Kautiej Ro Rej Iroij Iom
“Komin kõmõn men eo ekar ñõn armij otemjej. Komin yokwe jimjãn jimjãten. Komin koutiej kiñ eo.”—1 PITER 2:17.
1, 2. Ewi lemnak eo an armij ro kin ro reutiej ilo ran kein? Etke?
“KIEN ko otemjej rej jurake ajiri ro. Ejelok jitõb in kautiej jemen im jinen ajiri ro,” juõn jinen ear ba ilo buromõj. “Kajitõkin Ri Utiej Ro” juõn kakõlle in waan ettõr ko ear ba. Kwoj jelã kadede bwe, lemnak kein ruo rej jet ian lemnak ko rej walok ilo ran kein. Jitõb in jab kautiej jemen im jinen ajiri ro, ri kaki in school ro, ri kajerbal armij ro, im ri kien ro ekkã an walok iaolepen lal.
2 Jet remaroñ baj ba wõt, ‘Eokwe, ejjab tellokin aõ kautiej ro rej iroij.’ Jet ien, emaroñ bin ad karmijete men in. Jej jelmae news ko im ekkeini air kwalok kin ri kien ro reriap, ri kajerbal armij ro rekibbon, ri kaki in school ro ejaje air katakin ajiri ilo jimwe, im jemen im jinen ro rej kokkure ajiri ro nejiir. Emenin mõnõnõ bwe, eiet ri Christian ro rej bõk ejja kain lemnak rot in ibben ro rej bõk eddon congregation eo.—Matu 24:45-47.
3, 4. Etke Christian ro rej aikwij kautiej ro reutiej?
3 Einwõt Christian ro, “ewõr aikwij” ibbed ñan kautiej ro reutiej ilo kien ko an lal. Ri jilek Paul ear kakkõl Christian ro ñan “kiblie ñõn ro routiej jen ir: bwe ejelok eutiej a jen Anij wõt; im ro rej ber Anij e ar likiti.” (Romans 13:1, 2, 5, New World Translation; 1 Piter 2:13-15) Bareinwõt Paul ear kwalok juõn un ñan bokake ro reutiej ilo family eo: “Kõra rõn, komin kõtãik kom ñõn lõmaro belemi, einwõt ekar ilo Iroij.” (Dri Kolosse 3:18, 20) Congregation elder ro ej tellokin bwe jen kautiej ir kinke ‘jitõb kwojarjar e ar likit ir dri kaki ilo e, bwe ren najirik eklisia an Iroij.’ (Jerbal 20:28) Unin ad kautiej ro reutiej ilo kien ej bwe jen kautiej Jehovah. Emol, kautiej Jehovah ej bed imantata in jabdewõt men ilo mour eo ad.—Jerbal 5:29.
4 Ilo ad kememej wõt bwe Jehovah ej eo eutiejtata, jen lale jet joñok in armij ro rar jab kautiej ro reutiej im ro rar kautiej ir.
Jab Kautiej Ej Tellok ñan Bõk Ekajet Nana
5. Kain lemnak in jab kautiej rot eo, Michal ear kwalok ñan David, im men in ear tel ñan ta?
5 Jen bwebwenato eo an King David, jemaroñ lo wãwen an Jehovah lemnak kin ro rej kajettokjen ri utiej ro me Anij ear kamaroñ ir. Ke David ear bõktok tebteb in bujen eo ñan Jerusalem, Michal eo belen ear lo an David “kelok im eep iman Jeova; im ear kejekron e ilo buruen.” Michal enaj kar kile bwe David ear jab jeban family eo wõt ak ear king ilo ene eo bareinwõt. Bõtab, ear kalikar eñjake ko an kin nan in kajidede ko: “E nañin aibujuij kiñ in Israel ranin, eo e ar mõke elõklok e iman mejen ro dri korijeran kõra ro an, einwõt juõn ian armij re wan ej elõkloke!” Kin men in Michal ear wõrañe.—2 Samuel 6:14-23.
