Kejatdikdik Eo Kin Jerkakbiji Ewõr Kajurin
“Kin Eo men ko otemjej aõ re joko . . . bwe in jela [ Jesus Christ] im kajur in jerkakbiji eo An.”—DRI PILIPPAI 3:8-10.
1, 2. (a) Elõñ yiõ ko remotlok, ewi wãwen an juõn ri tel in kabuñ kwalok kin jerkakbiji eo? (b) Ewi wãwen enaj kõmman jerkakbiji eo?
ILO YIÕ ko jinoin ilo 1890, ro rej kõmman news rar report kin juõn ennan eo einjuõn an juõn ri tel in kabuñ ilo Brooklyn, New York, U.S.A. Ear ba bwe jerkakbiji eo ej kitibuj air aini im kajeblak mour ñan aolep dri ko im kanniek ko me rar ejaake enbwinin armij, meñe ear jorrãn kin kijeek ak juõn men in jirullok, juõn menin mour ear kañe ak ear oktak im bũdej. Ri kwalok in ear tõmak bwe ilo juõn ran 24 awa aetokin emwij kar karõke, mejatoto eo enaj obrak kin pã ko, nee ko, addin pã ko, dri ko, muscle ko, im kil ko an billion armij ro remij. Mõttan kein renaj bukõte mõttan ko jet in ejja enbwin eo wõt. Inem aan ko renaj itok jen lañ im jen hades im bed ilo enbwin kein rar jerkakbiji.
2 Jerkakbiji ikijen bar kakobaba in atom ko ilo enbwin eo mokta ejjab juõn lemnak ejimwe, im armij ejelok juõn aan eo eban mij. (Ekklisiastis 9:5, 10; Ezekiel 18:4, New World Translation) Jehovah, Anij in jerkakbiji eo, ejjab aikwij aini im bar kobaik atom ko me rar ejaake enbwinin juõn armij. Emaroñ eik enbwin ko rekãl ñan ro rej jerkakbiji. Ñan Nejin, Jesus Christ, emwij an Jehovah lelok ñan e kajur eo ñan kajerkakbiji ro remij, kin maroñ eo ñan mour indio. (Jon 5:26) Inem Jesus ear ba: “Ña jerkakbiji eo im mour eo: eo ej liki Iõ, meñe e mij, e naj bar mour.” (Jon 11:25, 26) Juõn kallimur elap an kõmãnãn buru! Ej kakajur kij ñan kijenmij nae melejoñ ko im jelmaik mij einwõt ri Kennan ro retiljek an Jehovah.
3. Etke Paul ear aikwij jojomare tõmak eo an kin jerkakbiji eo?
3 Jerkakbiji eo ejjab errã ibben katak eo bwe armij ewõr juõn aan eo eban mij—juõn lemnak me ri meletlet in Greek eo Plato ear tõmak kake. Inem, ta eo ear walok ke ri jilek Paul ear kwalok nan ñan ri Greek ro ri utiej ilo Areopagus ilo Athens, im konono kin Jesus, im ba bwe Anij ear kajerkakbijik e? Bwebwenato eo ej ba, “Im ke rej roñ kin jerkakbiji jen ro remij, jet rej kajirere kake.” (Jerbal 17:29-34) Elõñ ro me rar lo Jesus Christ elikin an kar jerkakbiji rar mour wõt im, meñe rar kajirere kake ir, rar kamol bwe ear jerkakbiji jen ro remij. Ak ri kaki wan ro me rar koba ibben congregation eo ilo Corinth rar kariap jerkakbiji eo. Kin men in Paul ear lap an jojomare katak in Christian in ilo 1 Korint chapter 15. Juõn etale emũlal kin nan in kõmmanwa ko an enaj kamol mol in im kajur in kejatdikdik eo kin jerkakbiji.
