Emwij Katakin Ñan Kwalok Nan Ilo Wãwen Eo Ejejjet
“Kom naj Aõ dri kennan ilo Jerusalem, im i aolepen Judia, im i Sameria im ñõn eneo etolok tata ilõl.”—JERBAL 1:8.
1, 2. Ta jerbal eo kar lelok ñan Peter, im wõn eo ear lelok ñan e?
“JISÕS dri Nazeret . . . E ar jiroñ kim bwe kimin kwalok ñõn armij rõn, im kennan bwe E in Eo Anij e ar likit E bwe En Dri Ekajet ro remour im ro remij.” (Jerbal 10:38, 42) Kin nan kein, ri jilek Peter ear kameleleik Cornelius im family eo an kin jerbal eo ear bõke bwe en juõn ri evanjel.
2 Ñããt eo Jesus ear jiroñ ir kin jerbal in? Alikar, Peter ear lemnak kin ta eo Jesus eo ear jerkakbiji ear ba mokta lok jidik jen an kar wanliñlok ñan lañ. Ilo ien eo, Jesus ear jiroñ ri kalor ro an retiljek: “Kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.” (Jerbal 1:8) Bõtab, mokta jen ien in, Peter ear jelã bwe einwõt juõn ri kaloran Jesus, ear aikwij konono ibben ro jet kin tõmak eo an ilo Jesus.
Kar Katak Iumin Jilu Yiõ
3. Ta eo ear walok ke Jesus ear kir Peter bwe en erom juõn ri kaloran?
3 Jet alliñ ko elikin an kar baptais ilo 29 C.E., Jesus ear kwalok nan ijo Peter im Andrew rar jerbal einwõt ri eñwõd ro ilo Lomalo in Galilee. Rar jerbal aolepen juõn boñ ak kar ejelok konair. Ak, Jesus ear jiroñ ir: “Kwon wõnmetolok im drorlol ok ko im añwõr.” Ke rar kõmmane ta eo Jesus ear ba, “rej kaboli elõñ iik: im air ok re nañin rup.” Ilo an lo men in bwilõñ in, Peter ear mijak, ak Jesus ear kainemõn e, im ba: “Kwon jab mijõk; jen ien in kwo naj druok armij.”—Luk 5:4-10.
4. (a) Ewi wãwen an kar Jesus keboj ri kalor ro an ñan kwalok nan? (b) Ewi naj wãwen jerbal in kwalok nan eo an ri kalor ro an Jesus ñe keidi ibben jerbal eo an make?
4 Ilo mõkaj, Peter im Andrew—im bareinwõt James im John, lõmaro nejin Zebedee—rar ilok jen waan eñwõd ko wair im lor Jesus. Iumin enañin jilu yiõ, rar etal ibben Jesus ilo ial in kwalok nan ko an im kar katakin ir bwe ren ri evanjel ro. (Matu 10:7; Mark 1:16, 18, 20, 38; Luk 4:43; 10:9) Ilo jemlokin ien in, ilo Nisan 14, 33 C.E., Jesus ear jiroñ ir: “Eo ej liki Ña, jerbal ko Ij kõmõnmõni, e naj kõmõni bareinwõt; im jerbal ko relap jen kein e naj kõmõni.” (Jon 14:12) Ri kalor ro an Jesus renaj kwalok nan einwõt Jesus ear kõmmane ak ilo juõn joñan elaplok. Ejjabto tokelik rar kile, ir im aolep ro renaj erom ri kalor ro renaj kwalok nan ilo “ailiñ ko otemjej,” ñan “jemlokin jukjuk im bed in.”—Matthew 28:19, 20, NW.
