Kwoj ke “Mweie Ñõn Anij”?

“Ein drein eo ej likit mweiuk ko mweien ñõn e wõt, im e jab mweie ñõn Anij.”​—LUK 12:⁠21.

1, 2. (a) Armij ro rar mõnõnõ in karmijete men ko relap kin ta? (b) Ta aitwerõk im men in kauwatata eo Ri Christian ro rej jelmaiki?

KABUK mweiuk ejjab juõn ikkure me ajiri ro wõt rekõnan ikkure kake. Ilo elõñ ebeben ko im ailiñ ko ekkã air lukkun kõmmani ilo mour bareinwõt. Ñan wanjoñok, ilo ebeben eo kein ka 19, elõñ armij rar kaiurlok in kabuk gold ilo Australia, South Africa, Canada, im United States bwe ren lukkun mweie. Jibadbad in ear kareel tok armij ro jen jikin ko retolok me rar mõnõnõ in illok jen moko imwiir im ro rejitenburu ibbeir ñan bukõt air mweie ilo ailiñ ko rar jejinet kake im iumin wãwen ko rebin. Aet, elõñ armij rej mõnõnõ in likit mour eo air ilo kauwatata im rej katok kin elõñ men ko bwe ren jibadõk air mweie einwõt an burueir kõnan.

² Meñe jarlepju in armij ro rainin rejjab bõk kunair ñan kabuk mweiuk, rej aikwij kate im jerbal ñan kabwe aikwij ko air. Ñan kõmman men in ilo jukjuk im bed in emaroñ bin im juõn aitwerõk elap. Ebidodo ñan ad maroñ mad kin mõñã, nuknuk, im jikin jokwe im ej kõmman bwe jen jerwane ak meloklok kin men ko raorõklok. (Dri Rom 14:​17) Jesus ear kwalok juõn wanjoñok, ak parable, me ear jejjet an kwalok kin biktok ak wãwen in an armij. Jemaroñ loe ilo Luk 12:​16-21.

3. Kwalok ilo tukadu kin wanjoñok eo an Jesus eo kar jeje kake ilo Luk 12:​16-21.

³ Jesus ear kwalok kin wanjoñok in ilo ejja ien eo wõt ear konono kin aikwij eo ñan kejbãrok nae ankwonak ak arõk mweiuk, eo jaar etale ilo tibdikin ilo katak eo lok iman. Elikin an kar kakkõl nae ankwonak, Jesus ear konono kin juõn emaan emweie me ear jab juburu kin imõn ekan ko an me rar obrak kadede kin men ko remõn ak ear rupi ñan kalek ko jet relaplok bwe en maroñ aini elõñlok men ko remõn. Ke ear lemnak bwe ebojak in kakije im lañliñ kin juõn mour emõn, Anij ej jiroñ e bwe enaj mij im aolep men ko remõn leo ear kakoni naj liloki ñan bar juõn. Inem Jesus ear kwalok nan in kajemlok eo: “Ein drein eo ej likit mweiuk ko mweien ñõn e wõt, im e jab mweie ñõn Anij.” (Luk 12:​21) Ta eo jemaroñ katak jen parable in? Ewi wãwen jemaroñ jerbale parable in ilo mour eo ad make?

Juõn Emaan Eo Ewõr an Abañ

4. Kain armij rot eo kar kwalok kake ilo parable eo an Jesus?

⁴ Wanjoñok eo Jesus ear kajerbale armij ro ilo elõñ ailiñ ko rejelã kake. Jej lo bwe Jesus ear jino bwebwenato eo ilo an baj ba: “Jikin kallip ko an juõn armij emweie elõñ air jebar leen.” Jesus ear jab ba bwe leo ear bõk men ko mweien ilo wãwen ko retao im jab jimwe ekkar ñan kien. Melelen men in bwe, leo ear jab juõn armij enana. Ilo mol, jen nan ko an Jesus, jej bõk lemnak eo bwe leo ilo parable eo ear lukkun niknik ilo an jerbal. Jemaroñ melele bwe ear juõn emaan eo ear karõk lok iman im kõmman jortoklik kin ilju im jeklaj, bõlen ilo an lemnak kin tokjen eo ñan family eo an. Kin men in, ekkar ñan lemnak eo an lal in, leo emaroñ kõkkar kin juõn emaan eo elap an jerbal im ear tiljek in kajejjet eddo ko an.

