Jipañ Rũkkatak Baibõl̦ eo Am̦ ñan Pepe in Karejar ñan Jeova

1-2. (1) Etke jet rũkkatak Baibõl̦ ro rej jenliklik jãn aer kããlõt ñan karejar ñan Jeova? (2) Ta ko jenaaj etali ilo katak in?

EWÕR ke men ko kwaar inepata kaki me rar kõm̦m̦an bwe kwõn jenliklik jãn am̦ erom juon iaan Ri-Kõnnaan ro an Jeova? Bõlen kwaar mijak el̦aññe ri-jerbal ro m̦õttam̦, ro jeram̦, ak baam̦le eo am̦ renaaj jum̦aik eok. Ak bõlen kwaar kile bwe kwõban maroñ kajejjet im mour ekkar ñan kien ko an Anij. El̦aññe eñin kar wãween am̦ eñjake, innem kwõmel̦el̦e kõn eñjake ko an rũkkatak Baibõl̦ ro jet im etke emaroñ pen ñan aer kõm̦m̦ane pepe eo ñan erom juon iaan Ri-Kõnnaan ro an Jeova.

² Jesus ear jel̦ã bwe kain mijak rot kein remaroñ kabõjrak juon armej jãn an karejar ñan Jeova. (Matu 13:​20-22) Bõtab ear jab bõjrak jãn an kajjioñ jipañ ro me rar jenliklik jãn aer l̦oore. Ijello̦kun an ãindein, ear kwal̦o̦k ñan ri-kal̦oor ro an wãween aer maroñ jipañ rein ñan (1) kile apañ ko rej kapañ aer wõnm̦aanl̦o̦k, (2) kam̦wilal̦l̦o̦k yokwe eo aer ñan Jeova, (3) likũt Jeova m̦oktata ilo mour ko aer, im (4) wãween aer maroñ anjo̦ ioon ijjiped ko jãn ro jet. Ewi wãween ad maroñ anõke wãween an kar Jesus katakin ri-kal̦oor ro an ilo ad kõjerbal bok eo M̦õn̦õn̦õ kõn Mour ñan Indeeo! ñan jipañ juon rũkkatak Baibõl̦ bwe en kããlõt ñan karejar ñan Jeova?

JIPAÑ RŨKKATAK RO AM̦ ÑAN KILE APAÑ KO REJ KAPAÑ AER WÕNM̦AANL̦O̦K

3. Ta eo emaroñ kar kapañ Nikodimõs jãn an erom juon iaan ri-kal̦ooran Jesus?

³ Nikodimõs, juon ri-tõl eo eutiej an ri-Ju ro, ear iioon juon apañ me ear kapañ an erom juon ri-kal̦ooran Jesus. Ãlikin wõt jijino allõñ jãn kar iien eo Jesus ear jino kwal̦o̦k naan, Nikodimõs ear kile bwe Anij ear jilkintok e. (Jon 3:​1, 2) Bõtab, Nikodimõs ear kããlõt ñan iioon Jesus ilo ittino kõnke ear “mijak ri-Ju ro.” (Jon 7:13; 12:42) Bõlen, ear mijak in luuji maroñ im taitõl̦ eo an im men ko m̦weien el̦aññe en kar erom ri-kal̦ooran Jesus.a

4. Ewi wãween an kar Jesus jipañ Nikodimõs ñan mel̦el̦e kõn ta eo Anij ear kõn̦aan bwe en kõm̦m̦ane?

⁴ Nikodimõs ear jel̦ã kõn kien eo me Anij ear lel̦o̦k ñan ri-Israel ro, bõtab ear aikuj jipañ ñan mel̦el̦e kõn ta eo Jeova ear kõn̦aan bwe en kõm̦m̦ane. Ewi wãween an kar Jesus jipañe? Jesus ear m̦õn̦õn̦õ in jol̦o̦k an iien im kõnono ippãn Nikodimõs meñe eboñ. Jesus ear lukkuun kaalikkar ta eo Nikodimõs ear aikuj kõm̦m̦ane bwe en maroñ erom juon ri-kal̦oor: ear aikuj ukel̦o̦k jãn jerawiwi ko an, peptaij ilo dãn, im kwal̦o̦k an tõmak ilo Nejin Anij.—Jon 3:​5, 14-21.