5. Ilo wãwen et ko jemaroñ bõk tokjen jen kaminene eo Jesus ear lelok ñan ri kalor ro an?
5 Jej mour ilo ien “jemlokin jukjuk im bed in.” (Matthew 24:3, NW) Einjuõn jen ri kalor ro jinoin, jejjab maroñ etal ibben Jesus im lale wãwen an kwalok nan ñan armij. Ak, jemaroñ bõk tokjen katakin eo an ilo ad konono ilo Bible kin ewi wãwen ear kwalok nan im ta nan in jiroñ ko ear lelok ñan ri kalor ro an. (Luk 10:1-11) Bareinwõt, katak in enaj bwebwenato kin juõn men eaorõk me Jesus ear kwalok ñan ri kalor ro an—lemnak eo ejimwe kin jerbal in kwalok nan.
Juõn Itoklimo kin Armij
6, 7. Kadkad et eo ear kõmman bwe en keie jerbal in kwalok nan eo an Jesus, im ewi wãwen jemaroñ anõk e ilo wãwen in?
6 Etke ekeie wãwen an kar Jesus kwalok nan? Juõn unin kar kin itoklimo eo an emũlal im an kea kake armij. Ri jeje sam ear kanan bwe Jesus enaj “tiriamokake ro dri jeramel im ro dri aikwij.” (Sam 72:13) Emol an kar kajejjet kitien kanan in. Bible ej ba kin juõn ien: “A ke Ej lo jar ko, Ej tiriamokake ir, bwe rej barõk, im jibliklik einwõt s̃ip ko ejelok air s̃eperd.” (Matu 9:36) Meñe ro rekanuij nana rar eñjake an itoklimo im rar kebak e.—Matu 9:9-13; Luk 7:36-38; 19:1-10.
7 Elañe jej kwalok ejja itoklimo eo wõt kin armij enaj keie ad jerbal. Mokta jen am bõk kunam ilo jerbal in kwalok nan, etke kwojjab bõk jidik ien ñan lemnak kin joñan an armij aikwiji melele ko kwoj bõklok ñan ir? Lemnak kin abañ ko me ewõr ibbeir me Ailiñ eo wõt emaroñ kamadmõdi. Kwon bebe ñan bõk juõn lemnak emõn kin aolep armij, kinke kwojaje wõn ro renaj emmakit ilo emõn ñan ennan eo. Bõlen armij eo juõn kwoj kebake ear jar bwe juõn armij einwõt kwe en itok im jibañ e!
Emmakit kin Yokwe
8. Ilo kajeoñe Jesus, ta eo ej kamakit ri kalor ro an ñan kwalok kin news eo emõn?
8 News eo emõn me Jesus ear keañ kake ekar wõr kunan ikijen kõtõbrak ankil an Jehovah, kokwojarjar Etan, im karreoik lotan eo nae iroij bõtata eo An—aitwerõk ko relap me armij rej jelmaiki. (Matu 6:9, 10) Kin an yokwe Jemen, men in ear kamakit Jesus bwe en kejbãrok an tiljek ñan jemlokin im bwe en let an kwalok kin Ailiñ eo, eo enaj uaki aolep aitwerõk kein. (Jon 14:31) Kinke ejja men in wõt ej kamakit ri kalor ro an Jesus rainin, rej tiljek ilo air bõk kunair ilo jerbal in kwalok nan. Ri jilek John ear ba: “Bwe eñin yokwe Anij, bwe jen kejbãrok kien ko An,” ekoba kien eo ñan kwalok nan kin news eo emõn im ñan kõmman ri kalor ro.—1 Jon 5:3; Matu 28:19, 20.
9, 10. Ijellokin yokwe eo ad ñan Anij, yokwe et eo juõn ej kamakit kij ñan kõmman bwe en let ad kwalok nan?