6. Kar ewi lemnak eo an Jehovah kin an Korah jab kautiej Eo me Anij ear kabite?
6 Juõn joñok elap an nana kin jab kautiej ro me Anij ear jitõñ ir ilo kwojarjar kar Korah. Einwõt juõn ri Kohath, ear lañliñ kin jerammõn in jerbal ñan Jehovah ilo imõn kabbed eo! Bõtab, ear naruõn Moses im Aaron, ri tel ro an Israel Anij ear kabiti. Korah ear kobalok ibben jeban ro jet an Israel im jiroñ Moses im Aaron ilo jab kautiej: “Aolepen jar re kwojarjar, barewõt iair, im Jeova ej ber iolapir: inem etke komij mõke koutiej kom jen jar eo an Jeova?” Kar ewi lemnak eo an Jehovah kin Korah im ro rar jurake? Anij ear watõk men eo rar kõmmane einwõt juõn men ejjab kautiej emake Jehovah. Elikin air lo an lal warõñlok aolep ro rar rejetak ir, kijeek eo jen Jehovah ear tile Korak im 250 jeban family ro.—Bwinbwin 16:1-3, 28-35.
7. Ekar wõr ke jabdewõt un kin an “dri jilik ro rewan” kananaik maroñ eo an Paul?
7 Ilo congregation in Christian eo ilo ebeben eo kein ka juõn, kar wõr ro im rar kajekdon ri utiej ro rekwojarjar. “Ri jilek ro reutiej burueir” ilo congregation in Corinth rar jab kautiej Paul. Rar notaik wãwen an konono, ilo air ba: “An enbwinin bed e mõjino, im an konono jekron.” (2 Dri Korint 10:10; 11:5) Elañe Paul ear melak ilo konono ak jab, ear tellokin bõk kautiej einwõt juõn ri jilek. Ak wãwen konono eo an Paul ear lukkun jab melak ke? Katak ko an ilo Bible eo rej kamol kin joñan an melak ear einwõt juõn ri kwalok nan. Eñin unin, kin an bwebwenato ilo tukaduin ibben Herod Agrippa Kein Karuo, eo ej “meletlet kin . . . nan in kajitõk ko iben ri Ju ro,” Paul ear kamakit king eo bwe en ba: “Ilo jirik, kwoj karel iõ bwe in dri Kristian”! (Jerbal 13:15-43; 17:22-34; 26:1-28) Ak, ri jilek ro eutiej burueir ilo jikin kwelok in Corinth rar naruõn kin an jab melak ilo konono eo an! Kar ewi lemnak eo an Jehovah kin lemnak eo air? Ilo juõn ennan ñan ro ri lale congregation in Ephesus, Jesus Christ ear buñburuen kake ro rar jab reel ibben ‘ro rej mõke naetair dri jilik, ak rar jab.’—Reveles̃õn 2:2.
Kautiej Meñe Jab Wãppen
8. Ewi wãwen an kar David kautiej maroñ in tel eo Jehovah ear lelok ñan Saul?
8 Elõñ joñok ko ilo Bible kin ro rar kautiej ro reutiej, meñe rar jab kajerbal maroñ ko air ilo jimwe. David kar juõn ian joñok kein remõn. King Saul, eo ear karejar ñan e, ear ebanbane tõbrak ko an David im kõnan mõn e. (1 Samuel 18:8-12; 19:9-11; 23:26) Ak, meñe kar wõr ien ko remõn ñan mõn Saul, David ear ba: “Jeova en kõtellok aõ peiõ nae eo Jeova e ar kabite!” (1 Samuel 24:3-6; 26:7-13) David ear jelã bwe Saul ear bwid, ak ear kõtlok bwe Jehovah en ekajete. (1 Samuel 24:12, 15; 26:22-24) Ear jab kananaik Saul.
