“Jerkakbiji Eo Mokta”—Emwij An Jinoe!
“Ro remij ilo Kraist re naj jerkakbiji mokta.”—1 DRI TESSALONIKA 4:16.
1, 2. (a) Ta kejatdikdik eo ewõr ibben ro rar mij? (b) Tõmak eo am kin jerkakbiji ej bedbed ion ta? (Lale footnote eo.)
“BWE ro re mour re jela bwe re naj mij.” Jen ien eo Adam ear jerawiwi, men in ear mol. Ilo bwebwenato in armij, aolep ro rar lotak rar jelã bwe renaj mij, im elõñ rar lemnak: ‘Ta eo enaj walok elikin mij? Ta wãwen ro remij?’ Bible eo ej uak: “A ro re mij ejelok air jela.”—Ekklisiastis 9:5.
2 Inem, ewõr ke juõn kejatdikdik ñan ro rar mij? Aet. Ilo mol, ej aikwij wõr ñan an naj jejjet kitien karõk eo jinoin an Anij kin armij. Iumin elõñ buki yiõ ko, ri karejar ro retiljek an Anij rar jerbale tõmak eo air ilo kallimur eo an Jehovah kin juõn Ine me enaj kokkure Satan im ukõt ak jolok aolep jorrãn ko ear kõmmani. (Jenesis 3:15) Elõñ rar mij. Ñan air maroñ lo an jejjet kitien kallimur in im ko jet me Jehovah ear kõmmani, rej aikwij jerkakbiji jen mij. (Dri Hibru 11:13) Juõn men einwõt in emaroñ ke walok? Aet, emaroñ. Ri jilek Paul ear ba: “Bwe ro remõn im ro renana re naj jerkakbiji.” (Jerbal 24:15) Juõn ien Paul ear kajerkakbiji juõn likao etan Eutychus, eo ear wõtlok jen bo eo kein kajilu im ke rar “kwotõk e emij.” Eñin ej jerkakbiji eo eliktata ian ko ruatimjuõn me kar jeje kaki ilo Bible eo.—Jerbal 20:7-12.a
3. Ilo wãwen et nan ko an Jesus ilo Jon 5:28, 29 ej kainemõn yuk, im etke?
3 Jerkakbiji kein ruatimjuõn rej letok juõn bedbed ñan tõmak ilo nan ko an Paul. Rej kakajur liki eo ad ilo kallimur eo an Jesus: “Auõ ej itok, ilo eo ro otemjej rej ber ilo lũp ko, re naj roñ ainiken [Jesus], im naj drioijtok.” (Jon 5:28, 29) Nan kein elap an kõmãnãn buruõd! Im ej juõn nan in kainemõn elap ñan million ro ear mij ro rejitenburu ibbeir!
4, 5. Jerkakbiji ta ko reoktak jen don Bible eo ej konono kaki, im jerkakbiji et eo jenaj etale ilo katak in?
4 Enañin aolep armij ro me rej jerkakbiji renaj jeblaktok ñan juõn lal eainemõn iumin Ailiñ in Anij. (Sam Ko 37:10, 11, 29; Aiseia 11:6-9; 35:5, 6; 65:21-23) Bõtab, jerkakbiji ko jet renaj walok mokta jen an naj walok men in. Mokta, Jesus Christ ear aikwij jerkakbiji ñan kwalok aorõkin katok in binmour eo an ñan Anij ñan tokjen eo ad. Jesus ear mij im jerkakbiji ilo 33 C.E.
5 Jeltokin, ri kabit ro uan “Israel an Anij” rej aikwij koba ibben Iroij Jesus Christ ilo aibujuij eo ilañ, ijo renaj “ber iben Iroij ien otemjej.” (Dri Galetia 6:16; 1 Dri Tessalonika 4:17) Rej naetan men in “jerkakbiji in mokta.” (Reveles̃õn 20:6) Ñe ededelok jerkakbiji in, inem enaj walok jerkakbiji eo an elõñ million ro renaj mour indio ion lal ilo Paradise eo. Kin men in, jekdon elañe kejatdikdik eo ad ej ñan mour ilañ ak ilal, ewõr ad itoklimo kin “jerkakbiji eo mokta.” Enaj kain jerkakbiji rot? Ñããt eo enaj walok?
“Ewi Wãwen Enbwinnier?”