5. Ewi wãween jemaroñ jipañ juon rũkkatak ñan kile ta eo ej bõbraiki jãn an karejar ñan Jeova?

⁵ Meñe juon rũkkatak ebwe an jel̦ã kõn Baibõl̦ eo, ak jemaroñ aikuj jipañe ñan kile ta eo ej kabõjrake jãn an kããlõt ñan karejar ñan Jeova. Ñan waanjoñak, emaroñ aikuj jol̦o̦k el̦ap iien ilo jikin jerbal eo an, ak bõlen baam̦le eo an ejjab kõn̦aan bwe en erom juon iaan Ri-Kõnnaan ro an Jeova. Ãinwõt Jesus, kwõn bõk am̦ iien ñan jipañ rũkkatak eo am̦. Kwõmaroñ kũri bwe en iwõj bwe komiro en ko̦pe im bwebwenato ak m̦õñã ippãn doon. Ñe komiro ej kõm̦m̦ani men kein, bõlen emaroñ l̦apl̦o̦k an kwal̦o̦k kõn mour eo an im kwõmaroñ jel̦ã kõn apañ ko ej iiooni. Rõjañ rũkkatak eo am̦ ñan kõm̦m̦an jabdewõt oktak ko ej aikuj kõm̦m̦ani, ñan kwal̦o̦k an yokwe Jeova im jab ñan kabuñbũruom̦.

6. Ewi wãween kwõmaroñ jipañ juon rũkkatak bwe en peran im maroñ jerbali men ko ej katak kaki? (1 Korint 16:13)

⁶ Ñe juon rũkkatak ej lukkuun tõmak bwe Jeova enaaj jipañe ñan mour ekkar ñan kien ko ilo Baibõl̦, enaaj peran im wõr an maroñ ñan jerbali men ko ej katak kaki. (Riit 1 Korint 16:13.) Ijo kun̦aam̦ ãinwõt juon ri-katakin emaroñ ãinl̦o̦kwõt juon ri-kaki in jikuul̦. Ekar ke wõr juon ri-kaki em̦m̦antata ippam̦ ke kwaar jikuul̦? Bõlen eñin kar ri-kaki eo me ear lukkuun jipañ eok ñan jel̦ã bwe ewõr am̦ maroñ ñan kõm̦m̦ani men ko kwõj aikuj kõm̦m̦ani. Juon ri-katakin eo em̦m̦an ejjab baj katakin wõt rũkkatak eo an kõn ta eo Anij ekõn̦aan bwe en kõm̦m̦ane, ak ej bar jipañe ñan an lukkuun tõmak bwe emaroñ kõm̦m̦ane men ko Jeova ekõn̦aan kõnke Enaaj jipañe. Ewi wãween am̦ maroñ erom juon ri-katakin em̦m̦an?

JIPAÑ RŨKKATAK EO AM̦ ÑAN KAM̦WILAL̦L̦O̦K YOKWE EO AN ÑAN JEOVA

7. Ewi wãween an kar Jesus jipañ ro rar roñjake e ñan eddekl̦o̦k ilo yokwe eo aer ñan Jeova?

⁷ Jesus ear jel̦ã bwe ñe juon ej yokwe Anij, men in enaaj kõm̦akũti ñan jerbali men ko ej katak kaki. Ekkã an kar katakin ri-kal̦oor ro an kõn men ko me renaaj jipañ er ñan eddekl̦o̦k ilo yokwe eo aer ñan Jemãd ilañ. Ñan waanjoñak, ear kwal̦o̦k bwe Jeova ej ãinwõt juon jemãn me ej lel̦o̦k men ko rem̦m̦an ñan ajri ro nejin. (Matu. 7:​9-11) Jet armej remaroñ kar jab rũttol̦o̦k ippãn juon jemãer me el̦ap an yokwe. L̦õmn̦ak kõn wãween aer kar eñjake ke Jesus ear kwal̦o̦k kõn bwebwenatoun juon jemãn me el̦ap an yokwe, eo me ear karwaineneik l̦adik eo nejin me ear kõm̦m̦an elõñ men ko renana. Jesus ear jipañ armej ñan lo bwe el̦ap an Jeova yokwe er im elukkuun kõn̦aan jipañ er.—Luk 15:​20-24.

