MOURIN KŨRJIN

Wãween eo Ekããl Naaj Kobaiki ilo Kweilo̦k in Lukwõl̦pãn Wiik

Jino jãn Jãnwõde 2018, enaaj wõr juon wãween ekããl jenaaj kobaiki ilo kweilo̦k eo ilo lukwõl̦pãn wiik. Ta in? Jenaaj kobaiktok kõmel̦el̦e ko kõn eoon ko im pija ko me rewal̦o̦k ilo Baibõl̦ in katak eo an doulul in ilo online (New World Translation of the Holy Scriptures, nwtsty), meñe ejjañin wõr men in ilo kajin eo am̦. Ejjel̦o̦k pere bwe wãween in enaaj lukkuun jipañ eok ilo am̦ kõppojak ñan kweilo̦k ko. El̦aptata, enaaj jipañ eok ñan lukkuun epaakel̦o̦k wõt Jeova, eo Jemãd me el̦ap yokwe ippãn!

KÕMEL̦EL̦E KO KÕN EOON KO

Ilo kõmel̦el̦e ko, ej kam̦wilal̦l̦o̦k ad mel̦el̦e kõn m̦anit, jikin, im kajin eo an armej ro me eoon ko rej kwal̦o̦k kaki.

Matu 12:20

Wiik in l̦aam̦ eo ebaatat: L̦aam̦ eo rekõn kõjerbale ilo m̦õko etto, ear juon kl̦e edik im kar teiñi kõn oil in olive. Wiik eo me kar kõm̦m̦ane jãn flax (juon kain ujooj) ej jorome lõñtak oil eo bwe en urur wõt l̦aam̦ eo. Naanin Grik eo kar ukote ñan “flax ebaatat” emaroñ jitõñl̦o̦k ñan iien eo wiik eo ej baatat kõnke ej bwil wõt bõran im ke urur eo edikl̦o̦k ak em̦õj an kun. Kanaan eo ilo Aiseia 42:3 ear kwal̦o̦k kõn an Jesus naaj jouj im tũriam̦o kõn ro rettã im erup bũrueer me kõjatdikdik eo aer enañin jako wõt jidik. Ewi wãween? Ikijjeen an jab “kune” ak kõm̦m̦an bwe en jako kõjatdikdik eo aer.

Matu 26:13

Em̦ool: llo kajin Grik naan in a·menʹ, ej itok jãn naanin Hibru eo ʼa·menʹ me ej mel̦el̦ein “en ãindein,” ak “em̦ool.” Elõñ alen an kar Jesus kõjerbal naan in ilo jinoin an ba jet naan ko, kallim̦ur ko, ak kanaan ko. Ilo wãween in, ear lukkuun kaalikkar bwe men ko ej ba rem̦ool im armej ro remaroñ lõki. An kar Jesus kõjerbal “em̦ool” ak amen, ej wal̦o̦k ilo bokin Gospel ko wõt. Ke ear ãliji im ba a·menʹ a·menʹ, ãinwõt an wal̦o̦k ilo enañin aolepen bokin Jon, rar ukote naan kein an Jesus ñan “em̦ool, em̦ool.”—Jon 1:51.

PIJA KO

Pija ko, jiña ko, im bareinwõt pija in alwõj ko ejjel̦o̦k ainikieer rej kwal̦o̦k tipdikin men ko kar jei ilo Baibõl̦.

Betpeje, Tol̦ Olive, im Jerusalem

Pija in ekadu ej kwal̦o̦k ial̦ eo l̦o̦k ñan Jerusalem jãn turear, ilo jikin eo me ilo raan kein rej n̦aetan et-Tur. Eñin ijo rej ba bwe ej Betpeje ilo kar Baibõl̦. Ial̦ in ej wanlõñl̦o̦k ñan juon iaan jikin ko reutiej ilo Tol̦ Olive. Betani ej pãd irearin Betpeje, eo me epãd tõrerein Tol̦ Olive. Ke Jesus im rũkal̦oor ro an rar pãd ilo Jerusalem, ekkã aer kar jol̦o̦k juon boñ ilo Betani, eo me ej pãd ilo bukwõn eo rej n̦aetan ilo raan kein el-ʽAzariyeh (El ʽEizariya) ilo kajin Arab, im ej mel̦el̦ein “Ijo Jikin Lazerõs.” Ejjel̦o̦k pere bwe Jesus ear kiki ilo m̦weo im̦õn Marta, Meri, im Lazerõs. (Mt 21:17; Mk 11:11; Luk 21:37, UBS; Jon 11:1) Ke Jesus im rũkal̦oor ro an rar etetal jãn m̦weo im̦õn Lazerõs ñan Jerusalem, Jesus emaroñ kar bõk ejja ial̦ eo wõt ilo pija in jej alwõje. Ilo kar Nisan 9, 33 C.E., ke Jesus ear uwe iioon koon in donkey eo im wanlõñl̦o̦k ioon Tol̦ Olive ñan Jerusalem, emaroñ kar uwe jãn Betpeje im etal ilo ial̦ eo l̦o̦k ñan Jerusalem.

Juon Dila ilo Diin Jim̦win Ne

Eñin pija eo ej kwal̦o̦k kõn diin jim̦win neen juon armej me rar dilaiki kõn juon dila 4.5 inij aetokan. Rar loe di in ilo 1968, ilo iien eo rar kũbwij jikin ko itueañin Jerusalem, im emaroñ kar itok jãn iien ko an RiRom ro. Men in ej kam̦ool bwe rekõn kõjerbal dila ko ñan dilaiki armej ro ioon al̦al̦ ko. Dila in ej ãinl̦o̦k wõt dila ko RiRom ro rar kõjerbali ñan dilaiki Jesus Christ ioon al̦al̦ in eñtaan eo. Dila in me ej pãd ilo diin jim̦win neen juon armej rar loe ilowaan juon bo̦o̦k kõm̦m̦an jãn dekã me rej n̦aetan ossuary. Ãlikin an kõt ãnbwinnin juon rimej im erom di wõt, rekõn likũt dik ko diin ilowaan bo̦o̦k rot in. Men in ej kam̦ool bwe rar maroñ kalibwin armej ro kar m̦an im totoik er ioon juon al̦al̦.—Mt 27:35.