Ta eo Kwomaroñ Katak Jen Ajiri Ro?

“EIN kwe wõt ajiri!” Ñe kar ba nan kein ñan kij ritto ro, jenaj kar lõkatip. Meñe relukkun emõn im kamõnõnõ, ajiri ro redik rejjab ritto ilo lemnak, im ejelok air iminene im meletlet eo ej ekkejel ibben joñan dettan.​—Job 12:12.

Meñe eindein, juõn ien Jesus ear ba ñan ri kalor ro an: “Emol Ij ba ñõn kom, elañe kom jab oktõk im erom einwõt ajiri redrik, kom jamin dreloñ ilo ailiñ in lõñ.” (Matu 18:3) Ta melelen nan kein an Jesus? Ta kadkad ko ewõr ibben ajiri ro redik me ritto ro rej aikwij in anõki?

Kaddeklok Ettã Buru Einwõt Juõn Ajiri

Lale wãwen eo ear kamakit Jesus bwe en ba nan kein. Ke rar tõbarlok Capernaum elikin air kar ito-itak ilo juõn ial eaetok, Jesus ear kajitõk ibben ri kalor ro an: “Ta eo kom ar akwaile dron kake ilo ial?” Ri kalor ro rar jook im ikõñ wõt, kinke rar akwele don kin wõn iair elaptata. Eliktata, ilo beran rar kajitõk ibben Jesus: “Inem wõn eo elaptata ilo ailiñ in lõñ?”​—Mark 9:33,34; Matu 18:1.

Emaroñ juõn men in bwilõñ kinke elikin enañin jilu yiõ ko in air bed ibben Jesus, ri kalor ro rej akwel wõt kin wõn iair eutiejtata. Bõtab, rein rar rittolok ilo kabuñ eo an Ri Jew, eo me elap an kar leliñlok ak kaorõk lemnak in. Alikar, kabuñ eo rar rittolok ie, ekoba jab wãppen eo air, ear jelet lemnak eo an ri kalor ro.

Jesus ear jijet, im kirtok ri kalor ro an ñane, im ba: “Elañe jabrewõt armij e kõnan bwe en mokta, e naj eliktata im korijerair otemjej.” (Mark 9:​35) Nan kein remaroñ kar kabwilõñ ir. Ilo kõmmanwa Jesus ear jumae lemnak ko an Ri Jew ro kin utiej! Inem Jesus ear kirtok juõn ajiri edik ñan ibben. Ej atbokwõjtok ajiri eo, im ej kalikarlok ak kakajurlok melele eo an: “Emol Ij ba ñõn kom, elañe kom jab oktõk im erom einwõt ajiri redrik, kom jamin dreloñ ilo ailiñ in lõñ. Inem jabrewõt eo ej mõke kõtaik e einwõt ajiri in erik, e in elaptata ilo ailiñ in lõñ.”​—Matu 18:3, 4.

Kar juõn katak elap an emõn kin ettã buru! Pijaik ilo lemnak eo am. Juõn kumi in emaan rej kabole juõn ajiri edik, im rej kalimjek ajiri eo. Ajiri eo ear lap an immijakjak ak ej liki! Ejelok junmad im kijirãt ibben! Elap an bokake im ettã buru! Aet, ajiri eo edik ear juõn joñok aibujuij im jejjet kin kadkad eo ekwojarjar ettã buru.

Ealikar ta eo Jesus ej ba ijin. Kij aolep jej aikwij kaddek kadkad in ettã buru einwõt juõn ajiri elañe jekõnan jolet Ailiñ eo an Anij. Ibwiljin ri karejar ro an Jehovah, rej jab najikin jiaik don ak utiej buru. (Dri Galetia 5:​26) Ilo mol, kadkad kein kar kadkad ko rar kõmman bwe Satan Devil eo en jumae Anij ilo jinoin. Eñin unin Jehovah ej dike kadkad kein!​​—Jabõn Kennan Ko 8:​13.