Men in Kamol eo Ebin kin Jerkakbiji eo an Jesus
4. Paul ear kwalok kin men in kamol ta ko me armij rar loi kin mejeir make kin jerkakbiji eo an Jesus?
4 Lale kin wãwen an kar Paul kabellok nan in jojomar eo an. (1 Dri Korint 15:1-11) Elañe ri Corinth ro rar jab erom ri tõmak ro kin ejelok unin, inem renaj debij wõt news eo emõn kin lomor. Christ ear mij kin jerawiwi ko ad, kar kalbwini, im ear jerkakbiji. Ilo mol, Jesus eo kar jerkakbiji ear walok ñan Cephas (Peter), inem “ñõn ro joñoul im ruo.” (Jon 20:19-23) Enañin 500 armij rar lo e, bõlen ke ear kakien ir: ‘Komin ilok, im kõmõn dri kalora.’ (Matu 28:19, 20) James ear loe, einwõt kar aolep ri jilek ro retiljek. (Jerbal 1:6-11) Turin Damascus, Jesus ear walok ñan Saul “einwõt ñõn juõn eko”—einwõt ededelok an kar jerkak ñan mour ilo jitõb. (Jerbal 9:1-9) Ri Corinth ro rar oktak im ri tõmak kinke Paul ear kwalok nan ñan ir, im rar bõk news eo emõn.
5. Ta kar wãwen in lemnak eo an Paul einwõt kar je ilo 1 Dri Korint 15:12-19?
5 Lale wãwen in kõmmanwa eo an Paul. (1 Dri Korint 15:12-19) Ke ri kamol ro rar kwalok nan bwe Christ ear jerkakbiji, ewi wãwen rar maroñ ba bwe ejelok jerkakbiji? Elañe Jesus ear jab jerkakbiji jen mij, inem jerbal in kwalok nan im tõmak eo ad enaj jekdon, im jenaj ri riap ro me rej kwalok nae Anij ilo ad ba bwe ear kajerkakbijik Christ. Elañe ro remij rejjab jerkakbiji, ‘[jej] berwõt ilo jerawiwi ko [ad],’ im ro rar mij ilo Christ re jako. Bareinwõt, “Elañe ilo mour in wõt jej kejatrikrik kij ilo Kraist, kij armij in tiriamo ian armij otemjej.”
6. (a) Ta eo Paul ear ba ñan kamole jerkakbiji eo an Jesus? (b) Ta in “dri kijirãt eliktata,” im ewi wãwen an naj jako?
6 Paul ej kamole jerkakbiji eo an Jesus. (1 Dri Korint 15:20-28) Einwõt Christ ej “leen moktata” ian ro rej kiki ilo mij, ro jet bareinwõt renaj jerkakbiji. Ke mij ear itok jen kiblia an emaan eo Adam, jerkakbiji ej itok ikijen juõn emaan—Jesus. Ro don Christ renaj jerkakbiji ilo ien bed eo an. Christ enaj “kalotlok kajur otemjej an iroij rõn kab kieir im air maroñ otemjej” rej jumae iroij bõtata an Anij im enaj iroij einwõt King mae ien Jehovah ej likit aolep ri kijirãt ro iumin neen. Im bareinwõt “dri kijirãt eliktata”—mij eo jaar jolete jen Adam—enaj jako ikijen tokjen katok eo an Jesus. Inem Christ enaj lelok Ailiñ eo ñan Anij eo an im Jemen, im enaj make kõttãik e ñan “Eo ear kõtãik men otemjej ñõn E, bwe Anij en otemjej ilo otemjej.”
Baptais kin Ro Remij?
7. Wõn ro “emwij baptais ir kin ro remij,” im ta melelen men in ñan ir?
7 Kar kajitõkin ro rej jumae jerkakbiji eo: “Elañe ein juõn ren it ro emwij baptais ir kin ro remij? (1 Dri Korint 15:29) Nan ko an Paul ear jab melelen bwe ro remour rej aikwij baptais ilo etan ro remij, bwe ro ri kaloran Jesus rar aikwij make katak, tõmak, im baptais. (Matu 28:19, 20; Jerbal 2:41) Ri Christian ri kabit ro rej “baptais ir kin ro remij” ilo air bõk juõn ial in mour me ej tellok ñan mij im jerkakbiji. Baptais rot in ej ijjino ñe jitõb an Anij ej kaddek ilo ir kejatdikdik eo kin mour ilañ im ej jemlok ñe rej jerkakbiji jen mij ñan mour ilo jitõb ilo jab wabanban ilañ.—Dri Rom 6:3-5; 8:16, 17; 1 Dri Korint 6:14.
