Ta Eo Kwonaj Lelok Ñõn Bõk Mour?
“Ta eo armij e naj lelõm wiaik an?”—MAT. 16:26.
1. Etke Jisõs ear kejekron nan in kowe eo an Piter?
DRI jilik Piter ear jab maroñ tõmak kin men ko ear roñ kin lojiliñin. Dri Tel eo ejitenburu iben, Jisõs Kraist, ear ‘konono ilo alikar’ bwe mõtõn jidrik enaj iñtan im mij! Ilo an lemnok bwe emõn men eo ej ba, Piter ear kowe Jisõs: “En etolok jen Kwe, Iroij; men in e jamin ber ibõm.” Jisõs ear oktõklok jen Piter im reilok ñõn dri kalor ro an. Bwelen ir bareinwõt rar bõk ejja lemnok in ebwir. Inem ear ba ñõn Piter: “Kwon ilok ilik Iõ, Kwe Setan; bwe kwo jab lemnok kin men ko an Anij, a kin men ko an armij.”—Mark 8:32, 33; Mat. 16:21-23.
2. Ewi wãwen Jisõs ear kemelele kin men ko ej kõtmene jen juõn dri kalor emol?
2 Nan ko tok jet an Jisõs remaroñ kar jibõñ Piter ñõn kile unin Jisõs ear kejekron kin nan in kowe eo an. Jisõs ear “añiñintok jar eo ñõn iben kab ro dri kaloran” im ear ba ñõn ir: “Jabrewõt eo e kõnan lor Iõ, en mõke karmijete, im inek drebail eo an, im lor Iõ. Bwe jabrewõt eo e kõnan lomor an mour, e naj joko an mour; a jabrewõt eo ej jolok an mour kin Ña im kin gospel, e naj lomoren.” (Mark 8:34, 35) Alikar bwe ear jab baj itok bwe en katok kin mour eo an ak ear bareinwõt kõtmene bwe ro rej lor e ren pojõk ñõn katok kin mour ko air kin jerbal eo an Anij. Elañe rar kõmõn eindrein, renaj bõk juõn jinekjij elap.—Riit Matu 16:27.
3. (a) Ta kajitõk ko Jisõs ear bõkmantak ñõn dri roñjake ro an? (b) Kajitõk eo kein karuo an Jisõs emaroñ kar kakememej ir kin ta?
3 Ilo ejja ien eo wõt, Jisõs ear bõkmantak ruo kajitõk ko rekaitoktoklimo. Ear ba: “Ewi emõn ñõn armij, elañe ej jibarek aolepen lõl, im kowutlok an mour? Ak ta eo emõn an armij lelok bwe en kõrrã an?” (Mark 8:36, 37) Uak eo ñõn kajitõk eo mokta ej alikar iben armij ro. Rejela bwe ejelok tokjen an juõn jibarek men ko an lõl in elañe enaj luji mour eo an. Eor wõt tokjen mweiuk ko elañe juõn ej mour im ej kajerbali. Kajitõk eo kein karuo ej, “Ta eo emõn an armij lelok bwe en kõrrã an?” Kajitõk in an Jisõs emaroñ kar kakememej dri roñjake ro an kin nan in kinak eo an Setan ilo ran ko an Job. Setan ear ba: “Kil wõt kil, aet, men otemjej iben juõn armij e naj lelok kin an mour.” (Job 2:4) Ñõn ro rejjab kabuñ ñõn Jeova, nan ko an Setan remaroñ mol. Elõñ renaj kõmõn jabrewõt men ekoba kokkure kien ko an Jeova bwe ren mour wõt. Bõtab, ejjab eindrein wãwen an dri Kristian ro lemnok.
