Ewi Wãween bwe Kwõn M̦õn̦õn̦õ Wõt ilo Am̦ Karejar ñan Jeova?
“El̦aññe juon armej ej mour ium̦win elõñ iiõ, en lañlõñ ilo er otemjej.”—EKKLISIASTIS 11:8.
1. Ta jeraam̦m̦an ko Jeova ej litok ñan kõj bwe jen lo m̦õn̦õn̦õ?
JEOVA ekõn̦aan bwe jen m̦õn̦õn̦õ ilo mour ko ad, eñin unin ej kajeraam̦m̦an kõj im litok aolep men ko jej aikuji bwe jen lo m̦õn̦õn̦õ. Juon iaan jeraam̦m̦an ko ej litok ñan kõj ej mour eo ad. Kõn men in, jemaroñ kõjerbal mour ko ad ñan karejar ñane im nõbare kõnke Anij ear karuwaakl̦o̦k kõj ñane bwe jen pãd ilo kabuñ eo em̦ool. (Sam 144:15; Jon 6:65) Jeova el̦ap an yokwe kõj, im ej jipañ kõj bwe jen jab ebbeer ilo ad karejar ñane. (Jeremaia 31:3; 2 Korint 4:16) El̦ap ad m̦õn̦õn̦õ ilo ad karejar ñan Jeova im pãd ilo doulul eo an. Ilo doulul eo an, jej lo aenõm̦m̦an im bõrokuk, yokwe eo ibwiljid, im katak ko me aolep iien rej kakeememej kõj kõn yokwe eo an Jeova. Bareinwõt, ewõr juon ad kõjatdikdik em̦m̦an kõn ilju im jekl̦aj.
2. Etke epen an jet ri karejar ro retiljek an Anij wõnm̦aanl̦o̦k im lo m̦õn̦õn̦õ ilo aer karejar ñane?
2 Meñe jej lo an Jeova kajeraam̦m̦an kõj bwe jen lo m̦õn̦õn̦õ ilo mour ko ad, ak jet ri karejar ro retiljek an Anij epen aer wõnm̦aanl̦o̦k im lo m̦õn̦õn̦õ ilo aer karejar ñane. Etke? Kõnke ekkã aer bõk l̦õmn̦ak ko rekabbeerer kõn er make. Remaroñ l̦õmn̦ak bwe Jeova ejjab kaorõk er im aer jerbal ñane. Kõn men in, epen aer maroñ pijaik aer m̦õn̦õn̦õ ilo mour ko aer “ium̦win elõñ iiõ” ko. Rein rej watõk bwe mour ej ãinwõt raan ko relukkuun marok im pen ñan er.—Ekklisiastis 11:8.
3. Ta ko remaroñ kõm̦m̦an bwe jen bõk l̦õmn̦ak ko rekabbeerer?
3 Ad rũttol̦o̦k, bõk juon nañinmej, illu im bũrom̦õj, men kein remaroñ kõm̦m̦an ad bõk l̦õmn̦ak ko rekabbeerer. (Sam 71:9; Jabõn Kõnnaan 13:12, UBS; 24:10) Bareinwõt, jej aikuj keememej bwe bũruod “ejel̦ã m̦on̦,” im emaroñ kõm̦m̦an ad l̦õmn̦ak bwe kõj armej nana meñe ilo m̦ool Anij ej m̦õn̦õn̦õ ippãd. (Jeremaia 17:9; 1 Jon 3:20) Tepil̦ eo ej kwal̦o̦k men ko reriab n̦ae ri karejar ro an Anij. Setan ear kõm̦akũt Elipaz ñan an ba bwe jejjab aorõk ippãn Anij. Eñin men eo eriab ear wal̦o̦k ilo raan ko an Job, im ej bar wal̦o̦k ilo raan kein ad.—Job 4:18, 19.
4. Ta eo jenaaj etale ilo katak in?
4 Em̦õj an Jeova kaalikkar ñan kõj ilo naan ko an ilo Baibõl̦ bwe enaaj jipañ ro me ekkã aer bõk l̦õmn̦ak ko rekabbeerer. (Sam 23:4) Juon wãween ej jipañ kõj ej ikijjeen naan ko an jãn Baibõl̦. Im Baibõl̦ emaroñ “kajim̦we” kõj. Mel̦el̦ein bwe emaroñ jipañ kõj bwe jen kajim̦we l̦õmn̦ak ko ad rebõd im rekabbeerer. (2 Timote 3:16) Kiiõ jen etale wãween an Baibõl̦ maroñ jipañ kõj ñan dãpij wõt l̦õmn̦ak ko rejim̦we im m̦õn̦õn̦õ wõt ilo ad karejar ñan Jeova. Kwõmaroñ bõk el̦ap tokjãn jãn katak in im kwõmaroñ bar kõjerbale ñan kakajoor im rõjañ ro jet.