8. Meñe Satan im ri karejar ro an rej mõn ir ñan mij ta eo ri Christian ro remaroñ liki kake?
8 Einwõt nan ko an Paul rej kalikar, kejatdikdik eo kin jerkakbiji ej kamaroñ ri Christian ro ñan jelmae jabdewõt men in kauwatata ko im mij kin air kõmman jerbal in kwalok kin Ailiñ eo. (1 Dri Korint 15:30, 31) Rej jelã bwe Jehovah emaroñ kajerkakbijik ir elañe ej kõtlok bwe Satan im ri karejar ro an ren mõn ir. Anij wõt emaroñ mõn air, ak mour eo air, ilo Gehenna, eo ej kõkkar kin jako ñan indio.—Luk 12:5.
Juõn Aikwij ñan Air Ekkõl Wõt
9. Bwe kejatdikdik in jerkakbiji eo en wõr kajur in kejbãrok ilo mour eo ad, ta eo jej aikwij bõprae?
9 Kejatdikdik eo kin jerkakbiji ear kamaroñ Paul ñan an kijenmij. Ke ear bed ilo Ephesus, ri kijirãt ro an remaroñ kar jolok e na iloan jikin ikkure eo ñan ire ibben kidu awia ko. (1 Dri Korint 15:32) Elañe ar eindein, kar lomoren e, einwõt kar lomoren Daniel jen lion ko. (Daniel 6:16-22, NW; Dri Hibru 11:32, 33) Kin an tõmak ilo jerkakbiji, Paul ear jab bõk lemnak eo an ri buñ jen tõmak ro ilo Judah ilo ran ko an Isaiah. Rar ba: “Jen mõñã im idak, bwe ilju jenaj mij.” (Isaiah 22:13, Septuagint) Bwe kejatdikdik eo kin jerkakbiji en wõr kajur in kejbãrok ilo mour eo ad einwõt kar Paul, jej aikwij bõprae ad bõk juõn jitõb enana rot in. “Komin jab bwir,” Paul ear kakkõl. “Kõmao ko renana rej kakõt mõnit ko remõn.” (1 Dri Korint 15:33) Emol, nan in kakabilek in ej jerbal ñan elõñ wãwen ko ilo mour.
10. Ewi wãwen jemaroñ kõmman bwe en kajur wõt kejatdikdik eo ad ilo jerkakbiji eo?
10 Ñan ro rej bere kin kejatdikdik eo kin jerkakbiji, Paul ear ba: “Komin ruj ñõn wãnik, im jab jerawiwi; bwe ejelok jela Anij iben jet; ij konono men in bwe in kajok kom.” (1 Dri Korint 15:34) Ilo “ien in ien jemlokin,” jej aikwij jerbal ekkar ñan jelãlokjen eo ejimwe kin Anij im Christ. (Daniel 12:4, NW; Jon 17:3) Men in enaj kõmman bwe en mour kejatdikdik eo ad kin jerkakbiji.
Jerkakbiji Ta Enbwin Rot Eo?
11. Ewi wãwen Paul ear wanjoñok kake jerkakbiji eo an ri Christian ri kabit ro?
11 Tokelik Paul ej jerbale jet kajitõk ko. (1 Dri Korint 15:35-41) Bõlen ñan kõmman bwe ro jet ren bere kin jerkakbiji eo, juõn emaroñ kajitõk: “Ekijkan kejerkakbiji ro remij? im ie ein enbwin rej itok kake?” Einwõt Paul ear kwalok, juõn ine kar kalbwini ilo bũdej ilo juõn wãwen ej mij ñe ej oktaklok ñan juõn menin eddek. Eindein, juõn armij emwij kabite kin jitõb kwojarjar ej aikwij mij. Einwõt juõn menin eddek ej waloktok jen ine eo ilo juõn enbwin ekãl, eindein enbwinin juõn Christian ri kabit eo ear jerkakbiji ej oktak jen kanniekin armij. Meñe kadkad ko kadkadin rej ejja wãwen eo wõt einwõt mokta jen an kar mij, ej jerkakbiji ilo juõn wãwen ekãl kin enbwinin jitõb bwe en maroñ mour ilañ. Ilo ekkar, ro rej jerkakbiji ion lal renaj bõk enbwinin armij.
