Jehovah Ej Kaibujuij Armij Ro An Kin Meram

“Kwon jerkak, O kõrã, kwon romak, bwe am meram E mottok, im aibujuij in Jehovah e ar tak iom.”​—ISAIAH 60:​1, NW.

1, 2. (a) Ta wãwen eo an armij? (b) Wõn eo ej bed ilikin marok eo an armij?

“OH, jej aikwiji jet ro ewõr ibbeir mour erreo ak meletlet eo an Isaiah ak Paul!” Eñin kar kain lamõj eo kaburomõjmõj eo an President eo an U.S. Harry Truman ilo yiõ ko 1940. Etke ear konono nan kein? Kinke ear eñjake aikwij eo ñan mour erreo eo emõntata ñan ri tel ro ilo lalin ilo ien ko an. Armij rar toloñe im kijon juõn tõre eo emarok ilo ebeben eo kein ka 20, ilo tarinae eo an lal kein karuo. Bõtab, meñe tarinae eo ear jemlok, lalin ear jab bed ilo ainemõn. Marok ear etal wõt. Emol, 57 yiõ ko elikin an jemlok tarinae eo, lalin ear bed wõt ilo marok. Elañe President Truman ear mour rainin, ejelok bere ej naj kar lo wõt aikwij eo kin mour erreo an ri tel ro ilo wãwen eo an Isaiah ak ri jilek Paul.

² Jejjab jelã elañe President Truman ear jelã menin, ak ri jilek Paul ear konono kin marok eo ej jelet armij, im ear kakkõl kake ilo jeje ko an. Ñan wanjoñok, ear kakkõl ri tõmak ro mõttan: “Bwe aruij oktak e jab iben bõtõktõk im kõniek, a iben jitõb ro, iben ro re kajur, iben ro iroij in marok i lõl, iben jeran jitõb renana ijo ko i lõñ.” (Dri Epesõs 6:​12) Kin nan kein Paul ear jab kwalok wõt bwe ear wõr an jelã kin marok eo ilo jitõb ej kalibubu lalin ak bareinwõt bwe ear jelã unjen eo emol​—kajur eo an dimon ilikin marok eo an lalin, im ta eo armij emaroñ kõmmane ñan joloke?

3. Meñe emarok wãwen eo an armij, ta eo Isaiah ear kanan kake ñan ro retiljek?

³ Eindeinlok Isaiah ear konono kin marok eo ej jelet armij. (Aiseia 8:​22; 59:9) Bõtab, ilo an reimantak ñan ran kein ad, ear kanan ilo nan in kakõrmol bwe wãwen eo ilo ien kein remarok, Jehovah enaj kameramlok ilju eo an ro rej yokwe meram. Aet, meñe ejako Paul ak Isaiah ibbed, ewõr ibbed jeje in kakõrmol ko air ñan tel kij. Ñan lo ta jerammõn in ñan ro rej yokwe Jehovah, jen lemnak kin nan in kanan ko an Isaiah jej loi ilo chapter eo kein ka 60 in book eo an.

Juõn Kõrã in Kanan Ej Kameram

4, 5. (a) Ta eo Jehovah ej kaiñ juõn kõrã ñan an kõmmane, im ta eo ej kallimur kake? (b) Ta melele eo ekairujruj ebed ilo Isaiah chapter 60?

⁴ Nan ko moktata ilo Aiseia 60 rej ñan juõn kõrã eo ej bed ilo juõn wãwen eo ekanuij kaburomõjmõj​—ilo marok, ej babu im jarleplep ion bũdej ilo marok jilõñlõñ. Ilo idiñ, meram ej debloke marok eo, im Jehovah ej lamõj: “Kwon jerkak, O kõrã, kwon romak, bwe am meram E mottok, im aibujuij in Jehovah ear tak iom.” (Isaiah 60:​1, NW) Emwij an mottok ien eo ñan an kõrã eo (kõrã in kõkkar eo) jutak im kalikar meram eo an Anij, aibujuij eo an. Etke? Jej lo uak eo ilo eon in tok ilokan: “Bwe, lo! marok e naj kalibubu lõl, im marok jiliñliñ, ro dri ailiñ ko; a Jeova e naj tak iom, im naj lo An aibujuij iom.” (Aiseia 60:2) Ke kõrã eo ej bokake nan in jiroñ eo an Jehovah, enaj bõk juõn tokjen emõn. Jehovah ej ba: “Im ro dri ailiñ ko re naj itok ñõn maram eo am, im kiñ ro ñõn rabõlbõl in am tak.”​—Aiseia 60:3.

