Nan eo an Jehovah Ej Mour Wõt
Katak ko Relap Jen Letter ko ñan Dri Korint
RI JILEK Paul ej lukkun inebata kin mour in jitõb eo an congregation eo ilo Corinth. Ear roñ bwe ewõr iakwelel ko ibwiljin ro jimjãn jimjatin ijo. Rar anloke an walok mour in ejej. Bareinwõt, congregation eo ear jeje ñan Paul, im kajitõk melele kin jet men ko rar walok. Inem ilo enañin lok 55 C.E., ke ear bed ilo Ephesus ilo ial in missionary eo an kein kajilu, Paul ej je letter eo kein kajuõn ian letter ko ruo an ñan Ri Corinth ro.
Letter eo kein karuo, me ear je bõlen jejjo wõt alliñ ko elikin an kar je letter eo kein kajuõn, ej juõn letter in kakobaba. Kinke wãwen ko jimor iloan im ilikin congregation eo ilo Corinth ilo ebeben eo kein kajuõn rej einlok wõt ko ilo ran kein ad ilo elõñ wãwen ko, alikar bwe ennan eo an Paul ilo letter ko an ñan Ri Corinth ro ekanuij lap tokjen ñan kij.—Hib. 4:12.
‘KOMIN EKIL, JUTÕK BIN, KOMIN KAJUR’
“Komin otemjej konono einwõt juõn,” Paul ej ba. (1 Kor. 1:10) Ejelok ‘bar juõn foundes̃õn jen Jisõs Kraist,’ eo kadkad ko kadkadin Ri Christian ro rej ejaak jene. (1 Kor. 3:11-13) Ikijen juõn ri lũñ ilo congregation eo, Paul ej ba: “Komin jolok leo enana jen ibemi.” (1 Kor. 5:13) “Enbwin e jab ñõn lũñ,” ej ba, “a ñõn Iroij.”—1 Kor. 6:13.
Ilo an uak ñan “men ko [rar] jeje kaki,” Paul ej lelok nan in kakabilek kin mour in mare im kin mour an ro rejañin mare. (1 Kor. 7:1) Elikin an konono kin jerbal in tel an ro rej bõran congregation, im kin lajrak in kwelok ko an Christian, kab kin tõmak eo kin jerkakbiji eo, Paul ej lelok nan in rejañ in: “Komin ekil, jutõk bin ilo tõmak, komin kõmõn einwõt eman, komin kajur.”—1 Kor. 16:13.
Emwij Uaki Kajitõk ko Rej Bedbed ion Bible:
1:21—Jehovah ej lukkun ke kajerbal “bwebwe” ñan lomoren ro rej tõmak? Jaab, ejjab. Bõtab, kinke “lõl e ar jab jela Anij kin meletlet eo an,” men eo Jehovah ej kajerbale ñan lomoren armij ej einwõt menin bwebwe ñan lal in.—Jon 17:25.
5:5—Ta melelen ñan “ketõk eo [enana] einwõt ñõn Setan ñõn kokkure kõniekin, bwe [jitõb eo ilo congregation] en mour”? Ñe juõn armij ejjab ukwelok jen an kõmmane juõn jerawiwi elap ej bukwelok jen congregation eo, ej bar erom mõttan lal eo enana an Satan. (1 Jon 5:19) Kin men in, kar konono kake einwõt ñe kar ketak e ñan Satan. Tokjen bukwelok eo an armij eo, ej jolok kilan eo enana jen congregation eo im kejbãrok bwe jitõb eo ilo congregation en kajur wõt.—2 Tim. 4:22.
7:33, 34—Ta melelen “men ko an lõl” leo im lio emwij air mare rej inebata kaki? Paul ej jitõñlok ñan men ko ilo mour in me jen ran ñan ran Ri Christian ro emwij air mare rej aikwij inebata kaki. Men kein rej koba mõñã, nuknuk, im imõn jokwe, ak jab kin men ko renana ilo lal in, me Ri Christian ro rej aikwij kejbãrok ir jeni.—1 Jon 2:15-17.
11:26—Ke Paul ear ba bwe “ien otemjej” jen kememe ran in mij eo an Jesus, ewi joñan ikutkut in kõmmane men in, im “ñõn” ñããt? Paul ear ba kin ien otemjej ñe Christian ri kabit ro rej bõk mõttan bread im wine ilo Kwojkwoj in Kememej eo, me ej walok juõn alen ilo juõn yiõ ilo Nisan 14, rej “kwalok mij an Iroij.” Rej kõmmane men in “ñõn ien eo Ej itok,” ak mae ien eo ej bõk ir ñan lañ ikijen juõn jerkakbiji.—1 Tes. 4:14-17.
