Ta eo Jej Aikwij Kõmmane ñan Lo Mõnõnõ

JEHOVAH, “Anij e mõnõnõ,” im Jesus Christ, “Iroij emõnõnõ,” elaplok air jelã jen jabdewõt armij kin ta eo ej aikwiji ñan lo mõnõnõ. (1 Timote 1:​11; 6:​15) Eñin unin, jejjab bwilõñ bwe ki eo ñan lo mõnõnõ ej bed ilo Nan in Anij, Bible eo.​—Reveles̃õn 1:3; 22:⁠7.

Ilo Katak eo an ebuñbuñ ion Tol eo, Jesus ear kwalok kin ta eo juõn armij ej aikwiji ñan lo mõnõnõ. Ej ba: “Emõnõnõ ro” (1) rej kile aikwij ko air ilo jitõb, (2) reburomõj, (3) ettã burueir, (4) rekwuli im mãro kin kwojarjar, (5) rej tiriamo, (6) erreo burueir, (7) rej kõmman ainemõn, (8) rej eñtan ilo matõrtõr kin kwojarjar, im (9) rej bõk kajirere im matõrtõr kin air jerbal ilo etan.​—Matu 5:​3-​11.a

Wõn eo ejjab errã bwe juõn armij eo me buruen erreo en kar kamakite bwe en ettã buru, tiriamokake, im kõmman ainemõn enaj laplok an mõnõnõ jen juõn armij elulu, lej, im ejelok tiriamo? Bareinwõt Bible eo ej jiroñ kij bwe jitõb kwojarjar eo an Anij ej ekkeijaklok ñan mõnõnõ, im ej bed ion ro wõt rej bokake Anij einwõt iroij. (Jerbal 5:​32) Armij rot rein rej mõnõnõ in reilok ñan Anij ñan bõk jibañ jen e kinke rej kile bwe ewõt emaroñ jibañ armij ro ñan anjo ion mõjno ko air.​—Jabõn Kennan Ko 16:​3, 9; 20:24.

Jerbal in Kanniek ko ak Leen ko Leen Jitõb?

Jehovah ejjab lelok jitõb eo an ñan ro rej kõmman “jerbal in kõniek ko.” Jerbal kein, rej koba mour etton, anijnij, im kadõk, emwij kilajraki ilo Dri Galetia 5:​19-​21. Jen air bõktok mõnõnõ, men kein rej kokkure kõtan ko remõn ikõtair im ro nukiir, jerair, im ro rejjab ebake ir. Bareinwõt, Nan in Anij ej ba bwe ro rej “kõmõn men rot kein re jamin bõk air jolit ailiñ in Anij.”

Oktak jen men in, Anij ej lelok jitõb eo an ñan ro rej kaddek “leen Jitõb.” Kadkad ko rej leen Jitõb rej koba “yokwe, lõñliñ, ainemõn, meanwõr, joij, lejokmen, tiljek, inemõn, jadõr.” (Dri Galetia 5:​22, 23) Ñe jej kwalok kadkad kein, jej kõmman wãwen ko ñan kaddek kõtan ko rainemõn ikõtan armij ro im Anij, eo ej bõktok mõnõnõ eo emol. (Lale box eo.) Ak men eo elaplok an aorõk bwe, jen kabuñburuen Jehovah im ewõr ibbed juõn kejatdikdik ñan mour indio ilo lal eo ekãl im ewãnik an Anij.

Ta Eo Jej Aikwiji ñan Lo Mõnõnõ?

Ilo tukaduin: Kejbãrok yuk jen “jerbal in kõniek ko,” im kaddek “leen Jitõb [an Anij].” Ñan lo mõnõnõ, juõn armij ej aikwij kõnan juõn kõtan ebak ibben Anij. Armij eo ej kate wõt e ñan jibadõk men in enaj einwõt armij eo Jesus ear watõke einwõt juõn armij elemõnõnõ.

Kin men in, kwon jab bwid im lemnak bwe kwojjab maroñ mõnõnõ. Emaroñ lõñ abañ ko ibbam kiõ kin ejmour eo am, mour in mare eo am, ak jerbal eo am, ak abañ kin money ko am. Mekarta, kwon beran; ejelok unin am aikwij ebwer! Iroij eo an Ailiñ in Anij enaj namejelan abañ kein im elõñ buki abañ ko jet. Emol, mõttan jidik Jehovah Anij enaj kajejjet kitien kallimur eo an me ri jeje sam ear konono kake: “Ailiñ eo Am juõn ailiñ e ñõn in drio . . . Kwoj erlokwe peiõm im kamat air kõnan ñõn men otemjej remour.” (Sam 145:​13, 16) Einwõt elõñ million ri karejar ro an Jehovah ibelakin lal maroñ kennan kake, ilo am kememej wõt kallimur in an Jehovah men in enaj kamõnõnõik yuk ilo ran kein.​—Reveles̃õn 21:3.

[Kamelele eo itulal]

[Bo̦o̦k/Pija eo ilo peij 5]

Kadkad ko Rej Bõktok Mõnõnõ

Yokwe ej kamakit ro jet bwe ren yokwe yuk.

Lañliñ ej kakajur yuk bwe kwon kijenmij ilo melejoñ ko.

Ainemõn ej jibañ yuk ñan debij bed eo emõn ibben ro jet.

Meanwõd ej kamaroñ yuk ñan mõnõnõ wõt meñe iumin melejoñ ko.

Joij ej kamakit ro jet bwe ren ebake yuk.

Lejokmen ej kamakit ro jet ñan jibañ yuk ñe kwoj kwalok kadkad in.

Tõmak ej kamol ñan yuk bwe Anij ej tel yuk ilo yokwe.

Inemõn enaj kainemõn buruõm, lolãtãt eo am, im enbwinõm.

Jadõr ej melelen bwe bwid ko kwoj kõmmani renaj eietlok.