Wãween ko Jemaroñ Oktak jãn Lal̦ In

1. Ta eo Jijej ear kaalikkare ilo kar boñõn eo an ãliktata ilo lal̦ in?

ILO boñõn eo ãliktata Jijej ear mour ioon lal̦ in, ear inepata kõn men ko me remaroñ wal̦o̦k ñan rũkal̦oor ro an ilo naaj raan ko im̦aan. Joñan ear bar jar ñan Jemen im ba: “Ijjab jar bwe Kwõn bõk er jãn lal̦, a bwe Kwõn kõjparok er jãn eo enana. Rejjab jãn lal̦, ãinwõt Ña Rejjab jãn lal̦.” (Jon 17:15, 16) Ilo kar jar in an, Jijej ear kwal̦o̦k an lukkuun yokwe rũkal̦oor rein an. Jar in an ear bareinwõt kaalikkar joñan an aorõk naan ko ear kwal̦o̦k ñan er m̦oktal̦o̦k ke ear ba: “Kom̦ jab an lal̦.” (Jon 15:19) Naan kein an Jijej rar kaalikkar joñan an kar kõn̦aan bwe rũkal̦oor ro an ren jenolo̦k im oktak jãn armej ro ilo lal̦ in!

2. Ta mel̦el̦ein an kar Jijej ba “lal̦ in”?

² Ta mel̦el̦ein an kar Jijej ba “lal̦ in”? Eokwe, ear jab kõnono kõn lal̦ in me jej jokwe ie. Ear kõnono kõn armej ro me rejjab epaake Anij. Setan ej irooj ioon armej rein. El̦ap aer l̦õmn̦ak kõn er make im eutiej bũrueer ãinwõt Setan. (Jon 14:30; Epesõs 2:2; 1 Jon 5:19) Elukkuun alikkar bwe el̦aññe jabdewõt armej ‘ej jerãik lal̦ in ej kõjdate Anij.’ (Jemes 4:4, UBS) Ro me rekõn̦aan pãd ilo yokwe eo an Anij remaroñ ke oktak jãn lal̦ in? Aet. Ewi wãween? Eokwe, jen etale l̦alem wãween ko. Kein kajuon, jej aikuj tiljek wõt ñan Aelõñ eo an Anij im jab bõk kun̦aad ilo m̦akũtkũt ko an kien ko an lal̦. Kein karuo, jej aikuj kõjparok kõj jãn kajoor eo an Setan. Kein kajilu, jej aikuj karbõb im erreo ilo ãnbwin. Kein kaemãn, jen jab arõk jããn im yokwe m̦weiuk ko. Kein kal̦alem, jej aikuj kõn̦ak kein tarin̦ae ko ad jãn Anij.

TILJEK WÕT ÑAN JEOVA IM JAB BÕK KUN̦AAD ILO M̦AKŨTKŨT KO AN KIEN KO

3. (1) Etke Jijej ear jab bõk kun̦aan ilo m̦akũtkũt ko an kien? (2) Etke jemaroñ ba bwe ri kapit ro an Jijej rej jerbal ãinwõt ri kõnono ro ñan Aelõñ eo an Anij? (Jouj im bar lale kõmel̦el̦e jiddik ko itulõñ.)

³ Ke Jijej ear pãd ilo lal̦ in, ear jab bõk kun̦aan ilo m̦akũtkũt ko an kien. Ear kõm̦m̦ane wõt jerbal in kwal̦o̦k naan eo an kõn Aelõñ eo an Anij. Eñin ej aelõñ eo ak kien eo me Jijej enaaj kar erom Kiiñ im Ri Tõl ie. (Daniel 7:13, 14; Luk 4:43) Eñin unin Jijej ear ba ñan komja eo jãn Rom etan Pontiõs Pailat: “Aelõñ eo Aõ ejjab jãn lal̦ in.” (Jon 18:36) Rũkal̦oor ro rej tiljek wõt ñan Kũraij im rej l̦oore joñak eo an ilo aer tiljek wõt ñan Aelõñ eo an Anij. Rej bareinwõt kwal̦o̦k naan kõn Aelõñ ak Kien in ijoko otemjej. (Matu 24:14) Rijjelõk Paul ear ba: “Kõmij kõnono waj ilo etan Kũraij . . . ilo etan Kũraij kõm akwel̦ap ñan kom̦, bwe kom̦win kõtl̦o̦k bwe Anij en ukot kom̦ jãn ami kõjdate ñan ami ro jeran.”a​—2 Korint 5:20, UBS.

