Demon Ro—Ewi Wãwen Jemaroñ Jumae Ir?
“Enjel rõn, r’ar jab kejbãrok air utiej, a r’ar illok jen jikiir, Ej kejbãrok ir, ñõn ekajet eo an ran elap, ilo kworõk ko in drio iomin marok.”—JUD 6.
1, 2. Ta kajitõk ko rej bõkmantak kin Satan Devil eo im demon ro?
“KOMIN jadõr, komin ekil,” ri jilek Peter ear kakkõl. “Dri kijirãte kom, devil eo, einwõt laiõn e rorror, ej etetal wõt im bukot eo ej maroñ in kõñi.” (1 Piter 5:8) Ikijen demon ro, ri jilek Paul ej ba: “I jab kõnan bwe komin kõmao iben dimon rõn. Kom jab maroñ in irak kõp in Iroij, im kõp in dimon rõn; kom jab maroñ in mõña jen tebel an Iroij, im jen tebel in dimon rõn.”—1 Dri Korint 10:20, 21.
2 Bõtab, wõn Satan Devil eo im demon ro? Ewi wãwen im ñããt eo rar bed? Anij ear kõmanman ir ke? Ewi joñan kajur in kilair ion armij ro? Ewi wãwen jemaroñ jojomare kij nae ir?
Ewi Wãwen Satan im Demon Ro Rar Walok?
3. Ewi wãwen an kar juõn enjel an Anij erom Satan Devil eo?
3 Ilo tujinoin bwebwenato ko an armij, ke armij ro rar jinoe ilo jikin kallip in Eden, juõn enjel an Anij ear erom ri jumae eo. Etke? Kinke ear jab juburu kin jerbal eo an ilo dolul eo an Jehovah ilañ. Elikin an Anij kõmanman Adam im Eve, ear lo juõn ien emõn ñan ukõt air bokake im kabuñ jen Anij eo emol ñan emake. Kin an kar jumae Anij im kareel armij ro ruo moktata ñan jibadõk juõn ial in jerawiwi, enjel in ear kõmman emake Satan Devil eo. Ejjab to tokelik, enjel ro jet rar bõk kunair ilo jumae eo an. Ewi wãwen?—Jenesis 3:1-6; Dri Rom 5:12; Reveles̃õn 12:9.
4. Enjel ro me rar jumae rar kõmman ta mokta jen Ibwijleplep eo ilo ran ko an Noah?
4 Jeje ko rekakõrmol rej ba ñan kij bwe ilo ien eo mokta jen Ibwijleplep eo ilo ran ko an Noah, jet enjel ro rar mijkaie kin kõrã ro ion lal. Kin juõn karõk ebwid, “lõmaro nejin Anij [ilañ] rar lo kõra ro nejin armij bwe re dreo,” Bible eo ej ba, “im rar bõk limaro beleir einwõt air mijkaiye.” Belele kein rar mour in ejej. Rar keotak ajiri ro reinjuõn, ri inea ro rar naetair Nephilim. (Jenesis 6:2-4) Jitõb ro me rar jab bokake Anij, rar kobalok ibben Satan im jumae Jehovah.
5. Ke Jehovah ear bõktok jorrãn ikijen Ibwijleplep eo ewi wãwen ear jelet ri jumae ro?
5 Ke Jehovah ear bõktok Ibwijleplep eo ion ro ri lal in, Nephilim ro im jineir rar jako. Enjel ro im rar jumae rar wutik enbwiniir ilo kanniek im jeblak ñan lañ. Bõtab, rar jab maroñ bar bõk “air utiej” ibben Anij einwõt mokta. Ak, rar likit ir “ilo kworõk ko in drio iomin marok.”—Jud 6.
6. Ewi wãwen demon ro rej mone armij ro?
6 Jen ien eo enjel ro renana rar luji “air utiej,” rej erom demon ro mõttan Satan im rej rejetake jerbal ko an renana. Jen ien eo manlok, ejelok an demon ro maroñ in kõnake enbwinin kanniek. Bõtab, remaroñ kabo maan im kõrã ro bwe ren kõmman mour in ejej rej men in jõjõ ilo elõñ wãwen ko. Demon ro rej bareinwõt mone ri lal ikijen anijnij, im emaroñ koba men kein einwõt anjin, ekkõpãl, im ri anijnij. (Duteronomi 18:10-13; 2 Kronikel 33:6) Ilju eo an enjel ro renana im Devil eo jimor rej joñan wõt juõn—mij ñan indio. (Matu 25:41; Reveles̃õn 20:10) Bõtab, ilo kõtan in, jej aikwij in jutak bin im jumae ir. Jej meletlet ñan etale joñan kajur in Satan, im ewi wãwen jemaroñ lo tõbrak ilo ad jumae e im demon ro an.
