Unin Jej Kõm̦m̦ane Kõjota eo an Irooj

1, 2. Ta eo Jijej ear kõm̦m̦ane ilo boñũn Nisan 14 ilo iiõ eo 33? (Lale pija eo itulõñ.)

ILO boñũn Nisan 14 ilo iiõ eo 33, ekar boñũn meram (full moon) ilo kar Jerusalem. Ilo boñõn in, Jijej im rũkal̦oor ro an rar kõm̦m̦ane Kwõjkwõj in Kijoone eo. Unin ej ñan kakeememej er kõn iien eo Jeova ear kanemkwõj RiIsrael ro jãn Ijipt 1,500 iiõ ko remootl̦o̦k jãn kar iien in. Ãlikin aer kõm̦m̦ane men in, Jijej ear kõm̦m̦ane juon kõjota ejej uwaan ippãn rũkal̦oor ro an 11 retiljek. Ej juon kõjota me rũkal̦oor ro an Jijej renaaj aikuj kõm̦m̦ane kajjojo iiõ ñan keememeje mej eo an.​—Matu 26:1, 2, UBS.

² Ilo iien in, ãlikin an kar Jijej jare bũreet eo ejjab uwe ear ajeje ñan rijjilõk ro an im ba: “Kom̦win bõke im m̦õñã.” Innem, ear bar bõk kab in wain eo im jare im ãlikin ear ba: “Kom̦win otemjej idaak jãne.” (Matu 26:26, 27) Ewõr mel̦el̦ein bũreet eo im wain eo Jijej ear kõjerbale ilo iien in. Ilo boñõn eo me Jijej ear kõm̦m̦ane iien in ippãer, elõñ men ko rũkal̦oor ro retiljek rar katak jãn kar iien kõjota in.

3. Ta kajjitõk ko jenaaj etali ilo katak in?

³ Jijej ear kõn̦aan bwe rũkal̦oor ro an ren keememeje mej eo an kajjojo iiõ. Tokãlik, kar n̦aetan iien in ‘Kõjota eo an Irooj,’ ak Kwõjkwõj. (1 Korint 11:20) Ilo katak in ewõr kajjitõk ko jenaaj etali. Etke jej aikuj keememej raanin mej eo an Jijej? Ta mel̦el̦ein bũreet eo im wain eo? Ta eo jej aikuj in kõm̦m̦ane bwe jen pojak ñan Kwõjkwõj in Keememej Mej eo an Jijej? Wõn ro rej m̦õñã bũreet im idaak wain? Im elemen ad kwal̦o̦k bwe jej kaorõk im kam̦m̦oolol Jeova kõn kõjatdikdik eo ad?

UNIN JEJ KEEMEMEJ RAANIN MEJ EO AN JIJEJ

4. Ilo an kar Jijej mej, ta kõjatdikdik eo ewõr ippãd?

⁴ Kõnke Adam ear jerawiwi, kõj armej jej bar jerawiwi im mej. (Rom 5:12) Kõn men in, ejjel̦o̦k juon armej emaroñ ajel̦o̦k mour eo an make ñan Anij bwe en lo̦mo̦o̦ren e ak ro jet. (Sam 49:6-9, UBS) Bõtab, Jijej wõt ear maroñ kõm̦m̦ane men in kõnke eweeppãn. Eñin unin ear ajel̦o̦k mour eo an ñan Anij im kanemkwõj kõj jãn jerawiwi im mej. Ilo an kar Jijej kõm̦m̦ane men in, ewõr juon ad kõjatdikdik bwe juon iien jeban bar jerawiwi im mej, ak jenaaj mour ñan indeeo.​—Rom 6:23; 1 Korint 15:21, 22, UBS.

5. (1) Etke jejel̦ã bwe Anij im Jijej rej yokwe kõj? (2) Etke jej aikuj in pãd ilo iien Kwõjkwõj eo?