9. (a) Kar ewi lemnak eo an David ke Saul ear matõrtõre? (b) Ewi wãwen ad maroñ lo bwe ear mol an David kautiej Saul?
9 David ear inebata ke kin an bed in eñtan? “Ro dri lej r’ar kabukot aõ, “David ear lamõj ñan Jehovah. (Sam Ko 54:3) Ear lutõklok buruen ñan Jehovah: “O Aõ Anij kwon lomoriõ jen ro dri kijirãt iõ; . . . Ro rekajur rej kweloklok nae iõ: jab kin aõ bwir, jab kin aõ jerawiwi, O Jeova. Rej etõr im kaboj ir mõke, im ejelok ruõ: Kwon ruj im jibõñ io im lo.” (Sam Ko 59:1-4) Kwonañin eñjake einwõt in—bwe meñe kwojañin kõmman jabdewõt bwid nae juõn eo eutiej, ear etal wõt im kabañ yuk? David ear jab likjap in kautiej Saul. Ke Saul ear mij, jen an lañliñ, David ear kine juõn al in liãjlol: “Saul im Jonetan, rar wolbo im armij in yokwe ke re mour . . . rar mõkõj jen igõl ko, rar kajur jen laion ko. Kom limaro nejin Israel, komin jõñõt Saul.” (2 Samuel 1:23, 24) Ear juõn joñok emõn im mol ilo an kautiej eo me Jehovah ear kabite, meñe Saul ear kabwid David!
10. Kain joñok rot eo emõn Paul ear likit ilo an kautiej jar in ri tel ro Anij ear kamaroñe, im men in ear tellok ñan ta?
10 Ilo ien ko an Christian, jej lo joñok ko remõn bareinwõt kin ro rar kautiej ri utiej ro Anij ear kabbeiki. Ñan wanjoñok, jen lemnak kin Paul. Ear kautiej bebe ko an jar in ri tel ro an congregation eo an Christian ilo ebeben eo kein ka juõn. Ilo ien lolok eo eliktata an Paul ñan Jerusalem, jar in ri tel eo rar kakabilek e bwe en karreoik e ekkar ñan mantin ri Jew ro ñan kwalok bwe kar ejelok notan ibben nae Kien ko an Moses, Paul ear maroñ ba: ‘Armij ran rar kaiñi iõ mokta bwe in illok jen Jerusalem ke armij ro rar iten mõn iõ. Kiõ rekõnan bwe in kwalok iman mejen armij otemjej bwe in kautiej Kien ko an Moses. Emwij aõ jei juõn letter ñan ri Galetia ro im kakabilek ir bwe ren jab bokake Kien eo. Elañe ij etal ñan temple eo, armij ro jet remaroñ jab melele kin ta eo ij kõmmane, im lemnak bwe ij jurake jar in armij ro rej mwijmwij kadede.’ Bõtab, Paul ear jab bõk kain lemnak rot in. Kinke men eo ear aikwij kõmmane jab jumae jabdewõt kien eo an Christian, ear kautiej im bokake bebe eo an jar in ri tel ro ilo ebeben eo kein ka juõn. Tokjen men in bwe ilo mõkaj rar aikwij lomoren Paul jen juõn jar in ri nana ri Jew ro, im ear bed aikwij bed ilo kalbuj ruo yiõ ko. Ilo jemlokin, Anij ear kõmanmõn ankil an. Paul ear kennan iman ri utiej ro ilo Caesarea inem ri kien ro rar kõllã bwe en etal ñan Rome ñan kennan iman mejen Caesar.—Jerbal 9:26-30; 21:20-26; 23:11; 24:27; Dri Galetia 2:12; 4:9, 10.
Kwoj Ke Kwalok Kautiej?