4. Etke kajitõk ko an Jisõs emũlallok meleleir ñõn dri Kristian ro?
4 Jejela bwe Jisõs ear jab itok bwe en kejmour kij, kamweieik im kaetoklok ar mour ilo lõl in. Ear itok ñõn kebellok ial eo bwe jen mour ñõn indrio ilo lõl eo ekãl, im elap ar kaorõk kejatdrikdrik in. (Jon 3:16) Eñin naj kar wãwen an juõn dri Kristian melele kin kajitõk eo mokta an Jisõs, “Bwe ewi emõn ñõn armij, elañe ej jibarek aolepen lõl, im kowutlok kejatdrikdrik eo an ñõn mour indrio?” Alikar ejelok ñõn jidrik. (1 Jon 2:15-17) Ñõn jibõñ kij uake kajitõk eo kein karuo an Jisõs, jemaroñ kajitõk ibed mõke, ‘Ewi joñõn aõ mõnõnõ in karmijete iõ mõke ñõn kajejit kejatdrikdrik eo aõ ñõn mour ilo lõl eo ekãl?’ Uak eo ñõn kajitõk in ej alikar ilo wãwen ar mour, im ej kwalok joñõn kajur in kejatdrikdrik eo ibed.—Keidi Jon 12:25.
5. Ewi wãwen jemaroñ bõk menin letok eo kin mour indrio?
5 Emol, Jisõs ear jab ba bwe jemaroñ bõk mour indrio kin jerbal ko ar. Meñe mour eo ar ekaru ilo jukjuk im ber in ak ej juõn menin letok. Jejjab maroñ wiaiki ak kõmõn jabrewõt men ñõn bõke. Wãwen eo wõt jemaroñ bõk menin letok in ñõn mour indrio ej ilo “ar liki Kraist Jisõs” im Jeova eo ej “lelok jinekjij ñõn ro rej kabukot E.” (Gal. 2:16; Hib. 11:6) Meñe eindrein, jej aikwij kamol ar tõmak ikijen jerbal ko ar kinke ñe “tõmak e jibil jen jerbal emij.” (Jem. 2:26) Kin men in, ñe jej kalaplok ar kalomõnlokjen kake kajitõk in an Jisõs, enaj emõn ar etale joñõn ar mõnõnõ in karmijeteik men ko ilo jukjuk im ber in, im men ko jej mõnõnõ in kõmõne ilo jerbal eo an Jeova ñõn kwalok bwe tõmak eo ar ejjab mij ak emour.
Kraist “E ar Jab Mõke Kabuñburuen”
6. Ta men eo ear aurõktata iben Jisõs?
6 Ijellokin an kar jibarek men ko an lõl in ilo ran ko an, Jisõs ear jibarek men ko raurõklok im ear karmejetik kareelel eo ñõn bõk juõn mour ejokane. Ear karmijete e mõke im bokake Anij. Jen an kabuñburuen e mõke, ear ba: “Ij kõmõn men ko rej kabuñburuen [Anij].” (Jon 8:29) Ewi joñõn an kar Jisõs mõnõnõ in kõmõne men ko rej kabuñburuen Anij?
7, 8. (a) Ta eo Jisõs ear karmijete, im ta jinekjij eo kar lelok ñõn e? (b) Ta kajitõk ko jej aikwij in kajitõkin kij mõke kaki?
7 Juõn ien, Jisõs ear ba ñõn ro dri kaloran: “Nejin armij e ar jab itok bwe armij ren jerbal ñõn E, a bwe En jerbal ñõn ir, im lelok An mour bwe En binmour ñõn ro relõñ.” (Mat. 20:28) Moktalok, ke Jisõs ear kakkõl ro dri kaloran bwe mõtõn jidrik enaj aikwij in “lelok An mour,” Piter ear ba bwe men in en etolok jen e. Bõtab, men in ear jab kareel Jisõs. Ear mõnõnõ in lelok mour eo an ewãppen ñõn armij otemjej. Kin an kar Jisõs kajerbal mour eo an ilo juõn wãwen ejjab kibbon, ear lo ilju im jeklaj eo an. Kar kajerkakbiji e im “Anij e ar koutiej E kin anbijmaroñõn.” (Jerb. 2:32, 33) Kin men in, ear erom juõn joñok emõn ñõn kij.