9 Jesus ear jiroñ ri kalor ro an: “Elañe komij yokwe Iõ, kom naj kejbãrok kien ko Aõ. Eo kien ko Aõ iben, im ej kejbãroki, e in eo ej yokwe Iõ.” (Jon 14:15, 21) Kin men in, yokwe Jesus en kamakit kij ñan kwalok nan kin mol eo im bokake men ko jet me Jesus ear kakien kaki. Juõn ien ke ear walok elikin an kar jerkakbiji, Jesus ear rejañ Peter: “Kwon najirik lam ko Aõ. . . . Kwon s̃eperd Aõ s̃ip. . . . Kwon najirik Aõ s̃ip.” Ta eo en kamakit Peter ñan kõmmane men in? Jesus ear kalikar uak eo ke ear elijinmen an kajitõkin Peter: “Kwoj yokwe Iõ elap jen rein ke? . . . Kwoj yokwe Iõ ke? . . . Kwoj yokwe Iõ ke?” Aet, yokwe eo an Peter ñan Jesus en kamakit e bwe en let an kwalok nan, bukõt “s̃ip” ro an Jesus, im jen ien eo en shepherd ir kin men ko lor jitõb.—Jon 21:15-17.
10 Rainin, jejjab make lo im jelã kajjen Jesus einwõt an kar Peter jelã e. Ak, ewõr ibbed juõn melele emũlal kin ta eo Jesus ear kõmmane ñan kij. Buruõd ej emmakit kin yokwe eo an elap me ear tellok e bwe en “erjoñ mij ñõn armij otemjej.” (Dri Hibru 2:9; Jon 15:13) Eñjake eo ad ej einwõt eo an kar Paul ke ear je: “Bwe yokwe an Kraist e relel ilo buruem . . . E ar mij kin otemjej bwe ro rej mour ren jab bar mour ñõn ir mõke, a ñõn Eo e ar mij.” (2 Dri Korint 5:14, 15) Jej kwalok bwe jej kaorõk yokwe eo an Jesus ñan kij im bwe jej yokwe e bareinwõt ilo ad kate kij ñan kajejjet jerbal eo bwe en let ad kwalok nan. (1 Jon 2:3-5) Jej aikwij jab bõk lemnak eo bwe ejettokjen jerbal in kwalok nan, einwõt je kar watõk bwe katok eo an Jesus ear juõn men ejjab aorõk.—Dri Hibru 10:29.
Jen Kalimjek Wõt Men eo Eaorõk
11, 12. Ta unin an kar Jesus itok ñan lal, im ewi wãwen an kar lemnak wõt kin un in?
11 Ke Jesus ear jutak iman Pontius Pilate, ear ba: “Kin men in I ar lotak, im kin men in I ar itok ñõn lõl, bwe In kennan kin mol.” (Jon 18:37) Jesus ear jab kõtlok bwe jabdewõt men en kamad e jen an kwalok kin mol eo. Eñin kar ankil an Anij ñan e.
12 Satan ear lukkun melejoñe Jesus ilo men in. Ejjabto elikin an kar Jesus baptais, Satan ear ba bwe enaj kõmman e bwe en lukkun utiej ilo lal in, ilo an lelok ñan e “ailiñ in lõl otemjej, im air aibujuij.” (Matu 4:8, 9) Tokelik, Ri Jew ro rar kõnan kairoij e bwe en king. (Jon 6:15) Jet remaroñ lemnak kin tokjen ko renaj kar walok elañe Jesus ear bõk jerammõn kein, bõlen ilo air lemnak bwe einwõt juõn king, elõñ tokjen ko remõn emaroñ kõmmani ñan armij. Ak Jesus ear karmijeteik lemnak rot in. Ear kalimjek wõt an kwalok kin mol eo.
13, 14. (a) Ta eo ear likjap in kamad Jesus jen jerbal eo an eaorõk? (b) Meñe ear jeramel Jesus, ta eo ear kõtõbrake?
13 Bareinwõt, Jesus ear jab kõtlok bwe korlok mweiuk en kamad e. Tokjen men in, ear jab juõn armij emweie. Ear ejelok mweo imõn make. Juõn ien, ear ba: “Kiru jãkol eor roñ air, im bao in mejatoto eor ilir; a Nejin armij ejelok jikin An kababu bõran.” (Matu 8:20) Ke Jesus ear mij, men eo wõt eaorõk ear wõr ibben kar nuknuk eo me ri tarinae in Rome ro rar kõmman kakõlle kake. (Jon 19:23, 24) Inem, ear jerata ke mour eo an Jesus? Jaab ñan jidik!