11. Ewi wãwen ad maroñ kautiej ri utiej ro ilo kien?
11 Kwoj kautiej ke ro reutiej? Ej juõn kien ñan Christian ro bwe ren “lelok ñõn ro otemjej men ko rekar ñõn ir, . . . kõnimarmij ñõn eo kõnimarmij.” Emol, ad kiblie ñan “ro routiej” ej koba ad jab kõllã owõj wõt ñan ir ak bareinwõt ej koba ad kõnimarmij ak kautiej ri utiej ro ilo jerbal im nan. (Dri Rom 13:1-7) Ñe jej jelmae ri kien ro relej, ewi wãwen ad naj emmakit? Ilo Chiapas State, Mexico, ri utiej ro ilo juõn bukwon rar bõk jikin kallip ko an 57 family ko an Ri Kennan ro an Jehovah kinke ri Christian rein rar jab bõk kunair ilo jet ian kwojkwoj in kabuñ ko air. Ilo kwelok ko ñan kamadmõde abañ in, ri Kennan ro, ilo nuknuk ko rekarbõb im erreo, rar kautiej armij ilo wãwen air konono aolep ien. Elikin juõn yiõ tokelik, rar jurake ir ilo juõn bebe. Lemnak eo air ear wini kautiej eo an jet ri lale ro ñan joñan eo bwe rar kõnan einwõt Ri Kennan ro an Jehovah!
12. Etke “koutiej” leo ri belele eo ejjab tõmak ej juõn men eaorõk?
12 Ewi wãwen kwomaroñ kautiej ri utiej ro Anij ear kamaroñe ilo family eo? Elikin an bwebwenato kin joñok eo an Jesus kin eñtan ilo nana, ri jilek Peter ear ba: “Ein drein, limaro, komin kõtãik kom ñõn lõmaro belemi, bwe elañe jabrewõt e jab bokake nan eo en rel buruen ñe ejelok nan, kin an beleir ber im kõmõn; Ñe rej lo ami etetal ekwojarjar ilo mijõk.” (1 Piter 3:1, 2; Dri Epesõs 5:22-24) Peter ear kalikar kin aorõkin an lio kõtãik e ñan leo belen ilo “mijõk” ak kautiej, meñe jet emaan rejjab tellokin air bõk kautiej. Ñe lio ej kautiej leo belen men in emaroñ wini buruen leo belen eo ejjab tõmak.
13. Ewi wãwen an limaro maroñ kautiej lõmaro beleir?
13 Ekkar ñan kobban jeje kein, Peter ear jitõñlok kij ñan joñok eo an Sarah, eo me leo belen kar Abraham, ear juõn joñok elap ilo tõmak. (Dri Rom 4:16, 17; Dri Galetia 3:6-9; 1 Peter 3:6) Kõrã ro me lõmaro beleir rej bed ilo tõmak ren kar ke kadiklok air kautiej ir jen ro me lõmaro beleir rejjab bed ilo tõmak? Ta elañe kwojjab errã ibben leo ibbam kin juõn men? Jesus ear letok jet nan in kakabilek ko im remaroñ jerbale ilo juõn wãwen ekkar ñan men in: “Jabrewõt eo e naj kamakokoik yuk, bwe kwon ilok ibenlok ilo juõn mail, en ruo alen am ilok ibenlok.” (Matu 5:41) Kwoj kautiej leo ibbam ke ilo am errã ibben bebe ko an? Elañe ebin am kõmman men in, kwon kwalok buruõm ñan e. Kwon jab baj lemnak wõt bwe ejelã kin ta eo ej bed ilo buruõm. Ak ñe kwoj kwalok kõnan ko am ñan e, kwon kõmmane ilo juõn wãwen kautiej e. Bible eo ej kakabilek: “Ami konono, en ien otemjej ilo joij, im en emwij kejãtok e kin salt, bwe komin jela kijkan emõn ami uak armij otemjej.”—Dri Kolosse 4:6.
