“Anij Eo Ej Kadreklok”!

“Ein drein eo ej kallip jekron, ak eo ej kamorur jekron: a Anij eo Ej kadreklok.”​​—1 KOR. 3:7.

1. Ilo wãwen et jej einwõt “dri jerbal iben Anij”?

“DRI jerbal iben Anij.” Eñin wãwen eo ri jilek Paul ear kamelele kin jerammõn eo kij aolep jemaroñ lañliñ kake. (Read 1 Dri Korint 3:​5-9.) Jerbal eo me Paul ear konono kake ej jerbal eo ñan kõmman ri kalor ro. Ear keidi jerbal in ibben jerbal in kallip im wutdikdik ine. Elañe jekõnan lo tõbrak ilo jerbal in eaorõk, jej aikwij bõk jibañ jen Jehovah. Paul ej kakememej kij bwe “Anij eo Ej kadreklok.”

2. Etke mol eo bwe ‘Anij ej kadreklok’ ej jibañ kij bõk juõn lemnak ejimwe kin jerbal in kwalok nan eo ad?

² Mol in ej jibañ kij bok juõn lemnak ejimwe kin jerbal in kwalok nan eo ad. Emaroñ bõlen lap ad niknik ilo jerbal in kwalok nan im katakin, ak ilo jemlokin Jehovah eo ej tellokin bõk nebar otemjej elañe juõn enaj erom juõn ri kalor ekãl. Etke? Kinke meñe jej kajeoñ kate kij, ejelok juõn iad emaroñ lukkun melele kin ewi wãwen juõn armij ej kaddek juõn kõtan ibben Anij, inem alikar bwe ejelok ad maroñ ilo men in. King Solomon ear kameleleik men in ilo jimwe ke ear je: “Kwo jaje kake jerbal an Anij, eo ej kõmõn men otemjej.”​​—Ekk. 11:5.

3. Ta wãwen ko rej einlok wõt juõn ikõtan jerbal in kallip ine im jerbal in kõmman ri kalor ro?

³ Kinke jejjab maroñ melele kin ewi wãwen an juõn armij erom juõn ri kalor, men in ej kõmman ke bwe jen ebwer? Jaab. Jen men in, ej kõmman bwe jerbal in en lap an kairujruj, im ekaitoktoklimo. King Solomon ear ba: “Ke e jiboñ kwon jeor ine eo am, im ke e jota kwon jab drebij peõm; bwe kwo jaje ewi iairro e naj jerammõn, eñin ak eo juõn, ak elañe irro re naj emõnin wõt juõn.” (Ekk. 11:6) Emol, ñe jej kalbwin ine eo, jejaje ia eo ak elañe enaj eddek ak jab. Elõñ men ko im rej ellã jen ad maroñ ioir. Jemaroñ ba bwe wãwen in ej einlok wõt jerbal eo ñan kõmman ri kalor ro. Jesus ear kwalok kin men in ilo wanjoñok ko ruo kar jeje kaki ilo Gospel eo an Mark ilo chapter 4. Jen lale ta eo jemaroñ katak jen wanjoñok kein ruo.

Kajjo Kain Bũdej

4, 5. Ilo tu kadu kameleleik wanjoñok eo an Jesus kin ri jeor eo me ej julok ak kajebliklik ine ko.

⁴ Einwõt kar jeje ilo book in Mark 4:​1-9, Jesus ej kamelele kin juõn ri kallip eo ej julok, ak kajebliklik, ine ko me rej buñõt jikin ko reoktak jen don: “Komin roñjake: lo, dri jeor e ar ilen jeor. Im ke ej jeor, jet ine rej buñõt iturin ial, im bao in mejatoto rej kãtem kõñi. Im jet re buñõt ijo erkãke, ijo erik brij ie; im emõkõj an edrek, bwe ebijbij brij; Ak ke ej loliñ al e kejeeke; im bwe ejelok okran ej aimirlok. Im jet re buñõt ilo bwiljin kãliklik ko, im kãliklik ko rej edrek, im koutameki, im e jab jebar leen. Im bar jet re buñõt ion brij emõn, im jebar leen, ej edrek im laplok, im jebar jilñoul kin juõn, im jiljinoñoul kin juõn, im jibuki kin juõn.”

