‘Ran Eo Elap An Jehovah Ej Ebak’
“Ran eo elab an Iroij ebak, elukkun ebak im emõkajtok!”—ZEPHANIAH 1:14.
1, 2. (a) Ta ran eo ejej uan Ri Christian ro rej kõttare? (b) Ta kajitõk ko jej aikwij kajitõk kaki, im etke?
JUÕN jiroñ emõnõnõ ej kijoror in kõttar tok ran in mare eo an. Juõn jinen eo ebõroro ilo yokwe ej reimanlok ñan ran eo enaj lotak niñniñ eo nejin. Juõn ri jerbal eo emõk ej lukkun kijororetok ien jino kakije eo an etto an kar kõttare. Ta eo ewõr ibben rein kajjojo? Ir aolep rej kõttar juõn ran ejej uan—juõn ran elap ñan mour ko air. Eñjake ko air remũlal ak rej oktak jen don. Ran eo rej kõttare enaj itok, im ñe enaj itok, rej kejatdikdik bwe renaj bojak ñan e.
2 Ri Christian ro remol rainin rej bareinwõt kijororetok an itok juõn ran ejej uan. Ej ‘ran eo elap an Jehovah.’ (Aiseia 13:9; Joel 2:1; 2 Piter 3:12) Ta ran in ej itok ‘ran eo an Jehovah,’ im ewi wãwen itok eo an enaj jelet armij otemjej? Elaptata, ewi wãwen jemaroñ kõmman bwe jej bojak ñan ien eo ñe ej itok? Elukkun aorõk bwe jen bukõt uak ko ñan kajitõk kein kiõ kinke kein kamol ko rej kalikar mol in nan kein ilo Bible eo: “Ran eo elab an Iroij ebak, elukkun ebak im emõkajtok.”—Zephaniah 1:14.
‘Ran eo Elap an Jehovah’
3. Ta in ‘ran elap an Jehovah’?
3 Ta in ‘ran eo elap an Jehovah’? Ilo Jeje ko ilo Bible eo, nan in ‘ran in Jehovah’ ej jitõñlok ñan ien ko ejej uair me Jehovah ej bõktok ekajet ion ri kijirãt ro an im kaibujuij etan elap. Armij ro ilo Judah im Jerusalem me rejjab tiljek im bareinwõt armij ro relej ilo Babylon im Egypt aolepeir rar jelmae ‘ran ko an Jehovah’ ke Jehovah ear bõktok ekajet eo an ioir. (Aiseia 2:1, 10-12; 13:1-6; Jeremiah 46:7-10) Bõtab, ‘ran eo an Jehovah’ elaptata ej bed wõt iman. Ej “ran” eo ñe ekajet eo an Jehovah enaj itok ion ro rar kattone ãt eo etan. Enaj jino ilo ien jorrãn eo an “Babilõn Elap,” dolul eo elap in kabuñ wan ilo aolepen lal, im jemlok ilo ien jeebeplok eo an aolepen jukjuk in bed in enana ilo tarinae in Armageddon.—Reveles̃õn 16:14, 16; 17:5, 15-17; 19:11-21.
4. Etke armij ro rej aikwijtok lelñoñ kin ran in emõkaj an Jehovah?
4 Meñe rej kile ak jab, armij ro rej aikwij lelñoñ kin ran in ej mõkajtok. Etke? Ikijen ri kanan Zephaniah, Jehovah ej uak: “Enaj juõn ran in matõrtõr elab, juõn ran in iñtan im inebata, juõn ran in jorrãn im jebeblok, juõn ran in marok im nijõk, juõn ran ekkõdrodru lõñ im kilmej.” Emol ekanuij kamijak! Bareinwõt, ri kanan eo ej ba: “Inaj bõktok elab jorrãn ion armij . . . Rar jerawiwi nae iõ.”—Zephaniah 1:15, 17.
