Ewi Wãwen Jej Aikwij Jerbal Ibben Ro Jet?

“Im einwõt kom kõnan bwe armij ren kõmõn ñõn kom, ein drein ami kõmõnmõn bareinwõt ñõn ir.”​​—LUK 6:​31.

1, 2. (a) Ta Katak eo Elap me Jesus ear kwaloke ion Tol Olive? (b) Ta eo jenaj bwebwenato kake ilo katak in im katak eo tok juõn?

EMOL bwe Jesus Christ ear Ri Kaki eo Elap. Ri tel in kabuñ ro me rar kijirãte rar jilkinlok armij ro ñan ketak e. Ke rar jeblak, Jesus ear jab bed ibbeir. Ak rar ba: “Ejelok armij e ar konono einwõt armij in.” (Jon 7:​32, 45, 46) Juõn ian katak ko rebolemeir kar Katak eo Elap ear kwaloke ion Tol Olive. Jemaroñ lo katak in ilo chapter 5 ñan 7 an Gospel in Matu, im ilo Luk 6:​20-​49.a

² Bõlen eon eo me ekkã wõt an elõñ armij jelã kake ilo Bible eo kar naetan Kien eo eaorõk an Jesus Christ ak Golden Rule. Ej kwalok kin ewi wãwen jej jerbal ibben armij ro jet. “Im einwõt kom kõnan bwe armij ren kõmõn ñõn kom, ein drein ami kõmõnmõn bareinwõt ñõn ir.” (Luk 6:​31) Im ear kõmmani elõñ men ko remõn ñan armij ro! Jesus ear kejmour armij ro renañinmij im kajerkakbijeik ro remij. Bõtab, Anij ear lukkun kajerammõn armij ro ke rar mõnõnõ in bõk news eo emõn ear kwalok ñan ir. (Read Luk 7:​20-​22.) Einwõt Ri Kennan ro an Jehovah, jej mõnõnõ in bõk kunad ilo jerbal in kwalok nan kin Ailiñ eo bareinwõt. (Mat. 24:14; 28:​19, 20) Ilo katak in im eo tok juõn, jenaj etale nan ko an Jesus kin jerbal in im kamelele ko jet ilo Katak eo me Jesus ear kwaloke ion Tol Olive ikijen ewi wãwen ad maroñ jerbal ibben ro jet.

Jej Aikwij Ettã Buru

3. Ewi wãwen kwomaroñ kamelele kin melelen ettã buru?

³ Jesus ear ba: “Emõnõnõ ro etã burueir; bwe re naj jolit lõl.” (Mat. 5:5) Ilo Bible eo, ettã buru ejjab juõn kadkad emõjno. Ej juõn kadkad ejoij me jej kwaloke ñe jej jerbale kien ko an Anij. Jej kwaloke ilo mwilid ñe jej jerbal ibben armij ro. Ñan wanjoñok, jejjab “bar lelok ñõn jabrewõt armij nana kin nana.”​​—Rom 12:​17-​19.

4. Etke emõnõnõ ro rej inemõn?

⁴ Ro ettã burueir rej mõnõnõ kinke “re naj jolit lõl.” Jesus, eo me ear ‘inemõn im etã buru,’ ej “dri jolit an men ko otemjej” im Ri Jolet eo elap an lal einwõt Iroij eo an. (Mat. 11:29; Hib. 1:2; Sam 2:8) Emwij kar kanan kake bwe Messiah eo, nejin “armij” enaj wõr iroij ro mõttan ilo Ailiñ eo ilañ. (Dan. 7:​13, 14, 21, 22, 27) Einwõt “dri jolit iben Kraist,” 144,000 ri kabit ro me rej inemõn im ettã buru, renaj bareinwõt koba ibben Jesus ilo air jolet lal in. (Rom 8:​16, 17; Rev. 14:1) Ro jet me rejoij im ettã burueir renaj bõk jerammõn eo ñan mour indio ion lal iumin Ailiñ eo.​​—Sam 37:11.