⁵ Anij ear kwal̦o̦k an yokwe kõj ilo an kar letok Nejin, Jijej, bwe en mej kõn kõj. (Jon 3:16) Bareinwõt, Jijej ear kwal̦o̦k an yokwe kõj ilo an kar m̦õn̦õn̦õ in mej kõn kõj. Baibõl̦ ej kaalikkar bwe m̦okta jãn an kar Jijej itok ñan lal̦ in, ear “lañlõñ ilo armej” ak m̦õn̦õn̦õ kõn armej ro. (Jabõn Kõnnaan 8:30, 31) El̦ap ad kam̦m̦oolol Jeova im Jijej kõn men in erro kar kõm̦m̦ane ñan kõj! Im juon wãween jemaroñ kwal̦o̦k ad kam̦m̦oolol ej ilo ad pãd ilo iien Kwõjkwõj eo. Ad pãd ilo iien in, jej kaalikkar ad m̦õn̦õn̦õ in pokake Jijej ke ear ba: “Kom̦win kõm̦m̦an men in ilo ememej Eõ.”—1 Korint 11:23-25.

TA MEL̦EL̦EIN BŨREET EO IM WAIN EO?

6. Etke jejel̦ã kõn mel̦el̦ein bũreet im wain eo ilo iien Kwõjkwõj eo?

⁶ Jet armej rej tõmak bwe ke Jijej ear ba, “Men in ej ãnbwinnũ,” bũreet eo ear erom ãnbwinnin. Rej bar tõmak bwe ke Jijej ear ba, “Men in ej bõtõktõkũ,” wain eo ear erom bõtõktõkin. Bõtab, tõmak in ejjab jim̦we. Etke? Kõnke Jijej ear pãd ijo ippãn rijjilõk ro an retiljek, im bũreet eo ejjab uwe im wain eo rar bar pãd ijo. Kõn men in, elukkuun alikkar bwe ke Jijej ear ba naan kein, ear kõnnaan ilo kõkkar. Elõñ alen an kar Jijej kõjerbale naanin kõkkar ko.​—Jon 2:19-21; 4:13, 14; 10:7; 15:1.

7. Bũreet eo ejjab uwe ej kõkkar kõn ta?

⁷ Ilo kõjota eo ãliktata, Jijej ear kõjerbal bween pilawã eo ejjab uwe me rar kõjerbale ke rar kõm̦m̦ane Kwõjkwõj in Kijoone Eo. (Exodus 12:8) Jet iien Baibõl̦ ej kõjerbal naan in kein kauwe ñan kõkkar kõn jerawiwi. (Matu 16:6, 11, 12, UBS; Luk 12:1, UBS) Jijej ear kõjerbale bũreet ejjab uwe ilo iien kõjota eo an. Bũreet in ejjab uwe ear kõkkar kõn an weeppãn. (Hibru 7:26, UBS) Eñin unin jejjab likũt kein kauwe ko ilo bũreet ko jej kõjerbali ilo iien Kwõjkwõj eo.

8. Wain eo ej kõkkar kõn ta?

⁸ Wain eo me Jijej ear kõjerbale, im wain ko me jej kõjerbali ilo iien Kwõjkwõj ko ad ilo raan kein, rej aolep kõkkar kõn bõtõktõkin ak mour eo an Jijej. Jijej ear mej kõn kõj im lel̦o̦k mour eo an ‘bwe en jeorl̦o̦k jerawiwi ko ad’ ilo juon jikin epaake Jerusalem etan Golgota. (Matu 26:28, UBS; 27:33) Ñe jej lukkuun kwal̦o̦k ad kam̦m̦oolol Jijej kõn an kar katok kõn mour eo an, jenaaj kate kõj bwe jen pãd ilo iien in eaorõk kajjojo iiõ. Ewi wãween ad maroñ kõm̦m̦ane men in?

JET IAAN MEN KO KWÕMAROÑ KÕM̦M̦ANI BWE KWÕN POJAK

9. (1) Etke jej aikuj riiti eoon ko em̦õj kããlõti ñan ad riiti m̦okta im ãlikin iien Kwõjkwõj eo? (2) Ewi wãween am̦ l̦õmn̦ak kõn an kar Jijej mej kõn kwe?

