Kajeoñwe Tõmak eo Air

“Lo Ña Dri Korijeran Iroij!”

MERI ear ilbõk ke dri lotok eo ear dreloñ iloan mweo imõn. Dri lotok eo ear jab bukot jemen ak jinen. Ak ear iten bukot e! Meri ear kile bwe dri lotok eo ejjab juõn dri Nazeret, kinke ilo bukwon eo an edrik ear biruru air kile ruwamaejet ro. Im armij in ear alikar an oktõk. Ear yokyokwe Meri ilo juõn wãwen ekãl an kar roñ, ilo an ba: “Yokwe yuk, kwe elap am jerammõn, Iroij ej ber ibõm.”​—Luk 1:​28.

Ilo wãwen in Baibel eo ej kwalok ñõn kij kin Meri, eo nejin Eli, jen bukwon in Nazeret ilo Galili. Ilo ien in ear kwalok kin e, Meri ear aikwij kõmõn bebe ko raurõk ilo mour eo an. Ear pojõk in mareik dri karpenter eo Josep, eo ear jab mweie ak ear juõn eo ear tiljek ñõn Anij. Inem ealikar bwe wãwen mour eo an ear einwõt ñe emwij karõke, juõn mour elamwan ilo an naj jerbal einwõt lio belen Josep, im jibõñ e kakajiririk ajiri ro. Ak ilo idriñ, dri lotok in ear lelok ñõn e juõn jerbal jen Anij eo an me enaj ukot wãwen mour eo an.

Kwomaroñ bwilõñ bwe Baibel eo ejjab lukkun kalikar ñõn kij kin aolepen mour eo an Meri. Jidrik wõt an kwalok kin wãwen kar kakajiririk e, karkar ko karkarin, im ejjab ba jabrewõt kin baotokin. Ak, ebwe an Nan eo an Anij kwalok kin e.

Ñõn ar jela kin Meri, jej aikwij jab lemnok kin wãwen ko me elõñ kabuñ ko rej katakin kake e. Inem ilo katak in jejamin konono kin pija ko rar jiñaiki ak ekjõp ko kar kõmõni jen dreka ko. Bareinwõt jejamin lemnok kin katak ko an kabuñ ko me ele jen joñõn air koutiej e ilo air kajerbal title kein einwõt “Jinen Anij” im “Leroij in Lõñ.” Ak jenaj etale ta eo Baibel eo ej lukkun kwalok kin e. Ej letok melele ko raurõk kin tõmak eo an im kin wãwen eo jemaroñ anõke.

Lotok Eo An Juõn Enjel

Einwõt am jela bwe dri lotok eo an Meri ear jab juõn armij bajjek ak kar enjel Gebriel. Ke ear ba ñõn Meri “kwe elap am jerammõn,” Meri ear “lokjenan” kin nan kein an im kalomõnlokjen kin nan in yokyokwe in. (Luk 1:​29) Ear bõk jerammõn in elap jen wõn? Meri ear jab kõtmene ñõn bõk elap jerammõn jen armij ro. Ak enjel eo ear konono kin an bõk jerammõn jen Jeova Anij. Meñe Meri ear kaurõk men in, ear jab utiej buru kake im lemnok bwe emwij an bõk joij eo an Anij. Elañe jej kate wõt kij ñõn bõk joij eo an Anij im jab utiej buru im lemnok bwe emwij ar bõke, jenaj bõk ejja melele eo wõt an Meri. Ear lukkun melele bwe Anij ej jumae ro eutiej burueir, ak ej yokwe im jibõñ ro etã burueir.​—Jemes 4:6.

Meri ear aikwij kwalok etã buru kinke enjel eo ear lelok juõn jerammõn ekabwilõñlõñ ñõn e. Ear kemelele bwe enaj keutak ajiri eo me enaj erom eo aurõktata ian armij ro otemjej. Gebriel ear ba: “Iroij Anij e naj lelok ñõn E tron eo an Devid jemen: Im E naj iroij ion imõn Jekõb in drio: im ailiñ eo An e jamin jemlok in drio.” (Luk 1:​32, 33) Meri ear jela kin kalimur eo Anij ear kõmõne iben Devid elõñlok jen juõn tausan yiõ ko remotlok, bwe juõn ian ro inen enaj iroij ñõn indrio. (2 Samuel 7:​12, 13) Inem ajiri eo nejin Meri enaj erom Messaia eo me armij ro an Anij rar kejatrikrik kake iomin elõñ buki yiõ ko!