⁵ Nan kein rekairujruj ilo eon kein jilu rej jimor juõn nan in ijjino ñan im juõn elij in ta eo ej bed ilo bwen mõttan eo ilo Aiseia chapter 60. Ej kanan kin bwebwenato in juõn kõrã in kanan im kamelele kin wãwen ad maroñ bed ilo meram eo an Jehovah meñe marok ej bed ion armij. Ak, ta eo kakõlle ko ilo eon in ijjino kein jilu rej jutak kake?

6. Wõn kõrã eo ilo Isaiah chapter 60, im wõn ro rej jutak ikijen ion lal?

⁶ Kõrã eo ilo Aiseia 60:​1-3 ej Zion, dolul in jitõb ro an Jehovah ijoko ilañ. Rainin, bwen ro ilo “Israel eo an Anij,” congregation eo ibelakin lal an Christian ri kabit ro ilo jitõb, ro kejatdikdik eo air ej ñan bõk jerbal in iroij ibben Christ ilañ, ir eo rej jutak ikijen Zion ilo lalin. (Dri Galetia 6:​16) Ailiñ in ilo jitõb tarlep in ro uan ej 144,000, im an jejjet kitien Aiseia chapter 60 ilo ran kein ej jitõñlok ñan ro rej mour ion lal ilo “ran ko eliktata.” (2 Timote 3:1; Reveles̃õn 14:1) Kanan eo elap wõt ijo ej ba kake kin ro rejetan Christian ri kabit ro, “jar elap” eo in “sheep ro jet.”​—Revelation 7:​9, NW; John 10:​16, NW.

7. Ta kar wãwen eo an Zion ilo 1918, im ewi wãwen kar kanan kin menin?

⁷ Ear wõr ke juõn ien “Israel eo an Anij” ear bed ilo marok, einwõt an kar kõrã in kanan in annañelok? Aet, menin ear walok elõñlok jen 80 yiõ ko remotlok. Ilo ien tarinae eo an lal kein kajuõn, Christian ri kabit ro rar kate ir kejbãrok an wõnmanlok wõt jerbal in kwalok nan eo. Ak ilo 1918, yiõ eo eliktata ilo tarinae eo, jerbal in kwalok nan eo ear bõjrak. Joseph F. Rutherford, eo ear tel ilo jerbal in kwalok nan eo ibelakin lal, im Christian ro jet rebuñbuñ rar likit ilo kalbuj kin narueir ko rar jab mol. Ilo book in Revelation, Christian ri kabit ro rar bed wõt ion lal ilo ien eo rar kwalok kake ir ilo kanan einwõt enbwin ko remij rej babu “ilo ial in jikin kwelok elap eo naetan ekar ñõn jitõb, Sodõm im Ijipt.” (Reveles̃õn 11:8) Emol menin ear juõn ien marok ñan Zion, einwõt ajiri ro ri kabit nejin ion lal!

8. Ta oktak eo ear walok ilo 1919, kin ta tokjen eo?

⁸ Bõtab, ilo yiõ eo 1919 ear walok juõn oktak ekabwilõñlõñ. Jehovah ear kameramram ion Zion! Ro rar ellã im mour ilo Israel eo an Anij rar emmakit ñan kwalok meram eo an Anij, im ilo beran bar juõn alen keañ kin news eo emõn. (Matu 5:​14-​16) Kamolol ñan Christian rein rar bar lotak im kijejeto, ri kabit ro im jar eo elap rar ruaklok ñan meram eo an Jehovah. Ñan jinoe, ri kãl ro kar kabit ir einwõt ro rej kobalok im uan Israel eo an Anij. Rej kir ir einwõt king ro ilo Aiseia 60:3, ke ir rej ri jolet ibben Christ ilo Ailiñ in Anij ilañ. (Reveles̃õn 20:6) Tokelik, juõn jar elap in sheep ro jet rar ruaklok ñan meram eo an Jehovah. Rein rej “dri ailiñ ko” rej kwalok kake ir ilo kanan eo.

Ajiri ro Nejin Kõrã eo Rej Itok ñõn Mweo!

