“Ajiri Rõn, Komin Bokake Jememi Im Jinemi”

“Ajiri rõn, komin bokake jememi im jinemi ilo Iroij: bwe men in e jime.”​—DRI EPESÕS 6:⁠1.

1. Ewi wãwen bokake emaroñ kejbãrok yuk?

JEJ mour wõt ñan kiõ kinke jaar bokake, ak jet rejako ak rejjab mour kiõ kinke rar likjap in bokake. Bokake ta? Nan in kakkõl ko, ñan wanjoñok, jen enbwinid eo kar kõmanmane “men in bwilõñ.” (Sam Ko 139:​14) Mejed ej lo kõdo ko rekilmej, im lojilñid rej roñ an jorur kabbokbok. Inem, kõto ej laplok wõt. Ñan ro im kar katakin ir kin men kein rekauwatata, kakõlle kein rej kein kakkõl eo ñan an juõn bukõt juõn jikin kone jen lañ eo ej itok ibben jarom ko me remaroñ menin kauwatata ñan mour.

2. Etke ajiri ro rej aikwij nan in kakkõl ko, im etke rej aikwij bokake ro jemeir im jineir?

² Kom ro redik komij aikwij nan in kakkõl ko kin men ko rekauwatata, im ro jememi im jinemi ej eddo eo air ñan air kõmmane menin. Bõlen kwoj kememej air kin jiroñ kom: “Jab jibwe stove ne. Ebwil.” “Jab etal ñan lojet. Ekauwatata.” “Reito-reitak ñe kwoj kijone ial eo.” Ekaburomõjmõj, bwe ajiri ro rej jorrãn ak mij kinke rej likjap in bokake. Ñan bokake ro jememi im jinemi “men in e jime.” Ej bareinwõt men in meletlet. (Jabõn Kennan Ko 8:​33) Bar juõn eon ilo Bible ej ba bwe ej “kabuñburuen” ad Iroij Jesus Christ. Ilo mol, Anij ej kaiñi yuk ñan am bokake jemõm im jinõm.​—Dri Kolosse 3:20; 1 Dri Korint 8:⁠6.

Jerammõn ko Rej ñan Indio kin Bokake

3. Ta eo ej “mour eo emol” ñan elõñ iad, im ewi wãwen ajiri ro remaroñ kejatdikdik ñan air mõnõnõ kake?

³ Bokake ro jemõm im jinõm ej kejbãrok “mour eo am kiõ,” ak bokake emaroñ bareinwõt kõmman bwe kwon mõnõnõ kin mour “eo e naj itok,” eo ej naetan “mour eo emol.” (1 Timote 4:8; 6:​19) Ñan enañin aoleped, mour eo emol ej mour eo ejelok jemlokin ijin ion lal ilo lal eo ekãl an Anij, eo im ej kallimur kake ñan ro im rej ilo tiljek eddeb ñan kien ko an. Juõn ian kien kein relap ej ba: “ ‘Kwon koutiej jemõm im jinõm’ (eo kien moktata eor kalimur iben), ‘Bwe en emõn ibõm, im bwe en eto am mour ion lõl.’” Inem elañe kwoj bokake jemõm im jinõm kwonaj mõnõnõ. Ilju im jeklaj eo am enaj jokane, im bõlen kwonaj maroñ mõnõnõ kin mour indio ilo paradise eo ion lal!​—Dri Epesõs 6:​2, 3.

4. Ewi wãwen ajiri ro remaroñ kautiej Anij im ilo wãwen in bõk tokjen?

⁴ Ñe kwoj kautiej ro jemõm im jinõm ikijen am bokake ir, kwoj bareinwõt kautiej Anij kinke e eo ej jiroñ yuk ñan am bokake ir. Im ilo ejja ien eo wõt, kwoj bõk tokjen jen am bokake. “Ña Jeova am Anij, Eo eor tokjen An katakin yuk,” Bible ej ba. (Aiseia 48:17; 1 Jon 5:⁠3) Ewi wãwen kwoj bõk tokjen jen am bokake? Ej kõmman bwe jinõm im jemõm ren mõnõnõ, im jen menin, renaj kwalok air mõnõnõ ilo wãwen ko im renaj kõmman bwe mour eo am en laplok an lemõnõnõ. (Jabõn Kennan Ko 23:​22-25) Ak men eo eaorõktata, bokake eo am enaj kõmman bwe Jemõm ilañ en mõnõnõ, im enaj kanuij lap an kajerammõn yuk! Jen lale ewi wãwen Jehovah ear kajerammõn im kejbãrok Jesus, eo ear ba kin e make: “Ien otemjej Ij kõmõn men ko rej kabuñburuen.”​—Jon 8:⁠29.

