Kejatdikdik Eo Kin Jerkakbiji Ej Lukkun Mol!
“Ij kejatrikrik iõ ilo Anij kin men in . . . bwe re naj jerkakbiji.”—JERBAL 24:15.
1. Etke jemaroñ tõmak ilo jerkakbiji eo?
JEHOVAH ear letok ñan kij un ko remõn ñan kejatdikdik ilo jerkakbiji eo. Emwij an kallimur bwe ro remij renaj jerkak, bar jutak ilo mour. Im karõk eo an ikijen ro rej kiki ilo mij enaj jejjet kitien. (Aiseia 55:11; Luk 18:27) Ilo mol, emwij an Anij kwalok kajur eo an ñan kajerkakbiji ro remij.
2. Ewi wãwen jemaroñ bõk tokjen jen kejatdikdik eo kin jerkakbiji?
2 Tõmak ilo men in letok eo an Anij ñan kajerkakbiji ro remij ikijen Nejin, Jesus Christ, emaroñ jibañ kij ñan kijenmij iumin ien ko elap abañ ko ie. Mol in kejatdikdik eo kin jerkakbiji emaroñ bareinwõt jibañ kij ñan kejbãrok tiljek eo ad ñan Jemed ilañ meñe ñan mij. Ilo mol, kejatdikdik eo ad kin jerkakbiji eo enaj kajurlok ñe jej etale bar jeblak ko ñan mour me emwij kar je ilo Bible eo. Aolep men in kabwilõñlõñ kein kar kõtõbraki ikijen kajur eo ear itok jen Iroij Bõtata eo Jehovah.
Rar Bõk Ro Air Remij Kin Air Jerkakbiji
3. Ta eo kar kamaroñ Elijah ñan an kõmmane ke ear mij ladik eo nejin kõrã eo ejako belen ilo Zarephath?
3 Ilo an elij kin tõmak eo ekabwilõñlõñ me ri kennan ro an Jehovah mokta jen ien Christian rar kwaloke, ri jilek Paul ear je: “Kõra rõn r’ar bõk nukiir ro remij kin air jerkakbiji.” (Dri Hibru 11:35; 12:1) Juõn ian kõrã rein kar juõn kõrã ejako belen im ejeramel me ear jokwe ilo bukwon in Phoenicia ilo Zarephath. Kin an kwalok karuwainene ñan ri kanan eo an Anij Elijah, ilo kabwilõñlõñ flour im oil eo an rar jab maat ilo ien ñitta eo me enaj kar bõk mour eo an im eo an nejin. Ke ear mij nejin tokelik, Elijah ear kababuik e ion aowej eo an, jar, im beroane ladik eo jilu alen, im akwelap: “O Jeova aõ Anij, ij akwelap, an ladrik in en bar dreloñtok iben.” Anij ear kõmman bwe aan, ak mour eo an, en jeblak ñan ladik eo. (1 Kiñ Ro 17:8-24) Lemnak kin lañliñ eo an kõrã eo ejako belen ke tõmak eo an kar nawõnãn kin jerkakbiji eo moktata—eo an nejin ejitenburu ibben!
4. Men in kabwilõñlõñ et eo Elisha ear kõmmane ilo Shunem?
4 Bar juõn kõrã ear bõk eo an ri mij kin an jerkakbiji ear jokwe ilo bukwon in Shunem. Ear lio belen juõn emaan eritto, im ear kwalok joij ñan ri kanan eo Elisha im ri karejar eo an. Ear bõk jinekjej kin juõn nejin ladik. Bõtab, jet yiõ ko tokelik ear kir ri kanan eo, eo ear lo ladik eo emij ilo mweo. Elikin an Elisha jar im kõmman jet men ko, “kõniekin ladrik eo e mãnãnlok.” Ear “mõji jiljilimjuõn alen, im ladrik eo e ar kabellok mejen.” Ejelok bere jerkakbiji in ear bõktok elap lañliñ ñan jinen im nejin jimor. (2 Kiñ Ro 4:8-37; 8:1-6) Ak enaj laplok air mõnõnõ ñe renaj jerkakbiji ñan mour ion lal ilo “jerkakbiji eo emõnlok”—juõn eo ej likit imair maroñ eo ñan air jab aikwij bar mij! Ej juõn un elap ñan kamolol Anij in jerkakbiji eo im ej yokwe, Jehovah!—Dri Hibru 11:35.