BAIBÕL̦ EMAROÑ JIPAÑ EOK M̦ÕN̦ÕN̦Õ WÕT
5. Ta eo enaaj jipañ kõj bwe jen m̦õn̦õn̦õ wõt ilo ad karejar ñan Jeova?
5 Rijjilõk Paul ear kwal̦o̦k kõn jet men ko me remaroñ jipañ kõj bwe jen m̦õn̦õn̦õ wõt ilo ad karejar ñan Jeova. Ear kakapilõk eklejia eo ilo Korint: “Kom̦win make mãlejjoñ kom̦ el̦aññe kom̦ pãd ilo tõmak.” (2 Korint 13:5) Ilo eoon in, “tõmak” ej mel̦el̦ein aolep katak ko Kũrjin ro rej tõmaki im rej pedped ilo Baibõl̦. Ñe jej l̦oore men ko Baibõl̦ ej katakin kõj kaki ilo kõm̦m̦an ko ad im wãween ad kõnnaan, men in ej kwal̦o̦k bwe jej “pãd ilo tõmak.” Bõtab, jejjab maroñ kããlõt ta katak ko jenaaj l̦oori. Jej aikuj in l̦oore im pokake aolep katak ko jãn Baibõl̦.—Jemes 2:10, 11.
6. Etke jej aikuj in etale kõj make ñan lale ñe jej “pãd ilo tõmak”? (Lale pija eo ilo jinoin katak in.)
6 Bõlen kwõjjab kõn̦aan mãlejjoñe ak etale kwe make im lale ñe kwõj pãd ilo tõmak kõnke kwõj inepata ñe men in enaaj kwal̦o̦k likjab ko am̦. Bõtab, l̦õmn̦ak eo an Jeova kõn kõj el̦apl̦o̦k an aorõk jãn l̦õmn̦ak ko ad kõn kõj make. Etke? Kõnke el̦apl̦o̦k an jel̦ã im mãlõtlõt jãn kõj. (Aiseia 55:8, 9) Jeova ej etale ri karejar ro an im ejjab kõm̦m̦ane men in ñan lale likjab ko aer, ak ej pukot men ko rem̦m̦an ilo bũrueer im ej jipañ er. Ñe kwõj lale Naan in Anij ñan etale kwe make im lale el̦aññe kwõj “pãd ilo tõmak,” kwõnaaj jel̦ã ta l̦õmn̦ak eo an Anij kõn kwe. Men in enaaj jipañ kwe ñan jol̦o̦k am̦ l̦õmn̦ak bwe ejjel̦o̦k tokjam̦. Im enaaj kakeememej eok bwe kwõj aorõk ippãn Anij. Ej ãinwõt ñe kwõj kõppel̦l̦o̦k wũntõ ko ak kõjãm ko ilo m̦weo im̦õm̦ bwe en meram lowaan. Ãindein, ñe kwõj keememej bwe kwõj aorõk ippãn Anij, men in enaaj jipañ eok bwe kwõn m̦õn̦õn̦õ.
7. Elemen an waanjoñak ko an ri karejar ro retiljek an Anij ilo Baibõl̦ maroñ jipañ kõj?
7 Juon wãween ñan etale kõj make im lale ñe jej “pãd ilo tõmak” ej ilo ad kõl̦mãnl̦o̦kjen̦ kõn joñak ko an ri karejar ro retiljek an Anij ilo Baibõl̦. Ñe kwõj kõm̦m̦ane men in, kwõn keidi kwe make ñan ta ko rein rar iiooni kab eñjake im l̦õmn̦ak ko aer. Im l̦õmn̦ak kõn ta ko kwõnaaj kar kõm̦m̦ani ñe en kar kwe eo kwaar iiooni men kein. Jen kiiõ etale jilu waanjoñak ko jãn Baibõl̦ me remaroñ jipañ kõj lale ñe jej “pãd ilo tõmak.” Men in enaaj bar jipañ eok ñan dãpij wõt l̦õmn̦ak ko rem̦m̦an im lo m̦õn̦õn̦õ ilo am̦ karejar ñan Jeova.
