Ekkar Ñan Baibõl̦ Eo

Katakin Ajri ro Nejõm̦ im Kõm̦m̦an Am̦ Iien Ippãer

NEJIN Anij ear ke lel̦o̦k iien ko an ñan ajri ro? Jet iaan ri kal̦oor ro an Jijej rar l̦õmn̦ak ejjel̦o̦k an iien. Juon iien rar kajjioñ in bõbrae an ajri ro kepaake Jijej. Ak Jijej ear ba ñan er: “Kom̦win likũt ajri ran̦ bwe ren itok ñan ippa; kom̦win jab bõbrae er.” (Mark 10:13-16) Innem ear karwaineneik ajri ro ilo yokwe im kalikkar bwe em̦õn̦õn̦õ in lel̦o̦k iien ko an ñan er. Rainin ewi wãween an jemen im jinen ajri ro maroñ kajjioñe Jijej? Remaroñ kõm̦m̦an iien ippãer im katakin ajri ro nejier ilo jim̦we.

Em̦ool bwe jemen im jinen ajri ro im rej jerbale eddo ko aer rej kabwe im jab kõjekdo̦o̦n aikuj ko an ajri ro nejier. Im enañin aolep jemen im jinen rej yokwe im kõjparok ajri ro nejier. Bõtab, Baibõl̦ eo ej kakkõl bwe yokwe in ikõtaan jemen im jinen ñan ajri ro nejier enaaj jakol̦o̦k ilo raan kein. (2 Timote 3:1-3) Ak ñan ro im rej kõjparok im yokwe wõt ajri ro nejier, ej naaj wõr wõt wãween ko ñan kakõm̦anm̦anl̦o̦k kilen aer jerbale eddo ko aer. Innem katak kein rej pedped wõt jãn Baibõl̦ eo rej menin kakeememej ko im renaaj jipañ rũtto ro me rej yokwe im kõn̦aan jipañ ro nejier.

Katakin Er im Jab Kailluik Er

Juon taktõ, etan Robert Coles ear ba: “Ilo an ajri ro rũttol̦o̦k, ej bar eddekl̦o̦k maroñ eo aer ñan kõn̦aan jel̦ã im kõm̦m̦ane men eo ejim̦we. Relukkuun kõn̦aan jel̦ã em̦m̦an im kõm̦m̦ane men eo ejim̦we. Ña ij l̦õmn̦ak bwe maroñ in ej itok jãn Anij.” Wõn eo emaroñ jipañ er kõn men in?

Epesõs 6:4, UBS ej ba, ‘Ro jemen in jinen, komin jab kõmmõn men ko renaj kallu ro nejimi. Ak komin kauweik ir im katakin ir katak ko an Jeova.’ Kwõj ke kile bwe Baibõl̦ eo ej lel̦o̦k eddo eo ñan jemen baam̦le eo bwe en katakin ajri ro ñan yokwe Jeova im kien ko an? Ilo Epesõs 6:1, rijjelõk Paul ej jitõñl̦o̦k ñan l̦eo im lio jim̦or ke ej rõjañ ajri ro bwe ren ‘pokake jemãer im jineer.’a

Bõtab, el̦aññe ejako jemen baam̦le eo, jinen baam̦le eo enaaj wõnm̦aanl̦o̦k wõt kõn eddo in. Elõñ kõrã ro im rej make iaaer rar maroñ lo tõprak ke rar katakin ajri ro nejier ñan yokwe Jeova im kien ko an. Bõtab, el̦aññe lio jinen ajri ro enaaj bar m̦are, l̦eo pãlele enaaj aikuj ineek eddo in ñan tõl baam̦le eo. Jinen ajri ro ej aikuj m̦õn̦õn̦õ in kõttãik e im l̦oore l̦eo ñe ej katakin im kajim̦we ajri ro.

Ewi wãween kwõmaroñ katakin ajri ro nejõm̦ im jab kailluik er? Eokwe, ejjel̦o̦k juon wãween eo me kwõj aikuj l̦oore kõnke kajjojo ajri reoktak jãn doon. Bõtab, jemen im jinen ajri ro rej aikuj kõl̦mãnl̦o̦kjen̦ m̦okta kõn kain kauwe rot renaaj lel̦o̦k ñan ajri eo. Im ñe rej kauwe ajri eo, ren kõm̦m̦ane ilo yokwe im jouj. Jej aikuj itoklimo kõn an Baibõl̦ eo ãliji bwe jen jab kaillu ajri ro. Ilo Kolosse 3:21, ej bar rõjañ ro jemen bwe ren jab kaillu ro nejier im kõm̦m̦an bwe ren ebbeer.