Ri Christian ro remol rej jibadõk ñan air karejar ak jerbal, jab ñan kwalok air kajur. Jekdon ewi joñan an nana jerbal eo ak joñan an ettã armij eo jej jerbal ñane, ettã buru eo emol enaj kamakit kij ñan ad jerbal ñan ro jet. Jerbal ilo ettã enaj bõktok ãjinkij ko rekalañliñ. Jesus ej ba: “Jabrewõt eo e naj bõk juõn ian ajiri rein ilo eta, ej bõk Ña; im jabrewõt eo ej bõk Ña, e jab bõk Ña, a Eo e ar jilkintok Iõ.” (Mark 9:​37) Kaddek juõn jitõbõn emmol, ettã buru, einwõt juõn ajiri, menin ej kaburukuk kij ibben Armij eo eutiej bõtata ilañ im ilal im ibben Nejin. (Jon 17:​20, 21; 1 Piter 5:⁠5) Jenaj madmõde mõnõnõ eo me ej itok jen ad lelok. (Jerbal 20:​35) Im jej juburu bwe ewõr kunad ilo ainemõn im burukuk eo ej walok ibwiljin armij ro an Anij.​​—Dri Epesõs 4:​1-3.

Ebidodo Katakin im Ej Liki

Jesus ej kalikar bar juõn katak me ritto ro remaroñ katak jen ajiri ro: “Jabrewõt eo e jab bõk ailiñ in Anij im einwõt ajiri erik, e jamin dreloñ iloan.” (Mark 10:15) Ajiri ro ejjab ettã wõt burueir, ak ebidodo katakin ir. “Rej bõk melele ak katak ko einwõt matmat ko,” juõn jinen ear ba.

Kin men in, ñan ad jolet Ailiñ eo an Anij, jej aikwij bõk im bokake ennan eo an Ailiñ eo. (1 Dri Tessalonika 2:​13) Einwõt niñniñ ro rej kab lotak, jej aikwij “mako milk emõn im erreo wõt, bwe [jen] edreklok kake ñõn lomor.” (1 Piter 2:⁠2) Ta, elañe, ebin ad melele kin juõn ian katak ko ilo Bible eo? “Ajiri ro rejjab bõjrak jen air kajitõk ‘etke?’ ñan ñe rej juburu kin uak in kajitõk ko air,” juõn ri jerbal in lale ajiri ro ear ba. Jej aikwij anõk joñok eo air. Kin menin wõnmanlok wõt im katak. Konono ibben Ri Christian ro ewõr air iminene. Kajitõk ibben Jehovah kin meletlet. (Jemes 1:⁠5) Ejelok bere bwe, elañe ejjab jokwod am jar enaj nawõnãn ilo ien eo ejejjet.​​—Matu 7:​7-11.

Bõtab, jet remaroñ lemnak, ‘Armij ro rekiblie ilo katak ejamin bidodo ke ñan an armij ro kajebwãbweik ir?’ Jab elañe ewõr juõn air ri tel emõn. Ñan wanjoñok, aolep ien ajiri ro rej bõk nan in tel jen ro jemeir im jineir. “Ro jemen im jinen rej kamol bwe ajiri ro remaroñ liki ir ikijen air kejbãrok im kabwe aikwij ko air kajjojo ran,” juõn jemen ear ba. Aet ewõr ibbed ejja un ko wõt ñan ad liki jemed ilañ, Jehovah. (Jemes 1:​17; 1 Jon 4:​9, 10) Jehovah ej letok nan in tel ko an rejejjet im mol ikijen Nan eo an. Jitõb kwojarjar im dolul eo an rej kainemõn im jibañ kij. (Matu 24:​45-​47; Jon 14:​26) Ilo ad kortokjen men in letok kein enaj kejbãrok kij jen ad jorrãn ilo jitõb.​​—Sam Ko 91:​1-​16.

Einwõt juõn ajiri ej lukkun liki jemen im jinen, elañe jej kaddeklok liki eo emol ilo Anij ej bareinwõt letok ainemõn ilo lemnak. Juõn emaan eo ej kõmman etale ko kin Bible ej ba: “Ilo ien eo jej ajiri jej illok ilo juõn ial ilo ad jab kõllã wõnãn, im jejjab jelã ewi wãwen jenaj tõbar jemlokin ial eo ad, im meñe eindein, ejelok ad bere bwe ro jemed im jined renaj bõklok kij ñan ijo ilo ejelok jorrãn.” Ewõr ke ibbed liki rot in ilo Jehovah ke jej etal ilo ial eo ad ilo mour?​​—Aiseia 41:⁠10.