8. Ewi wãween am̦ maroñ jipañ juon rũkkatak ñan kam̦wilal̦l̦o̦k yokwe eo an ñan Jeova?

⁸ Kwõmaroñ bareinwõt jipañ rũkkatak eo am̦ ñan kam̦wilal̦l̦o̦k yokwe eo an ñan Jeova ilo am̦ ekkeini am̦ katakin e kõn kadkad ko an Anij. Kajjojo iien kwõj katak ippãn, jipañ rũkkatak eo am̦ ñan mel̦el̦e kõn wãween an men ko ej katak kaki kwal̦o̦k bwe Jeova ej yokwe kõj. Ñe kwõj kõnnaan ippãn rũkkatak eo am̦ kõn pinmuur eo, jipañe ñan mel̦el̦e bwe Jeova ear kõm̦m̦ane men in ejjab kõnke ej yokwe wõt aolep armej, ak kõnke ej bar yokwe e. (Rom 5:8; 1 Jon 4:10) Ñe rũkkatak eo emel̦el̦e kõn joñan an Jeova yokwe e, men in emaroñ jipañe bwe en l̦apl̦o̦k an yokwe Jeova.—Gal. 2:20.

9. Ta eo ear jipañ juon em̦m̦aan etan Michael ñan an kõm̦m̦an oktak ko ilo mour eo an?

⁹ L̦õmn̦ak kõn waanjoñak eo an Michael jãn Indonesia. Ear jel̦ã kõn m̦ool eo ke ear dik im rũttol̦o̦k, bõtab ear jab peptaij. Ke ear 18 an iiõ, ear etal ñan bar juon aelõñ ñan jerbal ãinwõt juon ri-kattõr truck. Tokãlik ear m̦are ilo Indonesia, bõtab ear wõnm̦aanl̦o̦k wõt im jerbal ilo bar juon aelõñ me ear ettol̦o̦k jãn lio ippãn im ledik eo nejierro. Ilo ejja iien in wõt, lio ippãn im ledik eo nejin rar jino katak Baibõl̦ im rar kõm̦m̦an wõnm̦aanl̦o̦k. Ãlikin an kar jinen mej, Michael ear pepe in ro̦o̦l ñan ijo jikin ñan an lale jemãn im ear pepe in katak Baibõl̦. Ear lukkuun tõpar bũruon Michael ke ear etale m̦õttan eo “Kam̦wilal̦l̦o̦k Am̦ Mel̦el̦e” ilo katak 27 ilo bok eo M̦õn̦õn̦õ kõn Mour ñan Indeeo! Ke ear kõl̦mãnl̦o̦kjen̦ kõn wãween an Jeova eñjake ke ear loe an eo nejin eñtaan, men in ear kõm̦akũt bũruon Michael im ear jino jañ. Innem ke ear mel̦el̦e im kile joñan an Jeova im Jesus yokwe e, ear kwal̦o̦k an kam̦m̦oolol im kõm̦m̦an oktak ko ilo mour eo an im ear peptaij.

JIPAÑ RŨKKATAK EO AM̦ ÑAN LIKŨT JEOVA M̦OKTATA ILO MOUR EO AN

10. Ewi wãween an kar Jesus jipañ ri-kal̦oor ro an ñan likũt men ko raorõktata m̦okta ilo mour ko aer? (Luk 5:​5-11) (Bar lale pija eo.)