12. Ta melelen nan ko “enbwin ilõñ” im “enbwin i lõl”?
12 Einwõt Paul ear ba, kanniekin armij rej oktak jen eo an menin mour ko. Kanniekin menin mour ko bareinwõt reoktak jen don. (Jenesis 1:20-25) Aibujuij in “enbwin ilõñ” an jitõb ro rej oktak jen “enbwin i lõl” ilo kanniek. Ewõr oktak ko bareinwõt ilo aibujuij an al, aliñ, im iju ko. Ak ri kabit ro emwij air jerkakbiji ewõr ibbeir juõn aibujuij elaplok.
13. Ekkar ñan 1 Dri Korint 15:42-44, ta eo rej jeore im ta eo ej jerkakbiji?
13 Ke emwij an kar kwalok kin oktak ko, Paul ear kobaik: “Ein drein bareinwõt jerkakbiji an ro remij.” (1 Dri Korint 15:42-44) Ear ba: “Emwij jeor e ilo wabõnbõn; ej jerkakbiji ilo jabwabõnbõn.” Ijin Paul ear konono kin ri kabit ro einwõt juõn kumi. Ear jeor e ilo wabanban ilo mij, im ej jerkakbiji ilo jabwabanban, anemkwoj jen jerawiwi. Meñe lal in ej kajekdon e, ej jerkakbiji ñan mour ilañ im kwalok e ibben Christ ilo aibujuij. (Jerbal 5:41; Dri Kolosse 3:4) Ilo mij ej jeor e “enbwinin armij” im ej jerkakbiji “enbwin e jitõb.” Kin an maroñe men in ibben ri Christian ro emwij kabit ir kin jitõb kwojarjar, jemaroñ liki bwe ro jet remaroñ jerkakbiji ñan mour ion lal.
14. Ewi wãwen Paul ear keidi Christ ibben Adam?
14 Tokelik Paul ej keidi Christ ibben Adam. (1 Dri Korint 15:45-49) Adam, armij eo mokta, “ear juõn aan eo emour.” (Genesis 2:7, NW) “Adam eo elik”—Jesus—“E jitõb in kemour.” Ear lelok an mour einwõt juõn katok in binmour, mokta ilo etan ri kabit ri kalor ro an. (Mark 10:45) Einwõt armij ro, rej ‘bõk jekjekin eo ear kõmman jen bũñalñal,’ ak elikin air jerkakbiji rej erom einwõt Adam eo elik. Emol, armij otemjej rekiblie remaroñ bõk tokjen jen katok eo an Jesus, ekoba ro rej jerkakbiji ñan mour ion lal.—1 Jon 2:1, 2.
15. Etke ri Christian ri kabit ro rejjab jerkakbiji ilo kanniek, im rej jerkakbiji ilo wãwen et ilo ien bed eo an Jesus?
15 Ñe Christian ri kabit ro rej mij, rejjab jerkakbiji ilo kanniek. (1 Dri Korint 15:50-53) Enbwinin wabanban in kanniek im bõtõktõk ejjab maroñ bõk an jolet Ailiñ in lañ. Jet ri kabit ro reban aikwij to air kiki ilo mij. Ñe rej mij ilo tiljek ion lal ilo ien bed eo an Jesus, renaj “ein juõn, ilo bũkkinkwõle, ilo rum.” Ien eo wõt renaj jerkakbiji ñan mour ilo jitõb ilo jabwabanban im aibujuij. Eliktata, “kõra lio belen” Christ ilañ enaj tõbar oran eo 144,000.—Reveles̃õn 14:1; 19:7-9; 21:9; 1 Dri Tessalonika 4:15-17.
Anjo Ion Mij!