4. Ewi wãween an aolep Kũrjin ro rem̦ool kwal̦o̦k bwe rej tiljek wõt ñan Aelõñ eo an Anij? (Jouj im bar lale bo̦o̦k eo, “Kũrjin ro M̦okta Rar Jab Bõk Kun̦aaer ilo M̦akũtkũt ko an Lal̦.”)

⁴ Jet aelõñ ko rej jilkinl̦o̦k juon aer ri kõnono (ambassador) ñan aelõñ ko jet. Ta jerbal eo an ri kõnono in? Eokwe, ejjab bõk kun̦aan ilo m̦akũtkũt ko an kien eo an aelõñ eo rar jilkinl̦o̦ke ñane. Jerbal eo an ri kõnono in ej ñan kwal̦o̦k kõn jibadbad im kõttõpar ko an kien eo an ñan aelõñ eo me rar jilkinl̦o̦ke ñane. Ãindein rũkal̦oor ro an Kũraij me em̦õj kar kapit er. Ri kapit rein rej “ri aelõñ in lõñ.” (Pilippai 3:20, UBS) El̦ap an ri kõnono rein an Kũraij kijejeto ilo aer kwal̦o̦k naan kõn Kien ak Aelõñ eo an Anij. Jejaam̦ ba men in? Eokwe, em̦õj aer jipañ elõñ milien “jiip” ro jet an Kũraij bwe ren maroñ erom “ro jeran” Anij. (Jon 10:16; Matu 25:31-40) Innem, “jiip” rein ak armej rein rej wõnm̦aanl̦o̦k wõt im jipañe ri kapit ro ilo jerbal eo aer. Ilo wãween in, armej rein rej jerbal ãinwõt ri jipañ ro an Kũraij. Armej rein im ri kapit ro rej bõrokuk ippãn doon im kwal̦o̦k kõn Aelõñ eo an Anij. Eñin unin rejjab bõk kun̦aaer ilo jabdewõt m̦akũtkũt ko an jabdewõt kien ko ilo lal̦ in.​—Aiseia 2:2-4.

5. Bar ta juon iaan un ko Kũrjin ro rejjab bõk kun̦aaer ilo m̦akũtkũt ko an kien ko ilo lal̦ in?

⁵ Ro rej m̦ool in Kũrjin rejjab bõk kun̦aaer ilo m̦akũtkũt ko an kien ko ilo lal̦ in kõnke rej tiljek wõt ñan Kũraij. Bõtab, ejjab un eo de in wõt. Bar juon un rejjab bõk kun̦aaer ilo m̦akũtkũt ko an lal̦ in ej kõnke rej m̦õttan baam̦le eo el̦ap an Jeova ipel̦aakin lal̦ in. (Matu 28:19; 1 Piter 2:9) El̦aññe jej rejetake kien ko an lal̦ in, enaaj pen ad juon wõt ippãn Kũrjin ro jet m̦õttad ilo aelõñ ko jet. Enaaj bar pen ad kwal̦o̦k naan im ba bwe kien eo wõt an Anij emaroñ jipañ armej ro. (1 Korint 1:10) Bareinwõt, jet iien ewõr tarin̦ae ko ikõtaan ruo aelõñ ko. El̦aññe jen kar rejetake juon iaan kien kein, jenaaj kar ilo̦k im tarin̦aek im m̦ane ri tõmak ro m̦õttad ilo aelõñ eo juon. (Jon 13:34, 35; 1 Jon 3:10-​12) Eñin unin Jijej ear ba ñan rũkal̦oor ro an bwe ren jab bõk kun̦aaer ilo tarin̦ae ko. Ear bareinwõt jiroñ er bwe ren yokwe armej ro me rej kõjdate er.​—Matu 5:44; 26:52; jouj im lale bo̦o̦k eo etan “Ij Ke Tiljek Wõt ñan Jeova?”