5. Ewi wãwen Elisha ear deloñ ilo juõn men in kabwilõñlõñ meñe elikin an kar mij?
5 Meñe elikin an kar Elisha mij im rar kalbwini, Anij ear kõmman bwe di ko diin ren kajur ikijen jitõb kwojarjar. Jej konono: “Im ke rej [jet ri Israel ro] kalibwin juõn eman, lo, rar lo juõn jaran armij [ri Moab]; im rar jolok ubõn leo iloan lup eo an Ilaisha: im kiõkiõ ke ubõn e ar uñire diin Ilaisha, e ar mour wõt im jerkak. (2 Kiñ Ro 13:20, 21) Alikar an kar ilbõk im mõnõnõ leen! Lemnak kin lañliñ eo enaj walok ñe ro rejitenburu ibbed renaj jerkakbiji ekkar ñan karõk eo ejamin likjap an Jehovah Anij!
Nejin Anij ear Kajerkakbiji Ro Remij
6. Men in kabwilõñlõñ et eo Jesus ear kõmmane ilo jikin kwelok in Nain, im men in walok in emaroñ jelet kij ilo wãwen et?
6 Nejin Anij, Jesus Christ, ear letok ñan kij un ko rebin ñan tõmak bwe ro remij remaroñ jerkakbiji, kin kejatdikdik eo ñan mour ñan indio. Juõn men ear walok ebak ñan jikin kwelok in Nain me emaroñ jibañ kij ñan kile bwe juõn men in kabwilõñlõñ rot in emaroñe ikijen kajur eo letok in Anij. Juõn ien, Jesus ear iion ro rej bõktok juõn emij ñan ilikin jikin kwelok eo ñan kalbwini. E kar make wõt nejin juõn kõrã ejako belen. Jesus ear jiroñ e: “Kwon jab jõñ.” Inem ear uñur box in ri mij eo im ba: “Likao, Ij ba ñõn yuk, Kwon jerkak!” Im eo e kar mij ej jijet im jino an konono. (Luk 7:11-15) Men in kabwilõñlõñ in emol an kakajur tõmak eo ad kin jerkakbiji eo.
7. Ta eo ear walok ikijen ledik eo nejin Jairus?
7 Lemnak, bareinwõt, kin men eo ear walok ñan Jairus, juõn iroij in imõn kwelok ilo Capernaum. Ear kajitõk ibben Jesus ñan itok im jibañ ledik eo nejin jitenburu ibben 12 yiõ dettan, eo ear bed ebak ñan mij. Ejjab eto rar report bwe emij ledik eo. Ilo an rejañ Jairus ñan jerbale tõmak, Jesus ear etal ibben ñan mweo imõn, ijo juõn jar in armij rar jañ. Rar kajirere kake e ke Jesus ear jiroñ ir: “Komin jab jõñ: bwe e jab mij, a ej kiki.” Ilo mol ear mij, ak Jesus ear iten kwalok bwe armij remaroñ jerkakbiji ñan mour einlok wõt ñe rej kworuje juõn jen an kiki. Ear kapjere pein ledik eo, im ear ba: “Jiroñ, kwon jerkak!” Ear mõkaj an jerkak, im “jemen im jinen re bwilõñ” kin elap bwilõñ. (Mark 5:35-43; Luk 8:49-56) Ejelok bere, ro uan family eo renaj “bwilõñ” ñe ro jitenburu ibbeir remij renaj jerkakbiji ñan mour ilo juõn paradise ion lal.
