“En Itok Am̦ Aelõñ”

Jeova ej kallim̦ur im ba: ‘Armej ro reban bar jañ, eñtaan, nañinmej, ak mej. Inaaj kõm̦õrãik jãn mejãer dãnnin kõmjaal̦al̦ otemjej. Aolep men ko renana jãn iien ko m̦okta renaaj jako.’

Jeova ear likũt Adam im Iv ilo jikin kallib Iden bwe erro en mour ilo aenõm̦m̦an im m̦õn̦õn̦õ. Erro kar aikuj in kabuñ ñan Jemãerro ilañ im koobrak lal̦ in kõn ajri ro nejierro. Ak Adam im Iv rar jab pokake Jeova. Jekdo̦o̦n ak kõn̦aan eo an Jeova kõn armej im lal̦ in ejjab oktak. Ilo bok in, jaar loe bwe aolep kallim̦ur ko an Anij rej jejjet kũtieer. Aelõñ eo an enaaj bõktok jeraam̦m̦an ko ñan lal̦ in, ãinwõt an kar Anij kallim̦ur ñan Ebream.

Ejjabto jãn kiiõ, Setan, enjel̦ ro renana, im aolep armej ro renana renaaj jako. Aolep ro remour renaaj kabuñ ñan Jeova. Jeban bar nañinmej ak mej, im kajjojo raan ñe jej rujlo̦k, jenaaj m̦õn̦õn̦õ im lukkuun em̦m̦an ad mour. Bareinwõt lal̦ in enaaj erom juon pedetaij. Enaaj wõr kijen aolep m̦õñã ko reuõne im renno̦, im enaaj em̦m̦an m̦õko im̦weer. Armej renaaj jouj, joñan ejjel̦o̦k en̦ enaaj nana ak lãj. Im menninmour ko rawiia reban mijak kõj, im jeban bar mijak er.

Elukkuun naaj kãitoktoklimo ñe Jeova enaaj jino kõmour ro rar mej. Jenaaj maroñ karwaineneik ro jãn kar iien ko etto, ãinwõt Ebel, Noa, Ebream, Sera, Moses, Rut, Ester, im Devid. Rein renaaj kobatok ippãd im jenaaj aolep jim̦or kõm̦m̦an bwe lal̦ in en juon pedetaij. Aolep iien enaaj lukkuun lõñ jerbal ko rekãitoktoklimo ñan ad kõm̦m̦ani.

Jeova ekõn̦aan bwe kwõn pãd ilo naaj iien en̦. Enaaj l̦apl̦o̦k am̦ jel̦ã kajjien ilo wãween ko me kwaar jab kõtmãne kaki. Kõn men in, jen aolep wõnm̦aanl̦o̦k wõt im kõkajoor jem̦jerã eo ad ippãn Jeova kajjojo raan, kiiõ im ñan indeeo!