6. Kiiõ ke em̦õj ad ajel̦o̦k mour ko ad ñan Anij, ewi joñan ad kõttãik kõj ñan “Sizar” ak kien ko an lal̦ in?

⁶ Bok in 1 Korint 6:19, 20 ej ba: “Kom̦ jab ami make, bwe em̦õj wiaik kom̦ kõn juon on̦eãn.” Elukkuun jim̦we im m̦ool naan kein ilo eoon kein. Etke? Kõnke Kũrjin ro rem̦ool rar ajel̦o̦k mour ko aer ñan Anij. Rar jab ajel̦o̦k mour ko aer ñan jabdewõt armej, doulul ak jabdewõt kien ko ilo lal̦ in. Kõn men in, meñe rũkal̦oor ro an Jijej rej “lel̦o̦k ñan Sizar men ko an Sizar,” rej bareinwõt lel̦o̦k “ñan Anij men ko an Anij.” Ta men kein an “Sizar” me Kũrjin ro rej lil̦o̦k ñane? Eokwe, rej kwal̦o̦k kautiej ñan kien ko ilo aelõñ ko rej jokwe, rej kõl̦l̦ã eowõj, im pokaki kien ko el̦aññe rejjab n̦ae Baibõl̦. (Mark 12:17; Rom 13:1-7) Ak ta jet iaan men kein an Anij? Eokwe, ej kitibuj aer kabuñ ñan Anij, yokwe e kõn aolepen bũrueer, im aer pokake im tiljek wõt ñan e. Joñan aer yokwe Anij, rej m̦õn̦õn̦õ in mej kõn e.​—Luk 4:8; 10:27; Jerbal 5:29; Rom 14:8.

KÕJPAROK KÕJ JÃN L̦ÕMN̦AK KO AN LAL̦ IN

7, 8. (1) Wõn eo ej tõlpiloik enañin aolep armej ro ilo lal̦ in? (2) Ta ko armej ro rej kõm̦m̦ani el̦aññe rej jino aer bõk wãween l̦õmn̦ak ko an Setan?

⁷ Bar juon wãween me Kũrjin ro rej jenolo̦k im oktak jãn lal̦ in ej ilo aer kõjparok er jãn l̦õmn̦ak ko renana an lal̦ in. Paul ear ba bwe jaar jab bõk “jetõb an lal̦” ak wãween l̦õmn̦ak ko renana an armej in lal̦ in. L̦õmn̦ak kein rej itok jãn Setan. Bõtab, Paul ej ba bwe jaar bõk l̦õmn̦ak ko an Anij. (1 Korint 2:12) Ke Paul ear jejel̦o̦k ñan Ri Epesõs, ear bar kakeememej er bwe em̦õj aer ilo̦k jãn l̦õmn̦ak ko renana an armej in lal̦ in. Em̦õj aer kar bõjrak jãn kain l̦õmn̦ak kein me rej itok jãn Setan, “eo ej irooj ioon armej ro rejjab pokake Anij.”​—Epesõs 2:2, 3, UBS.

⁸ Wãween an armej ro ilo lal̦ in l̦õmn̦ak ej itok jãn Setan. Ñe armej ro rej l̦õmn̦ak ilo wãween in, men in ej kõm̦m̦an bwe ren jab pokake Anij im kõm̦m̦an bwe en wal̦o̦k “m̦õm̦ an kanniõk” im “m̦õm̦ an mej ko.” (1 Jon 2:16; 1 Timote 6:9, 10, UBS) Etke el̦ap an ajeeded l̦õmn̦ak kein an Setan? Kein kajuon, armej rejjab weeppãn im epidodo aer m̦õn̦õn̦õ kaki men ko renana. Kein karuo, armej ro remaroñ bõk l̦õmn̦ak kein an Setan ilo aer jab jel̦ã kake. Kein kajilu, Setan ejjab bõjrak jãn an kajjioñ kareel armej ro bwe ren l̦õmn̦ak ãinwõt e. L̦õmn̦ak kein an Setan rej ãinwõt mejatoto. Rej pãd aolep jikin im remaroñ jelõt jabdewõt armej. Ta ko juon armej ej kõm̦m̦ani el̦aññe ej jino an bõk wãween l̦õmn̦ak ko an Setan? Eokwe, armej in emaroñ jino an l̦õmn̦ak kõn e make, utiej bũruon, im arõk m̦weiuk. Emaroñ kõm̦m̦an bwe en l̦ap an jum̦ae im kõm̦m̦ani jabdewõt men ekõn̦aan ilo mour jekdo̦o̦n ñe ebõd men eo. Ilo tukadu, jemaroñ ba bwe l̦õmn̦ak ko an armej in lal̦ in remaroñ kõm̦m̦an bwe kõn̦aan im kõm̦m̦an ko an Tepil̦ eo ren eddek im pen ilo bũruon armej eo.​—Jon 8:44; Jerbal 13:10, UBS; 1 Jon 3:8, 10.