5. Ta abañ eo leo ilo parable eo an Jesus ear jelmaiki?

⁵ Jekdon ta wãwen eo, Jesus ear ba bwe leo ilo parable eo ear juõn eo emweie, melelen juõn eo ededelok an kar lõñ mweiuk ko ibben. Bõtab, einwõt Jesus ear kwalok, leo emweie ear wõr juõn an abañ. Jikin kallip eo an ear jebar leen elõñlok jen kar kõtmene kake, elaplok jen ear aikwiji ak ear maroñ kejbãroke. Ta eo en kar kõmmane?

6. Ta jokãlet ko elõñ ri karejar ro an Anij rej jelmaiki rainin?

⁶ Elõñ ian ri karejar ro an Jehovah rainin rej jelmae wãwen ko einlok wõt ri mweie eo. Ri Christian ro remol rej kate ir bwe ren mol, tiljek, im niknik ñe rej jerbal ilo jikin jerbal ko air. (Dri Kolosse 3:​22, 23) Meñe rej ri jerbal ñan bar juõn armij ak ewõr air make business, ekkã air lo tõbrak ilo men ko rej kõmmani. Ñe ebellok ñan ir juõn jerbal eutiejlok ak ien ko rekãl ñan kalaplok business eo air, rej aikwij kõmman juõn bebe. Ren bõk ke jerbal eo eutiejlok ak kalaplok business eo air? Eindein lok wõt, elõñ Ri Kennan jodikdik ro ej emõn air wõnmanlok ilo school. Tokjen men in, remaroñ bõk nebar ak scholarship ko (money in jibañ jen juõn school, university, ak dolol ko jet ñan kõllã kin wõnãn ri school eo) ñan etal ñan school ko reutiej im buñbuñ. Ren kar baj lore wõt ke ial eo me elõñ armij rej lore im bõk men in letok eo?

7. Ewi wãwen leo ilo parable eo an Jesus ear kamadmõde abañ eo an?

⁷ Kiõ jen jeblak ñan wanjoñok eo an Jesus. Ta eo ri mweie eo ear kõmmane ke jikin kallip eo an ear jebar elõñ leen im ear ejelok jikin ñan aini leen jonikõn eo an? Ear bebe ñan rupe jikin kein im kalek ko jet relaplok ñan aini bwen mõñã ko im mweiuk ko remõn. Joñan an lap an karõk in kõmman bwe en eñjake an jokane im juburu ear lemnak: “Im I naj ba ñõn aõ, Aõ, elõñ mweiuk ko mweiõm emwij pojõk ñõn elõñ yiõ; kwon kakije, mõña, irak im lõñliñ.”​—Luk 12:⁠19.

Etke E ‘Bwebwe’?

8. Ta men eo eaorõk leo ilo parable eo an Jesus ear likjap kake?

⁸ Bõtab, einwõt Jesus ear kwalok, karõk eo an ri mweie eo ear lelok juõn eñjake in jokane ear jab mol. Meñe ear einwõt ñe ekeie, ear jab kitibuj juõn men elukkun aorõk​—ankil an Anij. Leo ear lemnak kin e make, kin wãwen eo ear maroñ kakije im mõñã, idak, im lañliñ kin men ko mweien. Ear lemnak bwe kin an ‘lõñ mweiuk ko mweien,’ enaj bareinwõt wõr “elõñ yiõ” ibben ñan mour. Ak ej juõn men ekaburomõjmõj ibben, kinke ear jab eindein an walok. Einwõt Jesus ear ba mokta, “an armij mour e jab kin an lõñ men ko an.” (Luk 12:​15) Boñin eo wõt, aolep men ko me leo ear kate e kaki rar jemlok, bwe Anij ear ba ñan e: “Kwo bwebwe, boñinin naj kajitõk ibõm kin am; inem e naj an wõn men ko kw’ar kapoji?”​—Luk 12:⁠20.