5. Ta lemnak eo emõn an million armij ro kin ran eo an Jehovah, im etke?
5 Bõtab, million ro jet, rej kijororetok ran eo an Jehovah. Etke? Rejelã bwe ej juõn ien lomor im anemkwoj ñan ro rewãnik, ej ran eo me Jehovah ej bõk kautiej im naj kokwojarjar etan elap. (Joel 3:16, 17; Zephaniah 3:12-17) Lelñoñ kin ran in ak kijoror e tok ej wawa elaptata ion ta eo armij ro rej kõmmane kin mour eo air kiõ. Ewi wãwen kwoj lemnak kin ran in ej itok? Kwoj bojak ke ñane? Am jelã bwe ran eo an Jehovah elukkun ebak ej jelet ke wãwen am mour kajjojo ran kiõ?
“Eor Dri Kajirere Re Naj Itok Im Kajirere”
6. Ewi wãwen elõñ armij rej lemnak kin “ran an Jehovah,” im etke Ri Christian ro remol rejjab bwilõñ kin menin?
6 Meñe ien in ej ien ekaiuriur, elõñ armij ro ilo lal in rejjab inebata kin “ran an Jehovah” ej itok. Rej kajirere kin ro rej kakkõl ir kin ien itok eo an ran in. Ri Christian ro remol rejjab bwilõñ kin men in. Rej kememej nan in kakkõl eo ri jilek Peter ear jeje kake: “Im kom jela men in mokta, bwe ilo ran ko eliktata, eor dri kajirere re naj itok im kajirere, im etetal ilo mõm ko air, im ba, ‘Ej ber ia kalimur eo kin An itok? bwe, jen ran eo ke ro jimar r’ar kiki, men ko otemjej r’ar berwõt einwõt air ber jen jinoin kõmõnmõn.’”—2 Piter 3:3, 4.
7. Ta eo enaj jibañ kij debij wõt juõn lemnak in ekaiuriur?
7 Ta eo enaj jibañ kij jumae lemnak in ebwid im kejbãrok wõt lemnak in ekaiuriur eo ad? Peter ej jiroñ kij: “Ij kworuj ami lolãtãt erreo kin kememej: Bwe komin kememej nan ko dri kanan r’ar ba mokta, im kien Iroij im Dri Lomor, emwij lewoj kin dri jilik ro ami.” (2 Piter 3:1, 2) Ad roñjake im bokake nan in kakkõl ko an ri kanan ro enaj jibañ kij ‘kworuj lolãtãt ko ad.’ Bõlen elõñ alen jaar roñ kin nan in kakememej kein, ak elukkun aorõk bwe kiõ, elap jen kar mokta, jen wõnmanlok wõt im roñjake im bokake nan in kakkõl kein.—Aiseia 34:1-4; Luk 21:34-36.
8. Etke elõñ rej kajekdon nan in kakememej ko an Bible eo?
8 Etke jet rej kajekdon nan in kakememej kein? Peter ej wõnmanlok wõt: “Bwe rej kõnan meloklok men in, bwe lõñ ko r’ar ber jen ien ko remotelok, kab lõl eo emwij kabine jen dren kin dren, kin nan in Anij; im kin men kein lõl, e kar ilo ien eo, ke dren ej kalibubu e, e ar joko.” (2 Piter 3:5, 6) Aet, ewõr ro rej jab kõnan bwe ran eo an Jehovah en itok. Rej jab kõnan bwe jabdewõt men en kabañ mour eo air. Rej jab kõnan uak ñan Jehovah kin wãwen mour eo air ekibbon! Einwõt Peter ear ba, rej mour ekkar ñan “mõm ko air.”
9. Kar lemnak rot eo armij ro ilo ran ko an Noah im Lot rar kwalok?
9 Kinke “rej kõnan”, ri kajirere rein rej kajekdon bwe Jehovah ear bõk kunan ilo makitkit ko an armij ilo ien ko mokta. Jesus Christ im ri jilek Peter jimor rar jitõñlok ñan ruo ien ko “ilo ran ko an Noa” im “ran ko an Lot.” (Luk 17:26-30; 2 Piter 2:5-9) Mokta jen Ibwijleplep eo, armij ro rar jab roñjake nan in kakkõl eo Noah ear lelok. Eindein bareinwõt, mokta jen ien jeebeplok eo an Sodom im Gomorrah, ilo mejen lõmaro naj kar belen limaro nejin, Lot “ej einwõt juõn dri kajirere.”—Jenesis 19:14.
