Komij Mõnõnõ Ke in Koutiej Dron?
“Komin kwalok ami mõnõnõ in kautiej dron.”—ROM 12:10, UBS.
1. Ta eo ejokolok an armij ro kõmõne ilo elõñ ailiñ ko?
Ilo jet ailiñ ko, ajiri ro rej kwalok air koutiej ridto ro ilo air bukwelõlõ imair, im men in ej kalikar bwe rejjab utiejlok jen ir. Ilo jikin kein, ejjab bar menin koutiej ñe ajiri ro rej oktõklok jen ridto ro. Meñe eoktõk wãwen an armij ro kwalok koutiej, manit kein rej kakememej kij kin Kien eo Anij ear letoke ikijen Moses. Men in ekitibuj kien eo: “Kwon jutõk im aber iman armij e uõn bõran, im kõñiajoik turin mejen eo e lõlap.” (Liv. 19:32) Ekaburomõjmõj bwe, ilo elõñ jikin ko ejokolok air koutiej ro jet. Ilo mol, ekkã an armij ro jab kwalok koutiej ilo ran kein.
2. Baibel eo ej jiroñ kij ñõn koutiej wõn?
2 Nan eo an Anij, Baibel eo, ej kwalok kin aurõkin kwalok koutiej. Ej jiroñ kij bwe jen koutiej Jeova im Jisõs. (Jon 5:23) Ej kakien kij ñõn koutiej ro uan family eo ar, dri tõmak ro mõtar, im bareinwõt ñõn jet ian armij ro ilikin congregation eo me rej tellokin ñõn bõk koutiej. (Rom. 12:10; Ep. 6:1, 2; 1 Pit. 2:17) Ta jet ian wãwen ko jej kwalok ar koutiej Jeova? Ewi wãwen ar kwalok koutiej ñõn ro jeer im jãter ilo congregation eo? Jen etale kajitõk kein im kajitõk ko jet rej ekkejel ñõn katak in.
Koutiej Jeova im Etan
3. Ta juõn wãwen eaurõk ñõn koutiej Jeova?
3 Juõn wãwen ñõn koutiej Jeova ej ikijen ar kaurõk ãt eo etan. Men in eaurõk kinke kar bõk kij “kin etan.” (Jerb. 15:14) Emol ej juõn jerammõn elap ñõn jutõk kin etan Jeova, Anij eo eutiejtata. Dri kanan Maika ear ba: “Armij otemjej renaj etetal ilo etan anij ko air, ak kij, jenaj etetal ilo etan Jeova ar Anij ñõn indrio.” (Mic. 4:5, NW) Jej “etetal ilo etan Jeova” ikijen ar kate kij ñõn mour ilo juõn wãwen me enaj nebar ãt eo etan. Einwõt an kar Paul kakememej dri Kristian ro ilo Rom, elañe jejjab mour ekkar ñõn nuuj eo emõn jej kwaloke, jenaj “blaspim” ak katton etan Anij.—Rom. 2:21-24.
4. Ewi wãwen kwoj watõk jerammõn eo am ñõn kwalok kin Jeova?
4 Jej bareinwõt koutiej Jeova ikijen ar jerbal in kwalok nan. Ilo ien ko etto, Jeova ear kãlet ailiñ in Israel bwe ren dri kennan ro an, ak rar likjõp in kõmõne jerbal in. (Ais. 43:1-12) Elõñ alen air kar jumae Jeova im ‘kaburomõj’ E. (Sam 78:40, 41) Tokelik, ear joko an Jeova buñburuen kake ailiñ in. Ak kij ranin, jej kamolol kin jerammõn eo ñõn kwalok kin Jeova im ãt eo etan ñõn armij ro otemjej. Jej kõmõne men in kin ar yokwe e im kõnan kokwojarjar etan. Kin ar jela mol eo kin Jemer ilõñ im karõk ko an, men in ej kamakit kij bwe jen kõnan kwalok nan. Jej bõk ejja eñjake eo wõt an Paul ke ear ba: “Men in e relel ilo buruõ, bwe Wo ñõn iõ elañe I jab kwalok gospel!”—1 Kor. 9:16.
5. Etke tõmak ilo Jeova ej ekkejellok ñõn ar koutiej e?
5 Ilo buk in Sam Devid ear ba: “Ro re jela etõm re naj liki Yuk; bwe Kwe O Jeova, kw’ar jab illok jen ro rej bukot Yuk.” (Sam 9:10) Elañe emol ar jelã kin Jeova im koutiej etan, jenaj liki E einwõt kar dri karejar ro an retiljek ilo ien ko etto. Eñin bar wãwen eo juõn jej koutiej Jeova, ñe jej liki im tõmak kin e. Lale mõk kin ewi wãwen Nan eo an Anij ej kwalok bwe liki Jeova ej ekkejel iben ar koutiej e. Ke dri Israel ro rar jab liki E, Jeova ear kajitõk iben Moses: “Ietoõn an armij rein naj kejekron Iõ? im ietoõn air jab liki Iõ, kin kakõle ko otemjej I ar kõmõne ibeir?” (Bwin. 14:11) Ilo oktan, ñe jej liki bwe Jeova enaj kejbãrok im jibõñ kij ñõn kijenmij kin melejoñ ko jej iioni, jej kwalok ar koutiej e.
