Kwo Maroñ Ke “Jelã Kajjen Emõn Im Nana”?
“Ke komij melejoñ men eo ej kabuñburuen Iroij.”—DRI EPESÕS 5:10.
1. Ilo wãwen et eo mour rainin emaroñ bwok, im etke?
“EMÕN aõ jelã, O Jehovah, bwe ñan armij in lal ial eo an ejjab an. Ejjab an armij eo ej etetal meñe ñan tel buñten neen.” (Jeremiah 10:23, New World Translation) Mol in eaorõk me Jeremiah ear kile elaplok an jerbal ñan kij rainin. Etke? Ej kinke jej mour ilo “ien ko renana,” einwõt an Bible kar kanan. (2 Timote 3:1) Ran otemjej, jej jelmae wãwen ko rekabwokbwok ko rej aikwiji ad kõmman bebe. Meñe relap ak redik, bebe kein emaroñ mũlal air jelet ejmour eo ad—ilo enbwin, eñjake, im ilo jitõb.
2. Ta kãlet ko remaroñ watõki edik tokjeir, ak ewi wãwen an Ri Christian ro emwij air wujleplok lemnak kin men kein?
2 Elõñ jokãlet ko jej kõmmani ilo mour eo ad ran otemjej jemaroñ watõki men ko ekkã kõmmani ak dik tokjeir. Ñan wanjoñok, kajjojo ran, jej aikwij kãlet nuknuk ko jej kõnaki, mõñã ko jej mõñã, armij ro jej lo ir, im eindeinlok. Jej kõmmane kãlet kein ilo an dik ad lemnak kaki. Ak kain wãwen kein edik tokjeir ke? Ñan Ri Christian ro emwij air wujleplok, ej juõn wãwen eo elap ad lemnak kake bwe jokãlet ko jej kõmmani ilo wãwen ad letlet im baotokid, ilo ad mõñã im idak, im ilo ad konono im mwilid ien otemjej rej kalikar bwe jej ro ri karejaran eo Eutiej Tata, Jehovah Anij. Rej kakememej kij kin nan ko an ri jilek Paul: “Inem elañe komij mõña ak irak ak kõmõn jabrewõt, komin kõmõn men otemjej ñõn aibujuij an Anij.”—1 Dri Korint 10:31; Dri Kolosse 4:6; 1 Timote 2:9, 10.
3. Ta kãlet ko remol im elap air aorõk?
3 Inem ewõr jokãlet ko elaplok ad aikwij lemnak kaki. Ñan wanjoñok, bebe eo ñan belele ak bed wõt im jab belele, emol emũlal im etto an jelet mour eo an juõn armij. Emol, jokãlet in armij eo ejimwe ñan beleke, bwe en rejetam toan wõt amiro mour, ejjab juõn men eo edik.a (Jabõn Kennan Ko 18:22) Bareinwõt, jokãlet eo ad kin ro jerad im ro jej tel ad ibbeir, ilo school, ilo jikin jerbal, im ilo kamõnõnõ im ikkure ko elap an wõr kilair ilo mour in jitõb eo ad—ilo wãwen in, ñan ejmour eo ad ej indio.—Dri Rom 13:13, 14; Dri Epesõs 5:3, 4.
4. (a) Ta maroñ eo elap ad kõnan? (b) Ta kajitõk ko jej aikwij lemnak kaki?
4 Ilo jelmae aolep kãlet kein, emol ej juõn men eo ewõr tokjen bwe en wõr ibbed maroñ eo ñan jelã kajjen men eo ejimwe im men eo ebwid ak ikõtan men eo ej walok im einwõt ejimwe im men eo elukkun jimwe. “Eor ial einwõt ial e jime ñõn juõn armij; a jemlokõn, ial ko in mij,” Bible ej kakkõl. (Jabõn Kennan Ko 14:12) Kin menin, jemaroñ kajitõk: ‘Ewi wãwen ad maroñ ejaake maroñ eo ñan jelã kajjen kõtan jimwe im bwid? Ia eo jemaroñ lo ialin tel eo ej menin aikwij ilo ad kõmman bebe? Ta eo armij ro, ilo ien ko lok im ien kein, rar kõmmane ikijen men in, im ta tokjen eo ej walok?’