9. Ewi wãween l̦õmn̦ak ko an armej in lal̦ in remaroñ jelõt l̦õmn̦ak ko am̦ im bũruom̦?

⁹ Wãween an lal̦ in l̦õmn̦ak emaroñ ke jelõt l̦õmn̦ak ko am̦ im bũruom̦? Aet, el̦aññe kwõjjab kõjparok. (Jabõn Kõnnaan 4:23) Ñan waanjoñak, jemaroñ jab kile an l̦õmn̦ak kein jelõt kõj ilo ad m̦õttaik armej ro me jej l̦õmn̦ak bwe ejjab nana m̦wilier meñe jejel̦ã bwe rejjab yokwe Jeova. (Jabõn Kõnnaan 13:20; 1 Korint 15:33) L̦õmn̦ak kein remaroñ bar jelõt kõj el̦aññe jej riit bok ko me rejakkar, alwõj pija ko rettoon ilo Internet, im lali Web site ko an ri jum̦ae ro. Bareinwõt l̦õmn̦ak kein remaroñ jelõt kõj el̦aññe jej bõk kun̦aad ilo menin kam̦õn̦õn̦õ ko rejakkar im iukkure ko me el̦ap jiãiik doon ie. Ilo m̦ool, jabdewõt men ak armej ilo lal̦ in me rej rejetake l̦õmn̦ak im kõn̦aan ko an Setan ak jukjuk im pãd in enana remaroñ jelõt l̦õmn̦ak ko am̦ im bũruom̦.

10. Ta ko jemaroñ kõm̦m̦ani ñan kõjparok kõj jãn l̦õmn̦ak ko an armej in lal̦ in?

¹⁰ Ta ko jemaroñ kõm̦m̦ani ñan kõjparok kõj jãn l̦õmn̦ak ko an armej in lal̦ in? Ewi wãween jemaroñ kate kõj bwe jen pãd wõt ilo yokwe eo an Anij? Eokwe, jen jar aolep iien im kajjitõk bwe Anij en letok kajoor eo an. Jen bar kortokjãn aolep men ko me Jeova ej litoki ñan kõj ãinwõt Baibõl̦ eo, kweilo̦k ko an eklejia, im men ko ãierl̦o̦kwõt. El̦apl̦o̦k an Jeova kajoorl̦o̦k jãn Tepil̦ im jabdewõt armej ak men ko renana ilo lal̦ in an Setan. (Jemes 4:7) Eñin unin elukkuun aorõk bwe jen kepaake wõt Jeova iien otemjej ilo ad jar ñan e!

KARBÕB IM ERREO

11. Wãween an armej in lal̦ in l̦õmn̦ak ej alikkar ilo nuknuk ko aer im paotokier. Ewi wãween?

¹¹ Wãween an armej ro l̦õmn̦ak ej alikkar ilo nuknuk ko aer im paotokier. Men kein rej kaalikkar el̦aññe rej l̦oore l̦õmn̦ak ko an Anij, ñe eab l̦õmn̦ak ko an armej in lal̦ in. Ñan waanjoñak, joñan an nana nuknuk ko armej ro rej kõn̦aki raan kein, ekõm̦m̦an bwe en wal̦o̦k l̦õmn̦ak im kõn̦aan ko rejakkar ñan armej ro jet. Joñan, juon nuujpeba ej ba bwe leddik jiddik ro ilo raan kein rekõn̦aan kõn̦ak wõt nuknuk ko rebab im kadu im el̦ap an kwal̦o̦k ãnbwinnier. Jet relukkuun jaje m̦anit kõnke wãween aer nuknuk ej kaalikkar bwe rekõn̦aan jum̦ae im rejjab kea kõn ta eo enaaj wal̦o̦k ñan er.

