Jehovah Ej Roñjake Kir Ko Ad Kin Jibañ

“Mejen Jeova ñõn ro remõn, im lojiliñin rebellok ñõn air kir.”​—SAM 34:​15.

1, 2. (a) Ewi eñjake eo an elõñ armij ilo ran kein? (b) Etke jejjab ilbõk kin men in?

KWOJ ke iion inebata ko? Elañe aet, inem ejjab kwe wõt ej eindein am eñjake. Elõñ million armij ro rej kate ir ñan kijenmij kin ijjibed ko kin mour jen ran ñan ran ilo jukjuk im bed in enana. Ñan jet, elukkun bin ñan air kijenmij. Eñjake eo air ej einlok wõt eo an David, eo ear je: “Ilukkun jorrãn im mõjno, buruõ ej inebata im ij iññũr kin aõ metak. Buruõ ekkũmkũm, im aõ kajur ejako, im emaroktok meja.”​—Sam 38:​8, 10.

² Einwõt Ri Christian ro, jejjab ilbõk kin inebata im eñtan ko ilo mour. Jej melele bwe “iñtan” ko rej mõttan kakõlle eo kar kanan kake kin bed eo an Jesus. (Mark 13:8; Mat. 24:3) Nan eo ilo kajin eo jinoin kar ukõte “iñtan” ej jitõñlok ñan eñtan eo elap an juõn kõrã ñe ej kemour. Elap an jejjet an men in kwalok kin eñtan eo elap armij ro rej iione ilo ran kein “renana,” ak ‘lej’!​—2 Tim. 3:1.

Jehovah Ej Melele kin Eñtan ko Ad

3. Ta eo armij ro an Anij rejelã kake?

³ Armij ro an Jehovah rejelã bwe eñtan im abañ kein renaj jelet ir bareinwõt, im wãwen kein renaj nanalok wõt. Ijellokin men ko aolep armij rej iioni, ri karejar ro an Anij rej bareinwõt jelmae ‘dri kijirãt, devil eo,’ me ekõnan kokkure tõmak eo ad. (1 Pit. 5:8) Ebidodo ñan ad bõk eñjake eo an David: “Kinak eo e ar rupe buruõ, I obrõk kin erro, im I ar lale elañe jabrewõt eo en tiriamokake, e ejelok; im elañe eor dri kainemõn, a I ar lo ejelok”!​—Sam 69:20.

4. Ta eo ej kainemõn kij ñe jej iion inebata im eñtan ko?

⁴ Ear melelen ke bwe ear ejelok kejatdikdik ibben David? Jaab. Lale nan ko jet an ilo psalm in: “Bwe Jeova ej roñjake ro dri aikwij; im E jab kejekron dri prisõn ro An,” ak armij ro an me rej bed ilo kamakoko. (Sam 69:33) Jet ien jemaroñ eñjake bwe inebata im abañ ko ad rej debij kij einwõt ro rej bed ilo prison. Emaroñ einwõt ñe ro jet rejjab lukkun melele kin wãwen ko ibbed​—im bõlen jet rejjab. Ak einwõt David, jemaroñ bõk kainemõn ilo ad jelã bwe Jehovah elukkun melele kin inebata im eñtan ko ad.​—Sam 34:15.

5. Ta eo King Solomon ear liki?

⁵ Solomon nejin David ear kalikar mol in ilo ien aje temple eo ilo Jerusalem. (Read 2 Kronikel 6:​29-​31.) Ear eowore Jehovah ñan an roñjake jar eo an kajjojo armij emol buruen me ear kebak E ikijen “iñtan eo an im buromõj eo an.” Ewi wãwen Anij enaj emmakit ñan jar ko an armij rein rej eñtan? Solomon ear kwalok an liki bwe Anij enaj roñjake jar ko air im bareinwõt jibañ ir. Etke? Kinke e jelã ta eo ej bed ilo “buru ko buruen ro nejin armij.”