Jet jemen im jinen rej bũroñe ro nejier im men in el̦ap an kabũrom̦õj im kabbeer ajri ro. Bõtab Baibõl̦ eo ej ba: “Komin jolok meo otemjej, illu im anniãbãb otemjej. Komin jab bar kowaroñroñ im kallu; komin jab bar kijdrat ak bar men ko eirlok wõt.” (Epesõs 4:31, UBS) Baibõl̦ eo ej bar ba bwe “ri karijeran Irooj, en jab akwããl, a en jouj ñan armej otemjej im pojak in katakin armej, en meanwõd.”—2 Timote 2:24.

Kõm̦m̦an Am̦ Iien Ippãer

Ke kwõj lel̦o̦k iien ko am̦ ñan ajri ro nejõm̦, ej bareinwõt mel̦el̦ein bwe kwõj m̦õn̦õn̦õ in kaarmejjete kõn̦aan ko am̦ ñan kabwe aikuj ko aer. Baibõl̦ eo ej ba: “Naan kein, ij jiroñ eok rainin, ren ilo bũruom̦, im kwõn kanooj katakin ro nejõm̦ kaki, im kwõn kõnono kaki ñe kwõj jijet ilo m̦weo im̦õm̦, im ñe kwõj etetal ilo ial̦, im ñe kwõj babu, im ñe kwõj jerkak.”—Duteronomi 6:6, 7.

Rainin, epenl̦o̦k mour im ej kõm̦m̦an bwe jejjo wõt jemen im jinen ren maroñ pãd ippãn ajri ro nejier. Mekarta, Duteronomi ej kalikkar bwe jemen im jinen ajri ro rej aikuj kõm̦m̦an iien ippãn ajri ro nejier. Jej aikuj jel̦ã kõm̦m̦an laajrak ko im ewõr jet men ko jej aikuj kaarmejjeteiki kõnke ajri ro rej aikuj iien ippãd.

Kar kõm̦m̦ane juon ekkatak in etale elõñl̦o̦k jãn 12,000 jodrikdrik ro. Jem̦l̦o̦kin ekkatak in rar loe bwe “el̦aññe juon ajri ej lukkuun epaake jemen ak jinen, ekkã an ãjmour im ej menin kõjparok jãn m̦wil ko renana.” Aet, ajri ro rej aikuji im rekõn̦aan bwe jemãer im jineer en wõr aer iien ippãer. Juon jinen ear kajjitõkin ajri ro nejin im ba, “El̦aññe enaaj kar wõr jabdewõt men kom̦ kõn̦aan, enaaj kar ta?” Aolepeir emãn rar uwaak im ba, “Jekõn̦aan bwe komiro papa en kal̦apl̦o̦k amiro iien ippãmem.”

Juon jemen ak jinen eo ej jerbale eddo ko an enaaj kate wõt joñan an maroñ ñan kabwe aolepen aikuj ko an ajri ro nejin. Ej kate bwe ajri ro nejin ren epaake, im katakin er kõn Jeova. Bareinwõt ej jipañ ajri ro nejin bwe ren rũttol̦o̦k im jel̦ã kilen mour. Im ej bar katakin er bwe ren jel̦ã m̦anit im m̦ool aer jerbal, bareinwõt jouj ñan ro jet. Ajri ro im rej kõm̦m̦ani men kein rej kwal̦o̦k aer kautiej Ri Kõm̦anm̦an eo aer. (1 Samuel 2:26) Aet, ñe jemen im jinen ajri ro rej katakin im kajim̦weik ajri ro nejier ilo wãween eo ej kabuñbũruon Anij, rej jerbale eddo ko aer.

[Kamelele eo Itulal]

[Pija ilo peij 5]

Bũroñ im lam̦õj enaaj kõm̦m̦an bwe juon ajri en bũrom̦õj im ebbeer

[Pija ilo peij 5]

Kwõn kõm̦m̦an am̦ iien ippãn ro nejõm̦