14 Elaplok men ko Jesus ear kõtõbraki jen an ri mweie ro kõmman ñan kamadmõdi abañ ko an armij. Paul ear ba: “Bwe komij jela joij an ar Iroij Jisõs Kraist, bwe meñe e kin mweie, E ar erom jeramel kin kom, bwe komin mweie kin An jeramel.” (2 Dri Korint 8:9; Dri Pilippai 2:5-8) Meñe ear jeramel, Jesus ear kabellok ial eo bwe ro ettã burueir ren maroñ lañliñ kin mour indio ilo wãppen. Elap ad kamolol e! Im jej lukkun lañliñ kin jinekjej eo ear bõke kin an kõmman bwe ankil an Anij en men eo eaorõktata ilo an mour.—Sam 40:8; Jerbal 2:32, 33, 36.
15. Ta eo eaorõklok jen mweiuk?
15 Ri Christian ro rainin me rej kate ir ñan anõk Jesus rejjab bareinwõt kõtlok bwe korlok mweiuk en kamad ir. (1 Timote 6:9, 10) Rej kile bwe mweiuk ko remaroñ kõmman bwe en emõn im bidodo air mour, ak rej jelã bwe kejatdikdik eo air kin mour indio ejjab wawa ion mweiuk. Ñe ej mij juõn Ri Christian, ejelok tokjen mweiuk ko an ñan e einwõt an kar ejelok tokjen nuknuk eo an Jesus ke ear mij. (Ekklisiastis 2:10, 11, 17-19; 7:12) Ñe ej mij juõn Ri Christian, men eo wõt ewõr tokjen ibben ej kõtan eo an ibben Jehovah im ibben Jesus Christ.—Matu 6:19-21; Luk 16:9.
Jumae En Jab Kabwer Yuk
16. Ewi wãwen an kar Jesus jelmaik jumae?
16 Jumae ear jab kamad Jesus jen an kwalok nan kin mol eo. Meñe ear jelã bwe jerbal eo an ion lal enaj kar jemlok ilo an mij einwõt juõn men in katok men in ear jab kabwer e. Kin Jesus, Paul ear ba: “Kin lõñliñ ar likit e iman, E ar iñtan [ion alal in kaeñtan eo], im kejekron jok eo, im E ar jijõt i anbijmaroñõn tron an Anij.” (Dri Hibru 12:2) Lale bwe Jesus ear ‘kejekron jok.’ Ear jab inebata kin ta eo ri jumae ro rar lemnak kake e. Ear lemnak wõt ñan kõmanman ankil an Anij.
17. Ta eo jemaroñ katak jen kijenmij eo an Jesus?
17 Ilo an jerbale katak in kin kijenmij eo an Jesus, Paul ej rejañ Ri Christian ro: “Bwe komin kalõmõnlokjen kin Eo e ar kijenmij ilo an ro dri jerawiwi matõrtõr E, bwe komin jab mõk im kijelok ilo buruemi.” (Dri Hibru 12:3) Emol, emaroñ kamõk kij ñan ad aikwij jelmae jumae ak kajirere ran otemjej. Emaroñ kamõk kij ñan ad aikwij jumae wõt men in kareelel ko an lal in, bõlen ilo ad kaburomõj ro nukid me rej rejañ kij ñan jibadõk “men ko relap” ñan kij make. Bõtab, einwõt Jesus jej reilok ñan Jehovah ñan kabwe aikwij ko ad ke jej bukõt mokta Ailiñ eo ilo mour ko ad.—Matu 6:33; Dri Rom 15:13; 1 Dri Korint 2:4.