“Katak in Meletlet im Mon Bata” an Lal in
5. Ilo kain lal rot eo Ri Christian ro jinoin rar mour ie?
5 Ilo ebeben eo kein kajuõn Ri Christian ro rar mour ilo juõn lal ijo kien ko in mour im lemnak ko an Greco-Roman rar kajur. Ilo juõn wãwen, kar wõr men ko remweie ilo wãwen mour eo an Ri Rome, im elõñ rar watõke einwõt juõn menin lalojjede. Ilo wãwen eo juõn, jelãlokjen eo ilo ran eo ear kairujruj ejjab kin lemnak in meletlet ko an Plato im Aristotle wõt ak bareinwõt ro ilo school ko rekãl, einwõt an Ri Epicurean ro im Stoic ro. Ke ri jilek Paul ear itok ñan Athens ilo ialin missionary eo an kein karuo, ear jelmae ri meletlet in Ri Epicurean im Stoic ro, ro rar eñjake air kajurlok jen ri “kowaroñroñ in,” Paul.—Jerbal 17:18.
6. (a) Ta eo jet ian Ri Christian ro jinoin rar kabo ir ñan air kõmmane? (b) Ta nanin kakkõl eo Paul ear kwalok?
6 Kin menin, ejjab bin ñan melele unin an jet ibwiljin Ri Christian ro jinoin reel kin mantin mour ko an armij ro remweie ibelakiir. (2 Timote 4:10) Ro rar mõttan jukjuk im bed eo rar lañliñ kin elõñ tokjen ko remõn, im jokãlet ko air rar einwõt emõn. Lal in einwõt ewõr juõn men eo eaorõk ie ñan an lelok, eo wujleplok in mour in Christian eo ear jab. Bõtab, ri jilek Paul ear kakkõl: “Komin kejbãrok kom bwe ejelok juõn en rakimi kom kin katak in meletlet eo an ak kin an mon bata, ekar ñõn bwebwenato mokta an armij rõn, im ñõn irinekatak ko an lõl, im jab ñan Kraist.” (Dri Kolosse 2:8) Etke Paul ear ba menin?
7. Ta eo ej lukkun aorõk in meletlet eo an lal in?
7 Paul ear letok nanin kakkõl in kinke ear kile juõn men in kauwatata eo emol ej tilekek ilikin lemnak eo an ro lal in ej kareel ir. An kajerbal kajin in “katak in meletlet im mon bata” elap an wõr tokjen. Nan in “katak in meletlet” ej melelen “yokwe im jibadbad eo ñan bukõt meletlet.” Menin make emaroñ wõr tokjen. Ilo mol, ilo Bible eo, elaptata ilo Book in Jabõn Kennan Ko, rej kõketak ñan bukõt jelãlokjen im meletlet eo ejimwe. (Jabõn Kennan Ko 1:1-7; 3:13-18) Bõtab, Paul, ear kobaik “katak in meletlet” ibben “mon bata.” Ilo bar juõn wãwen ba, Paul ear watõk meletlet eo lal in ej lelok einwõt ejelok kobban im men in mon. Einwõt juõn bujeñ eo ebbol kin kõto, baotokin ej einwõt ebin, ak ejelok jabdewõt ie. Enaj lukkun ejelok tokjen, meñe jorrãn, ñan bedbede kãlet eo an juõn kin jimwe im bwid ion juõn men eo einwõt ejelok tokjen einwõt “katak in meletlet im mon bata” eo an lal in.