Bareinwõt, enjel eo ear jiroñ e bwe ajiri eo nejin naj “naetan Nejin Eo Eutiejtata.” Ak ewi wãwen juõn kõra emaroñ kar keutak Nejin Anij? Emol ke bwe Meri emaroñ kar bõroro? Ear pojõk ñõn mareik Josep bõtab rejañin kar ber iben dron. Meri ear kajitõk: “E naj kijkan men in, bwe I jab jela man?” (Luk 1:​34) Meri ear jab ãliklik in kalikar bwe ej juõn virjin. Ak ear kaurõk mour eo an erreo. Elõñ jodrikdrik ro ranin rej kijorur in babu iben dron, im rej kajirere kake ro rejañin. Lõl in ranin emwij an oktõk. Ak, Jeova ejañin oktõk. (Malachi 3:6) Einwõt ilo ran ko an Meri, Jeova ej kaurõk ro rej tiljek ñõn kien ko an kin mour erreo.​—Dri Hibru 13:4.

Meñe Meri ear juõn dri korijeran Anij etiljek, ear jab wãppen. Inem ewi wãwen emaroñ kar keutak ajiri eo ewãppen Nejin Anij? Gebriel ear kemelele: “Jitõb Kwojarjar e naj itok iom, im kajur an Eo Eutiejtata e naj kalur yuk; im kin men in Eo kwojarjar e naj lotak naj likit etan Nejin Anij.” (Luk 1:​35) Kwojarjar ej melelen “erreo otem erreo.” Ak ekkã an ajiri ro jolit jerawiwi im jab wãppen jen ro jemeir im jineir. Ak ilo ien in, Jeova enaj kõmõn juõn menin kabwilõñlõñ ejañin kar walok. Enaj kamakit mour eo an Nejin jen lõñ ñõn lojen Meri. Im ear kajerbal kajur eo an ak jitõb kwojarjar ñõn “kalur” Meri ñõn bõprae an ajiri eo jolit jerawiwi. Meri ear ke tõmake kalimur eo an enjel eo? Ewi wãwen an kar uak?

Uak eo an Meri ñõn Gebriel

Ro rej berre men in ekabwilõñlõñ, ekoba jet ian dri kaki ro an kabuñ ko me rej ba bwe rej Kristian, ebin air tõmak bwe juõn virjin emaroñ bõroro. Meñe elap jelalokjen ibeir rejjab maroñ melele kin mol in me Gebriel ear kwalok kake.” (Luk 1:​37, UBS) Kinke ear kajur tõmak eo an Meri, ear tõmak bwe nan ko an Gebriel remol. Bõtab, ear jab mõkaj in tõmak men ko rar jiroñ e kake. Ak ear aikwij menin kamol ko bwe en or berber in an tõmak. Gebriel ear pojõk in kalaplok an Meri melele kin men ko emwij an jela bwe remol. Ear jiroñ e kin eo nukin elilap etan Elisabet, eo me etto air jela kake bwe ejjab maroñ neje. Ilo kabwilõñlõñ Anij ear kamaroñ e bwe en bõroro!

Ta eo Meri enaj kõmõne kiõ? Kar lelok juõn erro ñõn e im kein kamol ko bwe Anij enaj kõmõne aolep men ko Gebriel ear jiroñ e. Jen jab lemnok bwe jerammõn in ear biruru ñõn e. Kinke elañe Josep en kar jela bwe ebõroro, bwelen ejamin kar mareik e. Bar juõn un erro in emaroñ kar bin ñõn e, ej kinke Meri enaj bõroro kin eo eaurõktata ian menin kõmõnmõn ko otemjej an Anij, eo ejitenburu Nejin Anij! Enaj aikwij in kakajiririk e ñe enaj juõn niñniñ im kejbãrok e ilo juõn lõl enana. Emol ej juõn erro ekanuij lap!

