Ruaklok ñan Anij
Juõn Anij Ebojak in Jeorlok Bwid
“KWE Iroij kwoj emõn, im kõnan jeõrlok.” (Sam 86:5) Kin ennan kein remãnãn, Bible eo ej kamol ñan kij bwe Jehovah Anij elap an joij im ebojak in jeorlok bwid. Juõn bwebwenato ilo mour eo an ri jilek Peter ej lukkun kalikar bwe Jehovah e “kanuij wujlep in jolok bwir.”—Aiseia 55:7.
Peter kar juõn ian ro rebaktata ñan Jesus. Bõtab, ilo boñin eo eliktata in an Jesus mour ion lal, Peter ear bo kin an mijak armij im ear kõmman juõn bwid elap. Iloan worwor eo ebake jikin eo rar ekajete Jesus ie, Peter ear karmijeteik Jesus iman ro jet—jab juõn wõt alen ak jilu. Elikin an Peter karmijeteik Jesus alen eo kein kajilu, Jesus ear “oktõklik, im kalimjeke Piter.” (Luk 22:55-61) Kwomaroñ ke pijaiki Peter im eñjake eo an ilo ien eo Jesus ear kalimjeke? Ilo an kile kin joñan an eddo bwid eo an, Peter ear “jõñ.” (Mark 14:72) Ri jilek in ear ukwelok emaroñ kar lemnak elañe bwid eo an ear kõmmane jilu alen ear ellã jen joñan ñan an Anij maroñ jeorloke.
Elikin an jerkakbiji, Jesus ear konono ibben Peter im ejelok bere bwe men in ear jolok jabdewõt bere bwe emwij jeorlok bwid eo an Peter. Jesus ear jab kwalok nan ko relej, ak ear jab naruõn. Jen men in, ear kajitõk ibben Peter: “Kwoj yokwe Iõ ke?” Peter ear uak: “Aet, Iroij; kwo jela Ij yokwe Yuk.” Jesus ear uak: “Kwon najirik lam ko Aõ.” Jesus ear elij kajitõk eo alen ruo, im Peter ear uak einwõt mokta, bõlen ilo juõn wãwen ealikarlok. Jesus ear ba: “Kwon s̃eperd Aõ s̃ip.” Inem Jesus ear bõk mantak ejja kajitõk eo wõt alen jilu: “Kwoj yokwe Iõ ke?” Kiõ “Piter ej buromõj” im ear ba: “Iroij, kwo jela men otemjej; Kwo jela ij yokwe Yuk.” Jesus ear uak: “Kwon najirik Aõ s̃ip.”—Jon 21:15-17.
Ta unin an kar Jesus bõk mantak kajitõk ko meñe ear jelã kadede uakier? Maroñ eo ej bed ibben Jesus ñan jelã kobban buruen, inem ear jelã bwe Peter ear yokwe e. (Mark 2:8) Ikijen an bõk mantak kajitõk ko, Jesus ear kõtlok Peter ñan uake bwe en bar kalikar yokwe eo an jilu alen. Uak eo an Jesus: “Kwon najirik lam ko Aõ. . . . Kwon s̃eperd Aõ s̃ip. . . . Kwon najirik Aõ s̃ip,” ear kainemõn ri jilek eo emwij an ukwelok bwe Jesus ear liki wõt e. Ilo mol, Jesus ear kabbeik Peter bwe en kejbãrok men eo eaorõktata—ri karejar ro an raorõk me rej einwõt sheep. (Jon 10:14, 15) Ejelok bere bwe ear lap an Peter ainemõn ñan jelã bwe Jesus ear liki wõt e!
Ealikar, Jesus ear jolok bwid eo an ri jilek eo. Kinke Jesus ear ilo wãppen anõk jemen im kadkad ko kadkadin im wãwen ko an, jemaroñ tõmak bwe Jehovah bareinwõt ear jeorlok bwid ko an Peter. (Jon 5:19) Jehovah eban rumij in jolok bwid, ej juõn Anij e tiriamokake im e “kõnan jeõrlok” bwid an juõn ri jerawiwi eo ej ukwelok. Men in ejjab lap an kainemõn kij ke?