Kwoj Juõn “Men in Aluij”!
1 Ri jilek Paul ear je: “Bwe kim men in aluij ñõn lõl, im ñõn enjel rõn, im ñõn armij rõn.” (1 Kor. 4:9) Ta melelen men in, im ewi wãwen en jelet jerbal in kwalok nan eo ad rainin?
2 Ñan juõn Ri Korint, nan eo “men in aluij” en kar kõmman an lemnak kin men in walok eo eliktata ilo juõn jiai in gladiator (juõn armij eo ej ire ñan mij ilobwilij) ilo Rome, ke rar kõmman bwe armij ro emwij liakelok ir ren maaj iman elõñ thousand ri aluij ro mokta jen air mõn ir ilo juõn wãwen elej. Eindein lok wõt, juõn jar elap in ri aluij ro—ian armij im enjel ro jimor—rar lo wãwen eo rar kaeñtan Ri Christian ro ilo ebeben eo kein kajuõn kin air kar kwalok nan kin Ailiñ eo. (Hib. 10:32, 33) Ial in tiljek eo air ear jelet elõñ ri aluij ro, einwõt kijenmij eo ad ej kõmmane ilo lal in rainin. Jej men in aluij ñan wõn ro?
3 Ñan Lal in im ñan Armij: Jet ien ro rej kõmman news rej je report ko kin makitkit ko an armij ro an Jehovah. Ke jej kamolol kin report ko remõn me remol im ejelok kalijeklok ie ñe rej jerbale jerbal eo ad, jej bareinwõt kõtmene bwe jen ien ñan ien ri jumae ro renaj kajededlok report ko renana. Mekarta, jej aikwij wõnmanlok im kwalok kadkadim einwõt ri jerbal an Anij “kin buñbuñ enana im buñbuñ emõn.” (2 Kor. 6:4, 8) Ñan ri lale ro remol enaj alikar bwe jej ri kalor ro remol an Jesus Christ.
4 Ñan Enjel ro: Jitõb ro rej bareinwõt kalimjek kij. Devil im demon ro an rej lale—ak kin “elap illu,” im rej kajeoñ in kabõjrak “jerbal eo ñan kwalok nan kin Jesus.” (Rev. 12:9, 12, 17, New World Translation) Enjel ro retiljek an Anij rej lale im lañliñ ñe juõn ri jerawiwi ej ukwelok. (Luk 15:10) En kar kakajur kij ñan jelã bwe enjel ro rej watõk jerbal in kwalok nan eo ad einwõt jerbal eo elaptata an aorõk im wõr tokjen rej kõmmane ion lal rainin!—Rev. 14:6, 7.
5 Ñe kwoj jelmae jumae ak kwoj lemnak bwe ejelok tõbrak jerbal in kwalok nan eo am, kememej bwe kwoj bed iolaplap ñan an ro ilañ im ilal lale yuk. Kijenmij eo am elap an kwalok kin tiljek eo am. Eliktata, ‘tarinae emõn eo am kin tõmak’ enaj kamaroñ yuk ñan ‘debij mour indio.’—1 Tim. 6:12.