An Wõn Eddo eo ñan Katakin Ajri ro kõn Anij?
“Ejjelok ri katak ej utiejlok jen ri kaki eo an; ak kajojo ri katak ñe edredrelok an katak enaj einwõt ri kaki eo an.”—LUK 6:40, UBS.
ILO jet aelõñ ko, jet jemen im jinen rej l̦õmn̦ak bwe ejjel̦o̦k aer maroñ ñan katakin ajri ro kõn Anij. Etke? Kõnke rej l̦õmn̦ak bwe ejabwe jel̦ãl̦o̦kjen̦ ippãer im rejaje Baibõl̦. Kõn aer l̦õmn̦ak rot in, rej lel̦o̦k bwe ro nukũer im ri tõl ro an kabuñ ko ren katakin ro nejier kõn Anij.
Bõtab, an wõn eddo eo ñan katakin ajri ro kõn Anij im naan in kakapilõk ko an ilo Baibõl̦ eo? Jen lale ta eo Baibõl̦ eo ej ba im keidi men in ippãn katak ak ripoot ko me armej ro rej kõm̦m̦ani ilo raan kein.
Eddo ko An Juon Jemen
Baibõl̦ eo ej ba: “Kom̦, ro jemaer, kom̦win jab poktake ro nejimi ñan illu, a kom̦win kakaajjiririk er ilo kaje im katak ko an Irooj.”—Epesõs 6:4.
Katak im ripoot ko: Ta eo enaaj wal̦o̦k ñe juon jemen ej kijejeto ilo kabuñ? Juon jikuul̦ etan Ball State University ear kõm̦m̦ane juon ripoot im ej ba: “An em̦m̦aan ro bõk kun̦aaer ilo m̦akũtkũt ko an kabuñ enaaj jipañ er bwe en em̦m̦anl̦o̦k aer lale ajri ro nejier. Kabuñ ko rej jipañ armej ro im katakin er kilen aer maroñ kakõm̦anm̦anl̦o̦k mour ko aer.”
Baibõl̦ eo ej ba bwe em̦m̦aan ro rej aikuj katakin ajri ro nejier. (Jabõn Kõnnaan 4:1, UBS; Kolosse 3:21; Hibru 12:9, UBS) Ej ke jerbal wõt naan in kakapilõk kein jãn Baibõl̦ eo ilo raan kein? Juon college ilo Florida ear kõm̦m̦ane juon ripoot im kõmel̦el̦e kõn joñan an juon jemen jelõt ajri ro nejin. Ripoot in ej ba bwe el̦aññe juon jemen ej nikniki ajri ro nejin, ajri rein renaaj m̦õn̦õn̦õ im jel̦ã l̦õmn̦ak kõn ro jet. L̦addik ro nejin enaaj em̦m̦an m̦wilier, im leddik ro nejin enaaj em̦m̦an wãween aer kõl̦mãnl̦o̦kjen̦ im eban l̦ap aer inepata. Aet, naan in kakapilõk ko ilo Baibõl̦ eo rej bar jejjet ñan kõj ilo raan kein.
Aorõkin Eddo ko An Juon Jinen
Baibõl̦ eo ej ba: “Kwõn jab ilo̦k jãn kien jinõm̦.”—Jabõn Kõnnaan 1:8.
Katak im ripoot ko: Ilo kar 2006 eo, rar je juon bok etan Handbook of Child Psychology me ej kõnnaan kõn wãween l̦õmn̦ak im eñjake ko an ajri ro. Bok in ej ba bwe ilo elõñ aelõñ ko ipel̦aakin lal̦ in, el̦apl̦o̦k an kõrã ro jol̦o̦k iien im lale ajri ro jãn l̦õm̦aro. Kõn men in, ñe ajri ro rej rũttol̦o̦k, ekkã aer ãinwõt jineer ilo wãween aer l̦õmn̦ak, kõnnaan, im kõm̦m̦an.
El̦aññe l̦eo im lio rej ippãn doon im katakin ajri ro nejier kõn Anij, ajri ro renaaj lukkuun jeraam̦m̦an. Ewi wãween? M̦oktata, ajri ro renaaj lukkuun yokwe im epaake Jeova Anij im men in enaaj jipañ er ilo aer mour. Kein karuo, ajri ro renaaj katak ewi wãween ri pãlele ro rej aikuj jerbal ippãn doon ñan lo tõprak ilo eddo eo aer. (Kolosse 3:18-20) Meñe enaaj wõr ro jet im renaaj jipañ l̦eo im lio, ak ej aerro eddo ñan katakin ajri ro nejier kõn Anij. Im ej aer bar eddo ñan katak katakin ajri ro kõn men ko Anij ekõn̦aan bwe baam̦le eo en kõm̦m̦ane.
Ewi wãween ro jemen im jinen remaroñ katakin ajri ro nejier? Ta ko enaaj jipañ erro ñan lo tõprak ilo men in?