Ewi Joñan Kajur In Satan?
7. Ta kajur eo ewõr ibben Satan ion lal in?
7 Ilo bwebwenato in armij, Satan ear ruruwe Jehovah. (Jabõn Kennan Ko. 27:11) Im ear mone juõn mõttan elap in armij ro. “Aolepen lõl ej berwõt ilo dri nana eo,” 1 Jon 5:19 ej ba. Eñin unin Devil eo ear wõr an maroñ ñan kajeoñ in kareel Jesus ikijen an lelok maroñ im aibujuij eo an “ailiñ in lõl otemjej.” (Luk 4:5-7) Ikijen Satan, ri jilek Paul ej ba: “A elañe e binjõk am gospel, e binjõk ñõn ro re joko. Ilo ir anij in lõl in e ar kabilo lemnok an ro re jab tõmak, bwe maram in gospel in aibujuij an Kraist, eo wãwen Anij, en jab rome ir.” (2 Dri Korint 4:3, 4) Satan ej “dri riõp, im jemen riõp,” ak ej kõmman e make einwõt “enjel in maram.” (Jon 8:44; 2 Dri Korint 11:14) Ewõr an kajur im wãwen ko bwe en kabilo lemnak an ri tel in lal in im ro don. Ikijen kareelel im bwebwenato ko rebwid im riap ko ilo kabuñ, ear mone ri lal in.
8. Ta eo Bible ej kalikar kin kilan Satan?
8 Kajur im kilan Satan ear alikar ilo ien ko an ri kanan Daniel, enañin 2,500 yiõ ko remotlok. Ke Jehovah ear jilkintok juõn enjel ñan kwalok juõn nan in rejañ ñan Daniel, enjel eo ear jelmae jumae eo jen “enjel [jitõb] eo ej lale ailiñ in Persia.” Ear bõpraiki enjel in etiljek iumin 21 ran mae ien “Michael, juõn ian enjel ro reutiej,” ear itok ñan jibañ e. Ejja bwebwenato in ear bar konono kin “enjel [demon] eo ej lale ri Greece.” (Daniel 10:12, 13, 20) Im ilo Reveles̃õn 13:1, 2, ej pijaiki Satan einwõt “drakon eo” me ej lelok ñan kiru awia eo ej ejaak in kien ko “an kajur, an tron, im maroñ elap.”
9. Christian ro rej tarinaik wõn?
9 Eñin unin ri jilek Paul ear jeje: “Aruij oktak e jab iben bõtõktõk im kõniek, a iben jiõb ro, iben ro re kajur, iben ro iroij in marok i lõl, iben jaran jitõb renana ijo ko i lõñ.” (Dri Epesõs 6:12) Bareinwõt rainin, kajur ko an demon ro iumin maroñ eo an Satan Devil eo rej ilo ittino, ñan kareel iroij ro ion lal im armij ro, im iuni ir ilo juõn joñan elap ñan mõn kumi in armij ak ri ailiñ ro, terrorism (men in kamijak ko), im uror. Jen etale kiõ ewi wãwen jemaroñ lo tõbrak ñan jumae jar in jitõb ro rekajur.
Ta eo ej Jojomare Kij Jen Demon Ro?
10, 11. Ewi wãwen jemaroñ jumae Satan im enjel ro an renana?
10 Jejjab maroñ jumae Satan im enjel ro an renana kin kajur eo ad make, jekdon elañe jej dibin ak meletlet. Paul ej kakabilek kij: “Komin bin ilo Iroij, im ilo kajur in maroñ eo An.” Jej aikwij in kebake Anij ñan kejbãrok kij. Paul ej kakobaba: “Komin kõnõk aolepen ken tõrinae an Anij, bwe komin maroñ in jutõk mae etao ko an devil . . . Komin bõk ñõn kom aolepen ken tõrinae an Anij, bwe komin maroñ in jumae ilo ran eo enana, im mõjen kõmõn otemjej, jutõk.”—Dri Epesõs 6:10, 11, 13.