6. Ewi wãwen jemaroñ kijenmij kin inebata, im etke?

⁶ Kij bareinwõt jemaroñ kebak Jehovah ilo jar ikijen ‘eñtan im buromõj ko ad make.’ En kar kainemõn kij ñan jelã bwe emelele kin eñtan ko ad im bwe ej kea kake kij. Ri jilek Peter ear kamol men in ke ear ba: “Im komin likit ami inebata otemjej na iben, bwe Ej ierki kom.” (1 Pit. 5:7) Jehovah emol an itoklimo kin ta eo ej walok ñan kij. Jesus ear kwalok kin kejbãrok eo eyokwe an Jehovah, ke ear ba: “Re jab wia ruo bao sparro kin juõn penni ke? Im juõn iair e jamin wutlok ion brij im Jememi e jab lale. A emwij bwini kolan bõrõmi otemjelok. Inem komin jab mijõk, elap ami aurõk jen elõñ sparro.”​—Mat. 10:29-​31.

Atartar ion Jibañ Jen Jehovah

7. Ta jibañ eo jemaroñ liki kake?

⁷ Jemaroñ liki bwe Jehovah ewõr an kõnan im maroñ ñan jibañ kij ñe jej eñtan kin inebata im abañ ko. “Anij amuij likepijñõk im kajur; Dri jibõñ e kanuij ebak ilo iñtan ko.” (Sam 34:15-​18; 46:1) Ewi wãwen Anij ej letok jibañ in? Lemnak kin ta eo 1 Dri Korint 10:13 ej ba: “Anij e tiljek, im E jamin likit bwe ren kabo kom elap jen ami maroñ; a ilo men in kabo E naj kõmõn ial in ko, bwe komin maroñwe.” Jehovah emaroñ ukõt men ko ñan jolok abañ eo ad, ak emaroñ letok kajur eo jej aikwiji ñan kijenmij kake. Jekdon ta wãwen eo, Jehovah enaj jibañ kij.

8. Ewi wãwen jemaroñ bõk tokjen jen jibañ eo jen Anij?

⁸ Ewi wãwen jemaroñ kortokjen jibañ in? Lale ta eo ej rejañ kij ñan ad kõmmane: “Komin likit ami inebata otemjej na iben.” Men in ej melelen bwe jej lelok ñan Jehovah eddo eo kin aolep inebata ko ad. Jej kajeoñ ñan kabõjrak ad inebata im ilo meanwõd liki bwe enaj lale ak kabwe aikwij ko ad. (Mat. 6:​25-​32) Liki rot in ej aikwij ad kwalok ettã buru, ilo ad jab atartar ion kajur im meletlet eo ad make. Ñe jej kõttãik kij make “iomin pein Anij,” jej kile ad ettã. (Read 1 Piter 5:6.) Men in ej jibañ kij ñan kijenmij kin jabdewõt men Anij ej kõtlok ad jelmaiki. Jemaroñ kõnan bwe en mõkaj ad rõlok jen wãwen eo, ak jej liki bwe Jehovah ejelã ñããt eo im ewi wãwen en emmakit ñan jibañ kij.​—Sam 54:7; Ais. 41:10.

9. Kain abañ rot David ear aikwij joloke na ion Jehovah?

⁹ Kememej nan ko an David kar jeje ilo Sam 55:22: “Kwon jolok inek eo am ion Jeova, im E naj baur yuk: E jamin likit ro remõn bwe ren makõtkit.” Ke David ear jei nan kein, elap an kar iion eñtan. (Sam 55:4) Kar je Sam in ke Absalom nejin David ear karõk ilo ittino bwe en nibiji throne eo an jemen. Ahithophel, ri kakabilek eo me elap an kar David liki, ear koba ilo jumae in. David ear aikwij ko jen Jerusalem bwe ren jab mõne. (2 Sam. 15:12-​14) Meñe ear bed iumin eñtan kein, David ear liki wõt Anij, im ear wõr tokjen.