5. Ñe jej kajeoñe inemõn eo an Jesus, ewi wãwen ej jelet mwilid?

⁵ Elañe jaar lej, jenaj kar kaillu ak kalõkatip ro jet im renaj katolok ir jen kij. Bõtab, elañe jej inemõn einwõt Christ, enaj kamakit kij bwe jen armij ro rejoij im menin kõketak ñan ro uan congregation eo. Inemõn ej mõttan leen jitõbõn Anij eo ej eddek iloa elañe jej “etetal kin Jitõb.” (Read Dri Galetia 5:​22-​25.) Emol bwe jekõnan jutak einwõt juõn ian ro rej inemõn me jitõb kwojarjar eo an Jehovah ej tel ir!

Emõnõnõ Ro Rej Tiriamo!

6. “Ro rej tiriamo” rej kwalok kadkad et ko remõn?

⁶ Ilo Katak eo an ion Tol Olive, Jesus ear bareinwõt ba: “Emõnõnõ ro rej tiriamo; bwe naj tiriamokake ir.” (Mat. 5:7) “Ro rej tiriamo” rej kwalok joij, im tiriamo kin ro rej jelmae abañ. Jesus ear jolok eñtan ko jen armij ilo wãwen ko rekabwilõñlõñ kinke ear “tiriamokake ir.” (Mat. 14:14; 20:​34) Elañe jej buromõj kin ro jet im joij ñan ir, enaj kamakit kij ñan kwalok tiriamo.​​—Jem. 2:13.

7. Kadkadin tiriamo ear kamakit Jesus bwe en kõmman ta?

⁷ Ke juõn jar in armij rar wõnmae Jesus ke ear kõnan kakije, ear “tiriamokake ir, bwe ir einwõt s̃ip ko ñe ejelok air s̃eperd.” Inem, ear “jino . . . katakin ir men ko relõñ.” (Mark 6:​34) Elap ad lañliñ kake ñe jej kwalok ejja ennan eo wõt kin Ailiñ eo ibben ro jet im jiroñ ir kin tiriamo eo elap an Anij!

8. Etke ro rej tiriamo rej mõnõnõ?

⁸ Ro rej tiriamo rej mõnõnõ kinke armij ro rej “tiriamokake ir.” Ñe jej kwalok tiriamo ñan armij ro, renaj kõmman eindein. (Luk 6:​38) Bareinwõt, Jesus ear ba: “Elañe komij jeorlok bwir ko an armij, bareinwõt Jememiuij ilõñ E naj jeorlok bwir ko ami.” (Mat. 6:​14) Ro wõt im rej tiriamo rej jelã kin mõnõnõ eo ej itok ñe Anij ej jeorlok air bwid im ej buñburuen kake ir.

Unin “Ro Rej Kõmmõn Ainemmõn” Rej Mõnõnõ

9. Ewi wãwen jenaj jerbal ibben ro jet elañe jej kõmman ainemõn?

⁹ Jesus ear kwalok bar juõn unin mõnõnõ ke ear ba: “Emõnõnõ ro rej kõmmõn ainemmõn ikõtan armij; bwe Anij enaj naetair ro nejin!” (Mt. 5:9) Elañe jej kõmman ainemõn, jejjab errã ak bõk kunad ilo jabdewõt nana einwõt ruruwe, eo me enaj “kijbil ro rej jimjeran.” (Ken. 16:​28) Ilo nan im kõmman, jej kõmman ainemõn ibben armij ro iloan im ilikin congregation eo an Christian. (Hib. 12:​14) Elaptata jenaj kate wõt kij ñan bed ilo ainemõn ibben Jehovah Anij.​​—Read 1 Piter 3:​10-​12.