11 Paul ear rejañ Ri Christian ro mõttan ruo alen ñan kõnake “aolepen ken tõrinae an Anij.” Nan eo “aolepen” ej melelen bwe jibadbad eo jen juõn buru ejebel ejamin jumae ire ko an demon ro. Inem, ta men ko raorõk rej mõttan kein tarinae eo ilo jitõb Ri Christian ro rainin rej lukkun aikwiji bwe remaroñ jumae demon ro?
“Komin Jutõk”—Ewi Wãwen?
12. Ewi wãwen Ri Christian ro rej kañõrñõr ibiir kin mol?
12 Paul ej kamelele: “Inem komin jutõk ke emwij kañõrñõr ibimi kin mol, im emwij kõnõk binjen op in wãnik.” (Dri Epesõs 6:14) Ilo eon in ijin men ko ruo rej mõttan kein tarinae eo rej juõn kañõr, im juõn binjen op. Juõn ri tarinae ear aikwij bwe kañõr in en kankan ñan kejbãrok ibin (jen lukwõn ñan unin nee) im inek jãje eo an. Eindein, jej aikwij kõnak mol eo ilo Bible einwõt juõn kañõr ekankan ilo aolep wãwen ad mour. Ewõr ke ad lajrak in konono Bible jen ran ñan ran? Aolepen family eo rej bõk kunair ke? Ewõr ke ad lajrak in etale unin tel in ran einwõt juõn family? Bareinwõt, jej wõnmanlok im jerbale ke kamelele ko an “dri korijer e tiljek im meletlet,” rej litoki jen book ko? (Matu 24:45) Elañe aet, jej kate in jerbale nan in kakabilek ko an Paul. Ebar wõr ad video im DVD ko bwe remaroñ litok nan in kakabilek ko jen Bible ñan tel kij. Kin ad lukkun eddeb ñan mol eo men in emaroñ jibañ kij kõmman bebe ko remeletlet im kejbãrok kij jen ad lor juõn ial ebwid.
13. Ewi wãwen jemaroñ kejbãrok burued?
13 Binjen op eo ej kejbãrok ubõn, menono im mõttan enbwin ko jet raorõk enbwinin ri tarinae eo. Ri Christian eo emaroñ kejbãrok buruen—armij eo iloa—ikijen an kaddeklok yokwe ñan wãnik eo an Anij im eddeb ñan kien ko rewãnik an Jehovah. Binjen op in kõkkar eo ej kejbãrok kij jen ad kabodãn Nan in Anij. Elañe jej “drike men ko renana, im yokwe men ko remmõn,” jej kejbãrok need “jen ial ko renana otemjej.”—Amos 5:15; Sam 119:101.
14. Ta melelen bwe jen ‘naballin need kin kapojõk in gospel in ainemõn’?
14 Ekkã an ri tarinae ro an Rome kõnak juj ko remõn bwe ren bojak ñan maaj iumin buki mile ko ilo ial ko ibelakin ailiñ in Rome. Ta melelen nan kein “emwij naballin neõmi kin kapojõk in gospel in ainemõn” ibben Ri Christian ro? (Dri Epesõs 6:15) Melelen men in bwe jej bojak in jerbal. Jej bojak in jaketo jaketak news eo emõn kin Ailiñ eo an Anij ilo jabdewõt ien ekkar. (Dri Rom 10:13-15) Kin ad boub kin jerbal in kwalok nan an Ri Christian men in ej juõn kejbãrok nae “etao ko” an Satan.—Dri Epesõs 6:11.
15. (a) Ta eo ej kwalok bwe kein tõrak eo elap in tõmak elap an aorõk? (b) Ta “mõri kijeek” ko remaroñ jelet tõmak eo ad ilo juõn wãwen enana?
15 “Ion otemjej,” Paul ej wõnmanlok im ba “emwij kwotõke ken tõrak in tõmak, ilo e kom naj maroñ in kwũni mõri kijeek otemjej an eo dri nana.” (Dri Epesõs 6:16) Nan in kakabilek eo ñan kwotake kein tõrak eo elap in tõmak ear jinoe kin nan kein “ion otemjej,” men in ej kalikar bwe ej kein tarinae eo elap an aorõk. En jab wõr likjap ilo tõmak eo ad. Einwõt juõn kein tõrak elap an kejbãrok, tõmak eo ad ej kejbãrok kij jen “mõri kijeek” ko an Satan. Rej jutak kin ta rainin? Remaroñ einwõt nan in riap im lõkatip ko jen ri kijirãt ro im ro rej ellok im jumae Anij ñan kabwer kij. Bareinwõt, “mõri” kein remaroñ koba arõk mweiuk, im kamakit kij bwe jen korlok elõñ men ko le jen joñan im jiaik ro me emwij air bo ilo kain mour rot in. Bõlen emwij air lelok elap ien ñan kalek moko imwiir im wia wa ko wair rekileplok im remõnlok ak kemjãje kin kein kalitlit ko air elap wõnãir im nuknuk ko rebuñbuñ ilo ran kein. Jekdon ta men ko ro jet rej kõmmane, en aikwij wõr ad tõmak elap an kajur bwe jen illok jen “mõri kijeek” kein. Ewi wãwen jemaroñ kalek im kabin tõmak eo ekajur?—1 Piter 3:3-5; 1 Jon 2:15-17.