KÕRÃ EO EJERAM̦ÕL IM EMEJ EO PÃLEEN
8, 9. (1) Ta apañ ko kõrã eo ejeram̦õl im emej pãleen ear iiooni? (2) Ta l̦õmn̦ak ko rekabbeerer emaroñ in kar l̦õmn̦ak kaki?
8 Ke Jijej ear pãd ilo tampel̦ eo ilo Jerusalem, ear lo juon kõrã eo ejeram̦õl im emej l̦eo pãleen. Joñak in an kõrã in emaroñ jipañ kõj ñan lo m̦õn̦õn̦õ ilo ad karejar ñan Jeova meñe jejjab maroñ kõm̦m̦ani men ko jekõn̦aan kõm̦m̦ani. (Riit Luk 21:1-4, UBS.) L̦õmn̦ak m̦õk kõn apañ ko kõrã in ear iiooni. M̦oktata, ear mej l̦eo pãleen jãne im ear aikuj kijenmej ilo iien in me epen ñane. Ejjab men in wõt, ak ear iioon apañ jãn ri tõl ro rekũbbon̦ an kabuñ ko me ijello̦kun aer jipañ kõrã ro emej l̦õm̦aro pãleer, rar m̦on̦e er im ko̦o̦t jãn er. (Luk 20:47, UBS) Innem, jããn eo ear jabawõt kake ear joñan wõt on̦ean juon ri jerbal me ej jerbal ium̦win 15 wõt minit. Kar joñan dein an kõrã in lukkuun jeram̦õl.
9 Kiiõ l̦õmn̦ak m̦õk kõn eñjake im l̦õmn̦ak eo an kõrã in ke ear del̦o̦ñl̦o̦k ilo tampel̦ eo kõn ruo jããn kõba. Kõrã in ear ke bũrom̦õj bwe jabawõt eo an kiiõ edik jãn joñan eo emaroñ kar jaba kake ñe l̦eo ippãn ear mour wõt? Ke ear loe an l̦apl̦o̦k jabawõt ko an ro jet jãne, ear ke jook im l̦õmn̦ak bwe edik jabawõt eo an im ejjel̦o̦k tokjãn an likũti? Meñe emaroñ kar wõr l̦õmn̦ak kein ippãn, ak ear m̦õn̦õn̦õ wõt in lel̦o̦k kõnke ear kõn̦aan rejetake kabuñ eo em̦ool.
10. Ewi wãween an Jijej kar kwal̦o̦k bwe kõrã eo emej eo pãleen el̦ap an aorõk ippãn Anij?
10 Jijej ear ba bwe jabawõt eo an kõrã in ear l̦ap an aorõk ippãn Jeova. Ear ba bwe el̦ap an kar lel̦o̦k jãn aolep ri m̦weiie ro. Jabawõt eo an ear kobal̦o̦k ippãn jabawõt ko an ro jet. Bõtab, iaan aolep armej ro, Jijej ear kwal̦o̦k kõn kõrã in im nõbare kõn menin lel̦o̦k eo an ñan Jeova. Ro ilo tampel̦ eo me rar bwini jabawõt ko rar jab jel̦ã kõn ewi joñan aorõkin jããn kõpa kein ñan Jeova. Bareinwõt, rar jab jel̦ã bwe el̦ap an aorõk kõrã in ippãn Jeova. Meñe ãindein, l̦õmn̦ak eo wõt an Jeova el̦ap an aorõk jekdo̦o̦n ta kar l̦õmn̦ak ko an ro jet ak l̦õmn̦ak ko an kõrã in kõn emake. Kwõmaroñ ke katak kõn waanjoñak in ñan lale ñe kwõj “pãd ilo tõmak”?