16. Ekkar ñan Paul in ri kanan ro in etto, ta eo enaj walok ñan mij eo jaar jolete jen ri jerawiwi eo Adam?
16 Paul ear keañ ilo anjo bwe naj worañlok mij ñan indio. (1 Dri Korint 15:54-57) Ñe wabanban im rien mij ej kõnak jabwabanban im banmij, inem nan kein renaj jejjet kitieir: “E ar warõñlok mij ñõn in drio.” “O mij, ewi am anjo? O mij, ewi am kein iri?” (Aiseia 25:8; Hosea 13:14, NW) Kein iri eo ej kõmman mij ej jerawiwi, im kajur in jerawiwi eo kar Kien eo, eo ear liakelok ri jerawiwi ro ñan mij. Ak kin katok im jerkakbiji eo an Jesus, mij eo jaar jolete jen ri jerawiwi eo Adam eban anjo.—Dri Rom 5:12; 6:23.
17. Ewi wãwen nan ko ilo 1 Dri Korint 15:58 ej jerbal rainin?
17 “Inem ro jãtiõ, kom jitenburu,” Paul ear ba, “en rim buruemi, im kibria, im en eor tokjemi ien otemjej ilo jerbal an Iroij, bwe komij jela bwe ami jerbal e jab jekron ilo Iroij.” (1 Dri Korint 15:58) Nan kein rej jerbal ñan bwen ri kabit ro im ñan “sheep ro jet” an Jesus meñe rej mij ilo ran kein eliktata. (Jon 10:16) Jerbal ko air einwõt ri keañ ro kin Ailiñ eo ejjab waan, bwe renaj jerkakbiji. Inem, einwõt ri karejar ro an Jehovah jen boub wõt ilo jerbal an Iroij ke jej kõttar ran eo ñe jemaroñ lamõj ilo lañliñ: “O mij, ewi am anjo?”
Ejejjet Kitien Kejatdikdik eo kin Jerkakbiji!
18. Kar ewi kajurin kejatdikdik eo an Paul ilo jerkakbiji eo?
18 Nan ko an Paul emwij je ilo 1 Dri Korint chapter 15 ej kalikar bwe kejatdikdik eo kin jerkakbiji eo ear wõr an kajur ilo mour eo an. Ear lukkun tõmak bwe Jesus ear jerkakbiji jen mij im bwe ro jet renaj bareinwõt rõlok jen lũp ko lũpen armij. Ej eindein an kajur ke tõmak eo am? Paul ear watõk tokjen ko an make einwõt “kwobij” im ear ‘watõki men otemjej jerata wõt’ bwe en ‘jelã Christ im kajur in jerkakbiji eo An.’ Ri jilek in ear mõnõnõ in mij juõn mij einlok wõt eo an Christ ilo kejatdikdik eo ñan bõk “jerkakbiji eo emõkajlok.” Rej bareinwõt naetan “jerkakbiji eo mokta,” eo ri kabit ri kalor ro 144,000 an Jesus rej bõk kunair. Aet, rej jerkakbiji ñan mour ilo jitõb ilañ, ak “ro jet ian ro remij” renaj jerkakbiji ñan mour ion lal.—Philippians 3:8-11, NW; Reveles̃õn 7:4; 20:5, 6.
19, 20. (a) Wõn ro ilo lokbook eo ilo Bible renaj jerkakbiji ñan mour ion lal? (b) Kwoj reimanlok ñan jerkakbiji eo an wõn?
19 Kejatdikdik eo kin jerkakbiji ear juõn kitien eaibujuij ñan ri kabit ro rar tiljek ñan mij. (Dri Rom 8:18; 1 Dri Tessalonika 4:15-18; Reveles̃õn 2:10) Ro renaj deor jen “iñtan eo elap” renaj lo jejjet in kitien kejatdikdik eo kin jerkakbiji eo ñe ‘lometo e ar lelok ro remij ro ilo e, im Mij im Hedis r’ar lelok ro remij ro ilo ir.’ (Reveles̃õn 7:9, 13, 14; 20:13) Ian ro renaj jerkakbiji ñan mour ion lal enaj Job, eo ear luji jiljilimjuõn nejin maan im jilu nejin kõrã ilo mij. Lemnak kin lañliñ eo an ñan karuwaineneik ir—im enaj lap air mõnõnõ in lo bwe ebar wõr ibbeir jiljilimjuõn jein im jatin maan im jilu kõrã ro redeeo!—Job 1:1, 2, 18, 19; 42:12-15.