⁹ Juon iaan men ko kwõmaroñ kõm̦m̦ani bwe kwõn pojak ñan iien Kwõjkwõj eo, ej ilo am̦ riiti eoon ko em̦õj kããlõti ñan ad riiti ilo raan ko m̦okta jãn iien Kwõjkwõj eo. Kwõmaroñ loe eoon kein ilo bok eo etan Liñõri Baibõl̦ Raan Otemjej. Ilo ad naaj riiti bwebwenato kein ilo Baibõl̦ kõn Jijej, enaaj jipañ kõj ñan kõl̦mãnl̦o̦kjen̦ kõn men ko Jijej ear kõm̦m̦ani m̦okta jãn an kar mej.a (Lale kõmel̦el̦e eo itulal̦.) Juon jeid im jatid kõrã ej ba: “Kajjojo iiõ kõmij reim̦aanl̦o̦k ñan iien Kwõjkwõj eo. Iien Kwõjkwõj ko relukkuun aorõk. Ij keememej ke jema ear mej im ij jutak ilowaan im̦õn mej eo . . . , ke ij reilo̦k im kalimjeke, ij kab jino lukkuun kile joñan aorõkin mej eo an Jijej. . . . El̦ap aõ jel̦ã kõn eoon ko ilo Baibõl̦ im kilen kõmel̦el̦eiki! Bõtab, ilo iien in me ej kab wõr juon eo ejitõnbõro ippa ear mej, ij kab kiiõ lukkuun kile tokjãn an kar Jijej mej kõn kõj. Men in ekõm̦m̦an bwe in lukkuun m̦õn̦õn̦õ.” Elukkuun aorõk bwe jen kõl̦mãnl̦o̦kjen̦ kõn an kar Jijej katok kõn mour eo an kõn kõj kajjojo. Ñe jej kõm̦m̦ane men in, enaaj kõm̦m̦an bwe jen pojak ñan iien Kwõjkwõj eo.

10. Bar ta eo jemaroñ kõm̦m̦ane bwe jen pojak ñan iien Kwõjkwõj eo?

¹⁰ Bar juon wãween enaaj jipañ kõj bwe jen pojak ej ilo ad kal̦apl̦o̦k ijo kun̦aad ilo jerbalin kwal̦o̦k naan. Bareinwõt, kamaat ad maroñ ñan kũrtok jabdewõt armej me jemaroñ tõpar er ñan iien Kwõjkwõj eo. Bõlen jemaroñ akjel̦õri bainier. Ñe jej bwebwenato ñan ro jet kõn Anij, eo Nejin Anij, im kõjatdikdik eo kõn mour indeeo, jenaaj lukkuun m̦õn̦õn̦õ kõnke jejel̦ã bwe jej kõm̦m̦ane men eo me Anij ekõn̦aan bwe jen kõm̦m̦ane.​—Sam 148:12, 13.

11. Etke Paul ear ba bwe ejjel̦o̦k an kar RiKorint ro kautiej ke rar m̦õñã bũreet ak idaak wain ilo iien Kwõjkwõj eo?

¹¹ Ñe kwõj kõppojak ñan iien Kwõjkwõj eo, em̦m̦an ñe kwõj bar kõl̦mãnl̦o̦kjen̦ kõn naan ko Paul ear je ñan Kũrjin ro ilo Korint. (Riit 1 Korint 11:27-34.) Paul ear ba bwe jabdewõt eo ejjab jim̦we ak ejjab kwal̦o̦k kautiej ilo an m̦õñã bũreet ak idaak wain, enaaj wõr “ruõn kõn ãnbwinnin im bõtõktõkin Irooj.” Alikkar bwe ñe juon iaan rũkkapit ro ej kõm̦m̦ani men ko renana ak ej m̦õñã bũreet im idaak wain ilo iien Kwõjkwõj eo, ej “liaakel̦o̦k” e make ilo an m̦õñã im idaak. Ilo kar iien ko an Paul, elukkuun kar lõñ RiKorint ro ear jab em̦m̦an men ko rar kõm̦m̦ani. Bõlen jet rar buul̦ m̦õñã im idaak m̦okta jãn iien Kwõjkwõj eo im ilo iien Kwõjkwõj eo. Im men in emaroñ kar kõm̦m̦an aer mejki. Kõn aer kar jab kwal̦o̦k kautiej ñan iien in eaorõk, Anij ear jab m̦õn̦õn̦õ ippãer ke rar m̦õñã bũreet eo im idaak wain eo.