¹⁰ Jet iaan ro me Jesus ear kwal̦o̦k naan ñan er rar kajju jel̦ã bwe e eo ej Messaia eo, bõtab rar aikuj jipañ ñan mel̦el̦e bwe ñan aer karejar ñan Jeova, rar aikuj in kijejeto ilo jerbalin kwal̦o̦k naan. Piter im Andru em̦õj aer kar erom ri-kal̦oor kadede ium̦win jejjo iien ke Jesus ear kũr er ñan aer l̦oore full-time. (Matu 4:​18, 19) Erro ar jerbal ippãn Jemes im Jon ãinwõt ri-eo̦ñõd ro, im rar lo tõprak ilo peejnej in eo̦ñõd eo aer. (Mark 1:​16-20) Bõtab Piter im Andru rar bõjrak jãn jerbal in aer bwe ren maroñ l̦oore Jesus full-time. Ke erro ar kõm̦m̦ane pepe in, ejjel̦o̦k pere bwe rar bar lale bwe ren maroñ kabwe wõt aikuj ko an baam̦le ko aer ilo aerro l̦oore Jesus. Ta eo ear jipañ er ñan likũt men ko raorõktata m̦okta ilo mour ko aer? Bwebwenato eo ilo Luk ej ba bwe Jesus ear kõm̦m̦ane juon menin kabwilõñlõñ me ear kõkajoor tõmak eo aer bwe Jeova emaroñ kabwe aikuj ko aer.—Riit Luk 5:​5-11.

11. Ewi wãween jemaroñ kõjerbal bwebwenato ko ad make ñan kõkajoorl̦o̦k tõmak eo an juon rũkkatak?

¹¹ Jejjab maroñ kõm̦m̦an menin kabwilõñlõñ ko ãinwõt an kar Jesus kõm̦m̦an, bõtab jemaroñ kwal̦o̦k bwebwenato ko kõn wãween an Jeova rejetake ro rej likũt E m̦oktata ilo mour ko aer. Ñan waanjoñak, kwõj ke keememej an kar Jeova jipañ eok ke kwaar jino etal ñan kweilo̦k ko? Bõlen kwaar kepaak bo̦o̦j eo am̦ im kõmel̦el̦eiki etke kwõjjab maroñ kaetokl̦o̦k awa in jerbal ko am̦ ñe enaaj kõm̦m̦an bwe kwõn jab pãd ilo kweilo̦k ko. Ilo am̦ kwal̦o̦k bwebwenato ko am̦ ñan rũkkatak eo, kõmel̦el̦eiki kõn wãween an kar tõmak eo am̦ kajoorl̦o̦k ke kwaar lo an Jeova rejetake pepe eo am̦ ñan kõm̦m̦an bwe am̦ kabuñ ñan E en men eo eaorõktata ilo mour eo am̦.

12. (1) Etke em̦m̦an ñan kũrwaj rũttõmak ro jet me reoktak jãn doon ñan juon iien katak Baibõl̦ ippãn rũkkatak eo am̦? (2) Ewi wãween kwõmaroñ kõjerbal pijain alwõj ko ñan katakin rũkkatak eo am̦ ilo juon wãween em̦m̦an im pol̦õmãn? Kwal̦o̦k juon waanjoñak.

¹² Rũkkatak eo am̦ enaaj bar bõk tokjãn ñe ej roñ kõn wãween an kar Kũrjin ro jet kõm̦m̦an oktak ko im likũt men ko raorõktata m̦okta ilo mour ko aer. Kõn men in, kũrwaj rũttõmak ro jet me reoktak jãn doon ñan aer kobawaj ilo iien katak Baibõl̦ eo. Kajjitõk ippãer ñan kwal̦o̦k kõn wãween aer kar itok ñan m̦ool eo im ta eo rar kõm̦m̦ane ñan likũt bwe aer karejar ñan Jeova en men eo eaorõktata ilo mour ko aer. Bareinwõt, bõk am̦ iien ippãn rũkkatak eo im alwõje pija ko jãn ijo ej ba “Kam̦wilal̦l̦o̦k Am̦ Mel̦el̦e” ak “Kal̦apl̦o̦k Am̦ Mel̦el̦e” ilo bok eo M̦õn̦õn̦õ kõn Mour ñan Indeeo! Ñan waanjoñak, ñe komiro ej etale katak 37, kwõmaroñ kaalikkar naan in kakapilõk ko jãn pijain alwõj eo etan Jehovah Will Care for Our Needs.