Ro Rej Ba Bwe “Emõn Nana im Nana Emõn”
8. (a) Wõn ro armij ro rej oktaklok ñan ir ñan bõk kakabilek? (b) Kain kakabilek rot eo rej letoke?
8 Elõñ men ko rejjab kanuij oktak rainin. Ilo jabdewõt wãwen jibadbad eo an armij, elõñ ri kabel ro. Ri kakabilek ro kin belele im family, ri jeje news, ri kamadmõd nañinmij ro rej make kõmman air title ilo jab jimwe, ri jedjed iju, ri kajitõbtõb, im ro jet rej bojak in lelok kakabilek—kin juõn wõnãn. Ak kain kakabilek rot rej leloke? Kien ko ilo Bible kin mour erreo, ekkã air kajekdoni ñan najikin men eo rej naetan new morality (mour in anemkwoj ñan kõmman jabdewõt men armij eo ekõnan). Ñan wanjoñok, ilo an konono kin an kien makoko in “kamelim belele ko ikõtan emaan ñan don ak kõrã ñan don,” juõn katak ilo juõn newspaper ilo Canada The Globe and Mail ej keañ: “Ilo yiõ eo 2000, ejakkar bwe ren karmijete kõnan eo elaptata an ruo armij ro rej yokwe im tiljek ñan don kin wõt air maan ñan don ak kõrã ñan don.” Wãwen eo rainin ej ñan kõtlok, jab ekajete. Men otemjej rej watõke einwõt ejelok juõn kien ebin im alikar; ejako kiõ an jabdewõt men lukkun jejjet ilo jimwe ak bwid.—Sam 10:3, 4.
9. Ta eo armij ro rej watõke bwe emõn mwiliir ilo jukjuk im bed in ekkã air kõmmane?
9 Ro jet rej reilok ñan armij ro remweie im buñbuñ einwõt joñok ko ilo air kõmmani bebe ko air. Meñe rej watõk ro remweie im buñbuñ einwõt ro tellokiir bõk kautiej ilo jukjuk im bed eo rainin, ekkã air konono wõt kake ak jab jerbale kadkad ko remõn einwõt mol im liki. Ilo air jibadõk air bõk kajur ak maroñ im orlok in money, elõñ ejelok air inebata elañe rej kajekdon kien ko ak karõk ko im kokkure kien ko kin mour erreo. Ñan tõbar buñbuñ, jet rej kowan kien mwil emõn ko im mõnõnõ in bõk manit eo ej menin bwilõñ im kailbõk. Tokjen ej juõn jukjuk im bed eo ej emmakit ñan korlok money im eanemkwoj, eo unintel eo ie ej, “Jabdewõt men emõn.” Ej menin bwilõñ ke bwe armij ro rej bwok im jebwãbwe kin jimwe im bwid?—Luk 6:39.
10. Ewi wãwen nan eo an Isaiah kin emõn im nana kar kamol an mol?
10 Tokjen ko renana rej walok jen bebe ko rejjab meletlet kar kõmmani ion bedbedin ialin tel eo ewan rej bed ibelakid—belele ko im family ko rejebel, unokan kadõk im kajerbal alcohol ilo jakkar, kumi in jodikdik ro relej, mour in ãjãj, nañinmij ko rekabobo rej walok jen mour in lũñ, baj ñan kwalok jejjo wõt wanjoñok. Ewi wãwen ad maroñ watõk an men ko walok im einjuõn ñe armij ro rej jolok kien ko ak men eo rej bõk air kakabilek jene ñe ej itok ñan jimwe im bwid? (Dri Rom 1:28-32) Ejja einwõt an kar ri kanan Isaiah keañ: “Wo ñõn ro rej naetan nana emõn, im emõn ñõn nana; rej likit marok einwõt maram, im maram einwõt marok; rej likit meo einwõt tõñõl, im tõñõl einwõt meo! Wo ñõn ro re meletlet ilo mejeir wõt, im dri jelalokjen ilo air lemnok!”—Aiseia 5:20, 21.