8. Ta eo Jesus ear kõmmane turin lũp eo lũpen Lazarus?
8 Ear mij Lazarus iumin emen ran ko ke Jesus ear itok ñan lũp eo im kajitõk bwe ren jolok ejman eo. Elikin an jar ilobwilij bwe ro rej lale ren jelã bwe kajur eo an ear itok jen Anij, Jesus ear ba ilo juõn ainikien elap: “Lazerõs, kwon itok!” Im ear itok! Pein im neen ear kitimi wõt kin nuknuk in mij, im juõn mõttan in nuknuk ear kalibubuik mejen. “Komin kõtlok e bwe en ilok,” Jesus ear ba. Ilo air lo men in kabwilõñlõñ in, elõñ ro im rar bed ijo ñan kainemõn limaro jein im jatin Lazarus, Mary im Martha, rar tõmak e. (Jon 11:1-45) Bwebwenato in ejjab kobrak yuk ke kin kejatdikdik bwe ro rejitenburu ibbam remij remaroñ bar mour ilo lal eo ekãl an Anij?
9. Etke jemaroñ liki bwe Jesus emaroñ kiõ kajerkakbijik ro remij?
9 Ke John ri Baptais ear bed ilo prison, Jesus ear jilkinlok ennan in ekõketak ñan e: “Ro rebilo rej lolokjen, . . . ro remij rej jerkakbiji.” (Matu 11:4-6) Kin an kar Jesus kajerkakbijik ro remij ke ear bed ion lal, emol an maroñ kõmmane kiõ ke ej juõn jitõb ekajur eo Anij ear kamaroñe. Jesus ej “jerkakbiji eo im mour eo,” im elap an kainemõn kij ñan ad jelã bwe ejjabto jen kiõ “ro otemjej rej ber ilo lũp ko, re naj roñ ainiken, im naj driojtok”!—Jon 5:28, 29; 11:25.
Jerkakbiji ko Jet Rej Kakajurlok Kejatdikdik eo Ad
10. Ewi wãwen kwonaj kar kwalok kin jerkakbiji eo moktata ilo lokbook eo an juõn ri jilek?
10 Ke Jesus ear jilkinlok ri jilek ro an einwõt ri kwalok ro kin Ailiñ eo, ear ba: “Kejerkakbiji ro r’ar mij.” (Matu 10:5-8) Bõtab, ñan air kõmmane, rar aikwij atartar ion kajur eo an Anij. Ilo Joppa ilo 36 C.E., kõrã eo tiljek Dorcas (Tabitha) ear mij. Jerbal ko an remõn ear koba an kõmman nuknuk ko ñan kõrã ro ejako beleir, ibwiljin rein mij eo an ear kõmman air jañũti. Ri kalor ro rar keboj e ñan air kalbwini im rar kajitõk ibben ri jilek Peter bwe en itok, bõlen ñan kainemõn ir. (Jerbal 9:32-38) Ear kadiojlok ir otemjej jen bo eo, jar, im ba: “Tabita, kwon jerkak!” Ear kabellok mejen, jijet, im jibwe pein Peter, im ear kajutake. Kajerkakbiji eo moktata an juõn ri jilek ear kõmman bwe elõñ ren erom ri tõmak ro. (Jerbal 9:39-42) Ej bareinwõt kalaplok unin ad kejatdikdik kin jerkakbiji eo.
11. Ta kar jerkakbiji eo eliktata ilo lokbook eo ilo Bible?
11 Kajerkakbiji eo eliktata kar jeje ilo Bible ear walok ilo Troas. Ke Paul ear bõjrak ijo ilo trip in missionary eo an kein kajilu, ear kaetoklok katak eo an ñan lukkun boñ. Kin an lap an kar mõk im bõlen kin okmãnãn eo ear itok jen lamp ko im wãwen eo ekobob ilo jikin kwelok eo, juõn likao etan Eutychus ear kiki mitõñ im wõtlok jen bo eo kein kajilu. Ke “rej kwotõk e emij,” jab baj lotlok wõt. Paul ear buñ ion Eutychus, jiburlep e, im jiroñ ro rar bed ijo: “Komin jab limõ, bwe an mour ej ilo e.” Nan ko an Paul rar melelen bwe mour eo an likao eo ear bar jeblak. Ro rar bed ijo ear “jab erik air mõnõnõ.” (Jerbal 20:7-12) Rainin, ri karejaran Anij rej bõk kainemõn ilo air jelã bwe ro mõttair ilo jerbal eo an Anij renaj lo jejjet in kitien kin kejatdikdik eo kin jerkakbiji eo.