18. Ta men eo emõn jemaroñ katak jen nan ko an Jesus ñan Peter?
18 An kar Jesus makoko in kõtlok bwe jabdewõt men en kamad e men in ear alikar ke ear jiroñ ri kalor ro an kin mij eo an. Peter ear rejañ Jesus bwe “En etolok jen Kwe” im ear kamol ñan e bwe “e jamin ber ibõm.” Jesus ear makoko in roñjake jabdewõt men me enaj kamõjnolok bebe eo an ñan kõmanman ankil an Jehovah. Ej oktaklok ñan Peter im ba: “Kwon ilok ilikiõ, Setan: kwoj iten latibñil Iõ: bwe kwo jab lemnok kin men ko an Anij, a kin men ko an armij rõn.” (Matu 16:21-23) Jej aikwij beek ilo buruõd ñan karmijete lemnak ko an armij. Ilo oktan, ien otemjej jej aikwij kõtlok bwe lemnak ko an Anij ren tel kij.
Ej Bõktok Tokjen ko Remol
19. Meñe ear kõmman elõñ men in bwilõñ ko, ta kar mõttan eo eaorõktata ilo jerbal eo an Jesus?
19 Jesus ear kõmman elõñ men in bwilõñ ko ñan kwalok bwe e kar Messiah eo. Ear kajerkakbiji ro remij bareinwõt. Jerbal kein rar kareel jar ko, ak Jesus ear jab itok ñan lal in ñan kõmman jerbal ko ñan kakõmanmanlok jukjuk im bed in armij. Ear itok ñan kwalok nan kin mol eo. Ear jelã bwe jabdewõt tokjen ko lor kanniek renaj ñan jidik wõt ien. Armij ro rar jerkakbiji renaj bar mij. Ilo an kar kwalok nan kin mol eo wõt ear maroñ jibañ jet ñan bõk mour indio.—Luk 18:28-30.
20, 21. Ewi wãwen Ri Christian ro rej kejbãrok jokkin wõt juõn eo air ikijen jerbal ko remõn?
20 Rainin, jet armij rej kajeoñ in anõk jerbal ko remõn an Jesus ilo air kabellok hospital ko ak kõmman jerbal ko jet ibwiljin ro rej jeramel ilo lal in. Ilo jet wãwen ko, rej aikwij kõllã elap jããn ñan kõmmani men kein, im jej nebar ir kin mol in kõnan ko air; ak jabdewõt jibañ ko rej kõmmani ej ñan jidik wõt ien. Ailiñ in Anij wõt emaroñ bõktok anemkwoj indio jen abañ ko an armij. Kin men in, mejenkajjik eo an Ri Kennan ro an Jehovah, einwõt kar Jesus, ej ñan kwalok nan kin mol eo kin Ailiñ in.
21 Emol, Ri Christian ro remol rej kõmman jerbal ko remõn. Paul ear je: “Einwõt eor ien iber, jen jerbale emõn ñõn armij otemjej, im elaplok ñõn ro rej ber ilo nukin tõmak.” (Dri Galetia 6:10) Ilo ien ko ñe ej walok juõn jorrãn elap ak ñe juõn armij ej bed ilo aikwij, jejjab rumij in “jerbale emõn” ñan ri turid ak ñan Ri Christian ro jeid im jatid. Ak, men eo jej watõke bwe elap an aorõk—ej ilo ad kwalok nan kin mol eo.
Katak Jen Wanjoñok eo an Jesus
22. Etke Ri Christian ro rej kwalok nan ñan ro ri turiir?
22 Paul ear je: “Wo ñõn iõ elañe I jab kwalok gospel!” (1 Dri Korint 9:16) Ear jab watõk news eo emõn einwõt ejej tokjen kinke ilo an kwalok kake ear melelen mour ñan e make im ñan ro rej roñjake e. (1 Timote 4:16) Jej watõk jerbal in kwalok nan eo ad ilo ejja wãwen in wõt. Jekõnan jibañ ro ri turid. Jekõnan kwalok ad yokwe Jehovah. Jekõnan kwalok yokwe eo ad ñan Jesus im kamolol eo ad kin yokwe eo an elap ñan kij. Kin men in, jej kwalok kin news eo emõn im ilo wãwen in jejjab “ber im mour ilo mõm ko an armij rõn, a ñõn ankil an Anij.”—1 Piter 4:1, 2.