Jesus​​—Ri Jerbal Eowõn

5. Ta un ko ñan ad tõmak bwe Jesus ear juõn ri jerbal eowõn im emõn?

⁵ Jesus ear manje eo an jinen, Mary. Leo jemen, Joseph, ear juõn carpenter. Jesus bareinwõt ear erom juõn carpenter, ealikar ear katak kabel in jen Joseph. (Matu 13:55; Mark 6:3; Luk 1:​26-31) Kar kain ri carpenter rot Jesus? Ke ear bed ilo lañ, mokta jen an kar itok ñan lal in, ear kamelele: “I ar ber iturin [Anij], einwõt juõn dri mejerik, im I ar jitenburu iben ran otemjej.” Anij ear buñburuen kake Jesus, eo im ke ear bed ilo lañ ear juõn ri jerbal emõn. Kwoj lemnak ke bwe, ke ear juõn ajiri ijin ilal ear bareinwõt kate e ñan an juõn ri jerbal emõn, juõn carpenter eowõn?​—Jabõn Kennan Ko 8:30; Dri Kolosse 1:​15, 16.

6. (a) Etke kwoj lemnak bwe Jesus einwõt juõn ajiri ear aikwij jerbal ilo imweo imõn? (b) Ilo wãwen et ko ajiri ro remaroñ kajeoñe Jesus?

⁶ Ejelok bere bwe, ke Jesus ear juõn ajiri, jet ien ear ikkure, einwõt an Bible eo ba kin ajiri ro ilo ien ko mokta re kin ikkure. (Zechariah 8:5; Matu 11:​16, 17) Ak, kwomaroñ liki bwe einwõt juõn eo eritto tata ilo juõn family elap im ejjab mweie, ear lõñ jerbal ko ear aikwij kõmmani ekoba ibben kaminene eo ear bõk jen Joseph ñan an erom juõn carpenter. Tokelik, Jesus ear erom juõn ri kwalok im ear lelok emake ñan jerbal in kwalok nan eo an ñan joñan eo ear aikwij karmijete juõn mour emõn. (Luk 9:58; Jon 5:​17) Kwomaroñ ke lo jet wãwen ko me kwomaroñ kajeoñe Jesus ie? Ro jinõm im jemõm rej kajitõk ke bwe kwon karreoik room eo am ak kõmmane jerbal ko jet? Rej rejañ ke yuk ñan am bõk kunam ilo kabuñ ñan Anij ikijen am bed ilo kwelok ko an Christian im jaketo-jaketak tõmak eo am ibben ro jet? Kwoj lemnak ewi wãwen Jesus enaj kar uak elañe kar kajitõk ibben ejja kajitõk kein wõt?

Juõn Ri Katak Bible Eniknik im Ri Katakin

7. (a) Wõn ro Jesus ear illok ibbeir lok ñan Kwojkwoj in Kijone eo? (b) Ia eo Jesus ear bed ie ke ro jet rar jino jeblak ñan kabijukneir, im etke ear bed ijo?

⁷ Aolep emaan im ladik ro ilo juõn family in Ri Israel ro kar kakien ir ñan air illok in kabuñ ñan Jehovah ilo temple eo ilo ien kwojkwoj ko jilu relap an Ri Jew ro. (Duteronomi 16:​16) Ke Jesus ear 12 yiõ dettan, bõlen e im aolepen family eo an rar illok ñan Jerusalem ñan ien Kwojkwoj in Kijone eo. Emaroñ kar koba ladik im ledik ro jatin. Bõtab, ro im rar illok ibben family eo an Jesus emaroñ kar kitibuj Salome, eo im bõlen jein ak jatin Mary, leo belen etan Zebedee im maan ro nejiir James im John, ro im tokelik rar erom ri jilek ro.a (Matu 4:​20, 21; 13:​54-56; 27:56; Mark 15:40; Jon 19:​25) Ilo ial eo ke rej jeblak, Joseph im Mary rej bõlen lemnak bwe Jesus ej bed ibben ro nukiir, inem ilo jinoin ial eo air rar jab jelã bwe ejako. Jilu ran tokelik, ke Mary im Joseph rar lo Jesus, ear bed ilo temple eo, “ej jijõt iolapin ro dri kaki, ej roñjake ir, im kajitõk ibeir.”​—Luk 2:​44-46.