⁵ Ilo ien ko etto ilo Bible, ekkã air jeor ine ko ikijen air julok ak kajeblikliki. Ri jeor eo ej bõk ine ko ilo nuknuk eo an ak ej likit iloan juõn ieb im julok im kajeblikliki ion bũdej eo. Ilo wanjoñok in, ri jeor eo ear jab jeori ion kajjo kain bũdej ko. Jen men in, ine ko rar buñõt jikin ko rekajjo jen don.

6. Ewi wãwen Jesus ear kameleleik wanjoñok eo kin ri jeor eo?

⁶ Jejjab aikwij bere ñan jidik kin ta melelen wanjoñok in. Jesus ear kameleleiki, einwõt ej ba ilo Mark 4:​14-​20: “Dri jeor eo ej jeor nan. Im rein ro rej ber iturin ial, ijo jeor nan ie; im ke r’ar roñjake, emõkõj an Setan itok im bõklok nan eo ar jeor na ilo burueir. Im ein drein rein ro ar jeor ijo erkãke; ke r’ar roñjake nan, emõkõj air bõke, im ebuñburueir; Im ejelok okrair ilo ir, a jirik wõt ien air niknik; inem ñe jorran ak matõrtõr ej walok kin nan, emõkõj air tibñil. Im bar jet ro jeor ilo kãliklik ko; rein ro r’ar roñjake nan; Im inebata ko an lõl in, im mon an mweiuk ko, im mõmkake men ko jet, rej dreloñ im koutameik nan, im e jab jebar leen. Im ro ar jeor ion brij emõn; ro rej roñ nan, im bõk e, im jebar leir, juõn jilñoul, juõn jiljinoñoul, im juõn jibuki.”

7. Ine eo im bũdej ko reoktak jen don rej kõkkar kin ta?

⁷ Lale bwe Jesus ear jab ba bwe ine ko rar oktak jen don. Jen men in, ear konono kin juõn wõt kain ine, eo ear buñõt kajjo kain bũdej ko, me rar jebar im elle ilo wãwen ko reoktak jen don. Bũdej eo kein kajuõn ebin ak emwij juri, eo kein karuo ebejbej, im eo kein kajilu eobrak kin kãliklik ko, im eo kein kemen ej juõn bũdej emõn, im ej jebar leen ko remõn. (Luk 8:8) Ta ine in? Ej ennan kin Ailiñ eo me ej bed ilo Nan eo an Anij. (Mat. 13:​19) Bũdej ko reoktak jen don rej kõkkar kin ta? Buruen armij ro me einjuõn jen don.​​—Read Luk 8:​12, 15.

8. (a) Ri jeor eo ej jutak kin wõn? (b) Etke wãwen an armij ro uak ñan jerbal in kwalok nan an Ailiñ eo ej oktak jen don?

⁸ Ri jeor eo ej jutak kin wõn? Ej jutak kin ri jerbal ro mõttan Anij, ro rej keañ kin news eo emõn an Ailiñ eo. Einwõt Paul im Apollos, rej kallip im kemourur ak wutdikdik. Ak meñe elap air niknik ilo jerbal, jemlok ko rej oktak jen don. Etke? Kinke buruen ro rej roñjake ennan eo rej oktak jen don. Ilo wanjoñok eo, ri jeor eo ejelok an maroñ kin ta ko renaj walok. Men in elap an kainemõn, elaptata ñan ro jeid im jatid me etto air jerbal bõlen elõñ yiõ ko, ak einwõt rej lo jidik wõt tõbrak!a Etke?