Liki Anij kin aolepen buruõd ej jibañ kij ñan ad bõprae lemnak im kõmman ko me remaroñ kokkure mour in Christian eo ad. Ewõr ibbed liki eo emol ilo nan ko an Jesus bwe Jemed ilañ ejelã kin jerbal ko ad im bwe toan wõt ad bukõt mokta Ailiñ eo an Anij im kwojarjar eo an, Anij enaj lale im kejbãrok kij. Menin enaj jibañ kij ñan ad jumae menin in kabo eo ñan ad likit aikwij ko ilo kanniek iman im ilo ejja ien eo wõt kajekdon eddo ko ad ilo jitõb.​—Matu 6:​19-34.

“Ilo Junmare Komin Niñniñ”

Meñe rar lotak ilo jab wãppen, ajiri ro redik erreo burueir im lemnak eo air. Kin un in, Bible eo ej rejañ Christian ro: “Ilo junmare komin niñniñ.”​—1 Dri Korint 14:⁠20.

Lemnak kin Monique eo me lalem an yiõ, ear lukkun mõnõnõ im ba ñan jinen: “Ledik eo mõtta ekãl, etan Sarah, emõjalũlũ kolan bõran einwõt bõra!” Kar jab konono kin kil rot eo im ailiñ ta eo an Sarah. Juõn jinen ear ba: “Ajiri ro redik rejaje oktan color. Rejaje kin oktak eo ikõtan armij ro ak kalijeklok.” Ilo wãwen in, elukkun emõn an ajiri ro kalikar lemnak eo an Anij eo ad ejjab kalijeklok, me ej yokwe armij jen ailiñ otemjej.​—Jerbal 10:34, 35.

Ajiri ro bareinwõt ewõr ibbeir maroñ eo elap ñan jeorlok bwid. Juõn jemen ear ba: “Ñe Jack im Levi rej akwel ak ire, kimij ba ñan erro bwe ren jolok an don bwid, im ejjab to tokelik rej bar mõnõnõ im ikkure ibben don. Rejjab inebata, ak bõkliñtak men ko remotlok, ak iun don ñan kõmmani men ko eo juõn ej ba mokta jen air jeorlok bwid eo. Rej bar mõnõnõ ibben don im jino bar ikkure.” Juõn joñok elap an emõn ñan an ritto ro anõke!​—Dri Kolosse 3:13.

Bar juõn, ajiri ro redik rej mõnõnõ in kwalok bwe ewõr juõn Anij. (Dri Hibru 11:6) Air mol ekkã an kamakit ir ñan air kwalok nan ilo beran ñan ro jet. (2 Kiñ Ro 5:2, 3) Jar ko air relamwan im jen buru remaroñ kamakit juõn eo ebin buruen. Im ñe rej iion kabo, remaroñ kwalok juõn jutak ekajur kin men eo ejimwe. Ajiri ro rej juõn menin letok emõn!​—Sam Ko 127:3, 4.

Aibujuij ej Bar Jeblak

Kwomaroñ lemnak, ‘Ritto ro remaroñ ke bar bõk kadkad ko raibujuij ear wõr ibbeir ke rar ajiri?’ Uak eo ebidodo im ekõketak ej aet! Emol kien eo an Jesus ñan “erom einwõt ajiri redrik” ej kamol bwe menin emaroñ walok.​—Matu 18:⁠3.

Ñan wanjoñok: Juõn kumi in armij ro rej kõmmani pija ko rejorrãn remaroñ jerbal bwe ren kõkãl juõn pija rar jiñaiki me elukkun lap wõnãn. Wãwen eo rej kõmmane, rej jolok bũñalñal ko rej eddeb ion pija eo im bar ukõt wãwen ko rebwid ro jet rar kõmmani mokta. Elikin kate eo elap an rein, jiña eo ej walok unokan an emõn im aibujuij ñan an aolep lo. Ejja wãwen dein lok wõt, ibben kate, jibañ jen jitõb kwojarjar eo an Jehovah, im jibañ eo eyokwe an congregation eo an Christian, jemaroñ bar bõk kadkad kein raibujuij me rar ebul ke jaar ajiri.​—Dri Epesõs 5:⁠1.

[Pija eo ilo peij 4]

Ajiri ro redik ejelok air kalijeklok, im emõkaj air jeorlok bwid im meloklok

[Pija eo ilo peij 5]

Ettã buru ej biktokin ajiri ro