8. Ta eo Jesus ear kõmmane ilo temple eo, im etke armij ro rar bwilõñ?

⁸ Ilo wãwen et eo Jesus ear “kajitõk” ibben ri kaki ro? Kajitõk ko an bõlen ear jab ñan an baj kajuburuen kõnan eo an ñan baj jelã wõt ak an bõk wõt melele. Nan in Greek eo im rej kajerbal ijin emaroñ jitõñlok ñan kajitõk ko rej kajerbali ilo ien ekajet ko im emaroñ kitibuj uak ko rej itok ikijen kajitõk ko. Aet, meñe ilo ien eo ke ear juõn jodikdik, Jesus ear rittolok im erom juõn ri katak kin Bible eo im ear kabwilõñ ri kaki in kabuñ ro! “Ir otemjej rej roñjake re bwilõñ kin An meletlet im nan in uak,” Bible eo ej ba.​—Luk 2:⁠47.

9. Ewi wãwen kwomaroñ lor joñok eo an Jesus ilo am katak Bible eo?

⁹ Ilo am lemnak ewi wãwen an kar Jesus maroñ kabwilõñ ri kaki ro retijemlok kin Bible kin jelãlokjen eo an kin Bible meñe ear ajiri wõt? Aet, kar kajerammõne kin ro jinen im jemen re mijak Anij, ro im rar katakin e jen ke ar niñniñ nan in katak ko rekwojarjar. (Exodus 12:​24-27; Duteronomi 6:​6-9; Matu 1:​18-20) Jemaroñ kõtmene im liki bwe ke Jesus ear ajiri wõt Joseph ear bõke ñan imõn kwelok eo ñan an roñjake air read im konono kin Jeje ko ilo Bible. Kwoj bõk ke jerammõn eo kin ro jemõm im jinõm im rej katak kin Bible eo ibbam im bõk yuk ñan kwelok ko an Christian? Kwoj kaorõk ke kate im jibadbad ko air, einwõt kar Jesus ke ear kamolol kin kate ko an ro jemen im jinen? Kwoj konono ke ñan ro jet kin ta ko kwoj katak, einwõt an kar Jesus kõmman?

Jesus Ear Kiblie

10. (a) Etke jemen im jinen Jesus rar aikwij jelã ia eo ren kar lo e ie? (b) Ta joñok eo emõn Jesus ear likit ñan ajiri ro?

¹⁰ Ilo am lemnak ewi eñjake eo an kar Mary im Joseph ke rar lo Jesus jilu ran ko tokelik ilo temple eo? Ejelok bere bwe, rar lukkun mõnõnõ. Ak, Jesus, ear bwilõñ bwe jemen im jinen rar jab jelã ia eo ear bed ie. Erro jimor rar jelã kin lotak eo an ekabwilõñlõñ. Bareinwõt, meñe rar jab lukkun jelã kin aolep tibdik in melele ko, ren kar jelã jidik kin jerbal eo an einwõt Ri Lomor im einwõt Iroij eo an Ailiñ in Anij ilo ran ko rebed iman. (Matu 1:21; Luk 1:​32-35; 2:​11) Kin men in, Jesus ear kajitõk ibbeir: “Etke kom ar bukot Iõ? Kom ar jaje ke bwe emõn In ber ilo imõn Jema?” Bõtab, ilo bokake, Jesus ear illok ibben jemen im jinen im jeblak ñan kabijuknen ilo Nazareth. Bible eo ej ba: “Ej bokake ir.” Bareinwõt, “jinen ej likit nan kein otemjej ilo buruen.”​—Luk 2:​48-51.

11. Ta katak eo kin bokake kwomaroñ katak jen Jesus?

¹¹ Ebidodo ke ñan am anõk Jesus, ilo am ien otemjej bokake ro jemõm im jinõm? Ak kwoj lemnak ke bwe ekkã air jab melele kin wãwen mour ilo ran kein im bwe kwo jelã lok jen ir? Emol, emaroñ laplok am jelã kin jet men ko​—bõlen kin kilen kajerbal cell phone ko, computer ko, ak kein jerbal ko jet ilo ran kein. Ak lemnak mõk kin Jesus, eo ear kabwilõñ ri kaki ro rejelã lok kin “an meletlet im an uak.” Bõlen kwomaroñ errã bwe jidik wõt am jelã, ñe keidi ibben Jesus. Bõtab, Jesus ear kõttãik e ñan jemen im jinen. Ak ejjab melelen bwe aolep ien ear errã ilo bebe ko air. Mekarta, “ej bokake ir”​—manlok ñan ien eo ear juõn jodikdik. Ta katak eo kwoj lemnak kwomaroñ katak jen joñok eo an?​—Duteronomi 5:​16, 29.