14. Kautiej jemen im jinen ajiri ro ej kitibuj ta?
14 Ta kin kom ajiri ro? Nan in Anij ej kaiñi kom im ba: “Ajiri rõn, komin bokake jememi im jinemi ilo Iroij: bwe men in e jime. Kwon koutiej jemõm im jinõm (eo kien moktata eor kalimur iben).” (Dri Epesõs 6:1-3) Kwon lale bwe ilo am bokake jemem im jinem ej einwõt am ‘koutiej jemõm im jinõm.’ Nan in Greek eo “kautiej” ej melelen “kortokjen” ak “kaorõk.” Inem, kiblie ejjab melelen kwoj jememi im lori wõt kien ko an jemem im jinim kin am watõki einwõt rejjab jimwe. Anij ej kajitõk bwe kwon lukkun kautiej jememi im jinemi im kaorõk nan in tel ko air.—Jabõn Kennan Ko 15:5.
15. Ewi wãwen an ajiri ro maroñ kautiej wõt jemeir im jineir meñe rej lemnak bwe rar bwid?
15 Elañe jemem im jinim rej kõmman juõn men im ej kadiklok am kautiej ir, inem ta? Kwon kate yuk im lale men ko ekkar ñan lemnak ko air. Rar jab “keutak yuk” ke im wõnake yuk? (Jabõn Kennan Ko 23:22) Rejjab ke kõmman men ko kinke rej yokwe yuk? (Dri Hibru 12:7-11) Kwon kautiej jemem im jinim ñe kwoj bwebwenato ibbeir, im ilo jitõb in inemõn kwon kamelele kin ewi lemnak eo am. Meñe remaroñ uak ilo juõn wãwen eo ejjab emõn ibbem, kwon kejbãrok yuk jen am konono ilo juõn jitõb in jab kautiej ñan ir. (Jabõn Kennan Ko 24:29) Kememej kin ewi wãwen an kar David kautiej wõt Saul elaptata ke king eo ear illok jen nan in kakabilek eo an Anij. Kajitõk ibben Jehovah bwe en jibañ yuk bwe kwon kijenmij ilo eñjake ko am. “Komin kwalok buruemi iman,” David ear ba. “Anij ej aduij likepijñak.”—Sam Ko 62:8; Lamentations 3:25-27, New World Translation.
Kautiej Ro Rej Tel Kij
16. Ta eo jemaroñ katak kake jen joñok ko an ri katakin ro rewan im enjel ro?
16 Elder ro ilo congregation ko jitõb kwojarjar eo ej kãlet ir, ak rejjab wãppen wõt im kõmman bwid. (Sam Ko 130:3; Ekklisiastis 7:20; Jerbal 20:28; Jemes 3:2) Eñin unin, jet armij ilo congregation eo remaroñ inebata kin elder ro. Ewi wãwen ad aikwij uak ñe jej baj lemnak bwe ewõr juõn men ilo congregation eo ear jab jimwe air kõmmane? Lale oktak eo ikõtan ri katakin ro rewan ilo ebeben eo kein ka juõn im enjel ro: “A, laptata, [ri katakin ro rewan] rej lor kõniek ilo mõm ko an etton, im kejekron kajur an iroij rõn: rej mõkarkar im bõt, re jab mijõk in konono nae men ko reutiej: Ijoke enjel rõn, meñe relap jen ir ilo kajur im maroñ, re jab bõktok kinaklok im kajirere nae ir, kin air kautiej Jehovah.” (2 Peter 2:10-13, NW) Meñe ri katakin ro rewan rar konono nae “iroij ro—elder ro rej tel congregation in Christian eo ilo ebeben eo kein ka juõn—enjel ro rar jab konono nae ri katakin wan ro me rar kejebel ri tõmak ro nae don. Enjel ro, rej utiejlok im emõnlok air ekajete armij ilo jimwe, rar lo ta eo ear walok ilo congregation eo. Ak, “kin air kautiej Jehovah,” rar likit bwe Anij en ekajete ir.—Dri Hibru 2:6, 7; Jud 9.