9. Ta nan in kainemõn eo emol me ri jilek Paul im Jesus jimor rar kalikar?

⁹ Tiljek eo an ri jeor eo ejjab wawa ion tõbrak ko jen jerbal eo an make. Paul ear kwalok men in ke ear ba: “Anij enaj lelok jinekjej ñõn kajjojo iair ekkar ñõn jerbal ko air.” (1 Cor. 3:8) Jinekjej ej ekkar ñan jerbal ko air, im ejjab ekkar ñan tõbrak ko rej walok jen jerbal eo. Jesus ear bareinwõt kalikar men in ilo ien eo ke ri kalor ro an rar jeblak jen jerbal in kwalok nan eo. Rar lukkun mõnõnõ kinke ear wõr air maroñ ion demon ro ikijen air kajerbal etan Jesus. Meñe men kein rekairujruj im emõn, Jesus ear jiroñ ir: “A komin jab lõñliñ kin men in, bwe jitõb rõn rej bokake kom; a komin lõñliñ bwe emwij jeje etõmi ilo lõñ.” (Luk 10:​17-​20) Meñe juõn ri jeor emaroñ jab lo elap tõbrak ko jen jerbal eo an, ejjab melelen bwe edik an niknik ak tiljek jen ro jet. Men eo elap an aorõk in, tõbrak ko rej wawa ion buruen armij ro rej roñjake. Ak ilo jemlokin, Anij eo ej kaddeklok!

Eddo eo an Ro Rej Roñjake Nan Eo

10. Ta eo ej kalikar elañe eo ej roñjake nan eo ej einwõt juõn bũdej emõn ak jab?

¹⁰ Ak ta kin ro rej roñjake nan eo? Uak eo air ej ke juõn eo emwij kar karõk lok wõt iman? Jaab. Meñe rej einwõt bũdej emõn ak jab, bebe eo ej air make. Emol, wãwen buruen juõn armij emaroñ oktak ñan emõn ak nana. (Rom. 6:​17) Ilo wanjoñok eo an, Jesus ear ba “im ke [jet] r’ar roñjake” nan eo, Satan ej itok im bõke. Ak men in ejjab aikwij in walok. Ilo James 4:​7, ej rejañ Ri Christian ro ñan air “jumae devil” eo, im enaj ko jen ir. Jesus ej kamelele kin ro rej mõnõnõ im bõk nan eo ilo jinoin im rej lañliñ ak tokelik rej lõkatip kinke “ejelok okrair ilo ir.” Ak Anij ej rejañ ro ri karejaran bwe en ‘bin im elle okrair’ bwe ren maroñ lukkun melele “ta eo drilpen, im aitokõn, im mũlõlin, im utiejen, im jela yokwe an Kraist, eo elã jen jela.”​​—Ep. 3:​17-​19; Kol. 2:​6, 7.

11. Ewi wãwen an juõn eo ej roñjake nan eo maroñ bõprae inebata im mweiuk ko jen air kautameik nan eo?

¹¹ Ro jet me rar roñjake nan eo rej einwõt ro rej kõtlok bwe “inebata ko an lõl in, im mon an mweiuk ko” ren deloñ im kautameik nan eo. (1 Tim. 6:​9, 10) Ewi wãwen remaroñ bõprae men in? Ri jilek Paul ej uak: “Komin jab arõk dala; komin jokõne kin men ko ami: bwe E ar ba, I jamin likit yuk, im I jamin illok jen kwe in drio.”​​—Hib. 13:5.