Bokake​—Juõn Aitwerõk

12. Ewi wãwen bokake emaroñ kejbãrok mour eo am?

¹² Ejjab aolep ien ebidodo ñan ad bokake, einwõt ear walok jet yiõ ko remotlok ke ruo ledik jodikdik rar bojak in kijone juõn ial elap ijellokin airro etal ñan jikin kijone eo ilõñin ial eo. “Itok John,” erro ej ba ñan ladik eo mõttair ke ej kaioklok jikin etetal eo ilõñ. “Kwoj jab itok ibbem ro ke?” Ke ej aibedbed, juõn ian ledik ro ej kakitõtõik e, “Kwo buwal!” John, meñe ejjab mijak, ej ba, “Ij aikwij roñjake jinõ.” Ke ej etal ilo jikin etetal eo jet minute ko tokelik, ej roñ ainikien neen wa eo im ej reilallok im lo an juõn wa dibõj ledik ro. Juõn ian ledik ro ear mij, eo juõn ear lukkun jorrãn inem rar aikwij in mwijit juõn ian nee ko neen. Kõrã eo jinen ledik ro, eo ear jiroñ ledik ro bwe ren kajerbal jikin etetal eo ilõñ, tokelik ear ba ñan jinen John, “Yokwe bwe ledik ro ren kar bokake einwõt ladik eo nejõm.”​—Dri Epesõs 6:⁠1.

13. (a) Etke kwoj aikwij bokake jemõm im jinõm? (b) Ñããt eo enaj ekkar bwe juõn ajiri en jab kõmmane men eo ro jemen ak jinen rej jiroñe bwe en kõmmane?

¹³ Etke Anij ej ba: “Ajiri rõn, komin bokake jememi im jinemi”? Ikijen am bokake jemõm im jinõm, kwoj bokake Anij. Ijellokin menin, ro jemõm im jinõm rejelã im elap lok air iminene jen kwe. Ñan wanjoñok, lalem yiõ moktalok jen an kar walok jorrãn eo kar konono kake ilõñ, ear wõr juõn jeran jinen John kõrã, im ajiri eo nejin kõrã in ear mij ke ear kajeoñ kijone ejja ial eo wõt! Emol, ejamin aolep ien bidodo ñan am bokake ro jemõm im jinõm, ak Anij ej ba bwe kwoj aikwij. Ak ilo ijo turãjet, elañe jinõm im jemõm​—ak ro jet​—rej jiroñ yuk bwe kwon riap, kwot, ak kõmman jabdewõt men eo Anij ejjab buñburuen kake, kwoj aikwij “bokake Anij elap jen armij.” Eñin unin elikin an ba “bokake jememi im jinemi,” Bible eo ej bar kobaiktok im ba, “ilo Iroij.” Men in ej kitibuje am bokake jememi im jinemi ilo men otemjej me rej errã ibben kien ko an Anij.​—Jerbal 5:⁠29.

14. Etke ebidodo ñan an juõn eo ewãppen bokake, ak etke ear aikwij katak kake?

¹⁴ Kwoj lemnak ke bwe elañe kwar wãppen​—ak ba, “erreo otem erreo, emõkelok ian jen ro dri jerawiwi,” einwõt kar Jesus​—enaj kar ien otemjej bidodo ñan am bokake ro jemõm im jinõm? (Dri Hibru 7:​26) Elañe kwar wãppen, kwojamin kar kõnan kõmmane men eo enana, einwõt kwoj kõmman kiõ. (Jenesis 8:21; Sam Ko 51:⁠5) Bõtab, Jesus bareinwõt, ear aikwij katak kin bokake. Bible eo ej ba: “Meñe [Jesus] Nejin, E ar katak im bokake kin men ko E ar iñtan kaki.” (Dri Hibru 5:⁠8) Ewi wãwen eñtan ear jibañ Jesus ñan an katak bokake, juõn katak ear jab aikwij kar katak ke ear bed ilañ?

15, 16. Ewi wãwen Jesus ear katak bokake?

¹⁵ Iumin tel eo an Jehovah, Joseph im Mary rar kejbãrok Jesus jen jorrãn ke ear juõn ajiri. (Matu 2:​7-23) Bõtab, ejjab to, Anij ear bõk kejbãrok eo an jen Jesus. Eñtan eo an Jesus ilo lemnak im enbwinin ear lukkun lap inem Bible eo ej ba bwe “E ar katok kin jar ko im akwelap ko, im elap An lamij im jõñ.” (Dri Hibru 5:⁠7) Ñããt eo menin ear walok?