6, 7. (a) Mokta jen an Christian ri kabit ro maroñ etal ñan lañ, ta eo ej aikwij walok? (b) Kain enbwin rot eo renaj bõke ñe rej jerkakbiji?
6 Ilo letter eo an kein kajuõn ñan Ri Corinth ro, Paul ear bõkmantak juõn kajitõk kin jerkakbiji eo mokta: “Ewi wãwen an ri mij naj jerkakbije? Enaj ewi wãwen enbwinnier?” Inem ear uake kajitõk eo: “Ine eo kwoj kalbwini ilo bũdrej ejjab jul im eddek elañe ejjab mij mokta . . . Anij ej keboj juõn kãn ñõn ine ekkar ñõn an kõnan . . . Eor aibuijuij in men ko an lõñ, im ebar wor juõn aibuijuij in men ko an lõl.”—1 Dri Korint 15:35-40.
7 Nan kein an Paul rej kalikar bwe Ri Christian ro me kar kabit ir kin jitõb kwojarjar rej aikwij mij mokta jen air maroñ bõk jinekjej eo air ilañ. Ñe rej mij, enbwiniir ilo kanniek enaj jeblak ñan bũdej. (Jenesis 3:19) Ilo ien eo Anij ear karõke, renaj jerkakbiji kin juõn enbwin ekkar ñan w̃awen mour ilañ.(1 Jon3:2) Anij ej bareinwõt lelok ñan ir juõn mour me ejamin mij im wabanban. Men in ejjab juõn men rej lotak im ewõr ibbeir einwõt ñe kar lelok ñan ir juõn aan eo eban mij. “Im mij in en kõnõk banmij,” Paul ej ba. Jabwabanban ej juõn men in letok jen Anij, me ro rej bõk kunair ilo jerkakbiji eo mokta rej ‘kõnõke.’—1 Dri Korint 15:50, 53; Jenesis 2:7; 2 Dri Korint 5:1, 2, 8.
8. Ewi wãwen ad jelã bwe Anij ejjab kãlet 144,000 jen ro uan kabuñ ko rekajjo jen don?
8 Ro uan 144,000 renaj bõk jerkakbiji in mokta ak kein kajuõn. Jehovah ear jino kãlet ir jen ien Pentecost 33 C.E., ejjabto elikin an kar kajerkakbijeik Jesus. Aolepeir ewõr “etan [Jesus] im etan Jemen ion dremair.” (Reveles̃õn 14:1, 3) Kin men in, kar jab kãlet ir jen elõñ kabuñ ko rekajjo jen don. Ir aolep rej ri kalor ro an Christ, im aolep rej mõnõnõ in bõk etan Jemeir—Jehovah. Ñe rej jerkakbiji, renaj bõk juõn jerbal ilo lañ ko. Kejatdikdik eo ñan air jerbal ijo Anij ej bed ie elap an kamõnõnõik ir.
Emwij an Jinoe Ke?
9. Ewi wãwen an Reveles̃õn 12:7 im 17:14 jibañ kij antonelok kin ñããt eo jerkakbiji eo mokta ej ijjino?
9 Ñããt eo enaj walok jerkakbiji eo mokta? Ewõr kein kamol ko relap bwe emwij an jino walok. Ñan wanjoñok, kwon keidi mõk ruo chapter ko ilo book in Reveles̃õn. Mokta, lale Reveles̃õn chapter 12. Ijo jej konono bwe Jesus Christ eo ej kab mwij kairoij e, ibben enjel ro an rekwojarjar, rej tarinaik Satan im demon ro an. (Reveles̃õn 12:7-9) Einwõt ekkã an magazine in kwaloke, tarinae in ear jino ilo yiõ eo 1914.b Ak, lale mõk, ejelok juõn ian ri kabit ri kalor ro an Christ rej bed ibben Jesus ilo tarinae in ilañ. Kiõ lale mõk Reveles̃õn chapter 17. Jej konono ijin bwe elikin an naj kokkure “Babilõn Elap,” Lamb eo enaj tarinae im anjo ion ailiñ ko. Inem ej kobaik nan kein: “Im ro iben re naj bareinwõt bõk anjo, ro dri kir, ro ar kãlet ir, im retiljek.” (Reveles̃õn 17:5, 14) “Ro dri kir, ro ar kãlet ir, im retiljek” ej aikwij dedelok air jerkakbiji ñan air naj maroñ bed ibben Jesus ilo anjo eo eliktata ion lal eo an Satan. Inem, ej juõn men in kõmmanwa ñan ad tõmak bwe ri kabit ro me rar mij mokta jen Armageddon renaj jerkakbiji ilo ien eo ikõtan 1914 im Armageddon.