10. Ta eñjake eo an Jehovah kin ro rejjab roñjake?
10 Ejelok oktak ilo rainin. Ak, lale wãwen lemnak eo an Jehovah kin ro rejjab roñjake: “Inaj kaje armij ro rekõnkõmmõn im rej liki ir make, ro rej ba, ‘Iroij ejamin kõmmõn jabdrewõt.’ Naj rakimi mweiuk ko mweieir im kejebeblok moko imweir. Rejamin jokwe ilo moko rej kaleki, ak idrak wine jen jikin kallib grape ko rej kalbwini.” (Zephaniah 1:12, 13) Armij ro remaroñ wõnmanlok wõt ilo makitkit ko “ekkã” air kõmmani kajjojo ran, ak rejamin bõk tokjen ko rej ñan indio jen jerbal ko air relap. Etke? Kinke ran eo an Jehovah enaj itok ilo jidimkij, im jabdewõt mweiuk ak mweie rar maroñ korlok rejamin lomoren ir.—Zephaniah 1:18.
“Kwon Kõttar Wõt”
11. Ta nan in kakkõl eo jej aikwij kememej wõt?
11 Jen jab einwõt lal in enana me ej kabol kij, jej aikwij kememej wõt nan in kakkõl eo an ri kanan Habakkuk: “Kwon jei im likiti wõt, kinke ejjañin ien ñõn an jejjet kitieir. Bõtab ien eo ebaktok im men kein ij kwaloki ñõn yuk renaj walok. Kwo maroñ lemnak renaj rumwij, ak kwon kõttar wõt; enaj jejjet kitieir ilo ien eo iar karõke, im ejjelok menin bõbraiki.” (Habakkuk 2:3) Meñe emaroñ rumij tok ran eo ekkar ñan lemnak eo ad ejjab wãppen, jej aikwij kememej wõt bwe Jehovah ejjab rumij. Ran eo An enaj itok ilo ien eo ejejjet, ilo awa eo armij ro rejjab kõtmene kake.—Mark 13:33; 2 Piter 3:9, 10.
12. Ta eo Jesus ear kakkõl kake, im ewi wãwen menin ej oktak ñe keidi ibben kõmman ko an ri kalor ro retiljek an Jesus?
12 Ilo an kar lukkun kalikar aorõkin ad kõtmene kin ran eo an Jehovah, Jesus ear kakkõl bwe jet ian ro ri kaloran renaj luji lemnak in ekaiuriur eo air. Ear kanan kin ir: “A elañe dri korijeran eo enana e naj ba ilo buruen, ‘Aõ iroij [erumij] an itok,’ im enaj jino an dreñlokwe ro dri korijer iben, im naj mõña im irak iben ro dri karek, Iroij an dri korijeran eo e naj itok ilo ran eo ñe e jab kõtõmene, im ilo auõ eo e jaje kake, im e naj [kanuij kaeñtane].” (Matu 24:48-51) Ilo oktan, class in ri karejar eo etiljek im meletlet ej kejbãrok wõt lemnak in ekaiuriur eo an. Class in ri karejar in ej ekkõl wõt im kamol an bojak. Jesus ear kairoij e “ion men ko otemjelok an” ijin ion lal.—Matu 24:42-47.
Aikwij eo kin Ekaiuriur
13. Ewi wãwen Jesus ear kalikar aikwij eo ñan an armij ro emmakit ilo mõkaj?
13 Ear lukkun aorõk bwe Ri Christian ro ilo ebeben eo kein kajuõn ren debij wõt lemnak in ekaiuriur eo air. Rar aikwij ilo mõkaj ko jen Jerusalem ke rar lo jikin eo “jaran dri tõrinae ro rej kabol” e. (Luk 21:20, 21) Menin ear walok ilo yiõ eo 66 C.E. Lale ewi wãwen Jesus ear kalikar aikwij eo kin ekaiuriur ñan Ri Christian ro ilo ien eo: “Eo ej ber ion kejenwan en jab tolõl bwe en bõk jabrewõt jen mweo imõn; im eo ej ber ilo jikin kallip en jab jeblak bwe en bõk kobe eo an.” (Matu 24:17, 18) Ekkar ñan bwebwenato ko rej kwalok bwe Jerusalem ear wõnmanlok im ellã jen kokkure iumin bar emen yiõ ko, inem etke Ri Christian ro rar aikwij ilo mõkaj bokake nan in kakkõl eo an Jesus ilo yiõ eo 66 C.E.?