9. Etke kar naetan leo ilo parable eo bwe e bwebwe?

⁹ Kiõ, jej itok ñan point eo eaorõk ilo wanjoñok eo an Jesus. Anij ear naetan leo bwe e bwebwe. Juõn dictionary kin nan ko ilo kajin Greek ej kamelele bwe wãwen ko jet kin nan in rej kajerbali “ien otemjej ej kwalok kin an jabwe melele.” Dictionary eo ej ba bwe ilo parable in, Anij ej kajerbal nan eo ñan kajedmatmat “karõk ko ejelok tokjeir an ri mweie eo ñan ilju im jeklaj.” Nan in ejjab jitõñlok ñan juõn eo ejabwe jelãlokjen ibben, ak ñan “juõn eo e makoko in kile bwe ej aikwij atartar ion Anij.” Kamelele eo an Jesus kin ri mweie eo ej kakememej kij kin ta eo ear ba tokelik ñan Ri Christian ro ilo congregation eo ilo Laodicea, Asia Minor ilo ebeben eo kein kajuõn: “Bwe kwoj ba, Ij mweie, im I ar koorlok mweiuk ko, im ejelok aõ aikwij; im kwo jaje bwe kwoj nanatõmmõm im dri ememlokjen, im jeramel, im bilo im kelwan.”​—Reveles̃õn 3:⁠17.

10. Ñe ‘elõñ mweiuk ko mweied,’ etke ejjab melelen bwe enaj “elõñ yiõ” ko in ad mour?

¹⁰ Emõn bwe jen kalmenlokjen kake katak in. Jemaroñ ke einwõt leo ilo parable eo​—boub wõt ilo jikin jerbal eo ñan korlok ‘elõñ mweiuk ko mweied’ ak jej likjap in kõmmane ta eo ej men in aikwij ñan bõk kejatdikdik eo bwe en “elõñ yiõ” ko in ad mour? (Jon 3:16; 17:⁠3) Bible eo ej ba: “Mweiuk ko ejelok tokjeir, ilo ran eo ran in illu,” im “eo ej liki mweiuk ko an, e naj buñ.” (Jabõn Kennan Ko 11:​4, 28) Kin men in, Jesus ear kobaik nan in kakkõl in eliktata ilo parable eo an: “Ein drein eo ej likit mweiuk ko mweien ñõn e wõt, im e jab mweie ñõn Anij.”​—Luk 12:⁠21.

11. Etke ejelok tokjen ñe juõn ej kalek kejatdikdik im jokane eo an ion men ko mweien?

¹¹ Ke Jesus ear ba “ein drein eo ej,” ear kalikar bwe men eo ear walok ñan ri mweie eo ilo wanjoñok eo enaj bareinwõt walok ñan ro rej kalek mour eo air​—kejatdikdik im jokane eo air​—elaptata ion mweiuk ko. Bwid eo ejjab kin air ‘korlok mweiuk ko ñan ir make’ ak kin air likjap in kõmman bwe ren “mweie ñõn Anij.” Ri kalor eo James ear kwalok juõn nan in kakkõl einlok wõt in ke ear je: “Komin lale mõk, komeo komij ba: Rainin ak ilju kim naj etal ñõn jikin kwelok en, im bed ijo iomin juõn yiõ, im wia im jibarek mweiuk ko: Ijoke kom jaje ta eo e naj walok ilju.” Ta eo rej aikwij in kõmmane? “A emõn komin ba, Elañe Anij e kõnan, kim naj mour, im kõmõn men in ak men eo.” (Jemes 4:​13-15) Jekdon ewi joñan an mweie juõn armij ak jete mweiuk ko ewõr ibben, aolepeir renaj ejelok tokjeir elañe ejjab mweie ñan Anij. Inem, ta melelen bwe juõn en mweie ñan Anij?

Kwon Mweie ñan Anij

12. Ta eo jej aikwij kõmmane bwe jen mweie ñan Anij?

¹² Ilo nan ko an Jesus, mweie ñan Anij ej oktan korlok mweiuk ko ñan e make. Inem, Jesus ear ba bwe men eo elaptata ad aikwij itoklimo kake en kar jab ñan korlok mweiuk ko ak ñan lañliñ kin men ko mweied. Jen an eindein, jej aikwij kajerbal mweiuk ko ad ilo juõn wãwen en kakõmõnmõnlok, ak kalek, kõtan eo ad ibben Jehovah. Elañe jej kõmmane emol ad naj mweie ñan Anij. Etke? Kinke enaj kabellok aor eo ñan elõñ jerammõn ko jen e. Bible eo ej jiroñ kij: “Kejerammõn jen Jeova, ej namweien armij; im E jab kobaik buromõj na iben.”​—Jabõn Kennan Ko 10:⁠22.