10. Etke “ro rej kõmmõn ainemmõn” rej mõnõnõ?

¹⁰ Jesus ear ba bwe “ro rej kõmmõn ainemmõn” rej mõnõnõ, kinke Anij ej naetair “ro nejin!” Kin air jerbale tõmak ilo Jesus einwõt Messiah eo, Christian ri kabit ro rej bõk maroñ eo “bwe ren erom nejin Anij.” (Jon 1:​12; 1 Pit. 2:​24) Ak ta kin ‘sheep ro jet’ an Jesus me rej kõmman ainemõn bareinwõt? Renaj watõk Jesus einwõt ‘Jemeir ien in drio’ ilo ien an Iroij iumin Juõn Thousand Yiõ ko ibben iroij ro mõttan ilañ. (Jon 10:​14, 16; Ais. 9:6; Rev. 20:6) Ilo jemlokin Iroij eo an iumin Juõn Thousand Yiõ ko, rein rej kõmman ainemõn renaj erom lukkun nejin Anij.​​—1 Kor. 15:​27, 28.

11. Ewi wãwen jenaj jerbal ibben ro jet elañe “meletlet jen lõñ” ej tel kij?

¹¹ Ñan lañliñ kin juõn kõtan emõn ibben Jehovah, “Anij in ainemõn,” jej aikwij kajeoñe kadkad ko kadkadin, ekoba kõmman ainemõn. (Pil. 4:9) Elañe jej mõnõnõ bwe “meletlet jen lõñ” en tel kij, jenaj jerbal ilo ainemõn ibben ro jet. (Jem. 3:​17) Aet, jenaj mõnõnõ im kõmman ainemõn.

“En Romak Ami Maram”

12. (a) Ta eo Jesus ear ba kin meram eo ilo jitõb? (b) Ewi wãwen ad maroñ kõmman bwe en romak meram eo ad?

¹² Jej kõmman men eo emõntata ibben armij ro ñe jej jibañ ir ñan bõk meram ilo jitõb jen Anij. (Sam 43:3) Jesus ear jiroñ ri kalor ro an bwe ren “maram in lõl” im ear rejañ ir bwe ren kõtlok bwe armij ro ren lo ‘jerbal ko air remõn,’ rej kõmmani ñan ro jet. Tokjen men in ej bwe meram ilo jitõb enaj romak “iman mejen armij.” (Read Matu 5:​14-​16.) Rainin, jej kõmman bwe en romak meram eo ad ilo ad kõmman emõn ñan ro ri turid im ilo ad bõk kunad ilo jerbal in kwalok nan kin news eo emõn “i aolepen lõl,” melelen “ñõn dri ailiñ ko otemjej.” (Mat. 26:13; Mark 13:​10) Ej juõn jerammõn elap ebed ibbed!

13. Armij ro rej kile kij kin ta?

¹³ Jesus ear ba, bwe “jikin kwelok eo ej ber ion tol, re ban noje.” Ebidodo ad lo jabdewõt jikin kwelok eo me ej bed ion juõn tol. Ilo wãwen eo einlok wõt, armij ro rej lo jerbal ko ad remõn einwõt ri keañ ro kin Ailiñ eo im kadkad ko einwõt jatõr im mwil erreo.​​—Taitõs 2:​1-​14.

14. (a) Ewi wãwen am maroñ kwalok kin lamp ko ilo ebeben eo kein kajuõn? (b) Ewi wãwen jejjab noje meram eo ilo jitõb iumin juõn “jãbi”?

¹⁴ Jesus ear konono kin tili juõn lamp im likiti, jab iumin juõn jãbi, ak en likiti ion juõn jikin lamp bwe en romak ion aolep armij ro ilo mweo. Ilo ebeben eo kein kajuõn, armij ro rekin kõmman juõn lamp jen jãbi in bũdej edik im likit jet oil (ekkã air kajerbal oil in olive) im juõn to edik iloan bwe en urur. Ekkã air likit lamp in ion juõn jikin eutiej, im lamp eo ear ‘kameramlok ro otemjej iloan mweo.’ Armij ro rejamin kar tili juõn lamp im likiti iumin juõn “jãbi”​​—juõn jãbi ej rualitõk quart kilepen. Jesus ear jab kõnan bwe ri kalor ro an ren noje meram eo air ilo jitõb iumin juõn jãbi in kõkkar. Eindein, jej aikwij kõmman bwe en romak meram eo ad, im jab kõtlok bwe jumae ak matõrtõr en kamakit kij ñan noje mol eo ak debiji jen armij ro jet.