6. Ta eo ej kamakit kij ñõn koutiej Jeova?
6 Jisõs ear kwalok bwe koutiej Jeova ej aikwij itok jen buruer. Ke Jisõs ear konono ñõn ro me rar jab kabuñ ñõn Jeova jen burueir, ear kwalok ejja nan ko an Jeova ke ear ba: “Armij rein rej kabuñ ñõn Iõ kin tieir; a burueir etolok jen Iõ.” (Mat. 15:8) Yokwe eo ar ñõn Jeova ej kamakit kij ñõn koutiej e. (1 Jon 5:3) Im jej bareinwõt kememej kalimur in an Jeova: “Inaj kautiej ro rej kautiej iõ.”—1 Sam. 2:30, UBS.
Ro Rej Tel Congregation eo Rej Kwalok Koutiej ñõn Ro Jet
7. (a) Etke brother ro rej lolorjake congregation eo rej aikwij kwalok koutiej ñõn ro rej ber iomin tel eo air? (b) Ewi wãwen an kar Paul koutiej dri tõmak ro mõtõn?
7 Dri jilik Paul ear jiroñ dri tõmak ro mõtõn: “Komin kwalok ami mõnõnõ in kautiej dron.” (Rom. 12:10, UBS) Man ro rej bõk erro ko an congregation eo rej aikwij lor joñok eo an Paul ikijen air kõmõn juõn joñok emõn ilo air “mõnõnõ” in koutiej ro rej ber iomin tel eo air. (Riit 1 Dri Tessalonika 2:7, 8.) Brother ro ilo congregation ko Paul ear loloki rar jela bwe Paul ejamin kar kajitõk ibeir ñõn kõmõni men ko ear jab mõnõnõ in kõmõni. Kin an kar Paul kwalok an koutiej dri tõmak ro mõtõn rar bareinwõt koutiej e. Ke Paul ear ba: “Inem ij akwelap ñõn kom, bwe komin dri kajeoñwe ña,” jemaroñ liki bwe elõñ rar mõnõnõ in lor e kinke ear emõn joñok eo an.—1 Kor. 4:16.
8. (a) Ewi wãwen an kar Jisõs koutiej dri kalor ro an? (b) Ewi wãwen overseer ro ranin remaroñ lor joñok eo an Jisõs?
8 Bar juõn wãwen juõn brother ej kwalok an koutiej ro rej ber iomin tel eo an ej ikijen an kemeleleik ir kin unin kajitõk ko an ak nan in jiroñ ko ej lelok ñõn ir. Ilo an kõmõne men in, ej anõke joñok eo an Jisõs. Ñõn wanjoñok, Jisõs ear kemelele kin unin an kar jiroñ dri kalor ro ñõn jar bwe en lõñlok dri jerbal ro ilo ien jonikõn eo. Ear ba: “Elap jonikõn, a eiet dri jerbal; Inem komin jar ñõn Iroij in marmir, bwe En jilkinlok ro dri jerbal ilo jonikõn eo An.” (Mat. 9:37, 38) Ilo ejja wãwen in wõt, ke ear jiroñ dri kalor ro an bwe ren “ekil” wõt, ear kwalok un eo ilo an ba: “Bwe kom jaje ilo ran õt Iroij e naj itok.” (Mat. 24:42) Emakijkij an kar Jisõs jiroñ dri kalor ro an kin ta eo rej aikwij kõmõne im bareinwõt unin rej aikwij kõmõne. Ilo wãwen in, ear kwalok an koutiej ir. Ej juõn joñok elap an emõn ñõn an overseer ro ilo congregation eo lore.
Koutiej Congregation eo an Jeova im Wãwen Tel eo An
9. Ñe jej kwalok koutiej ñõn rolul eo ibelakin lõl im ro rej jutak kin e, bar wõn eo jej koutiej e? Kemelele.