13. Ewi wãwen kajerammõn jen Jehovah ej “namweien armij”?

¹³ Ñe Jehovah ej kajerammõn armij ro an, ien otemjej ej lelok ñan ir men ko remõntata. (Jemes 1:​17) Ñan wanjoñok, ke Jehovah ear lelok ñan Ri Israel ro juõn jikin air bed, ear juõn “ene e bwijliplip kin milk im hõnni.” Meñe kar kwalok kin ailiñ in Egypt ilo wãwen in bareinwõt, eneo me Jehovah ear lelok ñan Ri Israel ro ear oktak ilo juõn wãwen eaorõk. Ear “juõn ene Jeova am Anij ej lale,” Moses ear jiroñ Ri Israel ro. Ilo bar juõn wãwen ba, renaj lo tõbrak ko kinke Jehovah enaj lale ir. Elañe Ri Israel ro rar tiljek wõt ñan Jehovah, enaj kar kajerammõn ir, im renaj lañliñ kin juõn wãwen mour me ear utiejlok jen aolep ailiñ ko ibelakiir. Aet, kajerammõn jen Jehovah ej men eo me enaj “namweien armij”!​—Bwinbwin 16:13; Duteronomi 4:​5-8; 11:​8-15.

14. Ta eo ro remweie ñan Anij rej lañliñ kake?

¹⁴ Ro remweie rej itoklimo kin ewi wãwen rej walok iman mejen ro jet. Men in ekkã air kwalok kake ilo wãwen mour eo air. Rekõnan kabwilõñ armij kin ta eo Bible ej naetan “wuj wan an mour in.” (1 Jon 2:​16) Ilo oktan, ro remweie ñan Anij rej bõk buñburu im joij eo an im ewõr juõn kõtan ebak ibben. Ilo air bed ilo juõn wãwen rot in ej kõmman air mõnõnõ im jokane, men ko me mweiuk ko rejjab maroñ litoki. (Aiseia 40:​11) Kajitõk eo in, Ta eo jej aikwij kõmmane bwe jen mweie ñan Anij?

Mweie Iman Mejen Anij

15. Ta eo jej aikwij kõmmane bwe jen mweie ñan Anij?

¹⁵ Ilo wanjoñok eo an Jesus, leo ear karõk lok iman im kate ñan korlok mweiuk ko ñan e make, im kar naetan bwe e bwebwe. Inem, bwe jen mweie ñan Anij, jej aikwij kate im bõk kunad joñan wõt ad emaroñ ilo jerbal ko me emol air aorõk im wõr tokjeir iman mejen Anij. Ian men kein ej men eo Jesus ear kakien kake: “Inem komin ilok, im kõmõn dri ailiñ ko otemjej bwe ren dri kalora.” (Matu 28:​19) Ñe jej kajerbal ien, kajur, im kabel ko ad, jab ñan kakõmõnmõnlok wãwen mour eo ad make, ak ilo jerbal in kwalok nan kin Ailiñ eo im kõmman ri kalor ro ej einwõt ñe jej kadeloñ money ilo juõn account. Ro rar kõmmane rar madmõd juõn wõnãn elap ilo jitõb, einwõt ej alikar ilo bwebwenato in tok.​—Jabõn Kennan Ko 19:⁠17.

16, 17. Ta bwebwenato ko kwomaroñ konono kaki ñan kwalok kin ta wãwen mour eo ej kõmman bwe juõn en mweie iman mejen Anij?