9, 10. (a) Ta men in kabwilõñlõñ eo kõrã eo ej loe, im ta eo menin ear annañelok iman? (b) Ta un eo ear wõr ibben Zion ñan lañliñ?

⁹ Kiõ, Jehovah ej jino lelok elõñlok tibdik ko, einwõt ilo kõkkar, kin melele eo kar karõke ilo Aiseia 60:​1-3. Ej lelok ñan kõrã eo bar juõn nan in jiroñ. Roñjake ta eo ej ba: “Kwon reiliñlok iturõm im lo!” Kõrã eo ej bokake, im juõn menin kõmãnãn buru ke ej loe! Ajiri ro nejin rej itok ñan mweo. Jeje eo ej wõnmanlok wõt im ba: “Ir otemjej rej kweloktok, rej itok ñõn ibbam. Lõmaro nejõm re naj itok jen etolok, im limaro nejõm, re naj bõktok ir ilo peir.” (Aiseia 60:4) Nan in keañ eo kin Ailiñ eo ibelakin lal me ear ijjino ilo 1919 ear bõktok thousand ro rekãl ñan jerbal eo an Jehovah. Rein bareinwõt rar oktak im “lõmaro” im “limaro” nejin Zion, ri kabit ro uan Israel eo an Anij. Kin menin, Jehovah ear kaibujuij Zion ilo an bõktok ro eliktata uan 144,000 eo ñan meram eo.

¹⁰ Kwo maroñ ke lo lañliñ eo an Zion kin an ajiri ro nejin bed ibben? Ak, Jehovah ej lelok ñan Zion bar juõn un eo ñan lañliñ. Jej konono: “Im kwo naj lo im joerer mejõm, im buruõm e naj lujluj im laplok; bwe naj ukot obrõk an lometo ñõn kwe, mweiuk ko mweien dri ailiñ ko re naj itok ñõn ibõm.” (Aiseia 60:5) Ilo errã ibben nan in kanan kein, jen 1930 ko, jarlepju in Christian ro me kejatdikdik eo air ej ñan mour ion lal ñan indio rar ibweptok ñan Zion. Rar wanliñtak jen “lometo” in jebliklik eo an armij jen Anij im jutak ikijen mweie ko an ailiñ ko. Rej “men in aorõk ko an ailiñ ko otemjej.” (Haggai 2:​7, NW; Aiseia 57:20) Lale bareinwõt, bwe “men in aorõk” kein rejjab etal im karejar ñan Jehovah kajjojo iair ilo ial eo an make. Jab, rej kobaiklok ñan aibujuij eo an Zion ikijen air itok im kabuñ ilo air kobalok ibben ri kabit ro jeiir im jatiir, oktak im “juõn bwij” ibbeir iumin “juõn s̃eperd.”​—Jon 10:16.

Ri Wia ro, Shepherd ro, im Ro Rej Kõrrã Mweiuk Rej Itok ñan Zion

11, 12. Kwalok wãwen an jar eo elap emmakitlok ñan Zion.

¹¹ Tokjen eo ej walok jen aintok in kar kanan kake ej juõn laplok eo emõn in oran ro rej nebar Jehovah. Menin kar kanan kake ilo nan kein tok ilokan in kanan eo. Kalmenlokjen bwe kwoj jutak ibben kõrã in kanan eo ion Tol Zion. Kwoj reilok ñan rear, im ta eo kwoj loe? “Kamel ko relõñ re naj kalibubu yuk, kamel ko remõn drer jen Midian im Ipa; ir otemjej jen Shiba re naj itok; re naj bõktok gold im frankinsens, im naj kwalok nebar ko an Jeova.” (Aiseia 60:6) Jar in ri wia ro rej tel kamel ko air ilo ial ko lok ñan Jerusalem. Eokwe, kamel ko rej einwõt juõn ibwijleplep eo ej kalibubu ene! Ri kõrrã ro rej bõk menin lelok ko raorõk, “gold im frankincens.” Im ri wia rein rej itok ñan meram eo an Anij bwe ren tũblotake e ilobwilij, ‘ñan kejelã kin nebar eo an Jehovah.’