12, 13. Ta naan in kakapilõk ko jej aikuj l̦oori bwe jen maroñ karbõb im erreo wõt?

¹² Jej armej ro doon Jeova. Kõn men in, wãween ad nuknuk ej aikuj ekkar, karbõb, erreo, im en jab kal̦õkatip ro jet. Aolep iien nuknuk ko ad “ren ekkar” im jej aikuj erreo. Eaorõk men in ñan aolep ro me rej “kwal̦o̦k aer tõmak” ilo Anij. Bõtab, jen keememej bwe unin ad aikuj karbõb im erreo ejjab ñan bõktok nõbar ñan kõj make. Jej kõm̦m̦ane men in kõnke jekõn̦aan “pãd wõt ilo yokwe eo an Anij.” (1 Timote 2:9, 10; Jud 21, UBS) Meñe eaorõk bwe jen erreo im karbõb, ebar wõr juon men me “ekanooj aorõk im̦aan mejãn Anij.” Ta in? Juon bõro erreo. Eñin ej men eo me eaiboojojtata im em̦m̦antata ippãn Anij.​​—1 Piter 3:3, 4.

¹³ Jen bar keememej bwe wãween ad nuknuk im paotokid ej jelõt wãween an armej ro l̦õmn̦ak kõn kabuñ eo em̦ool. Ñe jej tõreejab, jen jab kabwilo̦k mejãn armej im kõm̦m̦an bwe armej ro ren kalimjek kõj. Jen tõreejab ilo juon wãween me ej kwal̦o̦k ad kautiej Anij im bareinwõt kwal̦o̦k bwe jej l̦õmn̦ak kõn armej ro jet. Mel̦el̦ein men in bwe aolep iien jej aikuj l̦õmn̦ak kõn ro jet im jab kõn kõj make ilo wãween ad nuknuk im tõreejab. Bõtab, men eo eaorõktata in ej bwe jen bõktok nõbar ñan Jeova im armej ro an im kaalikkar ñan aolep bwe jej ri jerbal ro an Anij. Ilo wãween in, jej kõm̦m̦ane “men otemjej ñan aiboojoj an Anij.”​—1 Korint 4:9; 10:31; 2 Korint 6:3, 4; 7:1.

14. Ta kajjitõk ko jej aikuj kajjitõk ippãd make ikijjeen nuknuk ko ad im paotokid?

¹⁴ El̦apl̦o̦k an aorõk bwe en karbõb nuknuk ko ad im erreo paotokid ñe jej kwal̦o̦k naan im bareinwõt ñe jej ilo̦k ñan iien kweilo̦k ko an eklejia eo. Kwõn kajjitõk ippam̦ make: ‘Nuknuk ko aõ im paotokũ rej ke kabwilo̦k mejãn armej? Rej ke kõm̦m̦an bwe ro jet ren jook kake eõ? Ij ke m̦õn̦õn̦õ in kõm̦m̦an oktak ko kõn men kein bwe en tõllo̦kũn aõ bõk kun̦aaõ ilo jerbal ko ilo eklejia eo?’​—Pilippai 4:5, UBS; 1 Piter 5:6.