13:13—Ilo wãwen et eo yokwe elaplok jen tõmak im kejatdikdik? Ñe “men ko jej kejatrikrik kij kaki” rej erom lukkun mol im “liki” eo ilo ir ej alikar, wãwen ko kin tõmak im kejatdikdik rej jemlok. (Hib. 11:1) Yokwe elaplok jen tõmak im kejatdikdik kinke ej bedwõt ñan indio.
15:29—Ta melelen ñan “baptais ir kin ro remij”? Paul ear jab ba bwe armij ro remour rej baptais ikijen ro remij me rejañin kar baptais einwõt an elõñ ukok in Bible ko ba kin eon in. Ilo ijin Paul ej konono kin an Christian ri kabit ro deloñ ilo juõn ial in mour ijo rej debiji tiljek eo air mae ien remij im jujen wõt jerkakbiji ñan mour ilañ.
Tokjen Katak ko ñan Kij:
1:26-31; 3:3-9; 4:7. Kwalok ettã buru ilo ad kemjãje kin Jehovah, im jab kin kij make, ej kowõnmanlok burukuk ilo congregation eo.
2:3-5. Ke ear kwalok nan ilo Corinth, jikin kwelok eo elap me meletlet im katak ko an Ri Greek rej bed ie, Paul emaroñ kar inebata kin elañe enaj kar maroñ kareel ri roñjake ro an. Bõtab, ear jab kõtlok bwe jabdewõt mõjno ak mijak emaroñ kar wõr ibben ren kabõjrak e jen an kwalok kin jerbal in kwalok nan eo Anij ear lelok ñan e. Eindein, jen jab kõtlok bwe wãwen ko rebin ren debij kij jen ad kwalok news eo emõn kin Ailiñ eo an Anij. Ilo liki, jemaroñ reilok ñan Jehovah kin jibañ einwõt kar Paul.
2:16. Ñan bõk “lolãtlãt an Kraist” ej melelen ñan jelã wãwen an lemnak im etke ej lemnak rot in, ñan lemnak einwõt e, ñan lukkun jelã aolep kadkad ko kadkadin, im ñan anõk joñok eo an. (1 Pit. 2:21; 4:1) Elap an aorõk bwe jen lukkun katak kin mour eo an Jesus im jerbal in kwalok nan eo an!
3:10-15; 4:17. Jej aikwij in etale im kakõmõnmõnlok jelã eo ad ñan katakin im kõmman ri kalor ro. (Mat. 28:19, 20) Elañe ejjab emõn ad katakin, ri katak eo ad eban maroñ ellã jen melejoñ ko kin tõmak, im jemaroñ jorrãn ñe lomor eo ad enaj “einwõt kin kijeek.”
6:18. Ñan “ko jen lũñ” ej melelen ñan jab baj jer jen jerbal ko an por nei’a (lũñ) ak bareinwõt ñan jer jen aluij pija in kelwan, mour etton, lemnak ko renana kin babu ibben don, katoojoj—ak jabdewõt men me emaroñ tellok ñan mour in lũñ.—Mat. 5:28; Jem. 3:17.
7:29. Ri belele ro rej aikwij in kejbãrok bwe air inebata kin mour in mare eo air en jab likit men ko an Ailiñ eo kein karuo ilo mour eo air.
10:8-11. Jehovah ear lukkun lap an illu ke Israel ear alliñũrñũr nae Moses im Aaron. Jej meletlet elañe jej kejbãrok nae ad kaddek juõn iminene kin alliñũrñũr.
16:2. Jenaj keini ad lelok jããn in jabawõt ko ñan kowõnmanlok jerbal in kwalok nan eo ibelakin lal elañe jej karõklok iman im kõmmane ekkar ñan ad kar karõk.
‘KOMIN WÕNMANLOK IM KÕMMAN KAJIMWE’
Paul ej jiroñ Ri Corinth ro bwe rej aikwij in “jolok an nana im kainemõn” eo ej ukwelok jen bwid eo an me emwij kajeik e. Meñe letter eo an kein kajuõn ear kaburomõj ir, Paul ej kwalok an lañliñ kinke kar “kaburomõj [ir] ñõn ukwelok.”—2 Kor. 2:6, 7; 7:8, 9.