15. Ewi wãwen ‘jerbal ko ad remõn’ rej jelet jet armij?

¹⁵ Elikin an kar Jesus konono kin juõn lamp ej romak, ear jiroñ ri kalor ro an: “Ein drein en romak ami maram iman mejen armij, bwe ren lo ami jerbal ko remõn, im nebar Jememi i lõñ.” Kin ‘jerbal ko ad remõn,’ jet armij rej “nebar” Anij ilo air erom ri karejar ro an. Ej juõn un emõn unin ad wõnmanlok im kõmman bwe jen romak einwõt “maram ko ilo lõl”!​​—Pil. 2:​15.

16. Einwõt “maram in lõl” ta eo jej aikwij kõmmane?

¹⁶ Einwõt “maram in lõl” jej aikwij bõk kunad ilo jerbal in kwalok nan kin Ailiñ eo im kõmman ri kalor ro. Ak ewõr bar juõn men jej aikwij kõmmane. Paul ear je: “Komin etetal einwõt ro nejin maram, bwe leen maram ej ilo emõn otemjej kab wãnik im mol.” (Ep. 5:​8, 9) Jej aikwij romak einwõt joñok ko remõn ñan kwalok mwil emõn ekkar ñan kien ko an Anij. Emol bwe jej aikwij lor nan in kakabilek eo an Peter: “Im en ekar ami ber im kõmõn ilo bwiljin dri ailiñ ko; bwe, ilo men eo rej konono nae kom kake einwõt dri kõmõn nana, ren kaibujuij Anij ilo ran eo ran in joij, kin ami jerbal ko remõn rej loi.” (1 Pit. 2:​12) Ak ta eo jenaj kõmmane elañe ewalok juõn abañ ikõtan ri tõmak ro?

“Kwon Kainemõn Jeõm im Jãtõm”

17-19. (a) Kar ta eo menin “jurtak” eo me Matu 5:​23, 24 ej konono kake? (b) Kar ewi joñan aorõkin kamadmõde abañ eo ikõtan ruo armij, im ewi wãwen an kar Jesus kwalok men in?

¹⁷ Ilo Katak eo an ion Tol Olive, Jesus ear kakkõl ri kalor ro an bwe ren jab lotan im kijirãte ri tõmak ro mõttair. Jen men in, rar aikwij kõmman ainemõn ilo mõkaj elañe rar kalõkatipi juõn jeiir im jatiir. (Read Matu 5:​21-​25.) Lukkun lale nan in kakabilek eo an Jesus. Elañe kwoj bõklok juõn menin jortak ñan lokatok eo im kwar kememej bwe jeõm ak jatõm ear lõkatip kin kwe, ta eo kwon kar kõmmane? Kwon kar likit menin jortak eo iman lokatok eo im kamadmõde abañ eo ikõtamiro mokta. Elikin amiro kõmmane men in, kwomaroñ jeblak im lelok menin jortak eo.

¹⁸ Ekkã an walok bwe menin “jurtak” eo ear juõn menin katok me juõn armij ear lelok ilo temple eo an Jehovah. Katok kin menin mour ko rar lukkun aorõk, kinke Anij ear kakien bwe men kein kar mõttan wãwen kabuñ eo an Israel iumin Kien eo Anij ear lelok ikijen Moses. Ak elañe kwoj kememej bwe kwar kalõkatip juõn jeõm ak jatõm, kwoj aikwij in kamadmõde abañ eo ikõtamiro mokta jen am lelok menin jortak eo am. “Kwon likit am jurtak na iman lokatok, im ilok,” Jesus ear ba. “Kwon kainemõn jeõm im jãtõm mokta, inem item katok.” Kamadmõde abañ eo ikõtan don en kar men eo earõklok jen katok kin menin mour ko meñe ear juõn menin aikwij ekkar ñan Kien eo.