15. Etke Baibõl̦ eo ejjab letok kien ko kõn nuknuk, wãween tõreejab im paotokid?

¹⁵ Baibõl̦ eo ejjab letok kien ko kõn kain nuknuk rot jej aikuj kõn̦aki im wãween ad tõreejab im paotokid. Etke? Kõnke Jeova ekõn̦aan bwe jen make kõjerbal maroñ eo ad ñan l̦õmn̦ak im pepe kõn ta ko jenaaj kõm̦m̦ani. Ekõn̦aan bwe jen jel̦ã kilen kõl̦mãnl̦o̦kjen̦ kõn naan in kakapilõk ko ilo Baibõl̦ eo im ‘kammineneik kõj make, bwe jen jel̦ã ta eo em̦m̦an im ta eo enana.’ (Hibru 5:14, UBS) Bõtab men eo eaorõktata ippãn Jeova ej bwe jen kõm̦m̦ane pepe ko me renaaj kaalikkar ad yokwe Anij im armej ro. (Mark 12:30, 31) Ñe jej l̦õmn̦ak kõn Anij im ro jet, mel̦el̦ein ke bwe enaaj juon wõt kain wãween ad nuknuk im juon wõt kain wãween ad tõreejab? Ejjab. Enaaj baj lõñ wõt kain nuknuk ko rekkar im rem̦m̦an me jemaroñ kõn̦aki. Im enaaj baj lõñ wõt kilen ak wãween tõreejab ko me rekkar im rem̦m̦an ñan Kũrjin ro kajjojo. Jej lo an armej ro doon Jeova kõm̦m̦ane men in ijoko otemjej me rej pãd ie.

JAB ARÕK JÃÃN IM M̦WEIUK

16. (1) Ta oktak eo ikõtaan l̦õmn̦ak ko an armej in lal̦ in im l̦õmn̦ak ko an Jijej kõn m̦weiuk? (2) Ta kajjitõk ko jej aikuj kajjitõkin kõj make?

¹⁶ L̦õmn̦ak ko an armej in lal̦ in el̦ap an m̦on̦e er. Ej m̦on̦e elõñ milien armej ro ñan l̦õmn̦ak bwe renaaj m̦õn̦õn̦õ el̦aññe elõñ aer jããn im ñe rem̦weiie. Bõtab, Jijej ear ba: “Mour eo em̦ool an juon armej ejjab wal̦o̦k jãn men ko m̦weien, meñe el̦ap an m̦weiie.” (Luk 12:15, UBS) Jijej ear ke ba bwe enana m̦weiuk im jããn? Ear jab. Bõtab, ear ba bwe ro me rej kaorõk jem̦jerã eo aer ippãn Anij im rejjab m̦ad kõn m̦weiuk im jããn renaaj lukkuun m̦õn̦õn̦õ. (Matu 6:22, 23; Luk 11:28) Jouj im kajjitõk ippam̦ make: ‘Ij ke tõmaki naan kein an Jijej? Ak ij ke po ippãn Setan, eo ej “jemen riab”? (Jon 8:44) Ij ke kaalikkar aõ tõmaki naan kein an Jijej ilo wãween aõ kõnnaan im wãween aõ mour? Men ko raorõk ippa im mejãnkajjik ko aõ rej ke kaalikkar bwe ij tõmake naan kein an Jijej? Ke ta, men kein aolep rej ke kaalikkar bwe em̦õj aõ po ippãn Setan?’​—Luk 6:45; 21:34-​36; 2 Jon 6.

17. Jouj im kwal̦o̦k jet iaan jeraam̦m̦an ko me rej wal̦o̦k ñan armej ro me rejjab arõk jããn im m̦weiuk.

¹⁷ Baibõl̦ ej ba bwe jen jab baj roñjake wõt naan eo ak jen “kõm̦m̦an ãinwõt an ba.” (Jemes 1:22, UBS) Armej ro me rejjab arõk jããn im m̦weiuk relukkuun jeraam̦m̦an. Ñan waanjoñak, el̦ap aer lañlõñ ilo aer jerbal ñan Anij. (Matu 11:29, 30) Kõn aer jab arõk m̦weiuk, rejjab inepata kõn men ko ejjel̦o̦k tokjãer. (1 Timote 6:9, 10, UBS) Rej jokwane wõt kõn men ko ewõr ippãer. Kõn men in, el̦apl̦o̦k aer iien ippãn eo pãleer, ro nejier im Kũrjin ro m̦õttaer. Men in emaroñ kõm̦m̦an bwe en em̦m̦an aer kiki. (Ekklisiastis 5:12) El̦apl̦o̦k aer lañlõñ kõnke rej m̦õn̦õn̦õ in lel̦o̦k im jipañ ilo jabdewõt wãween ko remaroñwe. (Jerbal 20:35) Bareinwõt, ewõr aer “kõjatdikdik” im rej aenõm̦m̦an im jokwane wõt. (Rom 15:13; Matu 6:31, 32) Jejjab aikuj jããn ñan bõk jeraam̦m̦an kein!