9 Ñõn koutiej Jeova, jej aikwij bareinwõt koutiej rolul eo ibelakin lõl, im ro rej jutõk kin e. Ñe jej bokake nan in kakabilek eo jen Baibel eo me dri korijer etiljek im meletlet ej letoke, jej kwalok ar koutiej karõk ko an Jeova. Ilo congregation eo jinoin, dri jilik Jon ear lo aikwij eo ñõn koweik ro rar jab kwalok air koutiej ro rej tel congregation eo. (Riit 3 Jon 9-11.) Nan ko an Jon rej kwalok bwe jet rar likjõp in kwalok air koutiej overseer ro im bareinwõt nan in katakin im tel ko air. Jej mõnõnõ bwe elõñ Kristian ro rar jab eindrein. Ke dri jilik ro rar mour wõt, alikar bwe rolul in jimjãn jimjãten rar kwalok air koutiej ñõn ro rej tel congregation eo.—Pil. 2:12.
10, 11. Kemelele jen Baibel eo kin etke ekkar bwe jet ren bõk maroñ eo ñõn tel ilo congregation eo.
10 Jet rej lemnok bwe kin an Jisõs jiroñ dri kalor ro an bwe “kom otemjej jimjãn jimjãten,” en kar ejelok juõn eutiejlok jen bar juõn ilo congregation eo. (Mat. 23:8) Bõtab, ilo Jeje ko in kajin Hibru im Grik rej kwalok elõñ wanjoñok ko kin eman ro me Anij ear kamaroñ ir ñõn tel. Bwebwenato eo an dri Hibru ro kin ro rej bõran bwij ko, dri ekajet ro, im kiñ ro ej letok elõñ menin kamol ko bwe Jeova ear kajerbal armij ñõn letok nan in tel. Ke armij ro rar jab koutiej ro me ear kãlet ir ñõn tel, rar bõk kaje jen Jeova.—2 Kiñ. 1:2-17; 2:19, 23, 24.
11 Ilo ejja wãwen in wõt, Kristian ro jinoin rar kile bwe kar kamaroñ dri jilik ro ñõn tel ir. (Jerb. 2:42) Ñõn wanjoñok, Paul ear lelok nan in tel ñõn ro jein im jãten. (1 Kor. 16:1; 1 Tes. 4:2) Mekarta, Paul ear bareinwõt mõnõnõ in kõtãik e mõke ñõn ro eor air maroñ ion. (Jerb. 15:22; Gal. 2:9, 10) Alikar bwe, ear jime an Paul lemnok kin ro eor air maroñ ilo congregation eo.
12. Ta men ko ruo jemaroñ katak kaki jen wanjoñok ko ilo Baibel eo ikijen ro eor air maroñ ion ro jet?
12 Katak eo jenaj katak kake ej jerbal ilo ruo wãwen ko. Kein kajuõn, ekkar ñõn Baibel eo, “dri korijer e tiljek im meletlet” ikijen Governing Body eo eor an maroñ ñõn jitõñ man ro ñõn bõk erro ko, im jet ian man rein eor air maroñ ion man ro jet rar bar jitõñ ir. (Mat. 24:45-47; 1 Pit. 5:1-3) Kein karuo, kij aolep, ekoba man ro kar jitõñ ir, jej aikwij koutiej ro me eor air maroñ ior. Inem ta jet ian wãwen ko jemaroñ koutiej ro rej bõk erro ko ñõn lolorjake rolul eo ibelakin lõl?
Koutiej Overseer Ro Rej Itoitak
13. Ewi wãwen ar maroñ koutiej dri lotok ro me rolul eo ej jilkintok ir?
13 Paul ear ba: “Ro jeim im jatim, kimij akwelab bwe komin kanuij kautiej ro rej jerbal ibbemi, bwe Iroij ear kãlet ir bwe ren tel kom im kabilõk kom. Komin kanuij kautiej ir im yokwe ir ilo mol, kin jerbal eo rej kõmmõne. Komin ainemmõn ñõn dron.” (1 Tes. 5:12, 13, UBS) Emol bwe overseer ro rej itoitak rej jet ian ro elap air “jerbal” iber. Kin men in, jen “kanuij kautiej ir.” Juõn wãwen ñõn kõmõne men in ej ikijen ar bokake nan in kakabilek ko air kin aolepen buruer. Ñe overseer rein rej letok nan in kakabilek ko jen kumi in dri korijer ro retiljek, “meletlet jen lõñ” enaj kamakit kij ñõn “bojak ñõn bokake.”—Jem. 3:17, NW.