16. Ta eo emaroñ jibañ kij ñan kalek tõmak eo ekajur?
16 Jemaroñ kebake Anij ikijen ad keini in katak Bible eo ibbed make im jar ko jen buruõd. Jemaroñ jar ñan Jehovah ñan kakajur tõmak eo ad im jerbal ekkar ñan jar ko ad. Ñan wanjoñok, jej keboje ke katak in Imõniaroñroñ kajjojo week ñan bõk kunad? Tõmak eo ad enaj kajur elañe jej katak Bible eo im book ak magazine ko.—Dri Hibru 10:38, 39; 11:6.
17. Ewi wãwen jemaroñ “bõk helmet in lomor”?
17 Paul ej kajemlok kamelele eo an kin kein tarinae eo ilo jitõb ikijen nan in kakabilek in: “Komin bõk helmet in lomor, im jãji an Jitõb, eo nan in Anij.” (Dri Epesõs 6:17) Helmet eo ear kejbãrok bõran im kamelij eo an ri tarinae eo, unjen kõmman bebe eo. Eindein, kejatdikdik eo ad einwõt juõn Ri Christian ej kejbãrok lemnak ko ad. (1 Dri Tessalonika 5:8) Jen ad kobrak lolãtãt eo ad kin mejenkajjik ko an lal in im kõnan ko ñan korlok mweiuk ko, jej aikwij lemnak kin kejatdikdik eo ad Anij ear letoke, einwõt Jesus ear kõmmane.—Dri Hibru 12:2.
18. Etke jen jab kajettokjen program eo ad ñan keini ad read Bible?
18 Kein kejbãrok eo eliktata nae kilan Satan im demon ro an ej nan in Anij, ak ennan eo ear jeje kake ilo Bible eo. Men in ej bar juõn un kin etke jejjab aikwij kajettokjen program eo ad ñan keini ad read Bible. Jelãlokjen eo elet kin Nan in Anij ej kejbãrok kij jen riap ko an Satan im kareelel ko an demon ro. Ekoba book im nan in jumae ko relej jen ro rej ellok im jumae Anij.
“Jar ilo Ien ko Otemjej”
19, 20. (a) Ta ilju eo an Satan im demon ro an? (b) Ta eo enaj kakajur kij ilo jitõb?
19 Ebaktok an jolok Satan, demon ro an, im lal in enana. Satan ejelã bwe “jirik wõt ien iben.” Elap an illu im ej tarinaik “ro rej kejbãrok kien ko an Anij, im kennan an Jisõs ibeir.” (Reveles̃õn 12:12, 17) Elap an aorõk bwe jen jumae Satan im demon ro an.
20 Jemaroñ kamolol kin nan in kakkõl eo ñan kõnake aolepen kein tarinae eo jen Anij! Paul ej kajemlok bwebwenato eo an kin kein tarinae in jitõb ikijen nan in kakabilek in: “Kin aolepen jar im akwelap komin jar ilo ien ko otemjej ilo Jitõb, im ekil ñõn men in ilo niknik im jar otemjej kin ro remõn otemjej.” (Dri Epesõs 6:18) Jar emaroñ kakajur kij ilo jitõb im jibañ kij ñan ekkõl wõt. Jen likit nan ko an Paul ilo burued im wõnmanlok im jar, kinke men in enaj jibañ kij ñan jumae Satan im demon ro an.
Ta Eo Kwar Katak Kake?
• Ewi wãwen Satan im demon ro an rar walok?
• Ewi joñan kajur in Devil eo?
• Ta eo ej bed ibbed ñan jojomare kij nae Satan im demon ro an?
• Ewi wãwen jemaroñ kõnak kein tarinae eo jen Anij ilo jitõb?