12. (1) Ta eo Paul ear keidi iien Kwõjkwõj eo ñane? (2) Ta naanin kakkõl eo an ñan ro rej m̦õñã im idaak ilo iien Kwõjkwõj eo? (3) Ta eo juon ej m̦õñã im idaak ilo iien Kwõjkwõj eo ej aikuj kõm̦m̦ane el̦aññe ear kõm̦m̦ane juon bõd el̦ap?

¹² Paul ear keidi iien Kwõjkwõj eo ñan juon iien m̦õñã. Ear lel̦o̦k naanin kakkõl ko ñan ro rej m̦õñã im idaak ilo iien Kwõjkwõj eo ke ear ba: “Kom̦ jab maroñ in idaak kab in Irooj, im kab in tim̦on̦ ran̦; kom̦ jab maroñ in m̦õñã jãn tebõl̦ an Irooj, im jãn tebõl̦ in tim̦on̦ ran̦.” (1 Korint 10:16-21) El̦aññe juon armej me ej m̦õñã bũreet im idaak wain ilo iien Kwõjkwõj ko ear kõm̦m̦ane juon bõd el̦ap, ej aikuj kepaake em̦m̦aan ro rej lale eklejia eo bwe ren jipañe. (Riit Jemes 5:14-16, UBS.) Ñe ej lukkuun ukel̦o̦k im kaalikkar bwe ej bũrom̦õj kõn ta eo ear kõm̦m̦ane, innem ñe enaaj m̦õñã im idaak ilo iien Kwõjkwõj eo, armej in ej kwal̦o̦k an kautiej menin katok eo an Jijej.​—Luk 3:8, UBS.

13. Etke jej aikuj jar kõn kõjatdikdik eo ad jãn Anij?

¹³ Ñe jej jar im kõl̦mãnl̦o̦kjen̦ kõn kõjatdikdik in, enaaj bar kõm̦m̦an bwe jen pojak ñan iien Kwõjkwõj eo. Jejjab kõn̦aan bwe jen kain armej rot en̦ me ejjel̦o̦k an kautiej mej eo an Jijej. Kõn men in, jejjab aikuj m̦õñã bũreet im idaak wain ilo iien Kwõjkwõj eo el̦aññe ejjel̦o̦k men en̦ jej eñjake ak ej kaalikkar bwe jej uwaan rũkkapit ro. Innem, wõn ro wõt remaroñ m̦õñã bũreet im idaak wain ilo iien Kwõjkwõj eo?

WÕN RO WÕT REJ M̦ÕÑÃ IM IDAAK ILO IIEN KWÕJKWÕJ EO?

14. Kõnke rũkkapit ro rej uwaan bujen eo ekããl, ta eo remaroñ kõm̦m̦ane ilo iien Kwõjkwõj eo?

¹⁴ Ro wõt rej m̦õñã bũreet im idaak wain ilo iien Kwõjkwõj eo, ej ro me relukkuun jel̦ã bwe rej uwaan bujen eo ekããl. Ikijjeen wain eo, Jijej ear ba: “Kab in ej bujen ekããl an Anij, em̦õj kapene ilo bõtõktõkũ.” (1 Korint 11:25, UBS) Jeova ear kõm̦m̦ane bujen Kien eo ippãn kar RiIsrael ro. Bõtab, tokãlik ear ba bwe enaaj ukote im kõm̦m̦ane juon bujen kããl. (Riit Jeremaia 31:31-34.) Im bujen ak karõk in ekããl, Anij ear kõm̦m̦ane ippãn rũkkapit ro. (Galetia 6:15, 16) Mej eo an Jijej ear kõm̦m̦an bwe en jejjet kitien karõk in ekããl. (Luk 22:20, UBS) Jijej ej e eo ikõtaan ro ilo bujen eo ekããl im Jemãn. Rũkkapit ro retiljek im rej uwaan bujen in ekããl renaaj pãd ippãn Jijej ilañ.​—Hibru 8:6; 9:15.

