̦m̦ane. Jesus ear utũk kopã eo an, bõk juon kein kõm̦õrã im lukwõje n̦a ipin, teiñi pejin eo kõn dãn, innem ear jino kwal̦ neen rijjilõk ro. (Jon 13:​4, 5) Emaroñ kar bõk iien ñan kwal̦ neen aolepen rijjilõk ro 12—ekoba Judas, eo enaaj kar ketake. Meñe ãindein, ak Jesus ear kwal̦o̦k ettã bõro im kõm̦m̦ane jerbal in. Innem ear kwal̦o̦k kijenmej ilo an kar kõmel̦el̦e im ba: “Kom̦ij ke mel̦el̦e kõn men eo iar kõm̦m̦ane ñan kom̦? Kom̦ij kũr ña im ba, ‘Ri-Kaki’ im ‘Irooj,’ im ejim̦we ami ba men kein. Kõn men in, el̦aññe ña Irooj im ri-Kaki ak iar kwal̦ neemi, innem kom̦ij aikuj bar kwal̦ neen doon.”—Jon 13:​12-14.

11. Ewi wãween an kar Piter kwal̦o̦k bwe em̦õj an katak ñan kwal̦o̦k ettã bõro? (1 Piter 5:5 im footnote) (Bar lale pija eo.)

¹¹ Piter ear katak jãn an Jesus kwal̦o̦k ettã bõro. Ãlikin an kar Jesus jepl̦aak ñan lañ, Piter ear kõm̦m̦ane juon menin kabwilõñlõñ ikijjeen an kar kõmouri juon em̦m̦aan me ear jaje etetal jãn ke ear l̦otak. (Jrb. 1:​8, 9; 3:​2, 6-8) Men in ear kaal juon jarlepju in armej. (Jrb. 3:11) Piter ear dik im rũttol̦o̦k ilo juon jikin me elukkuun aorõk an juon utiej im wõr bõnbõnin. Kõn men in, ear ke bõk aolep nõbar ilo iien in? Jaab, Piter ear kwal̦o̦k ettã bõro im lel̦o̦k aolep nõbar ñan ro ej tõllo̦kier, Jeova im Jesus. Ear ba: “Ikijjeen ãt eo etan [Jesus], im kõn am̦ro tõmak ilo etan, men in ear kõm̦m̦an bwe em̦m̦aan in kom̦ij loe im jel̦ã kake en kajoorl̦o̦k.” (Jrb. 3:​12-16) Ke Piter ear je lõta eo an ñan Kũrjin ro im ear kõnono kõn aer aikuj kwal̦o̦k ettã bõro, ear kõjerbale naan ko me remaroñ kakeememej kõj kõn iien eo Jesus ear lukwõje kein kõm̦õrã eo n̦a ipin im kwal̦ neen rijjilõk ro.—Riit 1 Piter 5:5 im footnote.

12. Ãinwõt Piter, ewi wãween jemaroñ wõnm̦aanl̦o̦k wõt im kaddek kadkadin ettã bõro?

¹² Jemaroñ anõke Piter ikijjeen ad wõnm̦aanl̦o̦k wõt im kaddek kadkadin etta bõro. Keememej bwe juon eo me em̦ool an ettã bũruon ejjab baj ba wõt naan ko rejim̦we. Naan eo me Piter ear kõjerbale ñan ettã bõro ej kitibuj wãween ad l̦õmn̦ak kõn kõj make im kõn ro jet. Jej kõm̦m̦ani jerbal ko ñan ro jet kõnke jej yokwe Jeova im armej ro, im ejjab kõnke jekõn̦aan bwe ro jet ren nõbar kõj. El̦aññe jem̦õn̦õn̦õ in jerbal ñan Jeova im ro jeid im jatid ilo jabdewõt wãween jemaroñe, meñe ro jet remaroñ jab loi jerbal ko ad, eokwe jej kam̦ool bwe ettã bũruod.—Matu 6:​1-4.

EN “JIM̦WE AMI L̦ÕMN̦AK”

13. Ta mel̦el̦ein an juon “jim̦we [an] l̦õmn̦ak”?

¹³ An “jim̦we [ad] l̦õmn̦ak” ej kitibuj ta? (1 Pit. 4:7) Juon Kũrjin me ejim̦we an l̦õmn̦ak ej kate joñan wõt an maroñ ñan kõm̦m̦ani pepe ko me rej ekkejell̦o̦k ippãn l̦õmn̦ak ko an Jeova. Ejel̦ã bwe ejjel̦o̦k men en̦ eaorõkl̦o̦k jãn jem̦jerã eo an ippãn Jeova. Epel̦an wãween an l̦õmn̦ak kõn e make, im ej kile bwe ejjab jel̦ã aolep men. Im ej kaalikkar an atartar ioon Anij ikijjeen an keini an jar ñan Jeova im kajjitõk jipañ jãne.a