10. Ta eo jej aikwij kõmmane ñe jej jelmae abañ ko?

¹⁰ Eaorõk bwe kij, einwõt David, jen kebak Jehovah ilo jar kin jabdewõt inebata ak abañ ko jej iioni. Jen etale ta eo ri jilek Paul ear rejañ kij ñan ad kõmmane ikijen men in. (Read Dri Pilippai 4:​6, 7.) Ta eo enaj walok jen jar rot in ej itok jen tumũlal in buruõd? “Ainemõn jen Anij, eo ej elã jen jela otemjej, e naj kejbãrok [buruõd] im lemnok ko [ad] ilo Kraist Jisõs.”

11. Ewi wãwen “ainemõn jen Anij” ej kejbãrok buruõd im lemnak ko ad?

¹¹ Jar enaj ke kõmman an oktak wãwen eo kwoj iione? Emaroñ. Bõtab, jej aikwij kile bwe ejjab aolep ien Jehovah enaj uake jar ko ad ilo wãwen eo jekõnan. Mekarta, jar ej jibañ kij ñan kejbãrok jokkin wõt juõn eo ad ilo lemnak, bwe abañ kein ren jab kabwer kij. “Ainemõn jen Anij” emaroñ kainemõn kij ñe eddo buruõd kin inebata ko. Einwõt juõn jar in tarinae me kar karõk ir ñan kejbãrok juõn jikin kwelok jen nitbwil eo an ri kijirãt ro, “ainemõn jen Anij” enaj kejbãrok buruõd im lemnak ko ad. Enaj bareinwõt kamaroñ kij ñan anjo ion bere ko, mijak ko, im lemnak ko ad renana im bõprae kij jen ad emmakit ilo juõn wãwen ejjab meletlet.​—Sam 145:18.

12. Kwalok juõn wanjoñok kin ewi wãwen juõn armij emaroñ bõk kainemõn ilo lemnak eo an.

¹² Ewi wãwen emaroñ ainemõn lemnak eo ad ñe jej iion inebata im abañ ko? Lemnak kin juõn wanjoñok me ej einlok wõt wãwen eo jej iione. Juõn ri jerbal emaroñ aikwij jerbal ibben juõn manager elej. Bõtab, ear bellok juõn ien emõn ñan an ri jerbal eo kwalok eñjake ko an ñan owner eo an company eo, me ejoij. Owner eo ej kallimur ñan ri jerbal eo bwe ewõr an melele kin wãwen eo im ej kwalok bwe mõttan jidik renaj jolok manager eo. Enaj kar ewi eñjake eo an ri jerbal eo? Kin an tõmak nan in kallimur eo im ejelã ta eo enaj walok, men in enaj kar kabin bebe eo an ñan wõnmanlok wõt im jerbal, meñe ej aikwij jelmae jet wãwen ko rebin ilo kõtan ien eo. Eindein, jejelã bwe Jehovah ewõr an melele kin wãwen ko ibbed, im ej kallimur ñan kij bwe mõttan jidik enaj “jolok iroij in lõl in.” (Jon 12:31) Men in elap an kainemõn kij!

13. Ijellokin jar, bar ta jej aikwij in kõmmane?

¹³ Inem, ebwe ke ñan ad baj kwalok wõt abañ ko ad ñan Jehovah ilo jar? Jaab. Ebar wõr juõn men jej aikwij in kõmmane. Jej aikwij in jerbal ekkar ñan jar ko ad. Ke King Saul ear jilkinlok jet maan ro ñan mweo imõn David ñan air mõn e, David ear jar: “O aõ Anij kwon lomoriõ jen ro dri kijirãt iõ; Kwon leliñlok iõ jen ro rej jerkak nae iõ.” (Sam 59:​1, 2) Ijellokin jar, David ear eoroñ lio belen im bõk buñten nee ko ñan an joor. (1 Sam. 19:11, 12) Ilo juõn wãwen einlok wõt in, jemaroñ jar kin meletlet ñan jibañ kij kamadmõde abañ ko im bõlen kakõmõnmõnlok wãwen ko rebin ibbed.​—Jem. 1:5.

