Kajitõk ko Jen Ro Rej Read
Ri jilek Paul ear ba bwe ‘naj kar lomoren Israel otemjej.’ (Rom. 11:26) Melele eo an in ke bwe aolep Ri Jew ro renaj kar erom Ri Christian ro?
Jaab, ejjab melele eo an Paul in. Einwõt juõn ailiñ, ro bwijin Abraham rar karmijete Jesus einwõt Messiah eo. Im ilo yiõ ko elikin an kar Jesus mij, ear jino alikar bwe Ri Jew ro otemjej rejamin naj kar erom Ri Christian ro. Bõtab, ennan eo an Paul bwe ‘naj kar lomoren Israel otemjej’ ear mol. Ilo wãwen et?
Jesus ear ba ñan ri tel in kabuñ ro an Ri Jew ro ke ear bed ion lal: “Naj bõk ailiñ in Anij jen kom, im lelok ñõn dri ailiñ rej kõmõn leen kaki.” (Mat. 21:43) Kinke Israel eo ilo kanniek ear karmijete Jesus, Jehovah enaj kar oktaklok ñan juõn ailiñ ekãl, ejaakin ri kabit ro kajjojo. Paul ear naetan ailiñ in “Israel an Anij.”—Gal. 6:16.
Eon ko jet ilo book in Matu ñan Reveles̃õn rej kamol bwe “Israel an Anij” ej ejaakin 144,000 Christian ri kabit ro. (Rom. 8:15-17; Rev. 7:4) Kumi in enaj kitibuj ro rejjab Ri Jew, im Reveles̃õn 5:9, 10 ear kamole men in ilo an ba bwe Christian ri kabit ro rej itok jen “bwij otemjej, im konono otemjej, im driloabjen otemjej, im ailiñ otemjej.” Ro uan Israel in ilo jitõb kar kãlet ir elaptata bwe ren “kiñ im pris ro; im rej kiñ ion lõl.” Meñe Jehovah ear karmijete Israel einwõt juõn ailiñ ear kãlete, ir kajjojo remaroñ kar kõmman juõn kõtan emõn ibben. Kar eindein ibben ri jilek ro im Ri Christian ro aolep ilo jinoin. Emol, Ri Jew ro, einwõt aolep armij ro jet, kar aikwij wiaik ir kin bõtõktõkin Jesus Christ.—1 Tim. 2:5, 6; Hib. 2:9; 1 Pit. 1:17-19.
Meñe enañin aolep Ri Jew ro ilo kanniek ilo ebeben eo kein kajuõn rar luji jerammõn eo ñan iroij ibben Jesus, men in ear jab bõpraik an jejjet kitien karõk eo an Anij. Men in ejamin naj kar bõjrak, bwe Jehovah ear ba ikijen ri kanan eo an: “E naj ein drein nan eo ej waloklok jen loñiõ: e jamin jeblaktok ñõn iba im ejelok tokjen, a e naj kõmõn men eo I kõnan, im e naj jerammõn ilo men eo Ij jilkinlok e kake.”—Ais. 55:11.
Men in emol kin karõk eo an Anij ñan kajutak ro renaj iroij ibben Nejin ilo lañ, ej 144,000. Bible eo ej lukkun kalikar bwe Anij enaj kadedelok an kabit oran aolep 144,000. Ejelok juõn enaj likjap!—Rev. 14:1-5.
Kin men in, ke Paul ear je bwe ‘naj kar lomoren Israel otemjej,’ ear jab melele eo an in bwe aolep Ri Jew renaj kar erom Ri Christian ro. Ak, melele eo an kar bwe karõk eo an Anij ñan kajutak Israel eo ilo jitõb, 144,000 ñan iroij ibben Nejin, Jesus Christ, ilo lañ enaj kar jejjet kitien. Ilo ien eo emwij an Anij kajejjete, likieo in oran—“Israel otemjej”—enaj kar bed ilo juõn wãwen emõn, im ilo jemlokin naj iroij einwõt king im priest ro ilo Ailiñ in Messiah eo.—Ep. 2:8.
[Pija ko ilo peij 28]
Ri kabit ro rej itok jen “bwij otemjej, im konono otemjej, im driloabjen otemjej, im ailiñ otemjej”