‘A einwõt rej ke ilo men otemjej,’ Paul ej rejañ Ri Corinth ro bwe ren “ke ilo men in joij in.” Elikin an uake ri jumae ro, ej lelok nan in kakabileklek eo eliktata ñan ir: “Komin lõñliñ, komin ainemõn, komin wãppen [“komin kõmman kajimwe,” NW], en buruemi wõt juõn, komin mour ilo ainemõn.”—2 Kor. 8:7; 13:11, NW.
Emwij Uaki Kajitõk ko Rej Bedbed ion Bible:
2:15, 16—Ewi wãwen jej “men in ñõj emõn an Kraist”? Eñin wãwen eo kinke jej lore Bible eo im kwalok kin ennan eo ie. Meñe “ñõj” in emaroñ einwõt bwin nana ñan armij ro rejjab wãnik, ej bwin ñaj ñan Jehovah im ro emol burueir.
5:16—Ekijkan an Christian ri kabit ro “jab jela jabrewõt armij ekar ñõn kõniek”? Rejjab kalimjek armij ro ilo wãwen eo ilo kanniek, melelen, kwalok kalijeklok ikijen air mweie, im kin kil, ak ailiñ eo rej itok jene. Men eo eaorõk ibbeir ej kõtan eo air ilo jitõb ibben ri tõmak ro mõttair.
11:1, 16; 12:11—Paul ear kwalok kõmmanwa ke ñan Ri Corinth ro? Aet, ear kwalok kõmmanwa. Bõtab, ñan ro jet ej einwõt kemjãje im jab kwalok kõmmanwa kin men eo ear emmakit im ba ilo an jojomare jerbal in ri jilek eo an.
12:1-4—Wõn eo kar “kwotõkliñlok e ñõn loan Paredais”? Kinke Bible eo ejjab konono kin armij ro jet me ear wõr air ettõnak einwõt in im eon in ej walok elikin an Paul jojomare jerbal in ri jilek eo an, alikar bwe Paul ear bõlen jitõñlok ñan men eo e make ear iione. Men eo ri jilek eo ear ettõnak kake ear einwõt paradise eo ilo jitõb me congregation eo an Christian ej lañliñ kake ilo “ien eo eliktata.”—Dan. 12:4.
Tokjen Katak ko ñan Kij:
3:5. Einwõt nan in kaiñi ko, eon in ej jiroñ kij bwe Jehovah ej kamaroñ Ri Christian ro ñan bõk jerbal in kwalok nan ikijen Nan eo an, jitõb kwojarjar eo an, im dolul eo an ion lal. (Jon 16:7; 2 Tim. 3:16, 17) Ej emõn bwe jen tiljek wõt ilo ad katak Bible eo im book ko rej bedbed ion, niknik ilo ad jar kin jitõb kwojarjar, im ekkeini ad bed im bõk kunad ilo kwelok ko an Christian.—Sam 1:1-3; Luk 11:10-13; Hib. 10:24, 25.
4:16. Kinke Jehovah ej ‘kõkal aad ran otemjej,’ jej aikwij kortokjen jerammõn ko jen Jehovah ien otemjej, im jab kõtlok bwe ran eo en motlok im jejjab kõmman jabdewõt ñan kakajur kõtan eo ad ibben Anij.
4:17, 18. Ad kememej bwe “iñtan eo emera im iumelok” emaroñ jibañ kij ñan tiljek wõt ñan Jehovah meñe iumin abañ ko rebin.
5:1-5. Elap wõt an aibujuij nan ko an Paul ke ear kwalok kin lemnak im eñjake ko an Christian ri kabit ro ikijen kejatdikdik eo air ñan mour ilañ!
10:13. Einwõt juõn kien ñan aolep, mae ien kar letok juõn karõk ñan kij bwe jen jibañ ijo elap aikwij ie, jej aikwij in jerbal wõt ilo territory eo kar letok ñan congregation eo ad.
13:5. Ñan ‘melejoñ kij elañe jej ber ilo tõmak,’ jej aikwij lale bwe mwilid en errã ibben men eo jej katak kake jen Bible eo. Ñan ‘mõke kamol kij,’ jej aikwij etale joñan mour in jitõb eo ad, ekoba joñan kajur in “maroñ in jela” eo ad im joñan lap in jerbal ko ad ilo tõmak. (Hib. 5:14; Jem. 1:22-25) Ilo ad jerbale nan in kakabilek in an Paul, jemaroñ etal wõt ilo ial in mol eo.
[Pija eo ilo peij 26, 27]
Ta melelen nan kein “ien otemjej komij mõña bred in, im irak kõp in”?—1 Kor. 11:26