8 Dri jilik Paul ear kakabilek dri Kristian ro ilo Rome bwe ren “jab mõke kabuñburuer” im ear kakememej ir bwe “Kraist bareinwõt E ar jab mõke kabuñburuen.” (Rom. 15:1-3) Inem ewi joñõn ar naj jerbale nan in kakabilek in an dri jilik eo im karmijete kij mõke ilo ar kajeoñwe Kraist?
Jeova Ekõnan bwe Jen lelok Men ko Remõntata ñõn E
9. Ta eo juõn dri Kristian ej kõmõne ñe ej wujleplok mour eo an ñõn Anij?
9 Ilo Israel eo etto, Kien Moses ear kalikar bwe dri Hibru ro rej ber ilo kamakoko, remaroñ anemkwoj ilo yiõ eo kein kajiljilimjuõn ak ilo yiõ in Jubili eo. Bõtab, ebar wõr juõn air jokãlet. Elañe dri kamakoko eo ej yokwe karo eo an, emaroñ kãlet ñõn berwõt ilo mweo imõn im jerbal ñõn e toõn wõt an mour. (Riit Duteronomi 15:12, 16, 17.) Jej kõmõn ejja jokãlet rot in ilo ien eo jej wujleplok ar mour ñõn Anij. Jej mõnõnõ in kõmõnmõn ankilan Anij im jab lori kõnan ko ar mõke. Ilo ar kõmõne men in, jej kwalok bwe elap ar yokwe Jeova im jekõnan korijer ñõn e ñõn indrio.
10. Ilo wãwen it eo jej an Anij, im ewi wãwen men in en kar jelet lemnok im kõmõn ko ar?
10 Elañe kwoj katak Baibel iben dri Kennan ro an Jeova, bõk kunam ilo jerbal in kwalok nan kin nuuj eo emõn, im ber ilo kwelok ko, kimij nebar yuk. Kimij kejatrikrik bwe ejjabto jen kiõ kwonaj wujleplok am mour ñõn Jeova im ba ejja kajitõk eo an dri Itiopia eo ñõn Pilip: “Lo dren e; ta ej bõprae iõ bwe in jab baptais?” (Jerb. 8:35, 36) Kõtan eo am iben Anij enaj einwõt dri Kristian ro me Paul ear jeje ñõn ir: “Kom jab ami mõke; Bwe emwij wiaik kom kin juõn wõnan.” (1 Kor. 6:19, 20) Meñe kejatrikrik eo ar ej ñõn mour ilõñ ak ion lõl, elañe emwij ar wujleplok mour eo ar ñõn Jeova, ej ar Karo. Inem, elukkun aurõk bwe jen drebij kõnan ko rekibbon im “jab korijeran armij.” (1 Kor. 7:23) Ej juõn jerammõn elap bwe Jeova emaroñ kajerbal kij ilo wãwen eo ej kabuñburuen einwõt juõn dri korijeran etiljek!
11. Ta menin katok eo kar rejañ dri Kristian ro ñõn ajelok, im ta lukkun melelen men in ekkar ñõn Kien Moses?
11 Paul ear rejañ dri tõmak ro mõtõn: “Komin lelok enbwinemi men in jurtak emour, ekwojarjar, men in kabuñburuen Anij, eñin ami jerbal men in Jitõb.” (Rom. 12:1) Nan kein remaroñ kar kakememej dri Ju ro rej Kristian kin menin katok ko rar mõtõn kabuñ eo air mokta jen air kar erom dri kalor ro an Jisõs. Iomin Kien Moses rejela bwe menin mour ko rej lelok ñõn lokatok eo an Jeova rej aikwij men ko remõntata. Jabrewõt menin mour ejjab emõn ear jab buñburuen kake. (Mal. 1:8, 13, UBS) Ejja eindrein ñe jej lelok enbwinid einwõt juõn “men in jurtak emour.” Jej lelok men eo emõntata ñõn Jeova, jab men eo bwen ar kõmõni kõnan ko ar mõke. Ñe jej wujleplok mour eo ar ñõn Anij, jej lelok ñõn e mour eo ar ekoba kajur, mweiuk ko mweied im maroñ ko ar. (Kol. 3:23) Ewi wãwen jej jerbale men in ilo mour eo ar?
