Kajitõk ko Jen Ro Rej Read
Jilu ian Gospel ko rej kamelele kin abõnõnõ eo ear walok kin an juõn armij kabit enbwinin Jesus kin oil eo elap wõnãn. Elõñ ri jilek ro rar abõnõnõ kake ke, ak kar Judas wõt?
Jemaroñ lo bwebwenato in ilo Gospel ko an Matthew, Mark, im John. Alikar bwe Judas ear bed imantata im tel ilo abõnõnõ in, im jet ian ri jilek ro rar errã ibben. Abañ in ej kalikar kin unin ad kõnan kamolol bwe ewõr Gospel ko emen ibbed. Men eo kajjojo ian ri jeje ro rar jeje kake kar jejjet, ak rejjab kwalok ejja tibdikdik ko wõt. Ilo ad keidi bwebwenato kein emen ibben don, jemaroñ bõk juõn melele eyu, im elõñlok tibdik ko kin elõñ men ko rar walok.
Bwebwenato eo ilo Matu 26:6-13 ej kwalok kin jikin eo—mweo imõn Simon ri leper eo, ilo Bethany—ak ejjab kwalok ãt eo etan kõrã eo me ear lutõkelok oil in kañajñaj eo ion bõran Jesus. Matthew ear ba: “Ke dri kaloran rej loe, rej illu” im abõnõnõ bwe remaroñ kar wiakake oil eo im bõk money eo im leloke ñan ro ri jeramel.
Gospel in Mark ej kakobaik enañin aolepen tibdik kein kin bwebwenato in. Ak ear bareinwõt ba bwe lio ear rupe nien. Kobban nien kar oil in kañajñaj eo im ear lukkun “nard,” elap an lap wõnãn im rar jilkintok e jen India. Ak kin abõnõnõ eo, Mark ear reporte bwe rar “illu,” im “lotan e.” (Mark 14:3-9) Inem gospel ko ruo rar kwalok bwe elõñlok jen juõn wõt ri jilek rar bõk kunair ilo abõnõnõ eo. Ewi wãwen an kar jinoe?
John, eo ear juõn ri kamol, ear kakobaik tibdikdik ko rej jelet bwebwenato in. Ear kwalok ãt eo etan kõrã eo—Mary, eo ear jatin Martha im Lazarus. John ear kwalok tibdik in bareinwõt, eo me jemaroñ watõke einwõt juõn nan in nebar im jab juõn nan eoktak: Ear “kabit neen Jisõs, im kõmõraik neen kin kolan bõran.” Ilo ad kakobaik bwebwenato kein, jemaroñ lo bwe Mary ear lutõkelok oil eo, me John ear kamole kar “nard erreo,” ion bõran im neen Jesus. Kõtan eo ikõtan John im Jesus kar lukkun ebake don im ear illu ñe jabdewõt armij ear konono nae E. Jej read: “Juõn ian ro dri kaloran, Judas Iskariõt, eo e naj ketõk E, e ba, Etke ar jab wiakake men in kabit in kin jilubuki s̃illiñ, im lelok ñõn ro dri jeramel?”—Jon 12:2-8.
Emol, Judas ear “juõn ian ro dri kaloran,” ak kwomaroñ lo illu eo an John ñe juõn armij eo ej bed ilo kõtan in ak ej karõk ñan ketõk Jesus. Ri ukok eo Dr. C. Howard Matheny ear ba kin Jon 12:4: “Nan eo ‘e naj ketõk’ [ak, “enaj kar ketõk”] ej kalikar kin juõn men kar kõmman mantak im wõnmanlok wõt. Men in ej kwalok bwe kõmman eo an Judas ñan ketõk Jesus ear jab juõn men ej kab kõmmane wõt kinke ear kalmenlokjen im karõk kake elõñ ran ko lok iman.” John ear kakobaiklok lemnak eo bwe Judas ear abõnõnõ “jab bwe ej bõk ñõn ro dri jeramel; a bwe e dri kwot, im bõjo iben, im bõk men ko iloan.”
Alikar bwe ri kwot eo Judas ear jinoe abõnõnõ eo bwe en kalaplok men ko emaroñ kwote elañe rar wiakake oil in kabit eo elap wõnãn im rar kadeloñ wõnãn iloan box in money eo ear bed ibben. Ke Judas ear bõkmantak abõnõnõ in, jet ian ri jilek ro jet rar bõk kunair ilo abõnõnõ in bareinwõt kinke rar lemnak bwe abõnõnõ eo an ear jimwe. Bõtab, Judas, kar e eo elaptata ear abõnõnõ kake men in.