12. Etke ro rej jutak kin bũdej eo emõn rej jebar leen ko reoktak joñan jen don?

¹² Eliktata, Jesus ej ba bwe ro rej buñõt bũdej eo emõn rej “jebar leir, juõn jilñoul, juõn jiljinoñoul, im juõn jibuki.” Meñe ro rej emmakit ñan nan eo ewõr ibbeir juõn buru emõn im rej jebar leen, men ko remaroñ kõmmani ilo jerbal in keañ kin news eo emõn enaj ekkar ñan wãwen ko ibbeir. Ñan wanjoñok, ritto ak mõjnolok kin juõn nañinmij emaroñ kõmman bwe en diklok kunair ilo jerbal in kwalok nan. (Keidi Mark 12:​43, 44.) Bar juõn alen, ri jeor eo emaroñ dik ak ejelok an maroñ ion men in, ak ej mõnõnõ ñe ej lo bwe Jehovah ear kaddeklok.​​—Read Sam 126:​5, 6.

Ri Jeor Eo Ej Kiki

13, 14. (a) Ilo tu kadu kameleleik wanjoñok eo an Jesus kin emaan eo me ej jeor ine. (b) Ri jeor im ine eo rej jutak kin ta?

¹³ Ilo Mark 4:​26-​29, ijin jej lo bar juõn wanjoñok kin juõn ri jeor: “Ein ailiñ in Anij drein, einwõt elañe armij ej kallip ine ilo brij; Im ej kiki im jerkak boñ im ran, im ine ej edrek im laplok, e jaje kijkan. Bwe lõl ej kalle mõke ian, mokta bwilik, inem leen, tokelik leen ekalo. A ñe leen ekalo emõkõj an bukwe kin sikel, bwe ien marmir emwij an itok.”

¹⁴ Wõn ri jeor in? Armij ro ilo kabuñ in Christendom rej tõmak bwe ej jitõñlok ñan Jesus. Bõtab ewi wãwen men in emol kinke eon eo ej ba bwe Jesus ej kiki im ejaje wãwen an ine eo eddeklok? Emol, Jesus ejelã wãwen an ine eo eddeklok! Jen men in, ri jeor in, einwõt eo emwij ad konono kake moktalok, ej jutak kin ri keañ ro kajjojo kin Ailiñ eo, ro rej jeor ine in Ailiñ eo ikijen jerbal ko air rekijejeto ilo kwalok nan. Ine eo me ej buñõt bũdej ej nan eo rej kwalok kake.

15, 16. Ilo wanjoñok eo an kin ri jeor eo, ta mol eo Jesus ear bõk mantak kin eddeklok an juõn ine im eddeklok ilo jitõb?

¹⁵ Jesus ej ba bwe ri jeor eo ej “kiki im jerkak boñ im ran.” Men in ejjab juõn likjap an ri jeor eo. Ej baj kalikar wõt kin ta eo ekkã an elõñ armij ro kõmmane ilo mour ko air kajjojo ran. Nan ko ilo eon in rej kwalok kin juõn wãwen ej wõnmanlok kin jerbal ilo ran im kiki ilo boñ iumin juõn ien aetok. Jesus ear kamelele kin ta eo ear walok ilo ien eo. “Ine ej edrek im laplok,” ej ba. Tokelik Jesus ej kakobaba: “E jaje kijkan.” Men eo ej kalikar ijin ej bwe ine eo ej make eddek.

¹⁶ Ta eo Jesus ear kamelele kake ijin? Melele bwe men eo ej kalikar ijin ej kin an eddeklok im wãwen an walok jidik kin jidik. “Bwe lõl ej kalle mõke ian, mokta bwilik, inem leen, tokelik leen ekalo.” (Mark 4:​28) Eddeklok in ej walok jidik kin jidik im ilo lajrak. Juõn ejjab maroñ kamõkajlok ak jibede. Ejja wãwen dein wõt ilo an juõn rittolok ilo jitõb. Men in ej walok ilo lajrak ke Jehovah ej kõtlok bwe mol eo en eddek ilo buruen eo kar likit bwe en tellokin mour.​​—Jerb. 13:48; Hib. 6:1.