Kajerbal Ien Ko Am ilo Meletlet
12, 13. Ewi wãwen jemaroñ lelok men ko remõntata ñõn Jeova?
12 Juõn wãwen ñõn lelok men ko remõntata ñõn Jeova ej ilo ar kajerbal ien ko ar ilo meletlet. (Riit Dri Epesõs 5:15, 16.) Ñõn kõmõn men in, jej aikwij in jatõr. Kilan ko an lõl in im jab wãppen eo ar rej kõmõn bwe jen kajerbal ien ko ar ñõn kamõnõnõik kij mõke ak ñõn tokjen ko ar mõke. Emol, bwe “eor ien ñõn jabrewõt men” ekoba ien kakije im jerbal bwe jen kajejit erro ko ar einwõt dri Kristian ro. (Ekk. 3:1) Bõtab, juõn dri Kristian emwij an wujleplok an mour ej aikwij jokkin wõt juõn im kajerbal ien ko an ilo meletlet.
13 Ke Paul ear lolok Atens, ear kile bwe “dri Atens otemjej, im ro drua maijet rej ber ijo, ejelok bar juõn air kõmõn, a rej berwõt im kennanek ak roñjake jabrewõt men eo ekãl.” (Jerb. 17:21) Ranin, elõñ rej bar jolok ien ko air kin men ko ejelok tokjeir. Menin kamad ko ilo ran kein rej kitibuj aluij TV, ikkure mijjin, im lale Internet. Elõñlok menin kamad ko me rej jolok ien ko ar. Elañe jejjab kejbãrok, jemaroñ jerwane aikwij ko ar ilo jitõb. Bareinwõt, jemaroñ lemnok bwe elap ar boub ñõn kejbãrok “men ko relijiklok” me ekitibuj ar korijer ñõn Anij.—Pil. 1:9, 10.
14. Ta kajitõk ko jej aikwij lukkun etali?
14 Kin men in, einwõt juõn eo emwij an wujleplok mour eo an ñõn Jeova, kwon kajitõk ibam mõke, ‘Lajrõk in men ko ij kõmõni jen ran ñõn ran rej ke kitibuj ien aõ riiti Baibel eo im kalomõnlokjen kake, im jar?’ (Sam 77:12; 119:97; 1 Tes. 5:17) ‘Ij ke kajenolok ien ñõn aõ keboje katak ko ñõn kwelok ko? Ij rejañ ke ro jet ilo aõ uak ilo kwelok ko?’ (Sam 122:1; Hib. 2:12) Nan in Anij ej ba bwe Paul im Barnebas ‘eto air ber, im re beran im konono ilo Iroij.’ (Jerb. 14:3) Kwomaroñ ke ukote wãwen ko ibam bwe kwon maroñ kalaplok am ien ilo jerbal in kwalok nan, bwelen einwõt juõn pioneer?—Riit Dri Hibru 13:15.
15. Ewi wãwen an elder ro kajerbal ien ko air ilo meletlet?
15 Ke dri jilik Paul im Barnebas rar lolok congregation eo an dri Kristian ro ilo Antiok, “eto air ber ijo iben ro dri kalor” bwe ren rejañ ir. (Jerb. 14:28) Bareinwõt ranin elder ro elap yokwe ibeir rej kajerbal ien ko air ñõn kakajur ro jet. Jen air baj kwalok nan wõt, elap an elder ro kate wõt ir ñõn lale bwij eo, bukot sip ko rejebwãbwe, im jibõñ ro renañinmij, im kõmõn jerbal ko jet ilo congregation eo. Elañe kwoj juõn brother im emwij am baptais, wãwen ko ibam rej kamaroñ yuk ke bwe kwon jibarek jerbal ko jet?