14. Ilo kar juon iien, ewi wãween an kar Piter kwal̦o̦k an jab atartar ioon Jeova?

¹⁴ Ilo boñõn eo ãliktata m̦okta jãn an Jesus mej, ear kakkõl ri-kal̦oor ro an im ba: “Buñniin, kom̦ aolep naaj buñ kõn wõt men eo enaaj wal̦o̦k ñan ña.” Ilo peran, Piter ear ba ñane: “Meñe aolep renaaj buñ kõn wõt men eo enaaj wal̦o̦k ñan kwe, ak ña, ijjãmin buñ!” Ilo ejja boñõn eo wõt, Jesus ear rõjañ jet iaan ri-kal̦oor ro an im ba: “Kom̦win ekkõl wõt im jab bõjrak jãn ami jar.” (Matu 26:​31, 33, 41) Piter ear jab l̦oore naanin rõjañ in. El̦aññe en kar l̦oore, emaroñ kar kwal̦o̦k peran im kaalikkar bwe ej ri-kal̦ooran Jesus. Ijello̦kun an ãindein, Piter ear kaarmejjeteik Irooj eo an, im ear lukkuun ajl̦o̦k kake men in.—Matu 26:​69-75.

15. Ewi wãween an kar Jesus kwal̦o̦k bwe ej juon eo ejim̦we an l̦õmn̦ak ilo boñõn eo ãliktata m̦okta jãn an mej?

¹⁵ Jesus ear lukkuun atartar ioon Jeova. Meñe Jesus ear weeppãn, ak ear ikkutkut an jar. Men in ear jipañe ñan kwal̦o̦k peran im kõm̦m̦ane men eo Jeova ear kõn̦aan bwe en kõm̦m̦ane. (Matu 26:​39, 42, 44; Jon 18:​4, 5) Ejjel̦o̦k pere bwe Piter ear jab mel̦o̦kl̦o̦k an lõñ alen an kar Jesus jar ilo boñõn eo ãliktata m̦okta jãn an mej.

16. Ewi wãween an kar Piter kwal̦o̦k bwe em̦õj an erom juon eo ejim̦we an l̦õmn̦ak? (1 Piter 4:7)

¹⁶ Ãlikin jet iien, ear l̦apl̦o̦k an Piter atartar ioon Jeova ikijjeen jar. Ãlikin an kar Jesus jerkakpeje, ear kaalikkar ñan Piter im rijjilõk ro jet bwe naaj lel̦o̦k ñan er jetõb kwõjarjar bwe ren maroñ kadedeikl̦o̦k jerbalin kwal̦o̦k naan eo aer. Ijoke, Jesus ear kajjitõk ippãer bwe ren pãdwõt ilo Jerusalem m̦ae iien enaaj wal̦o̦k men in. (Luk 24:49; Jrb. 1:​4, 5) Ta eo Piter ear kõm̦m̦ane ke ear pãd im kõttar ilo Jerusalem? Piter im Kũrjin ro m̦õttan rar “ekkeini aer jar.” (Jrb 1:​13, 14) Tokãlik, ke ear je lõta eo an kein kajuon, Piter ear rõjañ Kũrjin ro m̦õttan bwe “en jim̦we [aer] l̦õmn̦ak” im bwe ren atartar ioon Jeova ikijjeen jar. (Riit 1 Piter 4:7.) Piter ear katak ñan atartar ioon Jeova im ear erom jurõn eklejia eo.—Gal. 2:9.

17. Ta eo jej aikuj wõnm̦aanl̦o̦k wõt im kõm̦m̦ane jekdo̦o̦n ñe emaroñ wõr kapeel im maroñ ko ippãd? (Bar lale pija eo.)

¹⁷ Bwe jen maroñ juon eo ejim̦we an l̦õmn̦ak, jej aikuj ekkeini ad jar ñan Jeova. Jej kile bwe jej aikuj wõnm̦aanl̦o̦k wõt im jar ñan Jeova jekdo̦o̦n ñe emaroñ wõr kapeel im maroñ ko ippãd. Kõn men in, jej jar im kajjitõk ippãn Jeova bwe en tõl kõj, el̦aptata ilo iien ko jej aikuj kõm̦m̦ani pepe ko raorõk. Jej lõke bwe Jeova ejel̦ã ta eo em̦m̦antata ñan kõj.

18. Ewi wãween jemaroñ kal̦apl̦o̦k ad anõke wãween an Jeova l̦õmn̦ak?

¹⁸ El̦ap ad kam̦m̦oolol bwe Jeova ear kõm̦anm̦an kõj ilo juon wãween me jemaroñ kwal̦o̦k kadkad ko kadkadin. (Jen. 1:26) Em̦ool bwe eban jejjet wãween ad anõke Jeova. (Ais. 55:9) Ijoke, ãinwõt Piter, jekõn̦aan wõnm̦aanl̦o̦k wõt im anõke wãween an Jeova l̦õmn̦ak, kwal̦o̦k ettã bõro, im kõm̦m̦an bwe en jim̦we ad l̦õmn̦ak.