10, 11. (a) Wõn elder ro 24, im ta eo juõn iair ej kwalok kake ñan John? (b) Ta jemlok eo jemaroñ bõk jen men in?
10 Jemaroñ ke kajejjet ad ba ñããt eo jerkakbiji eo mokta ear jinoe? Jemaroñ lo juõn men in jibañ ekaitoktoklimo ilo Reveles̃õn 7:9-15, ijo ri jilek John ej kwalok kin vision eo kin juõn “jar elap, eo ejelok armij ej maroñ in bwinir.” Juõn ian elder ro 24 ej kwalok kajjen jar in elap ñan John, im elder rein rej jutak kin 144,000 iroij ro mõttan Christ ilo aibujuij eo air ilañ.c (Luk 22:28-30; Reveles̃õn 4:4) John bareinwõt ear wõr an kejatdikdik kin mour ilañ, ak kin an kar juõn armij ion lal ke elder eo ear konono ibben, ilo vision eo John ear jutak kin ri kabit ro ion lal me rejañin kar bõk jinekjej eo air kin mour ilañ.
11 Inem, ta jemlok eo jemaroñ bõke jen mol eo bwe juõn ian elder ro 24 ej kwalok kajjen jar eo elap ñan John? Emaroñ bwe ro ilo kumi in elder ro 24 me emwij air jerkakbiji rej bõk kunair ilo air kwalok mol ko rekwojarjar rainin. Etke men in eaorõk? Kinke melele eo ejimwe kin jar eo elap kar kwalok kake ñan ri kabit ri karejar ro an Anij ion lal ilo 1935. Elañe kar kajerbal juõn ian elder ro 24 ñan an kwalok kin mol in eaorõk, ealikar ear aikwij jerkakbiji ñan lañ mokta jen 1935. Men in ej kalikar bwe jerkakbiji eo mokta ear jino ikõtan yiõ ko ilo 1914 im 1935. Emaroñ ke wõr juõn uak ejejjet lok?
12. Kamelele kin etke ien manrak in 1918 emaroñ ien eo jerkakbiji eo mokta ear jinoe.
12 Bõlen kiõ, emaroñ juõn men in jibañ ñan etale kin ta eo jemaroñ watõke einwõt juõn katak einlok wõt eo ilo Bible. Kar kabit Jesus Christ ilo ien añõneañ in 29 C.E. einwõt King eo enaj itok tokelik ilo Ailiñ in Anij. Jilu im jimettan yiõ ko tokelik, ilo ien manrak in 33 C.E., kar kajerkakbijeik e einwõt juõn jitõb ekajur. Inem, jemaroñ ke bõk jemlok eo bwe kinke kar kairoij Jesus ilo ien añõneañ in yiõ eo 1914, ien jerkakbiji eo an ri kabit ri karejar ro an retiljek ear jino jilu im jimettan yiõ ko tokelik, ilo manrak in 1918? Men in emaroñ eindein. Meñe jejjab maroñ kamol men in ilo Bible, ej errã ibben eon ko jet me rej kalikar bwe jerkakbiji eo mokta ear jino walok ejjab etto elikin an kar jino ien bed eo an Christ.
13. Ilo wãwen et 1 Dri Tessalonika 4:15-17 ej kwalok bwe jerkakbiji eo mokta ear jino ilo tujinoin bed eo an Christ?
13 Ñan wanjoñok, Paul ear jeje: “Bwe kijeo, ro rej mour im berwõt mae an Iroij itok, je jamin ilok mokta jen ro rej kiki. Bwe E Iroij e naj wõnlõltak jen lõñ, kin lamij, im ainiken arkenjel, im jilil an Anij, im ro remij ilo Kraist re naj jerkakbiji mokta: Inem kij, ro jej mour im berwõt, naj bõkliñlok kij iben ro jet ilo kõro bwe jen wõnmae Iroij i mejatoto; im ein drein je naj ber iben Iroij ien otemjej.” (1 Dri Tessalonika 4:15-17) Ilo kajin Greek eo mokta, nan ko “an Iroij itok” ilo mol ej melele “bed eo an Iroij.” Ak lale bwe Paul ear jab konono kin tujemlokin bed eo an. Kin men in, Christian ri kabit ro me rar mij mokta jen ien bed eo an Christ rar jerkakbiji ñan mour ilañ mokta lok jen ro rej mour wõt ilo ien bed eo an Christ. Ej melelen men in bwe ear jino ilo tujinoin bed eo an Christ, im ej wõnmanlok wõt ilo ien bed eo an. Jen an aolepeir jerkakbiji ilo juõn wõt ien, jerkakbiji eo mokta ear walok jidik kin jidik iumin juõn ien kar karõke.