¹² Ejjab ri wia ro wõt rej emmakitkit. Shepherd ro bareinwõt rej ibweplok ñan Zion. Kanan eo ej wõnmanlok im ba: “Bwijin kiru otemjej jen Kidar​—naj kokweloktoki ñõn ibõm. Sip koman ko jen Nebaiot​—naj korijer ñõn kwe.” (Aiseia 60:7a) Bwijin shepherd ro rej itok ñan jikin kwelok eo ekwojarjar in lelok menin lelok ko air remõntata jen bwijin kau ko air ñan Jehovah. Rar bar make lelok ir make ñan air karejar ñan Zion! Ewi wãwen an Jehovah bõk ruwamaejet rein? Anij make ej uak: “Re naj wõnliñtok men in kabuñburõ ion lokatok eo Aõ, im I naj kaibujuij mweo imõn Aõ aibujuij.” (Aiseia 60:7b) Jehovah ilo joij ej bõk menin lelok ko im karejar eo an ruwamaejet rein. Air bed ijo ej kaibujuij temple eo.

13, 14. Ta eo rej lo an itok jen kabilõñ?

¹³ Kiõ ukõtlok bõram im lalelok iaejetlok ijo iturilik. Ta eo kwoj loe? Ilo kõtan eo ettolok, ewõr juõn men eo einlok wõt juõn kõdo emouj ejeded iaejetlok in lometo eo. Jehovah ej kajitõk kin men eo ej bed ilo lemnak eo am: “Wõn rein im rej kãtok im einwõt juõn kõdo, im einwõt mule ko ñan imõn roñ ko air?” (Aiseia 60:8) Jehovah ej uak kajitõk eo an make: “Emol ailiñ ko redrik re naj kõtar Iõ, im wa ko an Tarshish mokta, bwe ren ektõktok lõmaro nejõm jen etolok, air silver im gold ibeir, kin etan Jeova am Anij, im kin Dri Kwojarjar eo an Israel, bwe E ar kaibujuij yuk.”​—Aiseia 60:9.

¹⁴ Kwo maroñ ke kalmenlokjen kin wãwen eo ijo? Kõdo eo emouj ear ebaktok im kiõ ilo lale ej einwõt juõn dolul edik in jar in armij retolok ñan kabilõñ. Ilo lale einwõt juõn iur in bao ko rej ebbebe ion no ko. Ak ke rej ebaktok wõt, kwoj lo bwe wa men ko ibben wõjlã ko air relõtlõt bwe kõto en uuki. Ekanuij lõñ wan lojet ko rej jeraklok ñan Jerusalem me rej einlok wõt juõn iur in mule ko. Jen harbor ko retolok, inej in wa ko rej jerakrõk joñan air mõkaj ñan bõktok ri tõmak ro ñan air kabuñ ñan Jehovah.

Dolul eo an Jehovah Ej Jededlok

15. (a) Ta laplok eo nan ko an Isaiah 60:​4-9 ear kanan kake? (b) Christian ro remol ta jitõb eo rej kalikare?

¹⁵ Juõn pija in kanan eo ekameramram ilo eon kein 4 ñan 9 pija in jededlok eo ej walok ibelakin lal ear jino walok jen 1919! Etke Jehovah ear kajerammõn Zion kin kain laplok rot in? Kinke jen 1919, Israel eo an Anij ear ilo bokake im niknik karomak meram eo an Jehovah. A kwar lo kwe, bwe ekkar ñan 7 eon, ri kãl ro rej jikrõktok im “itok ion lokatok eo an An”? Juõn lokatok ej ijo menin katok ko rej kõmman ie, im menin kanan in ej kakememej kij bwe jerbal eo an Jehovah ekoba menin katok. Ri jilek Paul ear je: “Ij akwelap ñõn kom . . . bwe komin lelok enbwinemi men in jurtak emour, ekwojarjar, men in kabuñburuen Anij, eñin ami jerbal men in Jitõb.” (Dri Rom 12:1) Ilo errã ibben nan ko an Paul, Christian ro remol ejjab bo burueir kin air baj bed wõt ilo kwelok ko an kabuñ juõn alen ilo juõn week. Rej ajelok ien ko air, maroñ, mweiuk ñan kalaplok kabuñ eo erreo. Bed ilo kain kwelok rot in an ri kabuñ rein retiljek ejjab kaibujuij mweo imõn Jehovah ke? Kanan eo an Aiseia ej ba bwe enaj. Im jemaroñ liki bwe kain ri kabuñ rot in ewõr air kijejeto, rej aibujuij ilo mejen Jehovah.