11. Etke ejjab menin meletlet ñan an juõn atartar ion e make ñe ej beek kin jimwe im bwid?
11 Mol eo bwe Anij ear ekajete armij in Ri Jew ro etto ro rar oktak im “meletlet ilo mejeir” ej kalaplok tokjen eo ñan bõprae ad atartar iod make ilo beek jimwe im bwid. Elõñ armij rainin rej errã ilo lemnak eo kin “baj eoroñ wõt buruõm,” ak “kõmmane men eo kwoj eñjake bwe ejimwe.” Emõn ke kain wãwen in? Ejjab ekkar ñan Bible eo, bwe ej ba ilo alikar: “Buruen armij elaplok an jelã mon jen jabdewõt men im elap an kate. Wõn emaroñ ejelã?” (Jeremiah 17:9, NW) Kwon kar atartar ke ion juõn armij eo ejelã mon im ej kate ñan tel yuk ilo am kõmman bebe? Kwo jamin kar. Ilo mol, bõlen kwo naj kar ukõte men eo ej jiroñ yuk bwe kwon kõmmane. Eñin unin Bible eo ej kakememej kij: “Eo ej liki buruen wõt, e dri bwebwe; a eo ej etetal im e meletlet, naj lomorene.”—Jabõn Kennan Ko 3:5-7; 28:26.
Jen Katak Men eo Emõn ñan Anij
12. Etke jej aikwij kamol ñan kij make kin “ankil an Anij”?
12 Ke jej aikwij jab atartar ion meletlet eo an lal in im jab iod make ñe ej itok ñan jimwe im bwid, ta eo jej aikwij kõmmane? Lale nanin kakabilek in ealikar jen ri jilek Paul: “Im komin jab ilo wãwen dri lõl in: a komin kejakilkil kom ilo kõkãle ami lolãtãt, bwe komin melejoñ ta ankil an Anij emõn im kabuñburuen im wãppen.” (Dri Rom 12:2) Etke jej aikwij kamol ñan kij make ta ankil an Anij? Ilo Bible eo, Jehovah ej letok juõn un ejimwe ak ekajur, ke ej ba: “Bwe einwõt lõñ ko re utiej jen lõl, ein drein ial ko Aõ re utiej jen ial ko ami, im lemnok ko Aõ jen lemnok ko ami.” (Aiseia 55:9) Kin menin, jen ad atartar ion bebe ko ad make ak eñjake ko ad jej juburuõd kaki, rej kõketak kij: “Ke komij melejoñ men eo ej kabuñburuen Iroij.”—Dri Epesõs 5:10.
13. Ewi wãwen an nan ko an Jesus emwij jei ilo Jon 17:3 kalikar aikwij eo ñan jelã ta eo emõn ñan Anij?
13 Jesus Christ ear kalikar aikwij in ke ear ba: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Nan eo ilo kajin Greek rej ukõte “ren jela” ewõr juõn melele emũlallok. Ekkar ñan Vine’s Expository Dictionary, ej kwalok juõn kõtan eo ikõtan armij eo ejelã im men eo ej jelã kake; ilo wãwen in, men eo ewõr jelã kake ewõr aorõkin ak wõr tokjen ñan armij eo ejelã, im kin men in kõtan eo emwij ejaake ebareinwõt aorõk im wõr tokjen.” Ñan an wõr juõn kõtan ibben bar juõn ej melelen elaplok jen baj jelã wõt wõn armij eo ak ta ãt eo etan. Ej bareinwõt kitibuj ad jelã ta eo armij eo ekõnan ak jab kõnan, jelã men ko raorõk ibben, kien mour ko an—im kautieji.—1 Jon 2:3; 4:8.