Jerkakbiji—Juõn Kejatdikdik Eo Eto An Kar Bed
12. Tõmak ta eo Paul ear kwalok kake iman Governor in Rome eo Felix?
12 Ke ear bed ilo ekajet iman Governor in Rome eo Felix, Paul ear kamol: “[Ij] tõmak men otemjej ekar ñõn kien ak jeje ilo dri kanan ro: Im ij kejatrikrik iõ ilo Anij kin men in . . . bwe ro remõn im ro renana re naj jerkakbiji.” (Jerbal 24:14, 15) Ewi wãwen jet mõttan ko ilo Nan in Anij, einwõt “Kien eo,” rej jitõñlok ñan jerkakbiji eo an ro remij?
13. Etke jemaroñ ba bwe Anij ear konono kin jerkakbiji eo ke ear kwalok kin kanan eo moktata?
13 Anij make ear jitõñlok ñan jerkakbiji eo ke ear kwalok kin kanan eo moktata ilo jikin kallip in Eden. Ke ear ekajete “serpent e ridto,” Satan Devil eo, Anij ear ba: “I naj likit kijirãt ikõtam im kõra eo, im ikõtan ineõm im inen: e naj kokkure bõrõm, a kwo naj kokkure jimwin neen.” (Reveles̃õn 12:9; Jenesis 3:14, 15) Kokkure jimwin neen inen kõrã eo ear melelen ñan mõn Jesus Christ ñan mij. Elañe Ine eo en kar kokkure bõran serpent eo tokelik, Christ ear aikwij in jerkakbiji jen an kar mij.
14. Ewi wãwen an Jehovah jab juõn “Anij an ro remij, a an ro remour”?
14 Jesus ear keañ: “A bwe ro remij rej jerkakbiji, Moses e ar kwalok ilo nan kin jul eo, ke e ar ba, Iroij e Anij an Ebream, im Anij an Aisak im Anij an Jekõb. Bwe e jab Anij an ro remij, a an ro remour: bwe otemjej rej mour ñõn E.” (Luk 20:27, 37, 38; Exodus 3:6) Ear mij Abraham, Isaac, im Jacob, ak kin an kar lukkun mol karõk eo an Anij ñan kajerkakbiji ir, ñan e rar einwõt remour.
15. Etke ear wõr unin an Abraham tõmak ilo jerkakbiji eo?
15 Ear wõr unin an Abraham tõmak ilo jerkakbiji eo, bwe ke e im lio belen, Sarah, rar ritto, im rar einwõt remij ikijen maroñ eo ñan neje, ilo kabwilõñlõñ Anij ear karol maroñ eo air ñan neje. Men in ear einwõt juõn jerkakbiji. (Jenesis 18:9-11; 21:1-3; Dri Hibru 11:11, 12) Ke nejiir, Isaac, ear tarrin 25 yiõ dettan, Anij ear jiroñ Abraham ñan katok kin e. Bõtab, ke Abraham ear bojak in mõn Isaac, enjel eo an Jehovah ear kabõjrak pein. Abraham ear “lemnok bwe Anij e maroñ in kejerkak e jen ro remij, im e ar bar bõk e jen ijo ilo nan in kõkar.”—Dri Hibru 11:17-19; Jenesis 22:1-18.
16. Abraham ej kiki ilo mij kiõ, im ej kõttar ta?
16 Abraham ear kejatdikdik kin jerkakbiji eo iumin iroij eo an Messiah eo, Inen kallimur eo. Jen ijo ear bed ie mokta jen an erom juõn armij, Nejin Anij ear lo tõmak eo an Abraham. Ke ear armij eo Jesus Christ, ear jiroñ ri Jew ro: “Ebream e ar lõñliñ bwe e naj lo Aõ ran.” (Jon 8:56-58; Jabõn Kennan Ko 8:30, 31) Abraham ej kiki ilo mij kiõ, im ej kõttar jerkakbiji eo ñan mour ion lal iumin Ailiñ in Messiah eo an Anij.—Dri Hibru 11:8-10, 13.