KÕN̦AK KEIN TARIN̦AE KO JÃN ANIJ

18. (1) Ta eo Baibõl̦ ej ba kõn Setan, eo ej jum̦ae kõj? (2) Ekkar ñan Baibõl̦, wõn ro me jej “oktaak” ak jum̦aeik er? (3)  Kõl rot eo me Setan im jetõb ro an renana rej kõjerbale ñan jum̦aeik kõj?

¹⁸ Anij ej kõjparok armej ro me ej yokwe er. Ej kõjparok er jãn Setan, eo me ekõn̦aan bwe Kũrjin ro ren bõjrak jãn aer karejar ñan Anij. Ejjab kõn̦aan bwe ren m̦õn̦õn̦õ im bõk mour indeeo. (1 Piter 5:8) Rijjelõk Paul ear ba, ‘adwõj oktaak ejjab ippãn bõtõktõk im kanniõk, ak ippãn jetõb ro, ippãn ro rekajoor, ippãn ro irooj in marok ilal̦, ippãn jaran jetõb renana ijo ko ilañ.’ (Epesõs 6:12) Ta mel̦el̦ein eoon in? Eokwe, ta mel̦el̦ein naan in “oktaak”? Naan in ejjab jitõñl̦o̦k ñan armej ro me rej pãd ilo juon jikin ettol̦o̦k im rej kõjerbale bu ko ak baam̦ ko ñan ko̦kkure ri kõjdat ro aer. Rej kõjerbale naan in “oktaak” ñe ruo armej rej kajju ire ippãn doon. Eñin ej kõl eo me Setan im jetõb ro an renana rej kõjerbale. Rejjab pãd ettol̦o̦k jãn kõj. Rej kajju itok im jum̦aeik ak ire ippãd. Paul ear bar ba bwe enjel̦ rein renana “rekajoor” im rej “irooj in marok.” Ear bar ba bwe ewõr aer jaran tarin̦ae ak “jaran jetõb renana.” Naan kein rej kaalikkar bwe em̦õj an enjel̦ rein pepel̦o̦k im̦aan ñe rej iten jum̦aeik kõj, im el̦ap aer laajrak im kon̦.

19. Ta kein tarin̦ae ko jãn Anij?

¹⁹ Meñe jejjab weeppãn im ewõr joñan maroñ ko ad, ak jemaroñ anjo̦ ioon enjel̦ rein renana. Ta eo jej aikuj kõm̦m̦ane bwe jen anjo̦? Jej aikuj kõn̦ak “aolepen kein tarin̦ae an Anij.” (Epesõs 6:13) Ta kein tarin̦ae ko jãn Anij? Epesõs 6:14-18 (UBS) ej ba: “Kom̦win jutak im pojak: kom̦win bõk m̦ool bwe en ami kañõr; kom̦win kõn̦ak wãnõk bwe en ami penjãn ob, im ami pojak in kwal̦o̦k Naan eo Em̦m̦an kõn aenõm̦m̦an en ami juuj. Iien otemjej kom̦win bõk tõmak bwe en ami kein kattõrak; innem kom̦ naaj maroñ kuni m̦ade kijeek ko Ri Nana eo enaaj wãkar kom̦ kaki. Kom̦win bõk lo̦mo̦o̦r bwe en ami helmet, im naan in Anij bwe en ami jãje, . . . Kom̦win kõm̦m̦an aolep men kein ilo jar, im kajjitõk jipañ jãn Anij. Kom̦win jar iien otemjej.”