Kaminene Maroñ in Jelã eo Ad
14. Ta eo Paul ear ba ej oktak eo elaptata ikõtan niñniñ ro ilo jitõb im armij ritto ro?
14 Inem, ewi wãwen ad maroñ bõk maroñ eo ñan kile kõtan eo ikõtan jimwe im bwid? Nan ko an Paul ñan Christian Ri Hebrew ro ilo ebeben eo kein kajuõn rej letok uak eo. E ar je: “Bwe armij jabrewõt ej mõña milk wõt, e jab minene ilo nan emõn; bwe e niñniñ. A ekõn ko rebin rej ekar ñõn ro re ridto, aet, ñõn ro kin air minene rej maroñ in jela kajen emõn im nana.” Ijin Paul ej keidi “milk,” eo ear kwalok kake ilo eon eo lok iman einwõt “men ko mokta an nan in Anij,” ibben “ekõn ko rebin,” rej an “ro re ridto,” ro “rej maroñ in jela kajen emõn im nana.”—Dri Hibru 5:12-14.
15. Etke jej aikwij kate kij ñan bõk jelãlokjen eo ejimwe kin Anij?
15 Melelen menin bwe, moktata, jej aikwij kate kij ñan bõk jelãlokjen eo ejimwe kin kien ko an Anij einwõt air bed ilo Nan eo an, Bible eo. Jejjab bukõt juõn lajrak in kien ko ñan jiroñ kij ta eo jemaroñ ak jab maroñ kõmmane. Bible eo ejjab juõn book eo einwõt in. Ak, Paul ear kamelele: “Jeje ko otemjej emwij letok kin kakõrmol an Anij, ej bareinwõt or tokjeir kin katakin, im kowe, im kajime, im kajelaik armij ilo kwojarjar; bwe armij korijeran Anij en wãppen im emwij kõkõmõnmõn e ñõn jerbal emõn otemjej.” (2 Timote 3:16, 17) Ñan bõk tokjen jen katakin, kauwe, im kajimwe in, jej aikwij jino kajerbal lemnak eo ad im maroñ in kalmenlokjen eo ad. Menin ej aikwij ad kate, ak tokjen eo—ej “emwij kõkõmõnmõn e ñõn jerbal emõn otemjej”—emõn aorõkin.—Jabõn Kennan Ko 2:3-6.
16. Ta eo ej melelen ñan kaminene maroñ in jelã eo an juõn armij?
16 Inem, einwõt an Paul kar kwalok, ro re ritto “kin air minene rej maroñ in jela kajen emõn im nana.” Ijin jej itok ñan men eo elaptata ilo menin. Kajin in “kin air minene rej maroñ in jela” ej melelen bwe “mõttan ko ilo enbwin eo emwij kamineneiki (einwõt juõn gymnast ak ri kaminene).” (Kingdom Interlinear Translation) Juõn ri kaminene eo ewõr an jelã kilen ilo juõn kein kaminene eo emwij kãlete, einwõt ring ko ak juõn balance beam, emaroñ kõmman ilo mõkaj juõn kilen eo ej einwõt jumae kajur in mejatoto ak kien ko jet an mejatoto. Ewõr an maroñ in bebeik aolep mõttan ko in enbwinin ien otemjej, im emõkaj an eñjake kin ta emmakit ko ej aikwij kõmmani bwe en maroñ kadedelok an tõbrak ial eo an. Aolepen menin ej walok jen tokjen kaminene eo ejimwe im ejjab bõjrak.
17. Ilo wãwen et eo jej aikwij einwõt ri kaminene ro?
17 Kij bareinwõt jej aikwij katak einwõt juõn ri kaminene, ilo konono ilo nan in kõkkar, elañe jej kõnan kamol bwe bebe ko im kãlet ko jej kõmmani remõn ien otemjej. Ien otemjej jej aikwij bebek eñjake ko ad im mõttan ko an enbwin eo. (Matu 5:29, 30; Dri Kolosse 3:5-10) Ñan wanjoñok, kwoj kauweik ke mejem bwe en jab kalimjek juõn men eo etton ak lojilñim bwe en jab roñjake al ak konono ko rejjab emõn? Emol bwe men rot kein rejjab emõn rebed ibelakid. Bõtab, ej ad wõt kãlet eo elañe jej kõtlok okran bwe en ejaak ilo buruõd im lemnak eo ad. Jemaroñ kajeoñe ri jeje Sam eo ear ba: “I jamin likit iman meja jabrewõt men in drike: I kitõtõkake jerbal an ro rej jeorlok; e jamin edrep ñõn iõ. . . . Eo ej konono riõp jamin kabin e iman meja.”—Sam 101:3, 7.