11. Ta eo kwõmaroñ katak jãn joñak eo an kõrã eo emej eo pãleen?
11 Apañ ko kwõj iiooni ilo mour eo am̦ remaroñ kapañ eok jãn am̦ lel̦o̦k men ko kokõn̦aan lil̦o̦k ñan Jeova. Kõn an jet rũtto im nañinmej, rejjab maroñ kwal̦o̦k naan aolep iien meñe rekõn̦aan. Remaroñ l̦õmn̦ak bwe joñan an dik awa ko aer ilo jerbal in kwal̦o̦k naan, ejjel̦o̦k tokjãn aer kanne aer awa. Bareinwõt, jodrikdrik ro im ro el̦ap aer ãjmour, remaroñ ebbeer im l̦õmn̦ak bwe edik joñan awa ko aer ilo jerbal in kwal̦o̦k naan jãn ri karejar ro jet an Anij ipel̦aakin lal̦ in. Eokwe, bwebwenato eo kõn kõrã eo ejeram̦õl im emej l̦eo pãleen ej katakin kõj bwe Jeova ej loe aolep men ko reddik jej kõm̦m̦ani ilo ad karejar ñane im el̦ap an kaorõk men kein, el̦aptata ñe jej iioon wãween ko repen. Kiiõ, l̦õmn̦ak m̦õk kõn iiõ ko lõñlõñ ko me kwaar karejar ñan Jeova. Ewõr ke juon iien kwaar aikuj kate eok ñan kwal̦o̦k naan meñe kwaar iioon juon apañ ekanooj pen? El̦aññe aet, kwõn keememej bwe am̦ kar kate eok ñan kõm̦m̦ane men in el̦ap an aorõk ippãn Jeova. Ilo am̦ anõke waanjoñak eo an kõrã eo ejeram̦õl im emej eo pãleen im lel̦o̦k ñan Jeova joñan wõt am̦ maroñ, kwõj kaalikkar ñan kwe make ke kwõj “pãd ilo tõmak.”
“KWÕN BÕK AÕ MOUR”
12-14. (1) L̦õmn̦ak ta ko rekabbeerer ear wõr ippãn Ilaija? (2) Etke Ilaija ear maroñ bõk l̦õmn̦ak rot kein?
12 Ri kanaan Ilaija ear tiljek wõt ñan Jeova im ear pen tõmak eo an. Bõtab, ewõr juon iien ear lukkuun ebbeer im bũrom̦õj. Joñan, ear jar im kajjitõk ippãn Jeova bwe en bõk mour eo an. Ear ba: “Ebwe; kiiõ, O Jeova, kwõn bõk aõ mour.” (1 Kiiñ 19:4) Ro me rejjañin bõk ejja eñjake rot in an Ilaija remaroñ l̦õmn̦ak bwe naan ko ilo jar in an rar “naan in jajel̦o̦kjen̦.” (Job 6:3) Ak eñjake kein an rar m̦ool. Ta eo Jeova ear kõm̦m̦ane? Eokwe, Jeova ear jab illu ippãn Ilaija ak ear jipañe.
13 Etke Ilaija ear bõk l̦õmn̦ak im eñjake rot kein? Eokwe, m̦oktal̦o̦k, Ilaija ear kõm̦m̦ane juon menin bwilõñ ñan kaalikkar bwe Jeova ej Anij eo em̦ool. Ãlikin an kar kõm̦m̦ane men in, armej ro rar m̦ane 450 ri kanaan ro an Beal. (1 Kiiñ 18:37-40) Ilaija ear kõjatdikdik bwe armej ro an Anij renaaj bar ro̦o̦l im kabuñ ñan Jeova, ak men in ear jab wal̦o̦k. Lerooj eo enana Jezebel, ear jilkinl̦o̦k juon armej bwe en kõnnaanek Ilaija bwe enaaj m̦ane. Kõn an kar Ilaija kor im mijak bwe enaaj mej, ear ko jãn Israel im deblo̦ke Juda, im etal wõt ñan ãne jem̦aden.—1 Kiiñ 19:2-4.
14 Ke Ilaija ear make iaan ilo ãne jem̦aden, ear jino l̦õmn̦ak bwe ejjel̦o̦k tokjãn jerbal eo an ãinwõt juon ri kanaan. Ear ba ñan Jeova: “Ijjab em̦m̦an jãn ro jim̦m̦aõ.” Joñan an kar l̦õmn̦ak bwe ejjel̦o̦k tokjãn ear watõk e make ãinwõt bũñal im di ko diin ro jim̦m̦aan me remej. Ear l̦õmn̦ak bwe ejjel̦o̦k tõprak ear loe ilo jerbal eo an im ejjab aorõk ippãn Jeova im ro jet.