JIPAÑ RŨKKATAK EO AM̦ ÑAN ANJO̦ IOON IJJIPED KO JÃN RO JET

13. Ewi wãween an kar Jesus kõpooj ri-kal̦oor ro an ñan jelm̦ae ijjiped ko jãn ro jet?

¹³ Elõñ alen an kar Jesus ba ñan ri-kal̦oor ro an bwe renaaj iioon matõrtõr jãn ro jet, ekoba baam̦le ko aer. (Matu 5:11; 10:​22, 36) M̦oktal̦o̦k wõt jãn an Jesus mej, ear ba ñan ri-kal̦oor ro an bwe remaroñ m̦an er kõn aer kabuñ ñan Jeova. (Matu 24:9; Jon 15:20; 16:2) Ear rõjañ er ñan ekkõl wõt ilo aer kwal̦o̦k naan. Ñan waanjoñak, ear ba ñan er bwe ren jab akwããl ippãn ro rej jum̦ae tõmak ko aer im bwe ren kõjparok ta ko rej ba im kõm̦m̦ani.

14. Ewi wãween ad maroñ jipañ juon rũkkatak ñan pojakl̦o̦k im̦aan ñe enaaj jelm̦ae ijjiped ko jãn ro jet? (2 Timote 3:12)

¹⁴ Jemaroñ jipañ juon ad rũkkatak ñan pojakl̦o̦k im̦aan ñe enaaj jelm̦ae ijjiped ko jãn ro jet ikijjeen ad kõmel̦el̦eiki kõn men ko emaroñ roñ jãn ro m̦õttan, ri-jerbal ro m̦õttan, im baam̦le eo an. (Riit 2 Timote 3:12.) Jet iaan ri-jerbal ro m̦õttan rũkkatak eo remaroñ kajjirere kake e kõnke kiiõ ej kate ñan mour ekkar ñan katak ko ilo Baibõl̦. Bareinwõt, ro nukũn remaroñ kõnanaik tõmak eo an me ej pedped ioon Baibõl̦ eo. Ñe em̦õkaj ad kõpooj rũkkatak ro ad ñan jelm̦ae ijjiped ko jãn ro jet, renaaj pojak kadede ñe renaaj wal̦o̦k.

15. Ta eo emaroñ jipañ juon rũkkatak ñan an jel̦ã ta eo en kõm̦m̦ane ñe ej iioon jum̦ae jãn baam̦le eo an?

¹⁵ Ñe ro uwaan baam̦le eo an rũkkatak eo am̦ rej jum̦aiki, rõjañ rũkkatak eo ñan l̦õmn̦ak kõn ta unin aer illu. Bõlen remaroñ l̦õmn̦ak bwe Ri-Kõnnaan ro an Jeova rar tõlpilouk e, ak bõlen emaroñ wõr aer kalijekl̦o̦k n̦ae Ri-Kõnnaan ro an Jeova. Elõñ jet ro ilo baam̦le eo an Jesus bareinwõt rar jab m̦õn̦õn̦õ kõn ta eo ear kõm̦m̦ane. (Mark 3:21; Jon 7:5) Katakin rũkkatak eo am̦ ñan kwal̦o̦k wõt kijenmej im kõnono ilo jouj ñan ro jet, ekoba baam̦le eo an.