17. Wõn eo ej bõk lañliñ ñe ine in mol eo ej jebar leen?

¹⁷ Ta kunan ri jeor eo ilo ien madmõd “ñe leen ekalo”? Ñe Jehovah ej kõmman bwe mol eo kin Ailiñ eo en eddeklok ilo buruen ri kalor ro rekãl, ejjab to renaj tõbar joñan eo me yokwe eo air kin Anij enaj kamakit ir ñan wujleplok air mour ñan e. Rej kwalok wujleplok eo air ikijen air baptais ilo den. Maan ro rej Ri Christian me rej wõnmanlok ilo air rittolok ilo jitõb rej jidik kin jidik maroñ bõk elõñlok eddo ko ilo congregation eo. Ri jeor eo me ear kalbwin ine eo mokta ej madmõd leen Ailiñ eo im bareinwõt ri keañ ro jet an Ailiñ eo me rar jab kalbwin ine eo. (Read Jon 4:​36-​38.) Emol, “eo ej jeor im eo ej madmir ren jimor lõñliñ.”

Tokjen Katak ko ñan Kij Rainin

18, 19. (a) Ewi wãwen elij in kin wanjoñok ko an Jesus rar kõketak yuk? (b) Ta eo jenaj lale ilo katak eo tok juõn?

¹⁸ Ta eo jaar katak kake jen ad eliji wanjoñok kein ruo ilo Mark chapter 4? Ilo alikar jej katak bwe ewõr ibbed juõn jerbal​​—jerbal in jeor. Jen jab kõtlok bwe abañ im utame ko ren kabõjrak kij jen ad kõmmane jerbal in. (Ekk. 11:4) Bõtab, ilo ejja ien eo wõt, jej kile jerammõn eo ej bed ibbed einwõt ri jerbal ro mõttan Anij. Jehovah ej eo ej kamakit armij bwe ren erom ri kalor ro, ej kajerammõn kate ko ad im jibadbad ko an ro rej mõnõnõ in bõk ennan eo. Jej jelã bwe jejjab maroñ jibed jabdewõt armij bwe ren rittolok ilo jitõb. Bareinwõt jen jab buromõj ak ebwer elañe erumij ak ejjab rittolok ilo jitõb. Elap an juõn menin kainemõn ilo ad jelã bwe tõbrak ko rej wawa ion joñan ad tiljek wõt ñan Jehovah im ñan jerammõn eo ear letok ñan kij ñan kwalok kin “gospel in an ailiñ . . . kin men in kennan ñõn ailiñ otemjelok.”​​—Mat. 24:14.

¹⁹ Bar ta Jesus ear katakin kij kake kin eddeklok eo an ri kalor ro rekãl im jerbal eo an Ailiñ eo? Uak eo ñan kajitõk in ej bed ilo wanjoñok ko me kar jeje kaki ilo bwebwenato ko ilo Gospel ko ilo Bible eo. Jenaj etale jet ian wanjoñok kein ilo katak eo tok juõn.

[Kamelele ko]

Kwoj Kememej Ke?

• Ta men ko rej einlok wõt juõn ikõtan jerbal in jeor ine im jerbal in kwalok ennan eo kin Ailiñ eo?

• Ewi wãwen an Jehovah joñe tiljek eo an juõn ri kwalok nan kin Ailiñ eo?

• Ta men ko rej einlok wõt juõn me Jesus ear kalikar ikõtan eddeklok an juõn ine im eddeklok ilo jitõb?

• Ewi wãwen “eo ej jeor im eo ej marmir ren jimor lõñliñ”?

[Pija ko ilo peij 13]

Etke Jesus ear keidi juõn ri kwalok nan kin Ailiñ in Anij ñan juõn ri jeor?

[Pija ko ilo peij 15]

Ro rej kõkkar kake ir einwõt bũdej eo emõn rej bõk kunair kin aolepen burueir ilo jerbal in kwalok kin Ailiñ eo ekkar ñan wãwen ko ibbeir

[Pija ko ilo peij 16]

Anij eo ej kaddeklok