20 Enaj juõn jerammõn elap ñe Abraham im Sarah, Isaac im Rebekah—aet im elõñ ro jet, ekoba “dri kanan otemjej”—renaj jerkakbiji ñan mour ion lal! (Luk 13:28) Juõn ian ri kanan ro kar Daniel, eo kar kallimure bwe enaj jerkakbiji ñan mour iumin iroij eo an Messiah eo. Iumin enañin 2,500 yiõ ko, Daniel ear kiki ilo lũp, ak ikijen kajur in jerkakbiji eo, mõttan jidik enaj ‘jerkak im bõk jinekjej eo an’ einwõt juõn ian ro renaj “iroij i aolepen lõl.” (Daniel 12:13, NW; Sam 45:16) Enaj kairuj lojiõm ñan karuwaineneik tok ejjab ri tiljek ro in etto wõt ak bareinwõt jemõm, jinõm, nejõm maan, nejõm kõrã, ak ro jet rejitenburu ibbam me ri kijirãt eo mij ear bõk ir!
21. Etke jen jab rumij ilo ad kõmman men ko remõn ñan ro jet?
21 Jet ian ro mõttad im ro rejitenburu ibbed rar karejar ñan Anij iumin elõñ yiõ ko im kiõ ebwe air ritto. Kin air ritto emaroñ bin air jelmaik aitwerõk ko an mour. Elap an naj juõn men in yokwe ñan jibañ ir ilo jabdewõt wãwen jemaroñ kiõ! Inem jejamin ajlok kin ad jab kõtõbrak eddo ko ad ñan ro jitenburu ibbed elañe renaj mij. (Ekklisiastis 9:11; 12:1-7; 1 Timote 5:3, 8) Jemaroñ liki bwe Jehovah ejamin meloklok jerbal ko ad remõn jej kõmmani kin ro jet, jekdon ewi dettair ak wãwen ko ibbeir. “Einwõt eor ien iber,” Paul ear je, “jen jerbale emõn ñõn armij otemjej, im elaplok ñõn ro rej ber ilo nukin tõmak.”—Dri Galetia 6:10; Dri Hibru 6:10.
22. Mae ien ej jejjet kitien kejatdikdik eo kin jerkakbiji, ta eo jen beek ñan ad kõmmane?
22 Jehovah ej “Jemen tiriamokake, im Anij in ainemõn otemjej.” (2 Dri Korint 1:3, 4) Nan eo an ej kainemõn kij im ej jibañ kij ñan kajerbal kejatdikdik eo ekajur kin jerkakbiji eo ñan kainemõn ro jet. Mae ien jej lo jejjet in kitien eo kin kejatdikdik in ikijen an jerkakbiji ro remij ñan mour ion lal, jen einwõt Paul, eo ear likit an tõmak ilo jerkakbiji eo. Elaptata jen kajeoñe Jesus, eo kejatdikdik eo an ilo kajur eo an Anij ñan kajerkakbijik e ear jejjet kitien. Ejjabto ro rej bed ilo lũp ko renaj roñ ainikien Christ im diojtok. Men in en kainemõn im kalañliñ kij. Ak ilañin men otemjej, jen kamolol Jehovah, eo ear kõmman bwe jen maroñ anjo ion mij ikijen Iroij eo ad Jesus Christ!
Ta Uak Eo Am?
• Paul ear kwalok kin men in kamol ta ko me armij rar loi kin mejeir make kin jerkakbiji eo an Jesus?
• Ta in “dri kijirãt eliktata,” im ewi wãwen enaj jako?
• Ikijen ri Christian ri kabit ro, ta eo rej jeore im ta eo ej jerkakbiji?
• Kwo kõnan lo wõn ro ilo lokbook eo ilo Bible ñe renaj jerkakbiji ñan mour ion lal?
[Pija ilo page 14]
Ri jilek Paul ear lap an jojomare kejatdikdik eo kin jerkakbiji eo
[Pija ko ilo page 18]
Jerkakbiji eo an Job, family eo an, im elõñ ro jet enaj juõn unin elap lañliñ!