Nan in Kamol Jen Kien eo im Sam ko
17. Ewi wãwen “men otemjej ekar ñõn kien” ej jitõñ lok ñan jerkakbiji eo an Jesus Christ?
17 Kejatdikdik kin jerkakbiji eo an Paul ear errã ibben “men otemjej ekar ñõn kien.” Anij ear jiroñ ri Israel ro: “Komin bõktok tir in jomõkõj in jonikõn eo ami ñõn pris eo. Im [ilo Nisan 16] en kabelbel tir eo iman Jeova, bwe En bõke kin kom.” (Livitikõs 23:9-14) Bõlen kin an lemnak kin kien eo, Paul ear je: “A kiõ emwij an Kraist jerkakbiji jen ro remij, leen moktata ian ro rej kiki.” Einwõt “leen moktata,” Jesus ear jerkakbiji ilo Nisan 16, 33 C.E. Tokelik, ilo ien bed eo an, enaj wõr juõn jerkakbiji an ‘leen ko tokelik’—ri kabit ri kalor ro an.—1 Dri Korint 15:20-23; 2 Dri Korint 1:21; 1 Jon 2:20, 27.
18. Ewi wãwen Peter ear kwalok bwe book in Sam Ko kar kanan kin jerkakbiji eo an Jesus?
18 Book in Sam Ko ej bareinwõt rejetak jerkakbiji eo. Ilo ran in Pentecost 33 C.E., ri jilek Peter ear eliji nan ko jen Sam 16:8-11, im ba: “Bwe Devid ej konono kin [Christ], I ar lo Iroij ien otemjej iman meja; bwe Ej ber i anbijmaroñiõ; bwe in jab makõtkit. Inem e ar mõnõnõ buruõ im lõñliñ loiõ; im bar jet, kõniekiõ e naj bareinwõt jokwe ilo kejatrikrik; Bwe Kwo jamin likit aõ ilo Hedis, im Kwo jamin lelok am Dri Kwojarjar bwe En lo kõt.” Peter ear koba: “[David] e ar lo men in mokta, e ar konono kin an Kraist jerkakbiji bwe E ar jab ber iloan Hedis, im kõniekin e ar jab lo kõt. Anij e ar kejerkakbiji Jisõs in.”—Jerbal 2:25-32.
19, 20. Ñããt eo Peter ear eliji nan ko jen Sam 118:22, im ewi wãwen ear jerbal ibben mij im jerkakbiji eo an Jesus?
19 Jet ran ko tokelik, Peter ear jutak iman Sanhedrin im ear bar eliji nan ko jen Sam Ko. Ilo air kajitõk ibben kin ewi wãwen ear kemour juõn ri eowor ekirro, ri jilek eo ear ba: “Emõn komin otemjej jela, kab armij in Israel otemjej, bwe ilo etan Jisõs Kraist Dri Nazeret, Eo kom ar [dilaik] E, Eo Anij e ar kejerkakbiji jen ro remij, aet ilo E armij in ej jutõk im mour iman mejemi. Ein [Jesus] ejman eo, kom dri kal ar kejekron E, eo emwij kõmõn E jabõn im. Im mour ilo ejelok bar juõn: bwe ejelok bar juõn ãt iomin lõñ, im letok ñõn armij bwe jen mour ilo E.”—Jerbal 4:10-12.
20 Peter ijin ear eliji nan ko jen Sam 118:22, im jerbale ñan mij im jerkakbiji eo an Jesus. Ilo an ri tel in kabuñ ko air rooje ir, ri Jew ro rar karmijeteik Jesus. (Jon 19:14-18; Jerbal 3:14, 15) ‘Ilo an ri kal ro karmijeteik ejman eo’ men in ear walok ilo mij eo an Christ, ak ‘an ejman eo erom bõran jabõn em’ men in ear kalikar an jerkakbiji ñan aibujuij ilo jitõb ilañ. Einwõt ri jeje psalm ear kanan, ‘Men in Jeova e ar kõmõn e.’ (Sam 118:23) Ilo an kõmman bwe “ejman eo” en Bõran jabõn em eo men in ear kitibuj an kautiej e einwõt King emwij jitõñe.—Dri Epesõs 1:19, 20.