15. (1) Wõn ro rej uwaan bujen eo kõn Aelõñ eo? (2) Ñe rũkkapit ro renaaj tiljek wõt, ta jeraam̦m̦an eo renaaj bõke?

¹⁵ Rũkkapit ro rejel̦ã bwe rej uwaan bujen eo kõn Aelõñ eo. (Riit Luk 12:32, UBS.) Jijej ear kõm̦m̦ane bujen in ippãn rũkal̦oor ro an retiljek me rar eñtaan ippãn ilo “eñtaan ko an.” (Pilippai 3:10, UBS) Rũkkapit ro ilo raan kein rejel̦ã bwe rej bar uwaan bujen eo kõn Aelõñ eo. Rein renaaj kiiñ im tõl ippãn Kũraij ilañ ñan indeeo. (Revelesõn 22:5) Kõn men in, rũkkapit ro ilo raan kein remaroñ m̦õñã bũreet im idaak wain ilo iien Kõjota eo an Irooj.

16. Ta mel̦el̦ein naan ko ilo Rom 8:15-17? Jouj im kõmel̦el̦e ilo tukadu.

¹⁶ Rũkkapit ro rejel̦ã bwe rej nejin Anij im remaroñ m̦õñã bũreet im idaak wain ilo iien Kwõjkwõj eo. (Riit Rom 8:15-17.) Paul ear ba kõn rein bwe rej jar im ba: “Abba, Jema!” Naan in “Abba” ilo kajin Aramaic ej mel̦el̦ein “baba,” ak “jema.” An rũkkapit ro kũr Jeova ilo wãween in, ej kwal̦o̦k kõn kõtaan eo aer ejejuwaan ippãn Jeova kõn an kar bõk er bwe ren ro nejin. Kajoor eo an Anij ear make “kõnnaan” ak kããlõt rũkkapit rein bwe ren nejin Anij. Kõn men in, rũkkapit ro rej lukkuun tõmak bwe er rej nejin Anij. Ejjab mel̦el̦ein bwe rein rejjab kõn̦aan mour ioon lal̦ in. Rejel̦ã bwe el̦aññe renaaj tiljek wõt ñan mej, renaaj kiiñ ippãn Jijej ilañ. Bareinwõt, rejel̦ã bwe Jeova eo ear “kapit” er. Ilo raan kein, ewõr bween 144,000 ro nejin Anij ijin ioon lal̦. (1 Jon 2:20; Revelesõn 14:1) Kõn an rũkkapit rein lukkuun epaake Jeova, rej kũri im ba, “Abba, Jema!”

KAORÕK KÕJATDIKDIK EO AM̦ JÃN ANIJ

17. (1) Ta kõjatdikdik eo an rũkkapit ro? (2) Ewi wãween aer jel̦ã bwe rej uwaan rũkkapit ro?

¹⁷ El̦aññe kwõj juon rũkkapit, kwõnaaj ekkeini am̦ jar kõn kõjatdikdik eo am̦ ñan mour indeeo ilañ. Im kwõnaaj lukkuun kaorõk men ko Baibõl̦ ej ba kõn kõjatdikdik in am̦. Ñan waanjoñak, Baibõl̦ ej kwal̦o̦k kõn an Jijej im lio naaj “pãleen” m̦are ilañ. Ñe kwõj riiti men in, kwõjel̦ã kadede bwe ej kitibuj kwe, im kwõj reim̦aanl̦o̦k ñan iien eo enaaj jejjet kitien. (2 Korint 11:2, UBS; Jon 3:27-29, UBS; Revelesõn 21:2, 9-14, UBS) Im ñe Baibõl̦ eo ej kõnono kõn yokwe eo an Anij ñan rũkkapit ro, kwõjel̦ã bwe ej bar kõnono ñan kwe. Kõn men in, ñe kwõj riiti naanin kakapilõk ko an Anij ilo Baibõl̦ ñan rũkkapit ro, kajoor eo an Anij ej kõm̦akũt eok bwe kwõn pokaki. Kajoor eo an Anij ej “kõnnaan” ak kwal̦o̦k ñan kwe bwe kõjatdikdik eo am̦ ej ñan mour indeeo ilañ.