14, 15. Etke kar juõn men ekanuij aorõk ñan Ri Christian ro ilo ebeben eo jinoin ñan air emmakit ilo mõkaj ke rar lo an jar in tarinae ko kabole Jerusalem?
14 Meñe emol bwe jar in tarinae eo an Rome ear jab kokkure Jerusalem mae yiõ eo 70 C.E., ejjab melelen bwe yiõ ko emen mokta jen yiõ in ear wõr ainemõn. Ilo mol ear jab! Yiõ kein rar obrak kin kowadoñ im katorlok bõtõktõk. Juõn ri jeje bwebwenato ej kwalok kin wãwen eo ear walok ilo Jerusalem ilo kar ien in einwõt “juõn tarinae ekamijak im eobrak kin katorlok bõtõktõk, ekoba jerbal ko relej im rekanuij nana.” Rar bõk likao ro emõn dettair ñan kakajur lok worwor in ebar eo, ñan air bõk kein tarinae ko, im ñan air jerbal ilo jar in tarinae eo. Kajjojo ran rej bõk kaminene ko ilo jerbal in tarinae. Ro im rar jab rejetake makitkit kein kar watõk ir ri jumae ro. Elañe Ri Christian ro rar bedwõt ilo jikin kwelok eo, renaj kar bed ilo juõn wãwen elap an kauwatata.—Matu 26:52; Mark 12:17.
15 Jej aikwij bareinwõt kile bwe Jesus ear ba bwe “ro rej ber i Judia,” jab ilo Jerusalem wõt, rar aikwij ko bareinwõt. Menin ear aorõk kinke iloan jet wõt alliñ ko jen ke rar diojlok jen Jerusalem, jar in tarinae ko an Rome rar bar jino jerbal in tarinae eo air. Moktata, rar anjo ion Galilee ilo 67 C.E., im ilo yiõ eo tok juõn rar anjo ion Judea. Menin ear bõktok elap eñtan ion aolepen jikin ko ibelakin Jerusalem. Bareinwõt ear laplok an bin ñan an jabdewõt Ri Jew ro ko jen Jerusalem. Worwor ko an jikin kwelok eo ear wõr ri bar ro rej lale, im elañe jabdewõt ej kajeoñ in ko kar watõk rein bwe rej illok jen Ri Jew ro ñan air kobalok ibben jar in tarinae eo an Ri Rome ro.
16. Kar ta lemnak eo ear aikwij bed ibben Ri Christian ro ilo ebeben eo kein kajuõn ñan air kar maroñ ellã im mour jen ien eñtan eo?
16 Ilo ad lemnak kin aolep men kein rar walok, jemaroñ melele kin etke Jesus ear lukkun kalikar aorõkin air aikwij emmakit ilo mõkaj. Ri Christian ro rar aikwij mõnõnõ in karmijete kõnan ko air make, jab kõtlok bwe ren mad kin mweiuk ko. Rar aikwij bojak ak mõnõnõ, in “illok jen men otemjej [air]” ñan air bokake nan in kakkõl eo an Jesus. (Luk 14:33) Ro im ilo mõkaj rar bokake im ko im ellã lok jen Jordan rar mour.
Kejbãrok Wõt Lemnak In Ekaiuriur Eo Ad
17. Etke jej aikwij kakajurlok ad ekkõl?
17 Kanan ko ilo Bible elukkun alikar air kwalok bwe jej mour ilo ien jemlokin. Einwõt jab kar mokta, jej aikwij kakajur lemnak in ekaiuriur eo ad. Juõn ri tarinae ilo ien ainemõn ejjab bõk juõn eñjake kin kauwatata in tarinae. Ak, elañe ejjab bõk juõn lemnak ñan an ekkõl wõt im ilo jidimkij rej kir e ñan tarinae, emaroñ jab bojak, im tokjen men in emaroñ bõk jorrãn im mij. Menin ej mol bareinwõt ilo jitõb. Elañe jej kõtlok bwe ekkõl eo ad en jakolok, jemaroñ jab bojak ñan ad bõprae men in kokkure ko rej itok imad im jab kile bwe ran eo an Jehovah emottok. (Luk 21:36; 1 Dri Tessalonika 5:4) Elañe jabdewõt ear ‘oktaklok jen Jehovah im rejjab bar lor e,’ kiõ ej ien ñan air bar bukõt e.—Zephaniah 1:3-6; 2 Dri Tessalonika 1:8, 9.