¹⁶ Lemnak kin bwebwenato eo kin juõn Christian emaan ilo juõn ailiñ ilo Asia. Ear jerbal einwõt juõn computer technician (juõn eo ekabel in kõmman computer ko) im ear bõk juõn wõnãn elap. Bõtab, jerbal eo an ear bõk enañin aolep ien ko an im men in ear kõmman an eñjake an mõjno ilo jitõb. Eliktata, jen an kajeoñ in bukõt an utiej ilo jerbal eo an, ear kajemloke im ear jino bar juõn jerbal in kõmman ice cream im wiakake iturin ial bwe en laplok an ien ñan lale aikwij im eddo ko an ilo jitõb. Ri jerbal ro an mokta rar kajirere kake e, ak kar ta jemlokin? “Emol, ear laplok wõnãn aõ jerbal ke iar jerbal in kõmmane computer ko,” ear ba. “Ak elaplok aõ mõnõnõ kiõ ilo jerbal in kinke ejelok inebata ko me kar wõr ibba ilo jerbal eo mokta. Im elaptata an aorõk, ij eñjake aõ ebaklok Jehovah kiõ jen mokta.” Oktak in ear kamaroñ Ri Christian in ñan an deloñ in jerbal in kwalok nan full-time, im kiõ ej jerbal ilo ra eo an Ri Kennan ro an Jehovah ilo ailiñ eo an. Kajerammõn jen Jehovah emol an “namweien armij.”

¹⁷ Bar juõn wanjoñok ej ikijen juõn kõrã eo ear rittolok ilo juõn family me elap an kaorõk education ak jelãlokjen. Lio ear bed ilo university ko ilo France, Mexico, im Switzerland im ear wõr kejatdikdik eo ibben ñan bõk juõn jerbal elap an emõn. “Ear lap tõbrak ilo mour eo aõ; armij rar kautiej iõ im iar bõk jerammõn ko ejej uair,” lio ear ba, “ak ilo buruõ iar jab juburu im mõnõnõ.” Inem ear katak kin Jehovah. Ear ba: “Ke iar wõnmanlok ilo jitõb, kõnan eo aõ ñan kabuñburuen Jehovah im ñan ukõtlok jidik kin ta eo ear letok ñan iõ ear jibañ iõ ñan lo ilo alikar ial eo ij aikwij bõke​—jerbal ñan e full-time.” Ear to jen jerbal eo an im ejjabto tokelik ear baptais. Iumin 20 yiõ ko rej kab motlok, ear mõnõnõ in bed ilo jerbal in kwalok nan full-time. “Jet rar lemnak bwe iar jerwane kabel ko aõ,” lio ear ba, “ak rej kile aõ mõnõnõ, im rej kautiej kien ak nan in kaiñi ko ij jerbale ilo mour eo aõ. Ran otemjej ij jar ñan Jehovah ñan an jibañ iõ kwalok ettã buru bwe en buñburuen kake iõ.”

18. Einwõt Paul, ewi wãwen jemaroñ mweie ñan Anij?

¹⁸ Saul, eo ear erom ri jilek Paul, ear wõr juõn jerbal emõn ear maroñ jibadõke. Ak, tokelik ear je: “Ij watõki men otemjej jerata wõt, kin an kanuij emõn aõ jela Kraist Jisõs aõ Iroij.” (Dri Pilippai 3:​7, 8) Ñan Paul, men ko mweien ear bõk ikijen Christ ear laplok jen jabdewõt men me lal in ear maroñ letoke. Eindein, ilo ad jolok jabdewõt jibadbad ko rekibbon im jibadõk juõn mour etiljek ñan Anij, kij bareinwõt jenaj maroñ lañliñ kin juõn mour me emweie ilo mejen Anij. Nan in Anij ej kamol ñan kij: “Wõnan etã buru im mijõk Jeova, mweiuk, im nebar, im mour.”​—Jabõn Kennan Ko 22:⁠4.

Kwomaroñ Ke Kamelele?

• Abañ et eo ear bed ibben leo ilo wanjoñok eo an Jesus?

• Etke kar naetan leo ilo parable eo bwe ebwebwe?

• Ta melelen bwe jen mweie ñan Anij?

• Ewi wãwen jemaroñ mweie ñan Anij?

[Pija eo ilo peij 28, 29]

“Kejerammõn jen Jeova, ej namweien armij”

[Pija eo ilo peij 30]

Ewi wãwen ien ko remõn ñan utiejlok im korlok mweiuk emaroñ juõn melejoñ ebin?

[Pija eo ilo peij 31]

Etke kar naetan ri mweie eo bwe ebwebwe?