Wãwen eo Jemaroñ Bõk Kajur ñan Kijenmij

14. Ta eo emaroñ jibañ kij ñan kijenmij ñe jej jelmae abañ ko?

¹⁴ Emaroñ jab mõkaj an jako inebata im abañ ko ad. Remaroñ wõnmanlok wõt iumin juõn ien eaetok. Elañe ej eindein, ta eo emaroñ jibañ kij ñan kijenmij? Mokta, kememej bwe ñe jej wõnmanlok im karejar ñan Jehovah ilo tiljek meñe jej iion abañ ko, jej kamol yokwe eo ad ñan e. (Jerb. 14:22) Lemnak kin nan in kinaak eo an Satan ikijen Job: “Inem Setan e ar uak Jeova, im ej ba, Ejelok unin an Job mijõk Anij ke? Kwar jab likit juõn worwor in kabol e, im mweo imõn, im men ko otemjej iben, ijoko otemjej ke? Kwar kejerammõn jerbal ko an pein, im e lõñlok men ko an ilo eneo. A Kwon kõtellok peõm kiõ, im uñire men otemjej an, inem e naj karmijete Yuk iman mejõm.” (Job 1:​ 9-​11) Ikijen tiljek eo an, Job ear kariap nan in kinaak eo an Satan. Ilo ad kijenmij iumin wãwen ko rebin, kij bareinwõt ewõr juõn ien emõn ñan kamol bwe Satan ej juõn ri riap. Im ñe jej kijenmij ej kakajurlok kejatdikdik im liki eo ad ilo Jehovah.​—Jem. 1:4.

15. Ta wanjoñok ko remaroñ kakajur kij?

¹⁵ Kein karuo, kememej bwe “iñtan kein, ro jeiõmi im jãtõmi rej ber i lõl, rej iñtan kaki.” (1 Pit. 5:9) Aet, “ejelok men in kabo e ar bõk kom, a eo armij rej maroñwe.” (1 Kor. 10:13) Kin men in, kwomaroñ bõk kajur im beran ilo am kalmenlokjen kin joñok ko an ro jet im jab lemnak wõt kin abañ ko am make. (1 Tes. 1:​5-7; Hib. 12:1) Bõk ien ñan lemnak kin joñok eo an ro kwoj jelã kajjiir me rar kijenmij ilo tiljek meñe rej iion wãwen ko rebin. Kwar ke bukõt bwebwenato ko ilo book ak magazine ko ad kin mour ko an armij ro me rej iion ejja abañ ko wõt kwoj iioni? Bwebwenato kein remaroñ lap an kakajur yuk.

16. Ewi wãwen Anij ej kakajur kij ñe jej jelmae melejoñ ko?

¹⁶ Kein kajilu, kememej bwe Jehovah ej “Jemen tiriamokake, im Anij in ainemõn otemjej; Eo ej kainemõne kim ilo am jorran otemjej, bwe kimin maroñ in kainemõne ro rej ber ilo jabrewõt jorran, kin ainemõn eo kimij mõke ainemõn kake jen Anij.” (2 Kor. 1:​3, 4) Ej einwõt Anij ear jutak turid ñan rejañ im kakajur kij, jab ilo abañ eo ad kiõ wõt ak “ilo am jorran otemjej.” Men in ej kamaroñ kij ñan kainemõn ro jet “ilo jabrewõt jorran.” Paul make ear iion mol in nan kein.​—2 Kor. 4:​8, 9; 11:23-​27.