20. Ewi wãween jej oktak jãn ri tarin̦ae ro jet?

²⁰ Jeova ej letok ñan kõj kein tarin̦ae ko ilo kõkkar ñan kõjparok kõj. Im kõnke kein tarin̦ae kein rej itok jãn Anij, renaaj kõjparok kõj el̦aññe jej kõn̦ake aolep iien. Jej oktak jãn ri tarin̦ae ro jet. El̦aññe ejjel̦o̦k pata ak tarin̦ae, ekkã an ri tarin̦ae ro jepl̦aak ñan ijo kapijukuneer im kakkije. Bõtab, ejjel̦o̦k juon iien jej bõjrak jãn tarin̦ae in ad ilo kõkkar. Tarin̦ae in elukkuun aorõk im ej kitibuj mour ko ad. Jenaaj tarin̦ae wõt m̦ae iien eo me Anij enaaj ko̦kkure jukjuk im pãd in enana an Setan im kalbuuji Setan kab aolep enjel̦ ro renana. (Revelesõn 12:17; 20:1-3) Kõn men in, jouj im jab ebbeer el̦aññe ewõr am̦ m̦õjn̦o̦ ak jet iien ej wal̦o̦k ippam̦ kõn̦aan ko rejakkar. Keememej bwe aolep armej rej aikuj tarin̦aek ak “baiti” kõn̦aan ko aer make bwe ren maroñ tiljek wõt ñan Jeova.​—1 Korint 9:27.

21. Ta ko remaroñ jipañ kõj bwe jen anjo̦ ilo tarin̦ae eo ad ilo kõkkar?

²¹ Jejjab maroñ anjo̦ ioon tarin̦ae in kõn kajoor ko ad make. Eñin unin Paul ear kakeememej kõj bwe jej aikuj jar ñan Jeova aolep iien bwe en jipañ kõj. Bareinwõt, jej aikuj roñjake Jeova ilo ad katak kõn Naan ko an im kobal̦o̦k ippãn ri tarin̦ae ro jet m̦õttad ilo kõkkar. Rein m̦õttad rej jipañ kõj ilo tarin̦ae in me kõj aolep jej pãd ie! (Pailimõn 2; Hibru 10:24, 25, UBS) Ro me rej tiljek im kõm̦m̦ani men kein renaaj anjo̦ ilo tarin̦ae in.

POJAK IN JOJOMARE TÕMAK EO AM̦

22, 23. (1) Etke jej aikuj pojak aolep iien ñan jojomare tõmak eo ad? (2) Ta kajjitõk ko jej aikuj kajjitõk ippãd make? (3) Ta eo jenaaj etale ilo katak eo tok juon?

²² Jijej ear ba: “Kom̦ jab an lal̦ . . . kõn men in lal̦ ej kõjdate kom̦.” (Jon 15:19) Aolep iien Kũrjin ro rej aikuj pojak in jojomare tõmak eo aer. Bõtab, rej aikuj kõm̦m̦ane men in ilo kautiej. (1 Piter 3:15) Kwõn kajjitõk ippam̦ make: ‘Ij ke mel̦el̦e etke jet iien Ri Kõnnaan ro an Jeova rejjab kõm̦m̦ani men ko me armej ro jet rej kõm̦m̦ani? Ñe ijjab bõk kun̦aaõ ilo men kein me armej ro rej kõm̦m̦ani, ij ke lukkuun mel̦el̦e im tõmak bwe ejim̦we men ko Baibõl̦ eo ej ba? Ij ke lukkuun tõmak aolep naan in kakapilõk ko jãn ri karejar eo etiljek im mãlõtlõt? (Matu 24:45; Jon 17:17) Ij ke pojak im m̦õn̦õn̦õ in oktak jãn ro jet bwe in kõm̦m̦ani men ko rejim̦we im̦aan mejãn Jeova?​—Sam 34:2, UBS; Matu 10:32, 33, UBS.

²³ Ekkã an pen ad oktak jãn armej ro ilo lal̦ in. Etke? Kõnke Setan ej tõlpiloik kõj ilo wãween ko rettino. Ñan waanjoñak, Tepil̦ eo ej kajjioñ in tõlpiloik armej ro doon Jeova bwe ren ãinwõt armej in lal̦ in ilo an kõjerbali menin kam̦õn̦õn̦õ ko an lal̦ in. Ewi wãween jemaroñ kããlõt menin kam̦õn̦õn̦õ ko rekkar im rem̦m̦an im reban ko̦kkure erreo eo ad im̦aan mejãn Anij? Jenaaj etale men in ilo katak eo tok juon.