15. Ewi wãween an Anij kar kwal̦o̦k ñan Ilaija bwe el̦ap an kaorõke?
15 Bõtab, ear oktak wãween an Eo Ekajoor Bõtata l̦õmn̦ak kõn Ilaija. Ear l̦ap wõt an Ilaija aorõk im̦aan mejãn Jeova, im ear kõn̦aan bwe Ilaija en jel̦ã men in. Eñin unin, Anij ear jilkinl̦o̦k juon enjel̦ bwe en kakajoore. Bareinwõt, Jeova ear lel̦o̦k kijen im limen Ilaija ñan kakajoore ilo ial̦ eo an l̦o̦k ñan Tol̦ Horeb me 40 raan aetokin. Ke Ilaija ear l̦õmn̦ak bwe ejjel̦o̦k juon Ri Israel ear tiljek wõt ñan Jeova, Jeova ear jipañe im kajim̦we l̦õmn̦ak eo an. Ta tokjãn an kar bõk jipañ jãn Jeova? Ear kajoorl̦o̦k wõt jãn m̦okta im ear ro̦o̦ll̦o̦k im bar kõm̦m̦ane jerbal eo an ãinwõt juon ri kanaan.—1 Kiiñ 19:5-8, UBS; 15-19, UBS.
16. Ewi wãween an Jeova kar jipañ im kakajoor eok?
16 Joñak eo an Ilaija emaroñ jipañ eok ñan lale el̦aññe kwõj “pãd ilo tõmak” im bwe kwõn lo wõt m̦õn̦õn̦õ ilo am̦ karejar ñan Jeova. M̦oktata, l̦õmn̦ak kõn wãween an Jeova kar jipañ im rejetake eok. Ewõr ke juon em̦m̦aan ej lale eklejia eo ak juon eo me ekajoor kõtaan eo an ippãn Jeova ear jipañ eok ilo iien eo kwaar iioon apañ? (Galetia 6:2, UBS) Baibõl̦ eo, bok ko ilo doulul in an Jeova, im kweilo̦k ko ad renañin ke jipañ eok ñan kile bwe kaorõk ippãn Jeova? Juon iien ñe kwõnaaj bõk jipañ jãn wãween kein, em̦m̦an kwõn l̦õmn̦ak ippam̦ make kõn wõn eo jipañ kein rej itok jãne, im lale kwaar mel̦o̦kl̦o̦k in jar im kam̦m̦oolol Jeova.—Sam 121:1, 2.
17. Ta eo Jeova el̦ap an kaorõke ippãn ri karejar ro an?
17 Kein karuo, keememej bwe l̦õmn̦ak ko rekabbeerer kõn kõj make remaroñ kajorrããn kõj. L̦õmn̦ak eo an Anij kõn kõj el̦ap an aorõk. (Riit 1 Samuel 16:7, UBS.) Men eo el̦ap an Jeova kaorõk kõj kake ej kõn ad yokwe e im tiljek wõt ñane. Ad aorõk ippãn ejjab wawa ioon ta tõprak ko jej kõm̦m̦ani. Ãinwõt Ilaija, bõlen elukkuun lõñ men ko kwaar kõm̦m̦ani ñan Jeova ak kwõjjab kile. Bõlen kwõjaje ak wõn ejjab ba bwe ewõr jet ilo eklejia eo em̦õj am̦ jipañ er! Im bõlen ewõr ro rar roñ kõn nuuj eo em̦m̦an itok wõt jãn am̦ kar kijejeto ilo jerbal in kwal̦o̦k naan.
18. Ñe Jeova ej lewaj juon jerbal ñan eok, men in ej kam̦ool bwe ej ta?
18 Ãliktata, keememej bwe jabdewõt jerbal Jeova ej lewaj ñan eok ej kam̦ool bwe Jeova ej m̦õn̦õn̦õ ippam̦. (Jeremaia 20:11) Ãinwõt Ilaija, kwõmaroñ bũrom̦õj im ebbeer kõn an pen an tõprak mejãnkajjik ko am̦ ak bwe edik tõprak ko kwõj loi ilo am̦ jerbal ñan Jeova. Meñe emaroñ ãindein am̦ l̦õmn̦ak, ak keememej bwe kõj aolep ewõr ippãd juon jeraam̦m̦an el̦ap an em̦m̦an. Ta in? Ej jeraam̦m̦an eo ñan kwal̦o̦k kõn nuuj eo em̦m̦an im am̦ erom juon iaan Ri Kõnnaan ro an Jeova. Kõn men in, kwõn tiljek wõt ñan Jeova. Innem, el̦aññe kwõnaaj kõm̦m̦ane men in, Jijej ear ba bwe kwõnaaj maroñ “del̦o̦ñ ilo lañlõñ an am̦ irooj.”—Matu 25:23.