¹⁶ Ien eo ear walok menin, ej ilo awa ko eliktata in mour eo an Jesus ion lal ke Satan ear kajeoñ in rupe tiljek eo an Jesus. Alikar Jesus ear lukkun inebata kin ekijkan mij eo an einwõt juõn ri nana emaroñ jelet ãt eo etan Jemen ilo juõn wãwen enana inem ke “ej kalaplok An jar [ilo jikin kallip in Gethsemane]: im An menokoru einwõt elap bõliñliñ in bõtõktõk e wutlok ion brij.” Jet awa ko tokelik, wãwen mij eo an ion juõn alal in eñtan ear lukkun lap an kaeñtanan im Jesus “elap an lamij [kin] jõñ.” (Luk 22:​42-44; Mark 15:​34) Kin menin “e ar katak im bokake kin men ko e ar iñtan kaki” im ear kamõnõnõik buruen Jemen. Kiõ ke ej bed ilañ, Jesus ej eñjake im ejelã ad eñtan ke jej kate kij ñan ad bokake.​—Jabõn Kennan Ko 27:11; Dri Hibru 2:18; 4:⁠15.

Katak Kin Bokake

17. Ewi wãwen jej aikwij watõk ñe jej bõk kaje?

¹⁷ Ñe jemõm im jinõm rej kauwe yuk, ej kwalok bwe rej kõnan men eo emõntata ñan kwe, im bwe rej yokwe yuk. “Bwe ewi nejin eo jemen e jab kajeik e?” Bible eo ej kajitõk. Ejamin ke kar menin kaburomõjmõj elañe ro jemõm im jinõm rar jab yokwe yuk ñan air bõk ien im kate ir ñan air kajimwe yuk? Eindein lok wõt, kinke Jehovah ej yokwe yuk, ej kajimwe yuk. “Jabrewõt kaje, ilo ien in e jab men in mõnõnõ, a men in buromõj; ijoke tokelik ej jebar leen kwojarjar e ainemõn ñõn ro emwij kajeik ir kake.”​—Dri Hibru 12:​7-11.

18. (a) Ta eo kaje ilo yokwe ej kamole? (b) Ta tokjen ko remõn emwij am loi me kar eik armij ro kin kaje?

¹⁸ Juõn king ilo Israel eo etto, eo im Jesus ear konono kake kin meletlet eo an elap, ear konono kin aikwij eo ñan an jemen im jinen lelok kaje ilo yokwe. “Eo ej drebij wõt alal in kaje, ej drike nejin,” Solomon ear je, “a eo ej yokwe e, ej kajeik e ilo ien ekar.” Solomon ear bareinwõt ba bwe juõn eo ej bõk kauwe ilo yokwe ej lomoren an jen mij. (Jabõn Kennan Ko 13:24; 23:​13, 14; Matu 12:​42) Juõn kõrã Christian ej kememej bwe ke ear juõn ajiri ñe ej jab kõmanmõn mwilin ilo kwelok ko an Christian, jemen ej jiroñ e bwe enaj kauweik e ñe renaj jeblak ñan mweo imwiir. Kiõ ej kememej jemen kin yokwe kin an kar lelok ñane kaje ilo yokwe eo me ear eik mour eo an ilo wãwen eo emõn.

19. Etke elaptata kwoj aikwij bokake ro jemõm im jinõm?

¹⁹ Elañe ewõr ro jemõm im jinõm me elap air yokwe yuk ñan air bõk ien im kate ir ñan air kauwe im kaje yuk ilo juõn wãwen e yokwe, kwon kwalok am kamolol. Bokake ir, einwõt an kar Iroij eo ad Jesus Christ bokake ro jemen im jinen, Joseph im Mary. Ak bokake ir elaptata kinke Jemõm ilañ, Jehovah Anij, ej ba kwon kõmmane. Inem kwonaj bõk tokjen jen e, im “bwe en emõn ibõm, im bwe en eto am mour ion lõl.”​—Dri Epesõs 6:​2, 3.

[Footnotes]

Ewi Wãwen Kwonaj Uak?

• Ta tokjen ko ajiri ro remaroñ bõk jen air bokake ro jemeir im jineir?

• Einwõt juõn ajiri, ewi wãwen Jesus ear likit juõn joñok ilo an bokake jemen im jinen?

• Ewi wãwen Jesus ear katak bokake?

[Pija eo ilo peij 28]

Jesus ke ear joñoul ruo yiõ dettan ear jelã Jeje ko ilo Bible.

[Pija eo ilo peij 31]

Ewi wãwen Jesus ear katak bokake jen an eñtan?