Jesus Ear ke Konono kin Kijeek in Hell?
JET ro me rej tõmak kin katak eo kin kijeek in hell rej jitõñlok ñan nan ko an Jesus kar jei ilo Mark 9:48 (ak eon 44, 46). Ear konono kin likaakrak ko rejjab maroñ mij im kijeek eo ejjab kun. Elañe juõn ear kajitõk ibbam kin nan kein, enaj kar ewi wãwen am uak?
Ekkar ñan ukok in Bible eo rej kajerbale, armij eo emaroñ readi eon 44, 46, ak 48 kinke eon kein rej kwalok ejja melele eo wot ilo jet ukok in Bible ko.a New World Translation (Ukok in Lal eo Ekãl kin Jeje ko Rekwojarjar) ej ba: “Im elañe mejõm ej katibñil yuk, kwon joloke, bwe emõnlok am deloñ kin juõn wõt mej ilo ailiñ in Anij jen ruo mej im jolok yuk na iloan Gehenna, ijo ejjab mij air likaakrak im kijeek eo ejjab kun.”—Mark 9:47, 48.
Jekdon ta, jet rej ba bwe nan ko an Jesus rej rejetak lemnak eo bwe elikin mij, aan eo an ri nana ro enaj eñtan ñan indio. Ñan wanjoñok, juõn kamelele jen juõn ukok in Bible ilo Spain ilo University in Navarre ej ba: “Iroij ej kajerbal [nan kein] ñan jitõñlok ñan eñtan ko ilo hell. Ekkã air kajerbal ‘likaakrak eo ejjab mij’ ñan kameleleik ajlok eo ejelok jemlokin me ro kar liakelok ir ñan kijeek eo ilo hell rej eñtan kake; im ‘kijeek eo ejjab kun,’ kar kameleleiki einwõt kaje eo kin kõmetak enbwiniir.”
Bõtab, keidi mõk nan ko an Jesus ibben eon eo eliktata ilo kanan eo an Aiseia.b Ejjab alikar ke bwe Jesus ear jitõñlok ñan nan ko ilo Aiseia chapter 66? Ijo ri kanan eo ej konono kin air kar diojlok “jen Jerusalem ñan Komlal Hinnom (Gehenna), ijo rekin katok kin armij ie (Jer 7:31) im tokelik ear erom jikin jokobij eo an jikin kwelok eo. Ealikar bwe nan in kõkkar eo ilo Aiseia 66:24 ejjab ikijen an kaeñtan armij ro ie; ej konono kin enbwin ko remij. Men eo ejjab mij ej jitõñlok ñane ej likaakrak ko—jab armij ro remour ak aan ko reban mij. Inem, ta melelen nan ko an Jesus?
Lale kamelele eo kin Mark 9:48 ilo ukok eo an Catholic El-evangelio de Marcos. Análisis lingüístico y comentario exegético, Volume II: “Nan [ko] kar bok jen Aiseia (66,24). Ijin ri kanan eo ej kwalok ruo wãwen rekin kokkure enbwinin ro remij: kõtlok bwe ren kõt im tile ir . . . Kinke nan kein likaakrak im kijeek ilo eon in rej walok ibben don, men in ej kabinlok melele eo kin kokkure. . . . Wãwen kokkure kein jimor rej kwalok kaki bwe rej ñan indio kin air kajerbal nan ko einwõt ‘ejjab kun im ejjab mij’: melelen ejelok ial in ko jeni. Ilo kamelele in, men ko wõt im remaroñ bedwõt ej likaakrak im kijeek eo—ejjab armij—im rej jimor kokkure jabdewõt men ej bed iumin kajur eo air. Kin men in, ejjab kamelele kin eñtan indio, ak kin melele eo bwe ro rej bõk jorrãn in rejamin naj jerkakbiji, melelen bwe mij eo air ej indio. Inem, [kijeek] eo, ej juõn kakõllan kokkure eyu.”
Jabdewõt eo ej jelã bwe Anij ej yokwe im jimwe en kar maroñ kile bwe ej juõn menin kõmmanwa ñan melele nan ko an Jesus ilo wãwen in. Ear jab ba bwe ro renana renaj iion eñtan indio. Jen men in, rej bed ilo kauwatata kin jako eo me ejelok kejatdikdik kin jerkakbiji.
[Kamelele Ko Itulal]
a Jeje in Bible ko rejimwe tata rar jab likit eon kein 44 im 46. Ri meletlet ro rej kile bwe tokelik kar kobaiktok eon kein ruo. Professor Archibald T. Robertson ear je: “Jeje ko remor tata im emõn tata rejjab kakobaik eon kein ruo. Rar itok jen lokbook in jeje ko rej naetan mõttan ko jen Western im Syrian (Byzantine). Rej baj eliji wõt eon 48. Kin men in, kimar [jolok] eon ko 44 im 46 kinke rejjab mol.”
b “Im re naj drioijlok im kalimjek ubõn armij ro rar kokkure kien ko Aõ: likakrõk eo air e jamin mij, im kijeek eo air e jamin kwun; im re naj men in jõjõik ñan kõniek otemjej.”—Ais. 66:24.