16. Wõn ro rar lelok jibañ ilo jerbal in ekkal eo ilo ien ko etto, im wõn ro rej kõmman eindein ilo ran kein?

¹⁶ Ri kãl ro rekõnan jerbal. Kanan eo ej etal wõt im ba: “Im ro drua maijet re naj kalek worwor ko am, im kiñ ro air re naj korijer ñõn yuk.” (Aiseia 60:10) Ilo jejjet in kitien eo moktata in nan kein ilo ran ko kin jeblak eo jen kamakoko ilo Babylon, king ro im ro jet jen ailiñ ko rar lukkun jibañ ilo bar kalek temple eo im jikin kwelok eo ilo Jerusalem. (Ezra 3:7; Nihimaia 3:​26) Ilo jejjet in kitien eo ilo ran kein, jar eo elap ej jurake bwen ri kabit ro ilo kalek kabuñ eo emol. Rar jibañ ñan kalek congregation ko an Christian im kin menin kakajurlok worwor ko an jikin kwelok eo einwõt dolul eo an Jehovah. Rej bareinwõt bõk kunair ilo juõn jerbal in ekkal​—ekkal Kingdom Hall ko, Assembly Hall ko, im jikin ko an Bethel. Ilo aolepen wãwen kein, rej jurake ri kabit ro jeiir im jatiir ilo kejbãrok aikwij ko ñan kajededlok dolul eo an Jehovah!

17. Ta juõn wãwen eo Jehovah ej kaibujuij armij ro an?

¹⁷ Ej menin kõketak ilo nan ko eliktata ilo Isaiah 60:10! Jehovah ej ba: “Bwe ilo Aõ illu I ar mõn yuk, a ilo Aõ yokwe I ar tiriamokake yuk.” Aet, ilo 1918/19, Jehovah ear kajeik armij ro an. Ak menin kar ilo ien ko remotlok. Kiõ eien ñan an Jehovah kwalok an tiriamokake ñan ri kabit ri karejar ro an im sheep ro jet rejetair. Menin kamol eo bwe menin ej eindein ej ikijen laplok eo im ej kajerammõn ir make, ‘kaibujuij ir,’ einwõt ilo kõkkar.

18, 19. (a) Ta kallimur eo Jehovah ej kõmmane ñan ro rekãl im rej itok ñan loan dolul eo an? (b) Ta eo bwen eon ko ilo Isaiah chapter 60 rej jiroñ kij kake?

¹⁸ Kajjojo yiõ, bar jet buki thousand “drua maijet ro” rej kobalok ibben dolul eo an Jehovah, im ial eo enaj bellok wõt ñan elõñlok ñan air lor ir. Jehovah ej ba ñan Zion: “Aor ko am re naj bellok ien otemjej; jamin kilek ran ak boñ; bwe armij ren bõktok ñan kwe mweiuk ko mweien ro dri ailiñ ko, im king ro air ro renaj tel.” (Isaiah 60:​11, NW) Jet ri jumae rej kajeoñ in kili “aor ko,” ak jejelã bwe rejamin lo tõbrak. Jehovah make ear ba bwe aor ko renaj bellok wõt. Laplok eo enaj wõnmanlok wõt.

¹⁹ Ej lõñ wõt wãwen ko jet me Jehovah ear kajerammõn armij ro an, kõmman bwe ren aibujuij ilo ran kein eliktata. Bwen eon ko ilo Isaiah 60 rej kalikar ilo kanan ta wãwen kein.

Kwo Maroñ Ke Kamelele?

• Wõn “kõrã” eo an Anij, im wõn ro rej jutak ikijen ion lal?

• Ñããt eo ajiri ro nejin Zion rar babu im bedo ion bũdej, im ñããt im ewi wãwen air kar “jerkak”?

• Ewi wãwen an kar Jehovah kanan kin laplok eo an ri kwalok ro an Ailiñ rainin, ilo an kajerbal kajjo kain kakõlle ko?

• Ilo wãwen et ko Jehovah ear kõmman bwe meram eo an en romak ion armij ro an?

[Pija eo ilo peij 20]

“Kõrã” eo an Jehovah ej bõk kaiñ ñan jutak

[Pija eo ilo peij 22]

Inej in wa ko ilo lale ej einwõt mule ko iaejetlok