KAJJITÕK KO JÃN RO REJ RIIT
Ta mel̦el̦ein “menin kam̦ool” eo im “jiil̦” eo me kajjojo iaan rũkkapit ro rej bõke jãn Anij?—2 Korint 1:21, 22.
Ilo iien ko etto, rekõn kõjerbal juon riiñ in jiil̦ ñan kam̦ool ak koweeppãne juon peba ilo aer likũt jidik kl̦e ak wax ioon im jipede kõn riiñ eo
Menin Kam̦ool: Ekkar ñan juon bok, naan eo ilo kajin Grik me kar kõjerbale ñan naan in “menin kam̦ool” ilo 2 Korint 1:22, ekkã aer kõjerbale ilo “peba in kam̦ool ko jãn kien im ilo peejnej ko.” Im mel̦el̦ein naan in ej ñe juon ej “kõm̦m̦an kon̦ ak lel̦o̦k kõl̦l̦ã eo an jinointata ñan kõl̦l̦ãik jidikin on̦ãn juon men me enaaj bõke. An kõm̦m̦ane men in ej kam̦ool bwe men eo enaaj bõke ej an kadede ak kõm̦m̦an bwe en weeppãn kon̦ eo ej kõm̦m̦ane.” Ãindeinl̦o̦k wõt, menin kam̦ool eo me rũkkapit ro rej bõke jãn Anij ej kam̦ool bwe renaaj bõk jeraam̦m̦an eo me 2 Korint 5:1-5 (UBS) ej kwal̦o̦k kake. Jeraam̦m̦an in renaaj bõke ej jinõkjeej eo ñan mour ilañ. Men in ekitibuj aer naaj mour ñan indeeo im reban bar mej.—1 Korint 15:48-54, UBS.
Ilo kajin Grik eo ilo raan kein, ewõr juon naan rej kõjerbale me ej ekkejell̦o̦k ippãn naan in. Rej kõjerbale naan in ñe rej kõnnaan kõn riiñ eo juon likao ej lel̦o̦k ñan juon jiroñ ñe ej kajjitõk an m̦areiki. Elukkuun jejjet men in ñan rũkkapit ro kõnke renaaj erom lio pãleen Kũraij ilo kõkkar.—2 Korint 11:2, UBS; Revelesõn 21:2, 9.
Jiil̦: Ilo iien ko etto, rekõn kõjerbal kein jiil̦ ko ñan jaini juon men ñan kaalikkar an wõn, kam̦ool juon men, im koweeppãn juon kon̦. Ãindeinl̦o̦k wõt, ñe kajoor eo an Anij ej jiil̦i juon ilo kõkkar, ej kaalikkar bwe em̦õj an Anij kããlõte bwe en juon rũkkapit. (Epesõs 1:13, 14) Bõtab, jiil̦ in rar bõke ejjab mel̦el̦ein bwe renaaj kajju bõk jinõkjeej eo aer. El̦aññe rũkkapit ro rej tiljek wõt, ej kab naaj lukkuun alikkar bwe renaaj bõk jinõkjeej eo aer ilo iien en̦ m̦okta wõt jãn aer mej ak m̦okta wõt jãn an jinoe eñtaan eo el̦ap.—Epesõs 4:30, UBS; Revelesõn 7:2-4.