“Ar Lelok ñõn Ir Otemjej Nuknuk ko Remouj”
14. (a) Ñããt eo vision ko kar jeje ilo Reveles̃õn chapter 6 rar jejjet kitieir? (b) Ta eo ej annañelok ilo Reveles̃õn 6:9?
14 Lemnak bareinwõt, kin men in kamol eo ej bed ilo Reveles̃õn chapter 6. Ijo jej lo an Jesus iuwe ion horse eo emouj einwõt juõn King ej bõk anjo ion kijirãt ro an. (Reveles̃õn 6:2) Ailiñ ko rej bõk kunair ilo juõn tarinae elukkun lap. (Reveles̃õn 6:4) Ñitta ej jededlok. (Reveles̃õn 6:5, 6) Nañinmij ko rekauwatata rej kokkure armij. (Reveles̃õn 6:8) Aolep men kein kar kanan kaki rejejjet ñan wãwen ko ilo lal in jen 1914. Ake wõr barjuõn men ej walok. Kiõ jej reilok ñan lokatok eo. Ijo itulalin ewõr “aan armij ro iumin lokatok eo, ro emwij mõn ir kin air kwalok nan in Anij im kin air tiljek ilo air kennan kake.” (Revelation 6:9) Kinke “mour in kõniek ej ilo bõtõktõkin,” men eo ej annañelok men eo ej bed itulalin lokatok eo ej bõtõktõkin ri karejar ro retiljek an Jesus me kar mõn ir kin air kar beran im kijejeto ilo air kwalok nan.—Livitikõs 17:11.
15, 16. Kamelele kin etke nan ko ilo Reveles̃õn 6:10, 11 rej jitõñlok ñan jerkakbiji eo mokta.
15 Einwõt bõtõktõkin Abel eo ewãnik, bõtõktõkin Ri Christian rein rar mij kin tõmak eo air ej lamõj kin ekajet jimwe. (Jenesis 4:10) “Im r’ar lamij ilo ainiken elap, im ba, O Karo ekwojarjar im emol, ietoõn Kwo jab ekajet im irenwõne kin amuij bõtõktõk ion ro rej jokwe ilo lõl?” Jeltokin, ta eo ej walok? “Im ar lelok ñõn ir otemjej nuknuk ko remouj; im ar ba ñõn ir bwe ren kakije bar jirik ien, ñõn ter eo ro korijer ibeir, im ro jeir im jãtir, ro naj mõn ir einwõt rein, renaj kamwijlok air etal.”—Reveles̃õn 6:10, 11.
16 Kar lelok ke nuknuk ko remouj ñan bõtõktõk eo ear bed itulalin lokatok eo? Emol jaab! Kar lelok nuknuk ko ñan ro me kar katorlok bõtõktõkiir, ilo nan in kõkkar, ion lokatok eo. Rar katok ak lelok mour ko air ilo etan Jesus im kiõ kar kajerkakbijeik ir einwõt jitõb ro. Ewi wãwen ad jelã men in? Mokta ilo book in Reveles̃õn, jej konono: “Eo ej bõk anjo e naj kõnõk nuknuk ko remouj, im I jamin jeorilok etan jen buk in mour.” Bareinwõt, kememej bwe elder ro 24 rar kõnak “nuknuk ko air remouj, im ion bõrair [ear wõr] belin gold.” (Reveles̃õn 3:5; 4:4) Inem elikin an kar tarinae, ñitta, im nañinmij jino kokkure lal in, ro uan 144,000 me rar mij, einwõt kar annañelok ikijen bõtõktõk eo ear bed itulal in lokatok eo, rar jerkakbiji ñan mour ilañ im kanuknuk ir kin nuknuk ko remouj ilo nan in kõkkar.