18, 19. Ta eo enaj jibañ kij ñan ad kõtmene kin ‘ran in Jehovah itok’?
18 Ejelok bere ri jilek Peter ear rejañ kij ñan ad kõtmene kin ‘ran in Jehovah itok’! Ewi wãwen jemaroñ kõmmane menin? Juõn wãwen ej ikijen ad bõk kunad ilo “kõmõn wãnik im kabuñ rokwojarjar.” (2 Piter 3:11, 12) Boub wõt ilo jerbal kein enaj jibañ kij ñan ad kõtmene im lipjerjere itok eo an ‘ran eo an Jehovah.’ Jejjab maroñ kamõkajlok ien kein rej bed mae ien eo ej itok ran eo an Jehovah. Ak, ke jej kõttar ran eo, ien enaj mõkajlok elañe jej boub wõt ilo jerbal eo an Anij.—1 Dri Korint 15:58.
19 Kalmenlokjen kin Nan eo an Anij im lemnak kake nan in kakememej ko rej bed iloan renaj kamaroñ kij ñan ad kõmmane menin “kijoror kin (kõtõmene im lipjerjer) itok eo” an ran eo, aet, “ien otemjej kõtõmene” kake. (2 Piter 3:12, The Amplified Bible; The New Testament, jeje in William Barclay) Ibben nan in kakememej kein elõñ kanan ko rej kanan jab kin ien itok eo an ran eo an Jehovah wõt ak bareinwõt kin elõñ kajerammõn ko me naj lilok ñan ro rej ‘kõttar wõt Jehovah.’—Zephaniah 3:8.
20. Ta nan in rejañ eo jej aikwij bõk ñan buruõd?
20 Kiõ ej ien eo ñan ad aolep bõk ñan buruõd nan in rejañ eo ri kanan Zephaniah ear letok: “Mokta jen an illu eo ebwil an Iroij buñ iom, im mokta jen ran eo enaj kwalok an matõrtõr. Kom otemjej ro ettã burueir ilo ailiñ eo, ro rej bokake kien ko an Iroij, komin bukõt ankilan. Komin kõmmõni men ko rejimwe im kõttãik kom iman mejen Iroij. Innem bwelen kom naj joor jen kaje eo ilo ran eo Iroij enaj kwalok illu eo an.”—Zephaniah 2:2, 3.
21. Ta eo armij ro an Anij renaj kate in kõmmane ilo yiõ in 2007?
21 Kin menin, elap an jejjet im ekkar, unin tel in me kar kãlete ñan yiõ in 2007: ‘Ran eo elap an Jehovah ej ebak.’ Armij ro an Anij rej tõmak bwe, “elukkun ebak im emõkajtok.” (Zephaniah 1:14) “Ejjelok menin bõbraiki.” (Habakkuk 2:3) Kin menin ke jej kõttar ran eo, jen mour ie, im kile bwe jejjet in kitien kanan kein rebojak in walok!
Kwomaroñ ke Uak?
• Ta in ‘ran eo elap an Jehovah’?
• Etke elõñ rej kajekdon ien ekaiuriur kein?
• Etke Ri Christian ro ilo ebeben eo kein kajuõn rar aikwij emmakit ilo mõkaj?
• Ewi wãwen jemaroñ kakajurlok lemnak in ekaiuriur eo ad?
[Naan ko ilo peij 7]
Unin tel eo ñan yiõ in 2007 enaj: ‘Ran eo elap an Jehovah ej ebak.’—Zephaniah 1:14.
[Pija ko ilo peij 5]
Einwõt ilo ran ko an Noah, ri kajirere ro renaj bwilõñ ñe Jehovah enaj emmakit
[Pija eo ilo peij 6]
Ri Christian ro rar aikwij emmakit ilo mõkaj ke rar lo an “jaran dri tõrinae ro rej kabol”