Baibel eo ej kwalok bwe jet ien ro rekajur im tiljek remaroñ bareinwõt ãliklik in bõk jerbal ko rebin jen Anij. Moses ear ba bwe ejjab maroñ jerbal einwõt dri konono an Anij kinke ejjab melak an konono. (Exodus 4:​10) Jeremiah ear ba “ña ij ajiri wõt,” kin an lemnok bwe ear drik ñõn an bõk jerbal eo Anij ear lelok ñõn e. (Jeremiah 1:6) Im Jona ear ko jen jerbal eo kar lelok ñõn e! (Jonah 1:3) Ak ta eo Meri enaj kõmõne?

Nan ko an rej kalikar bwe ear kwalok etã buru im ear bokake. Ear ba ñõn Gebriel: “Lo ña dri korijeran Iroij: en ber iba einwõt am in nan.” (Luk 1:​38) Juõn ledrik dri kamakoko ear etã tata ian dri korijer ro im mour eo an ear ber iomin maroñ an karo eo an. Eñin kar eñjake eo an Meri kin Karo eo an, Jeova. Ear jela bwe Jeova enaj kejbãrok e kinke ej tiljek ñõn ro rej tiljek ñõn e, im enaj kejerammõn e ilo an kate wõt im bõk erro in ebin.​—Sam 18:25.

Jet ien, men ko Anij ej kajitõk iber bwe jen kõmõni jemaroñ lo bwe rebin im jejjab maroñ kõmõni. Bõtab, ilo Nan eo an, ej letok elõñ un ko ñõn ar liki e im atartar ion maroñ eo an einwõt kar Meri. (Jabõn Kennan Ko 3:​5, 6) Jenaj ke liki e? Elañe aet, enaj kejerammõn kij, im men in ej letok un ko ñõn kakajurlok tõmak eo ar kin e.

Meri Ej Lolok Elisabet

Nan ko an Gebriel kin an Elisabet bõroro ear aurõk ñõn Meri. Jen ian aolep kõra ro ibelakin lõl, Elisabet wõt emaroñ melele kin wãwen eo ej walok ñõn Meri. Kin men in Meri ear mõkõjlok ñõn Juda, juõn jikin elõñ tol ie, im emaroñ kar bõk jilu ak emen ran ñõn tõbarlok jikin eo. Ke ej dreloñ ñõn mweo imõn Elisabet im pris eo, Zechariah, Jeova ear lelok ñõn Meri menin kamol ko jet ñõn kakajurlok tõmak eo an. Ke Elisabet ear roñ nan in yokyokwe eo an Meri, ilo mõkaj ear eñjake an niñniñ eo ilojen makõtkit kin lõñliñ. Ear obrõk kin jitõb kwojarjar im ear añiñin Meri einwõt “jinen aõ Iroij.” Anij ear kwalok ñõn Elisabet bwe ladrik eo nejin Meri enaj erom Iroij eo an, Messaia eo. Bareinwõt, jitõb eo an Anij ear kamakit e ñõn nebar Meri kin an tiljek in bokake, ilo an ba: “Emõnõnõ eo e ar tõmak.” (Luk 1:​39-​45) Aet, aolep men ko Jeova ear kalimuri Meri renaj jejit kitieir!

Tokelik, Meri ear konono, im nan ko an rej ber ilo Luk 1:​46-​55. Nan kein rej nan ko an reaitoktata ilo Baibel im ej kalikar kain armij rot e. Ej kwalok an kamolol ilo an nebar Jeova kin an lelok ñõn e jerammõn eo ñõn erom jinen Messaia eo. Im joñõn kajurin tõmak eo an ear alikar ke ear ba bwe Jeova enaj kõtãik ro eutiej burueir im rekajur, im jibõñ ro retã im jeramel me rekõnan korijer ñõn e. Ej bareinwõt kalikar kin joñõn jelalokjen eo an. Ilo air kar antonelok, Meri ear jitõñlok ñõn elõñlok jen 20 eon ko ilo Jeje ko ilo kajin Hibru!

Alikar, Meri ear lukkun kalomõnlokjen kin nan in Anij. Ak, ear kwalok wõt an etã buru, im kõtlok bwe Jeje Ko ren kwalok kin wãwen ber eo an jen an kemelele jen e mõke. Juõn ien, ajiri eo ilo lojen enaj kwalok ejja eñjake in wõt, ilo an ba: “Nan in katak eo Aõ, e jab Aõ, a an Eo e ar jilkintok Iõ.” (Jon 7:​16) Emõn bwe jen kajitõkin kij mõke: ‘Ij kwalok ke ejja koutiej rot in kin Nan in Anij? Ak ikõnan ke kwalok wõt kin lemnok im katak ko aõ mõke?’ Uak eo an Meri ej alikar.