17. Ewi wãwen eñjake eo am bwe elder ro rar bwid en kar jelet yuk?
17 Meñe ejjab jimwe wãwen air kamadmõde juõn men, ejjab ke bwe jen tõmak ilo Jesus Christ eo ej mour wõt im Bõran congregation eo an Christian? Ejjab ke bwe ej kile ta eo ej walok ilo congregation eo an ibelakin lal? Ejjab ke bwe jen kautiej wãwen an kajimwe juõn men im kile maroñ eo an ñan anjo ion abañ ko? Emol, ‘wõn kij bwe jen ekajet dri turid?’ (Jemes 4:12; 1 Dri Korint 11:3; Dri Kolosse 1:18) Etke kwojjab bõklok inebata ko am ñan Jehovah ilo jar ko am?
18, 19. Ta eo kwomaroñ kõmmane elañe kwoj lemnak bwe juõn elder ear bwid?
18 Kin an armij jab wãppen, abañ ko remaroñ walok. Jet ien juõn elder emaroñ kõmman bwid. Ad wãlok kin men in ejamin ukõt abañ in. Emaroñ kalaplok e. Ro remeletlet ilo jitõb renaj kõttar Jehovah bwe en kajimwe men ko im lelok kaje ekkar ñan aikwij eo ilo ien im wãwen eo an make.—2 Timote 3:16; Dri Hibru 12:7-11.
19 Ta elañe kwoj inebata kin juõn abañ? Jen am bwebwenato kake ibben ro jet im congregation eo, etke kwojjab kebak elder ro ilo kautiej im bõk jibañ jen ir? Ilo juõn wãwen eo ejelok lotan ie, kwon kamelele kin ewi wãwen men eo ear jelet yuk. Ien otemjej kwoj aikwij bõk lemnak eo bwe “abañ eo an ej am,” im kautiej wõt ir ñe kwoj kwalok buruõm ñan ir. (1 Piter 3:8) Kwon jab kajirere kake ir, ak kwon liki air rittolok ilo jitõb einwõt Christian ro. Kamolol kin jabdewõt nan in rejañ ko rej bedbed ion Jeje ko im remaroñ lewõj ilo joij. Im elañe ewõr aikwij ñan bõk kaje ko jet, kwon liki bwe Jehovah enaj tel elder ro bwe ren kõmman men eo emõn im jimwe.—Dri Galetia 6:10; 2 Dri Tessalonika 3:13.
20. Ta eo jenaj katak kake ilo katak eo tok ilal?
20 Bõtab, ewõr bar juõn men jej aikwij lemnak kake ikijen kañiajo im kautiej ro rej tel kij. Ejjab ke bwe ro reutiej ren kar kautiej ro rej bed iumin kajur eo air? Jen etale men in ilo katak eo tok ilal.
Ewi Wãwen Am Naj Kar Uak?
• Ta un eo emõn unin ad kõnan kautiej ro rej iroij iod?
• Ewi lemnak eo an Jehovah im Jesus kin ro rejjab kautiej ro me Anij ear jitõñ ir?
• Ta joñok ko remõn ewõr ibbeir kin ro rar kautiej ro rar bõk maroñ in tel?
• Ta eo jemaroñ kõmmane elañe juõn eo ej iroij iod ear bwid?
[Pija ilo page 8]
Sarah ear lukkun kautiej maroñ eo an Abraham im lo mõnõnõ
[Pija ilo page 9]
Michal ear likjap in kautiej maroñ in tel eo an David einwõt bõran family im king
[Pija ilo page 11]
“Jeova en bõprae aõ . . . kõtellok peiõ nae e, bwe Jeova e ar kabite!”
[Pija ilo page 12]
Etke kwojjab kwalok buruõm ñan Jehovah ilo jar ko am?