Bõk Kakajur jen Kejatdikdik eo kin Jerkakbiji
21, 22. Job ear kwalok kin kejatdikdik et eo, einwõt emwij je ilo Job 14:13-15, im ilo wãwen et eo emaroñ kainemõn ro rej buromõj rainin kin an jako ro rejitenburu ibbeir?
21 Meñe jejañin lo kin mejed jerkakbiji eo an jabdewõt armij, emwij ad lo jet bwebwenato ko ilo Jeje ko me rej kamol ñan kij kin jerkakbiji eo. Kin men in, jemaroñ bõk kejatdikdik eo me armij eo ewãnik Job ear kwalok kake. Ke ear eñtan, ear akwelap: “O emõn Kwon [Jehovah] noj iõ ilo Hedis, . . . im kajejjet ñõn iõ juõn ien, im kememej iõ! Elañe juõn armij e mij, e naj bar mour ke? . . . Kwo naj kar kir im I naj uak Yuk: Kwo naj kar kõnan men in kõmõn an peõm.” (Job 14:13-15) Anij ‘enaj kõnan men in kõmman an pein,’ ñan kajerkakbijik Job. Ej letok ñan kij juõn kejatdikdik elap!
22 Juõn uan family eo e mijak Anij emaroñ nañinmij, einwõt kar Job, im emaroñ jatõptõp ñan ri kijirãt eo mij. Eo ear luji juõn eo ejitenburu ibben ilo mij emaroñ jañ, einwõt Jesus ear jañ ke ear mij Lazarus. (Jon 11:35) Ak elap an kainemõn kij ñan jelã bwe Anij enaj kir im ro ej kememeji renaj uak! Enaj einwõt ke rar jeblak jen juõn trip—rejamin nañinmij ak ejorrãn enbwiniir, ak renaj ejmour.
23. Ewi wãwen an jet kwalok liki eo air ilo kejatdikdik in jerkakbiji eo?
23 Mij eo an juõn ri Christian eritto im etiljek ear kamakit ri tõmak ro mõttan ñan je: “Kimij kõnan kwalok am buromõj emũlal kin an jako jinõm. Ejjabto jen kiõ jenaj maroñ karuwaineneik tok e—deeo im emourur!” Jemen im jinen me rar luji ladik eo nejiir ilo mij rar ba: “Elap am reimanlok ñan ran eo ñe enaj jerkakbiji Jason! Enaj reito-reitak ibelakin im lo Paradise eo ear jañnuwaade. . . . Ej juõn mejenkajjik elap ñan ro iam im kimij yokwe e bwe kimin bed ie bareinwõt.” Aet, elap ad kamolol bwe elap an mol kejatdikdik in kin jerkakbiji eo!
Ta Uak Eo Am?
• Ewi wãwen ad maroñ bõk tokjen jen men in letok eo an Anij ñan kajerkakbiji ro remij?
• Ta men eo ear walok im emwij je ilo Jeje Ko ej letok unin ad kejatdikdik ilo jerkakbiji eo?
• Etke jemaroñ ba bwe jerkakbiji eo kar juõn kejatdikdik eto an kar bed?
• Jemaroñ tõmak ilo kejatdikdik et eo ikijen ro remij?
[Pija ilo page 8]
Kin kajur eo ear itok jen Jehovah, Elijah ear maroñ kajeblak mour eo an ladik eo nejin juõn kõrã eo ejako belen
[Pija ilo page 10]
Ke Jesus ear kajerkakbijik ledik eo nejin Jairus, jemen im jinen rar bwilõñ kin elap bwilõñ
[Pija ilo page 13]
Ilo ran in Pentecost 33 C.E., ri jilek Peter ear kwalok ilo beran bwe emwij an kar Jesus jerkakbiji jen ro remij