“JAR AN JUON ARMEJ EO EJ PÃD ILO JORRÃÃN”
19. Elemen kar eñjake eo an eo me ear je Sam jebta 102?
19 Eo me ear je Sam jebta 102 ear l̦ap an ebbeer im jaje ta eo en kõm̦m̦ane. Ear kanooj l̦ap “jorrããn” ko ear iiooni ilo mour eo an im rar kainepataiki. Bareinwõt, ear l̦õmn̦ak bwe ejjel̦o̦k an maroñ ñan kijenmej ium̦win jorrããn ko rej wal̦o̦k ñane. (Sam 102, UBS, lale kõmel̦el̦e eo itulõñin jebta in.) Men eo de eo ear l̦õmn̦ak kake ej kõn an make iaan, eñtaan, im kõn eñjake ko an. (Sam 102:3, 4, 6, 11, UBS) Ear l̦õmn̦ak bwe Jeova ear kõn̦aan ilo̦k jãne im jol̦o̦ke.—Sam 102:10, UBS.
20. Ewi wãween jar emaroñ jipañ juon bwe en jol̦o̦k l̦õmn̦ak ko rekabbeerer?
20 Meñe ri jeje sam ear lukkuun ebbeer im bũrom̦õj, bõtab ear maroñ kõjerbal wõt mour eo an ñan nõbar Jeova. (Riit Sam 102:19-21, UBS.) Sam jebta 102 ej kwal̦o̦k ñan kõj bwe ewõr ro rej “pãd ilo tõmak” ak rej bũrom̦õj im ebbeer im epen aer l̦õmn̦ak kõn men ko jet. “Ãinwõt juon bao ej make iaan ibõrwajin juon em̦,” ri jeje sam in ear l̦õmn̦ak kõn an make iaan im lõñ jorrããn im apañ ko ej iiooni. (Sam 102:7, UBS) Kwõn kwal̦o̦k aolepen bũruom̦ ñan Jeova ñe kwõj ebbeer im bũrom̦õj ãinwõt ri jeje sam in. Jar ko am̦ renaaj jipañ eok bwe kwõn jol̦o̦k l̦õmn̦ak ko rekabbeerer. Jeova ej kallim̦ur bwe enaaj lukkuun roñjake jar ko an ro rej aikuj jipañ im “eban kõjekdo̦o̦n aer jar.” (Sam 102:17) Kwõn lõke kallim̦ur in an Jeova.
21. Ñe jej ebbeer im bũrom̦õj kõn mãlejjoñ ko jej iiooni, ta eo emaroñ jipañ kõj bwe jen m̦õn̦õn̦õ l̦o̦k ilo an karejar ñan Jeova?
21 Sam 102 ej bar kwal̦o̦k juon men me emaroñ jipañ eok bwe kwõn m̦õn̦õn̦õ l̦o̦k ilo am̦ karejar ñan Jeova. Ri jeje sam in ear maroñ lo m̦õn̦õn̦õ kõnke ear kããlõt bwe en l̦õmn̦ak kõn kõtaan eo an ippãn Jeova. (Sam 102:12, 27, UBS) Ear jel̦ã bwe aolep iien Jeova ej jipañ armej ro an ñe rej iioon mãlejjoñ ko reppen, im men in ear kaenõm̦m̦ane. Innem, el̦aññe kwõj ebbeer im men in ej bõbrae eok ñan am̦ kal̦apl̦o̦k ijo kun̦aam̦ ilo jerbal eo an Anij, eokwe em̦m̦an kwõn jar kake. Kwõn kajjitõk ippãn Anij bwe en jipañ eok kõn apañ ko am̦. Bareinwõt, kwõn bar kajjitõk bwe aolep ren jel̦ã kõn etan Anij, Jeova.—Sam 102:20, 21.
22. Ta eo kõj kajjojo jemaroñ kõm̦m̦ane ñan kam̦õn̦õn̦õik bũruon Jeova?
22 Aet, jemaroñ lale Baibõl̦ ñan kam̦ool ñan kõj make ke jej “pãd ilo tõmak” im bwe el̦ap ad aorõk ippãn Jeova. Em̦ool bwe ilo jukjukun pãd in an Setan jejjab maroñ jol̦o̦k aolep l̦õmn̦ak ko rekabbeerer. Meñe ej ãindein ak kõj aolep jemaroñ kam̦õn̦õn̦õik bũruon Jeova im bõk mour indeeo ñe jenaaj kijenmej im tiljek wõt ilo ad karejar ñane.—Matu 24:13.