Kaminene Maroñ in Jelã eo Am Ikijen Kajerbale
18. Ta melelen kajin in “kin air minene” ilo kamelele eo an Paul kin kamineneik maroñ in jelã eo an juõn armij?
18 Likit ilo ad lemnak bwe ej “kin air minene” jej maroñ katakin maroñ in jelã eo ad ñan kile jimwe im bwid jimor. Ilo bar juõn wãwen ba, jabdewõt ien jej jelmae juõn bebe, jej aikwij katak ñan kajerbal kajur in lemnak eo ad ñan melele ta nanin kaiñi ko ilo Bible ej kitibuji im ewi wãwen ad maroñ kajerbali. Ejaake manit in kõmman etale ko ilo publication ko kin Bible rej litok ikijen “dri korijer e tiljek im meletlet.” (Matu 24:45) Bwebõta, jemaroñ bukõt jibañ eo an Ri Christian ro reritto. Mekarta, jibadbad eo ad jej kõmmane ñan katak Nanin Anij, koba ibben jar ñan Jehovah ñan ialin tel eo an im jitõb eo, enaj etal im wõr tokjen.—Dri Epesõs 3:14-19.
19. Ta jerammõn ko remaroñ ad elañe jej wõnmanlok ilo kamineneik maroñ in jelã eo ad?
19 Ke jej wõnmanlok im kamineneik maroñ in jelã eo ad, men eo jej jibadõke ej “bwe jen kiõ jen jab ajiri, im jibliklik einwõt no ko, im makõtkit kin jabrewõt kõto in katak, ilo jela mon an armij, ilo etao eo ej tellok ñõn keien bwir.” (Dri Epesõs 4:14) Jen an eindein, ilo bedbed ion jelãlokjen im melele eo ad kin ta eo emõn ñan Anij, jenaj maroñ kõmman bebe ko remeletlet, lap im dik, ko ewõr tokjeir ñan kij, menin kalek ñan ri kabuñ ro mõttad, im ilõñ in men otemjej kamõnõnõ ñan Jemed ilañ. (Jabõn Kennan Ko 27:11) Ej juõn jerammõn im kejbãrok elap ilo ien kein rebin!
[Kamelele ko itulal]
a Ilo juõn lajrak in elõñlok jen 40 wãwen ko elap air bõktok inebata ilo mour an armij, kõmman in Drs. Thomas Holmes im Richard Rahe, mij eo an ri belele eo juõn, jebel, im ilok jen don rej men ko jilu ilõñ. Belele ej kein kajiljilimjuõn.
Kwo Maroñ Ke Kamelele?
• Ta maroñ eo ej menin aikwij ñan kõmmani bebe ko remõn?
• Etke ejjab menin meletlet ñan reilok ñan armij ro rebuñbuñ ak atartar ion eñjake ko ad make ñe jej beek jimwe im bwid?
• Etke jej aikwij jelã kin ta eo emõn ñan Anij ñe jej kõmman bebe, im ewi wãwen ad maroñ kõmman eindein?
• Ta melelen ‘ñan kamineneik maroñ in jelã eo ad’?
[Pija]
Reilok ñan ro remweie im buñbuñ ñan bõk ialin tel ej men wan
[Pija]
Einwõt juõn ri kaminene, jej aikwij bebek aolepen lemnak ko ad im mõttan ko in enbwin