“Dãpij Wõt Bõrokuk eo Kom̦ij Bõke Ikijjeen Jetõb Kwõjarjar”

“Bõrokuk eo” jej loe ilo eklejia eo ej maroñ wal̦o̦k “ikijjeen jetõb kwõjarjar.” Mel̦el̦ein bwe unin an wõr bõrokuk ej kõn jetõb kwõjarjar eo an Anij. Ijoke, ãinwõt an kar Paul kaalikkar, jej aikuj kate kõj ñan dãpij wõt ad bõrokuk. Wõn eo ej aikuj kõm̦m̦ane men in? Ilo m̦ool, kajjojo Kũrjin ej aikuj kõm̦m̦ane ijo kun̦aan ñan “dãpij wõt bõrokuk eo [jej] bõke ikijjeen jetõb kwõjarjar.”

Ñan waanjoñak, jen ba juon armej ear lewaj waam̦ juon wa ekããl. Enaaj kun̦aan wõn lale im kõjparok wa eo bwe en em̦m̦an wõt an jerbal? Eokwe, alikkar uwaak eo. Ñe ebaj jorrããn wa eo kõn am̦ kar jab lale im kõjparoke, kwõjjab maroñ n̦aruon armej eo ear lewaj wa eo.

Ejja ãindeinl̦o̦k wõt, meñe bõrokuk eo jej loe ilo eklejia eo ej juon menin letok jãn Anij, ak ej kun̦aad kajjojo ñan dãpij wõt ad bõrokuk. El̦aññe ejjab em̦m̦an kõtaad ippãn juon iaan ro jeid im jatid, jej aikuj kajjitõk ippãd make, ‘Ij ke kõm̦m̦ane ijo kun̦aõ ñan dãpij wõt bõrokuk eo jej bõke ikijjeen jetõb kwõjarjar ilo aõ kajjioñ kõm̦adm̦õde apañ eo?’

“KATE KOM̦” ÑAN DÃPIJ WÕT AMI BÕROKUK

Ãinwõt an kar Paul kwal̦o̦k, jet iien jej aikuj lukkuun kate kõj bwe jen dãpij wõt bõrokuk eo jej bõke ikijjeen jetõb kwõjarjar. El̦apl̦o̦k an men in aorõk ilo iien ko me juon iaan ro jeid im jatid ear kõmetak kõj. Men in ej ke mel̦el̦ein bwe jej aikuj aolep iien kepaake armej eo ear kainepataik kõj im bwebwenato ippãn kõn apañ eo? Jaab, ejjab aolep iien. Kajjitõk ippam̦ make, ‘Ñe inaaj bõkm̦aantak apañ in, men in enaaj ke kõm̦m̦an bwe en l̦apl̦o̦k ad bõrokuk ak enaaj ke kõm̦m̦an bwe en l̦apl̦o̦k apañ eo?’ Jet iien, pepe eo emãlõtlõt ej ñan kõjekdo̦o̦n bõd eo aer ak jeorl̦o̦k aer bõd.—JK. 19:11; Mark 11:25.

Ãinwõt an kar rijjilõk Paul rõjañ kõj, jen wõnm̦aanl̦o̦k wõt im “kijenmej ippãn doon ilo yokwe.” (Eps. 4:2) Juon bokin kõmel̦el̦e Baibõl̦ ej kwal̦o̦k bar juon wãween jemaroñ ukote naan kein—“kile bwe ãindein wãweer.” Men in ej mel̦el̦ein bwe jej kile bwe ro jeid im jatid rejjab weeppãn, ãinwõt kõj. Em̦ool bwe jej aolep kate kõj ñan kõn̦ak “mour eo ekããl.” (Eps. 4:​23, 24) Ijoke, ejjel̦o̦k juon iaad enaaj jejjet an kõm̦m̦ane men in. (Rom 3:23) Ñe jej kile im mel̦el̦e men in, enaaj pidodol̦o̦k ad kijenmej ippãn doon, jeorl̦o̦k an doon bõd, im “dãpij wõt bõrokuk eo [jej] bõke ikijjeen jetõb kwõjarjar.”

Ñe jej jol̦o̦k an ro jet bõd im mel̦o̦kl̦o̦k bõd eo rar kõm̦m̦ane n̦ae kõj—meñe jej kõm̦m̦ane men in ilo bũruod wõt—jej wõnm̦aanl̦o̦k wõt im lo “aenõm̦m̦an eo ej lukwõj [koj] ippãn doon.” Ilo Epesõs 4:​3, kar ukote naanin Grik eo ñan “lukwõj kom̦ ippãn doon” ñan naan eo “kõjjem̦ ko” ilo Kolosse 2:19. Kõjjem̦ ko rej to in m̦ajel̦ ko me rej dãpij di ko ippãn doon. Ilo ejja wãween in wõt, aenõm̦m̦an ekoba yokwe eo ad ñan ro jeid im jatid ej jipañ kõj ñan dãpij juon kõtaan epaak ippãer, meñe ewõr men ko rej kõm̦m̦ani me rej kainepataik kõj.

Kõn men in, ñe juon jeim̦ ak jatũm̦ ej kõmetak, kallu, ak kainepataik eok, kajjioñ mel̦el̦e kõn armej eo ijello̦kun am̦ kalimjek wõt likjab ko an. (Kol. 3:12) Kõnke kõj aolep jejjab weeppãn, ejjel̦o̦k pere bwe em̦õj am̦ bar kõm̦m̦ane juon men me ear kõmetak ak kainepataik bar juon armej. Am̦ keememej men in enaaj jipañ eok ñan kõm̦m̦ane ijo kun̦aam̦ “ñan dãpij wõt bõrokuk eo [jej] bõke ikijjeen jetõb kwõjarjar.”