¹⁹ Jesus ear jab konono kin jet wõt kain menin jortak ko im bwid ko. Inem, juõn ri tõmak ear aikwij in bõjrak jen an lelok jabdewõt kain menin jortak ko elañe juõn jein ak jatin ear lõkatip kin e. Elañe menin jortak eo kar juõn menin mour eo emour wõt, en kar likiti “iman lokatok” eo ilo jikin priest ro ilo temple eo. Elikin an kamadmõde abañ eo, eo ear kalõkatipi armij eo juõn ear maroñ jeblak im lelok menin jortak eo.

20. Elañe jej illu ibben juõn jeid im jatid, etke jej aikwij kamadmõde abañ eo ilo mõkaj?

²⁰ Ekkar ñan lemnak eo an Anij, kõtan eo ad ibben ro jeid im jatid ej juõn mõttan eaorõk ilo kabuñ eo emol. Kar ejelok tokjen katok kin menin mour ko ñan Jehovah elañe ro rar lelok menin jortak ko rar jab jerbal ibben ri tõmak ro mõttair ilo jimwe. (Mic. 6:​6-8) Kin men in, Jesus ear rejañ ri kalor ro an bwe ren “jarõpmõkõj” im kamadmõde jabdewõt abañ ikõtan don. (Mat. 5:​25) Kin ejja lemnak in wõt, Paul ear je: “Komin illu im jab jerawiwi: al en jab tulok ion ami illu; Im komin jab najikin devil eo.” (Ep. 4:​26, 27) Elañe ejimwe unin ad illu, jej aikwij kamadmõde abañ eo ilo mõkaj bwe jen jab illu wõt im najikin Devil eo.​​—Luk 17:​3, 4.

Kwalok Kautiej ñan Ro Jet Ien Otemjej

21, 22. (a) Ewi wãwen ad maroñ jerbale nan in kakabilek eo an Jesus me ej kab mwij ad bwebwenato kake? (b) Ta eo jenaj katak kake week in lal?

²¹ Katak in kin nan ko an Jesus ilo Katak eo an ion Tol Olive, en kar jibañ kij ñan kwalok joij im kautiej armij ro jet. Meñe kij aolep jejjab wãppen, jemaroñ jerbale nan in kakabilek in an Jesus kinke ejjab kajitõk ellã jen joñan ad maroñ kõmmane, im lemnak eo an Jemen ilañ ej eindein. Kin jar, kate eo emol, im kajerammõn jen Jehovah Anij, jenaj maroñ kwalok inemõn, tiriamo, im kõmman ainemõn. Jemaroñ romak kin meram ilo jitõb eo me ej kaibujuij Jehovah. Bareinwõt, jemaroñ kainemõn ro jeid im jatid ñe jej aikwij.

²² Kabuñ eo me Jehovah ej buñburuen kake ej koba wãwen ad emmakit ibben ro ri turid. (Mark 12:​31) Ilo katak eo tok juõn, jenaj etale nan ko jet ilo Katak eo Jesus ear kwaloke ion Tol Olive, bwe en jibañ kij ñan wõnmanlok im kõmman emõn ñan ro jet. Bõtab, elikin ad kalmenlokjen kin katak eo ejej uan an Jesus, jemaroñ kajitõk ibbed make, ‘Ewi wãwen ad jerbal ibben ro jet?’

[Kamelele eo itulal]

Ewi Wãwen Kwonaj Uak?

• Ta melelen kwalok inemõn?

• Etke “ro rej tiriamo” rej mõnõnõ?

• Ewi wãwen jemaroñ kõmman bwe meram eo ad en romak?

• Etke jej aikwij “jaropmõkõj” im kamadmõde abañ eo ibben ro jeid im jatid?

[Pija eo ilo peij 4]

Kwalok nan kin Ailiñ eo ej juõn wãwen eaorõk ñan kwalok meram eo ad

[Pija eo ilo peij 5]

Ri Christian ro rej aikwij likit juõn joñok emõn kin mwilin Christian

[Pija eo ilo peij 6]

Kwon kate yuk ñan kõmman ainemõn ibben ro jeõm im jatõm