Meri ear ber iben Elisabet iomin jilu alliñ im ejelok berre bwe irro ar rejañ dron. (Luk 1:​56) Kõra rein rej kakememej kij kin aurõkin ro jerar. Elañe jej bukot ro mõtar me emol air yokwe Anij eo ar, Jeova, enaj kajurlok kõtan eo ar iben im ebaklok e. (Jabõn Kennan Ko 13:20) Ak kiõ eien ñõn an Meri jeblak ñõn mweo imõn. Ta eo Josep enaj kar ba ñe ejela bwe ebõroro Meri?

Meri im Josep

Alikar, Meri ear jab kõtar mae ien eo aolep ren kar kile bwe ebõroro ñõn kejelãik Josep. Ak mokta jen an ba ñõn e, emaroñ kar lemnok kin ewi wãwen an naj Josep emmakit ñe enaj kennanik e kin men in. Mekarta, ear kebak e im kwaloke aolepen men ko rar walok ñõn e. Ejelok berre bwe Josep ear lukkun inebata. Ear kõnan tõmak jiroñ in ejitenburu iben, ak men eo Meri ear ba ñõn e, ejañin kar walok mokta. Baibel eo ejjab lukkun kwalok kin lemnok ko an Josep. Ak ej jiroñ kij bwe ear bebe in jolok Meri, kinke ilo ien ko, rekin watõk ro rar kalimur ñõn belek dron einwõt ro emwij air mare. Bõtab, ear jab kõnan kajook e iman mejen armij ak ñõn an bõk kaje, inem, ear kãlet bwe en noj an jolok e. (Matu 1:​18, 19) Meri emaroñ kar buromõj ke ear lo an Josep lukkun inebata kin men in me ejañin kar walok mokta. Bõtab, ear jab illu meñe Josep ear jab tõmak e.

Jeova ear jab kõtlok bwe Josep en wõnmanlok ñõn kõmõne men eo ear lemnok bwe ejime. Ilo tõnak, enjel eo an Anij ear jiroñ e bwe an Meri bõroro ekar juõn men ekabwilõñlõñ. Men in ear kainemõn e! Kiõ Josep ear emmakit ekkar ñõn tel eo an Jeova, einwõt an kar Meri kõmõne jen jinoin. Ear mareik Meri im pojõk ñõn bõk erro eo ejej uan ñõn kakajiriri eo Nejin Jeova.​—Matu 1:20-​24.

Ro emwij air mare im ro rej lemnok in mare remaroñ katak jen dri belele rein me rar mour enañin 2,000 yiõ ko remotlok. Ke Josep ear lo an Meri kakajiririk ajiri eo, ear lukkun mõnõnõ bwe enjel eo an Jeova ear tel e. Josep emaroñ kar kile aurõkin an atartar ion Jeova ñe ej kõmõn bebe ko relap. (Sam 37:5; Jabõn Kennan Ko 18:13) Ejelok berre bwe Josep ear kejbãrok wõt wãwen an kõmõn bebe ko ilo joij einwõt juõn bõran baamle.

Ilo turãjet, ta eo jemaroñ katak jen an kar Meri mõnõnõ in mareik Josep? Meñe Josep ear jab tõmak bwebwenato eo an Meri ilo jinoin, Meri ear kõtar wõt e einwõt eo enaj erom bõran baamle eo an. Kar juõn katak emõn ñõn e, im bareinwõt ñõn kõra ro rej Kristian ranin. Eliktata, men kein me rar walok rar katakin Josep im Meri elõñ men ko kin tokjen air mol im kwalok burueir ñõn dron.

Dri belele rein emol air kar jino mour in belele eo air ion berber ko remõntata. Rar jimor yokwe Jeova Anij ilõñin men otemjej im rar kõnan kabuñburuen ilo air kajejit erro ko air einwõt juõn jemen im jinen. Emol bwe, jerammõn ko relaplok rar ber imair, im bareinwõt men ko rebin. Jerammõn eo ear ber imair kar ñõn kakajiririk Jisõs, eo me enaj erom eo elaptata me armij ro rejela kake.

[Pija eo ilo peij 17]

Yokwe Anij ej berber eo emõntata ñõn dri belele ro