17. Ewi wãwen Bible eo emaroñ jibañ kij kamadmõde abañ ko kin mour?

¹⁷ Kein kemen, ewõr ibbed Nan in Anij, Bible eo, eo “ej bareinwõt or tokjeir kin katakin, im kowe, im kajime, im kajelaik armij ilo kwojarjar; Bwe armij korijeran Anij en wãppen im emwij kõkõmõnmõn e ñõn jerbal emõn otemjej.” (2 Tim. 3:​16, 17) Nan in Anij ejjab kõmman bwe jen “wãppen” wõt im ‘emwij kõkõmõnmõn kij ñõn jerbal emõn otemjej.’ Ej bareinwõt kamaroñ kij ñan kamadmõde abañ ko kin mour. Nan eo ilo kajin eo jinoin kar ukõte “emwij kõkõmõnmõn e” ej melelen “emwij keboje aolep men ko kõbwebwein.” Remaroñ kar kajerbal nan in ilo ien ko etto kin juõn wa in lojet me rar keboje aolep men ko rar aikwiji ñan trip eo ak kin juõn machine me ear maroñ kõmman aolep jerbal ko kar kõtmene ñan an kõmmani. Eindein, Jehovah ikijen Nan eo an ej letok aolep men ko jej aikwiji ñan kamadmõde jabdewõt men jemaroñ iioni. Ilo ekkar, jemaroñ ba, “Elañe Anij ej kõtlok abañ in bwe en walok, I maroñ kijenmij kake, ikijen jibañ jen e.”

Anemkwoj Jen Aolep Abañ ko Ad

18. Ta eo jej aikwij lemnak kake ñan bõk jibañ ñan kijenmij ilo tiljek?

¹⁸ Point eo kein kalalem: Ien otemjej kwon lemnak wõt kin mol eo bwe mõttan jidik Jehovah enaj kanemkwoj armij jen inebata im abañ ko otemjej. (Sam 34:19; 37:​9-​11; 2 Pit. 2:9) Ñe enaj jejjet kitien aolep men kein, jenaj anemkwoj ejjab jen inebata im abañ ko wõt ak enaj bareinwõt wõr ien eo emõn ñan bõk mour indio, elañe jab ilañ ibben Jesus inem enaj ilo paradise eo ion lal.

19. Ewi wãwen ad maroñ kijenmij ilo tiljek?

¹⁹ Mae ien eo, jej wõnmanlok im kijenmij kin wãwen ko rekaburomõjmõj im bin ilo lal in enana. Elap ad kijororetok ien eo ñe enaj jako aolep men kein! (Sam 55:​6-8) Jej aikwij kememej bwe ad kijenmij ilo tiljek ej kamol bwe Devil ej juõn ri riap. Jen bõk kajur jen jar ko ad im dolul in Christian jimjãn jimjatin, im kememej bwe ro jeid im jatid rej iion melejoñ ko einlok wõt ko ad. Jen wõnmanlok ilo ad kabel im bojak ñan kajerbale Nan eo an Anij ilo keie. Kwon jab kõtlok bwe en mõjnolok liki eo am ilo kea eo eyokwe me “Anij in ainemõn otemjej” ej letoke. Kememej bwe “mejen Jeova ñõn ro remõn, im lojiliñin rebellok ñõn air kir.”​—Sam 34:15.

Kwomaroñ Ke Uak?

• Kar ta eñjake eo an David kin inebata im abañ ko ear jelmaiki?

• Ta eo King Solomon ear liki kake?

• Ta eo emaroñ jibañ kij kijenmij kin men ko Jehovah ej kõtlok ad iioni?

[Pija eo ilo peij 13]

Solomon ear liki bwe Jehovah enaj emmakit ñan jibañ armij ro An rej eñtan im buromõj

[Pija eo ilo peij 15]

David ear jolok eddo eo an ion Jehovah ilo jar inem jerbal ekkar ñan ta eo ear jar kake