23, 24. (a) Ta men eo jemaroñ katak jen men in bwilõñ eo kin ek ko? (b) Wõn ro rainin ej let air kwalok nan?
23 Einwõt Jesus, ñe ro jet rej kajirere kake kij ak ilo illu rej karmijeteik ennan eo ad jejjab kõtlok bwe men kein ren kamad kij jen jerbal eo ad elap. Ewõr juõn men jej katak jen men in bwilõñ eo Jesus ear kõmmane ke ear kir Peter ñan lor e. Jej lo bwe elañe jej bokake Jesus im, ilo juõn wãwen kõkkar, jej dror ok ko ad ilo den ko einwõt ejelok ek ie, enaj lõñ konad ilo ad eñwõd. Elõñ Christian ri eñwõd ro rar lo tõbrak ko remõn elikin elõñ yiõ ko in air jerbal ilo den ko einwõt ejelok ek ko ie. Ro jet rar emmakit ñan jikin ko elõñ ek ko ie im rar bõk elap konair. Jekdon ta eo jej kõmmane, jejamin bõjrak in dror lallok ok ko, ak ñan ba ilo bar juõn wãwen, jejamin bõjrak jen ad kwalok nan kin mol eo. Jejelã bwe Jesus ejañin keañ ilo jabdewõt mõttan ko ilo lal in bwe ejemlok jerbal in kwalok nan.—Matu 24:14.
24 Elõñlok jen jiljino million Ri Kennan ro an Jehovah reboub kiõ ilo elõñlok jen 230 ailiñ ko. Ilo February 1, 2005, magazine in Imõniaroñroñ enaj wõr report eo ej walok kajjojo yiõ jen belakin lal kin makitkit ko air ilo 2004 yiõ in jerbal eo. Report in enaj kwalok bwe Jehovah ear lap an kajerammõn jerbal eo ñan kwalok nan. Ilo bwen ien eo ebed ibben jukjuk im bed in, jen wõnmanlok im bõk ñan buruõd nan kein an Paul me ej lujur kij: “Kwon kwalok nan, kwon kate yuk.” (2 Timote 4:2) Jen wõnmanlok im kõmman bwe en let ad kwalok nan mae ien Jehovah ej ba bwe ejemlok jerbal in.
Jino ilo yiõ in, Report eo kin Yiõ in Jerbal eo an Ri Kennan ro an Jehovah Ibelakin Lal ejamin walok ilo January 1 magazine in Imõniaroñroñ. Enaj walok ilo February 1 copy in magazine eo.
Kwomaroñ ke Uak?
• Ewi wãwen jemaroñ bõk tokjen jen kaminene eo Jesus ear lelok ñan ri kalor ro an?
• Kar ta lemnak eo an Jesus kin armij ro ear kwalok nan ñan ir?
• Ta eo ej kamakit kij bwe en let ad kwalok nan?
• Ilo wãwen et ko jemaroñ kalimjek wõt ad kõmanman ankil an Anij, einwõt Jesus ear kõmmane?
[Pija eo ilo peij 25]
Jenaj bolemen ilo jerbal in kwalok nan eo ad elañe jej kwalok ejja itoklimo eo wõt kin armij me Jesus ear kwaloke
[Pija eo ilo peij 26]
Jesus ear itok ñan lal elaptata ñan kwalok nan kin mol eo
[Pija ko ilo peij 27]
Ri Kennan ro an Jehovah rej lemnak wõt kin ewi wãwen emaroñ let air kwalok nan