16. Ewi wãween ad maroñ jipañ juon rũkkatak ñan kwal̦o̦k kõn tõmak eo an ilo juon wãween ejouj im ekõmmaanwa?

¹⁶ Meñe ro ilo baam̦le eo an rũkkatak eo rekõn̦aan kal̦apl̦o̦k aer jel̦ã kõn Baibõl̦ eo, ak em̦m̦an ñe rũkkatak eo ejjab kajjioñ kõmel̦el̦e kõn elõñ men ko ilo juon wõt iien. Ñe ej kõm̦m̦ane men in, emaroñ kabbweer ro ilo baam̦le eo an im remaroñ jab kõn̦aan bar bwebwenato ippãn kõn tõmak eo an. Kõn men in, rõjañ rũkkatak eo am̦ ñan kwal̦o̦k kõn tõmak eo an ilo juon wãween epidodo. Innem ilo wãween in, baam̦le eo an remaroñ m̦õn̦õn̦õ in bar roñjake an kõnono kõn Baibõl̦ eo bar juon iien. (Kol. 4:6) Bõlen emaroñ kwal̦o̦k ñan ro ilo baam̦le eo an bwe ren etal ñan jw.org. Ilo wãween in, ro ilo baam̦le eo an remaroñ kal̦apl̦o̦k aer jel̦ã kõn Ri-Kõnnaan ro an Jeova jabdewõt iien rekõn̦aan im remaroñ kããlõt ewi joñan mel̦el̦e ko rej katak kaki.

17. Ewi wãween am̦ maroñ kammineneik juon rũkkatak ñan jojomare Ri-Kõnnaan ro an Jeova ñe armej ro jet rej kwal̦o̦k juon men ejjab jim̦we kõn er? (Bar lale pija eo.)

¹⁷ Kwõmaroñ kõjerbal katak eo elõñ m̦õttan ilo jw.org etan “Frequently Asked Questions” ñan jipañ rũkkatak eo am̦ ñan kõpooj uwaak ko repidodo ñan kajjitõk ko me ro nukũn ak ri-jerbal ro m̦õttan remaroñ kajjitõk kaki. (2 Tim. 2:​24, 25) Ãlikin am̦ katak kajjojo katak ko, ãliji m̦õttan eo etan “Jet Armej Rej Ba” ilo bok eo M̦õn̦õn̦õ kõn Mour ñan Indeeo! Rõjañ rũkkatak eo bwe en kammineneik e ñan uwaak ilo naan ko an make. Jab jenliklik in lel̦o̦k naanin kakapilõk ko ñan jipañe kõn wãween emaroñ kakõm̦anm̦anl̦o̦k an uwaak. Kain jipañ rot in enaaj jipañe ñan jojomare men ko ej tõmaki ilo peran.

18. Ewi wãween am̦ maroñ rõjañ juon rũkkatak ñan kwal̦o̦k kõn tõmak eo an ilo jerbalin kwal̦o̦k naan? (Matu 10:27)

¹⁸ Jesus ear rõjañ ri-kal̦oor ro an bwe ren kwal̦o̦k kõn ennaan eo em̦m̦an ilo̦bwilej. (Riit Matu 10:27.) Ñe em̦õkajl̦o̦k an juon rũkkatak jino kwal̦o̦k kõn tõmak eo an, enaaj m̦õkajl̦o̦k an atartar ioon Jeova. Ewi wãween am̦ maroñ jipañ juon rũkkatak ñan kõm̦m̦an bwe men in en mejãnkajjik eo an? Ñe ewõr juon kõjjel̦ã ñan eklejia eo kõn juon iien kwal̦o̦k naan ejejuwaan, jipañ rũkkatak eo am̦ ñan lale ta ko ej aikuj kõm̦m̦ani bwe en erom juon ri-kwal̦o̦k naan. Kwal̦o̦k ñane bwe ekkã an pidodol̦o̦k ñan kwal̦o̦k naan ilo iien kwal̦o̦k naan kein rejejuwaer. Emaroñ bar bõk tokjãn ilo an bõk kun̦aan kõm̦m̦an katak ilo kweilo̦k ko lukwõl̦pãn wiik me rej kammineneik kõj ñan kwal̦o̦k naan ilo̦bwilej. Ilo an kajjioñ jibadek mejãnkajjik eo ñan kõm̦m̦an katak ko, enaaj katak kilen kakõm̦anm̦anl̦o̦k wãween an kwal̦o̦k kõn tõmak ko an ilo peran.