16. Ta jet ian wãwen ko jemaroñ ‘kõmmõn emmõn ñõn ro rej nukid im mõttad ilo tõmak’?
16 Elõñ rar lo lõñliñ ilo air lelok jibõñ ñõn ro rar iñtan jen jorran ko armij rej kõmõni ak jorran ko jet einwõt lañ ko. Ñõn wanjoñok, juõn sister, 60 jima an yiõ me ej jerbal ilo Bethel elõñ alen ear etal ñõn jikin ko retolok bwe en jibõñ ilo ien jorran. Etke ear kajerbal ran in kakije ko an jen jerbal ilo wãwen in? Liin ej ba: “Meñe ejelok kabel ko rejej uair iba, ear juõn jerammõn bwe iar maroñ kõmõn jabrewõt men kar aikwij jibõñ ie. Iar bõk elap kõketak jen aõ kar lo joñõn an kajur tõmak ko an ro jeiõ im jatiõ rar luji men ko mweieir.” Bareinwõt, elõñ tausan ibelakin lõl rej jibõñ ñõn kalek Imõn Kwelok ko. Ilo ar bõk kunar ilo makõtkit kein, jej “kõmmõn emmõn . . . ñõn ro rej nukid im mõttad ilo tõmak.”—Gal. 6:10, UBS.
“Ij Ber Ibemi Ien Otemjej”
17. Ta eo kwonaj kar lelok bwe kwon bõk mour indrio?
17 Mõtõn jirik jukjuk im ber in ejenolok jen Anij enaj joko. Jejjab lukkun jela ñãt men in enaj walok. Bõtab, jej jela bwe “e karu ien jen kiõ” im “bwe wãwen lõl in ejokolok.” (Riit 1 Dri Korint 7:29-31.) Men in ej kwalok joñõn an aurõk kajitõk eo an Jisõs: “Ta eo emõn an armij lelok bwe en kõrrã an?” Jenaj karmijete jabrewõt men ñõn kõmõne men eo Jeova ej kajitõk iber bwe jen maroñ bõk “mour eo emol.” (1 Tim. 6:19) Emol, elap an aurõk bwe jen bokake nan in kakabilek eo an Jisõs ñõn ‘wõnmanlok im lor e’ im ‘bukot mokta ailiñ eo.’—Mat. 6:31-33; 24:13.
18. Ta eo jemaroñ liki im etke?
18 Emol, ejjab biruru ñõn lore Jisõs aolep ien. Ej mol nan in kakkõl eo an Jisõs kinke jet rar luji mour ko air ilo jukjuk im ber in. Meñe eindrein, einwõt Jisõs, jej bõprae men in kabo eo ñõn kõmõn kõnan eo ar mõke. Eor ar liki ilo kalimur eo ear lelok ñõn ri kalor ro an emwij kabit ir ilo ebeben eo kein kajuõn: “Ij ber ibemi ien otemjej ñõn jemlokõn lõl.” (Mat. 28:20) Inem, jen kate kij joñõn wõt ar maroñ im kajerbal ien im maroñ ko ar ilo jerbal eo an Jeova. Ñe jej kõmõn men in, jej kwalok ar liki bwe Jeova enaj kejbãrok kij ñõn iñtan eo elap ak meñe jenaj mij enaj kajerkakbiji kij ilo lõl eo ekãl. (Hib. 6:10) Ilo wãwen in, jenaj kwalok bwe jej lukkun kaurõk menin letok eo kin mour.
Ta Uak ko Am?
• Ewi wãwen Jisõs ear kwalok an mõnõnõ in korijer ñõn Anij im armij?
• Etke juõn ej aikwij karmijete e mõke im ewi wãwen ej kõmõn men in?
• Ilo Israel eo etto, kain men in katok rot ko rar kabuñburuen Jeova, im ta eo men in ej katakin kij ranin?
• Ilo wãwen it ko jemaroñ kajerbal ien ko ar ilo meletlet?
[Pija ko ilo peij 26]
Ien otemjej Jisõs ear kõmõni men ko rej kabuñburuen Anij
[Pija ko ilo peij 28]
Dri Israel ro eor air kamolol rar lelok men ko remõntata ñõn rejetak kabuñ eo emol
[Pija ko ilo page 29]
Jej kabuñburuen Anij ikijen ar kajerbal ien ko ar ilo meletlet