18. (1) Ta kõjatdikdik eo an ‘jiip ro jet’? (2) Ta l̦õmn̦ak eo am̦ kõn kõjatdikdik in?

¹⁸ El̦aññe kwõj juon iaan ro ilo ‘jar eo el̦ap’ me rej uwaan ‘jiip ro jet,’ em̦õj an Anij lewaj juon jeraam̦m̦an bwe kwõn maroñ mour ñan indeeo ilo naaj lal̦ in ñe enaaj erom Pedetaij. (Revelesõn 7:9; Jon 10:16) Ewi wãween am̦ l̦õmn̦ak kõn men in? Ñe kwõnaaj kõl̦mãnl̦o̦kjen̦ kõn men ko Baibõl̦ ej kwal̦o̦k kaki kõn naaj Pedetaij eo, kwõnaaj lukkuun kijoororetok iien in. Kwõnaaj kijoorore am̦ mour ippãn baam̦le eo am̦ im ro m̦õttam̦ ilo iien en̦ me enaaj lukkuun l̦ap aenõm̦m̦an ilo lal̦ in. Bareinwõt, kwõnaaj kõn̦aan bwe en ejjel̦o̦k bar kwõle, jeram̦õl, eñtaan, nañinmej, im mej. (Sam 37:10, 11, 29, UBS; 67:6, UBS; 72:7, 16, UBS; Aiseia 33:24) Kwõnaaj kijooror in lo an ro rejitõnbõro ippam̦ bar mour. (Jon 5:28, 29) Kwõn lukkuun kam̦m̦oolol Jeova kõn kõjatdikdik in em̦m̦an! Meñe kwõjjab m̦õñã bũreet im idaak wain, bõtab kwõj etal ñan iien in kõnke kokõn̦aan kwal̦o̦k am̦ kam̦m̦oolol kõn an kar Jijej katok kõn mour eo an.

KWÕNAAJ KE PÃD ILO IIEN IN EAORÕK?

19, 20. (1) Etke jemaroñ bõk jeraam̦m̦an eo ñan mour indeeo? (2) Etke kwõnaaj kobal̦o̦k ilo iien Kwõjkwõj in Keememej Mej eo an Jijej?

¹⁹ Kwõmaroñ bõk jeraam̦m̦an kein ñan mour ilañ ak ijin ioon lal̦ el̦aññe kwõj tõmak ilo Jeova Anij, Jijej Kũraij, im katok in mour eo an Kũraij. El̦aññe kwõnaaj kobal̦o̦k ilo iien Kwõjkwõj eo, kwõn kõl̦mãnl̦o̦kjen̦ kõn kõjatdikdik eo am̦ im kõn aorõkin mej eo an Jijej. Ilo Bõl̦aide, Eprõl̦ 3, 2015, elõñ milien armej ro jãn ipel̦aakin lal̦ in renaaj kõm̦m̦ane Kwõjkwõj in Keememej Mej eo an Jijej. Renaaj kõm̦m̦ane ilo Im̦õn Kweilo̦k ko an Ri Kõnnaan ro an Jeova ak jikin ko jet me em̦õj aer kõm̦m̦an karõk ñan kõjerbali.

²⁰ Ñe jej kõpooj bũruod im l̦õmn̦ak ko ad ñan iien Kwõjkwõj in Keememej Mej eo an Jijej, enaaj l̦ap ad kam̦m̦oolol Jijej kõn an kar mej kõn kõj. Ilo ad pãd ilo iien Kwõjkwõj eo im lukkuun roñjake katak eo ej wal̦o̦k, men in enaaj kõm̦akũt kõj ñan jiroñ ro jet kõn yokwe eo an Jeova im kõn̦aan eo an ñan kõj ilo naaj ilju im jekl̦aj. (Matu 22:34-40) Kwõn kate eok im peek ippam̦ make bwe kwõn pãd ilo iien in eaorõk.