KWAL̦O̦K AM̦ LÕKE RŨKKATAK EO AM̦

19. Ewi wãween an kar Jesus kwal̦o̦k an lõke ri-kal̦oor ro an, im ewi wãween ad maroñ anõke?

¹⁹ M̦okta jãn an Jesus kar wanlõñl̦o̦k ñan lañ, ear jiroñ ri-kal̦oor ro an bwe renaaj bar koba ippãn doon. Rar jab mel̦el̦e bwe Jesus ear kõnono kõn aer naaj wanlõñl̦o̦k ñan lañ. Meñe rar jab lukkuun mel̦el̦e kõn aolep men ko Jesus ear kõnono kaki ak Jesus ear lukkuun jel̦ã bwe rar kõn̦aan l̦oore wõt e. (Jon 14:​1-5, 8) Ear jel̦ã bwe rar aikuj iien ñan mel̦el̦e kõn jet men ko ãinwõt kõjatdikdik eo ñan mour ilañ. (Jon 16:12) Kõj bareinwõt jemaroñ kwal̦o̦k ad lõke bwe rũkkatak ro ad rekõn̦aan kabuñbũruon Jeova.

20. Ewi wãween an kar juon jeid im jatid kõrã ilo Malawi kwal̦o̦k an lõke rũkkatak eo an?

²⁰ Jej kõjatdikdik wõt bwe rũkkatak eo ad ekõn̦aan kõm̦m̦ane men eo ejim̦we. Ñan waanjoñak, juon jeid im jatid kõrã ilo Malawi etan Chifundo, ear jino katak Baibõl̦ kõn bok eo M̦õn̦õn̦õ kõn Mour ñan Indeeo! ippãn juon jiroñ in Catholic etan Alinafe. Ke rar kam̦õjl̦o̦k katak 14, Chifundo ear kajjitõk ippãn rũkkatak eo an ta l̦õmn̦ak eo an kõn kõjerbal ekjab ko ilo iien an kabuñ. Alinafe ear inepata im ba, “Men in ej pepe eo an kajjojo armej!” Chifundo ear l̦õmn̦ak el̦aññe men in enaaj kabõjrak aerro katak. Bõtab ear wõnm̦aanl̦o̦k wõt im katak ippãn Alinafe im kõjatdikdik bwe juon iien enaaj mel̦el̦e bwe ejjab jim̦we ñan kõjerbal ekjab ko ilo ad kabuñ. Jejjo allõñ ko tokãlik, Chifundo ear kajjitõk ippãn kajjitõk in ilo katak 34: “Jãn jinoin am̦ katak Baibõl̦ im katak kõn Anij eo em̦ool, Jeova, ewi wãween am̦ bok tokjãn jãn men in?” Chifundo ej kwal̦o̦k kõn wãween an Alinafe kar uwaak: “Ear kwal̦o̦k elõñ mel̦el̦e ko relukkuun em̦m̦an, juon iaaer ej kõn an Ri-Kõnnaan ro an Jeova jab bõk kun̦aaer ilo m̦anit ko rej n̦ae Baibõl̦ eo.” Ejjabto tokãlik, Alinafe ear bõjrak jãn an kõjerbal ekjab ko im ear maroñ peptaij.

21. Ewi wãween ad maroñ jipañ kõkajoorl̦o̦k kõn̦aan eo an rũkkatak eo ñan karejar ñan Jeova?

²¹ Meñe Jeova ej “eo ej kaddekl̦o̦k,” ak ewõr kun̦aad ñan jipañ juon rũkkatak Baibõl̦ ñan kõm̦m̦an wõnm̦aanl̦o̦k ko. (1 Kor. 3:7) Elõñl̦o̦k men ko jej kõm̦m̦ani jãn ad baj katakin e kõn ta eo Anij ekõn̦aan bwe en kõm̦m̦ane. Jej jipañe ñan kam̦wilal̦l̦o̦k yokwe eo an ñan Jeova. Jej bar rõjañe ñan kwal̦o̦k an yokwe Jeova ikijjeen an likũt E m̦oktata ilo mour eo an. Im jej katakin e wãween an maroñ atartar ioon Jeova ñe ej jelm̦ae ijjiped im apañ ko jãn ro jet. Ñe jej kwal̦o̦k ad lõke rũkkatak eo ad, jej kõkajoorl̦o̦k tõmak eo an bwe e bareinwõt emaroñ mour ekkar ñan kien ko an Jeova im kããlõt ñan karejar ñan E.