14. Ewi wãwen an ro ilo congregation eo kamol air koutiej overseer ro rej lolok ir, im ta tokjen eo ej walok jen men in?
14 Ak ta elañe kar jiroñ kij ñõn kõmõne men ko me reoktõk jen wãwen eo jar iminene kake? Kwalok koutiej ilo ien rot kein ej aikwij ar bõprae ar bõk juõn lemnok in jumae einwõt, “Ejjab eindrein wãwen eo kimij kõmõne men kein ijin” ak, “Men kein remaroñ ekkar wõt ñõn jikin ko jet ak jab ilo congregation in am.” Jen an eindrein, jej kate kij ñõn bokaki. Ilo ar kememej bwe congregation eo ej an Jeova im bwe Jisõs ej Bõran, men in enaj jibõñ kij ñõn kõmõn eindrein. Ñe ro ilo congregation eo rej mõnõnõ in jerbale nan in jiroñ ko an overseer eo ej lolok ir, men in ej kwalok an mol air koutiej e. Dri jilik Paul ear nebar man ro jein im jãtin ilo Korint kin air bokake nan in tel ko me Taitõs ear liloki ke ear lolok congregation eo air. (2 Kor. 7:13-16) Ranin, jemaroñ liki bwe ñe jej mõnõnõ in jerbale nan in tel ko jen overseer eo ej lotok kij, men in enaj kalaplok lõñliñ eo jej bõke ilo ar jerbal in kwalok nan.—Riit 2 Dri Korint 13:11.
“Koutiej Armij Otemjej”
15. Ta jet ian wãwen ko jej kwalok ar koutiej dri Kristian ro mõtar?
15 Paul ear je: “En jab bin am kowe juõn elder, a kajime e einwõt kar jemõm, im ro likao einwõt kar ro jeõm im jãtõm man: Ro lilap einwõt kar jinõm; kõra re jab kanuij ridto einwõt kar ro jeõm im jãtõm kõra ilo kwojarjar otemjej. Kwon kõñiãjoik kõra ro rej mõke iair im rejoko beleir.” (1 Tim. 5:1-3) Aet, nan eo an Anij ej rejañ kij ñõn koutiej aolep armij ro ilo congregation eo. Ak ta elañe enana kõtam iben juõn eo ilo congregation eo? Men in enaj ke bõprae yuk jen am kajejjit erro eo ñõn am koutiej dri Kristian eo mõtõm? Ak kwonaj ke kajime lemnok eo am ikijen am lale karkar ko karkarin Kristian ej kwaloki? Elaptata ro eor air maroñ in tel rej aikwij kejbãrok juõn lemnok ejime kin ro jeiir im jãtiir ilo air jab “iroij ion . . . bwij eo.” (1 Pit. 5:3) Emol, kin ar kwalok yokwe ñõn dron ilo congregation eo, eor ien ko remõn ñõn ar koutiej dron.—Riit Jon 13:34, 35.
16, 17. (a) Etke eaurõk bwe jen koutiej ro jej kwalok nan ibeir im bareinwõt dri jumae ro? (b) Ewi wãwen jej “kautiej armij otemjej”?
16 Emol bwe, jejjab kwalok koutiej ñõn ro wõt im rej uan congregation eo. Paul ear jeje ñõn dri Kristian ro ilo ran ko an: “Einwõt eor ien iber, jen jerbale emõn ñõn armij otemjej.” (Gal. 6:10) Emol, emaroñ bin ñõn jerbale nan in kaiñi in elañe dri jerbal ak dri jikuul eo mõtar ejjab joij ñõn kij. Ilo ien rot kein, jej aikwij kememej nan kein: “Kwon jab aliñõrñõr [ak illu] kin ro rej kõmõn nana.” (Sam 37:1) Ilo ar jerbale nan in kakabilek in enaj bareinwõt jibõñ kij ñõn kwalok ar koutiej dri jumae ro. Eindrein, elañe eor juõn lemnok ettã kin kij mõke ñe jej kwalok nan, men in enaj jibõñ kij ñõn konono iben aolep armij “kin inimõn im mijõk.” (1 Pit. 3:15) Bareinwõt baotokir im nuknuk ko ar remaroñ kwalok bwe jej koutiej ro im jej kwalok nan ñõn ir.
17 Ilo mol, jekron elañe jej jerbal iben dri tõmak ro mõtar ak ro ilikin congregation eo, jej aikwij kate wõt kij ñõn jerbale nan in kakabilek in: “Kautiej armij otemjej, yokwe ri tõmak ro mõttami, mijak Anij, im kautiej Iroij Lablab eo i Rome.”—1 Pit. 2:17, UBS.
Ewi Wãwen Kwonaj Uak?
Ewi wãwen kwomaroñ kwalok koutiej ñõn:
• Jeova?
• Elder ro ilo congregation ko im overseer ro rej itoitak?
• Armij ro kajuju ilo congregation eo?
• Ro kwoj kwalok nan ñõn ir?
[Pija eo ilo peij 23]
Kristian ro ilo ran ko an dri jilik ro rar kwalok koutiej kin lolorjake eo an governing body eo
[Pija eo ilo peij 24]
Elder ro ilo ailiñ ko otemjej rej koutiej overseer ro rej itoitak, ro me Governing Body eo ear jitõñ ir