17. Ilo wãwen et eo ro rar bõk nuknuk ko remouj rej aikwij “kakije”?
17 Rein rej kab jerkakbiji rej aikwij “kakije.” Rej aikwij kõttar ilo meanwõd kin ran in idenwõne eo an Anij. “Ro korijer ibeir,” ak Christian ri kabit ro me rej bedwõt ion lal, rejañin kamol air tiljek iumin melejoñ. Ñe emottok ien ekajet eo ekwojarjar, enaj jemlok ien “kakije” eo. (Reveles̃õn 7:3) Ilo ien eo, rein rej jerkakbiji renaj bõk kunair ibben Iroij Jesus Christ ñan kokkure ro renana, ekoba ro rar katorlok bõtõktõkin Ri Christian ro ejelok rueir.—2 Dri Tessalonika 1:7-10.
Ta Melelen ñan Kij
18, 19. (a) Kin un et ko kwomaroñ bõk jemlok eo bwe jerkakbiji eo mokta emwij an jino walok? (b) Melele eo am kin jerkakbiji eo mokta, ewi wãwen an jelet eñjake eo am?
18 Nan in Anij ejjab kwalok juõn jejjet in ran eo ñe enaj walok jerkakbiji eo mokta, ak ej kwalok bwe enaj walok iumin juõn ien kar karõke, ilo ien bed eo an Christ. Christian ri kabit ro me rar mij mokta jen an kar jino ien bed eo an Christ renaj jerkakbiji mokta. Ke ien bed eo an Christ ej wõnmanlok wõt, Christian ri kabit ro me rej mij ilo tiljek renaj oktak ilo “bũkkinkwõle, ilo rum” ñan jitõb ro rekajur. (1 Dri Korint 15:52) Aolep ri kabit ro renaj bõk ke jinekjej eo air ilañ mokta jen tarinae eo ilo Armageddon? Jejjab lukkun jelã. Bõtab, men eo jejelã ej bwe ilo ien eo Anij ear karõke, aolep 144,000 renaj jutak ilo Tol Zion ilañ.
19 Jej bareinwõt jelã bwe enañin aolep ro uan 144,000 ededelok air kobalok ibben Christ. Eiet wõt ro rej bedwõt ijin ion lal. Men in ej lukkun kalikar bwe ien kajejjet ekajet eo an Anij ebak! Mõttan jidik, aolepen jukjuk im bed eo an Satan enaj jako. Im naj jolok Satan ilo abyss eo. Inem, enaj jino ien jerkakbiji eo, im ion bedbed in katok in binmour eo an Jesus, armij ro retiljek remaroñ jerkakbiji ñan mour wãppen eo ej einlok wõt eo Adam ear luji. Kanan eo an Jehovah ilo Jenesis 3:15 ej jejjet kitien ilo juõn wãwen elukkun aibujuij. Ej juõn jerammõn elap ibbed ñan ad mour ilo ran kein!
[Kamelele ko itulal]
a Ñan lo bwebwenato ko kin jerkakbiji ko ruatimjuõn, lale 1 Kiñ Ro 17:21-23; 2 Kiñ Ro 4:32-37; 13:21; Mark 5:35, 41-43; Luk 7:11-17; 24:34; Jon 11:43-45; Jerbal 9:36-42; im Jerbal20:7-12.
b Ñan lo nan ko ilo Bible me rej kamol bwe bed eo an Christ ear jino ilo 1914, lale book eo What Does the Bible Really Teach? (Ta eo Bible eo Ej Katakin?) page 215-18, jeje in Ri Kennan ro an Jehovah.
c Ñan bõk melele ko kin ewi wãwen ad jelã bwe 24 elder ro rej jutak kin Christian ri kabit ro ilo ijo jikiir ilañ, lale book eo Revelation—Its Grand Climax At Hand! (Reveles̃õn—Ien eo Elaptata im Kamõnõnõ Ebak!) page 77, jeje in Ri Kennan ro an Jehovah.
Kwomaroñ Ke Kamelele?
Ewi wãwen eon kein rej jibañ kij ñan kile ien eo ej jino “jerkakbiji in mokta”?
• 1 Dri Korint 15:23; 1 Dri Tessalonika 4:15-17
[Pija ko ilo peij 31]
Jerkakbiji ta ko renaj walok mokta jen an naj kajerkakbiji armij ro jet remij?