Ro Doon Jeova Rej “Ilo̦k jãn Jerawiwi”

1. Ta men eo el̦ap an Ri Kõnnaan ro an Jeova kaorõke?

ILO jikin ko ipel̦aakin lal̦ in, kar je etan Jeova ikiin m̦õko im ioon jet men ko me rej pãd ilowaan m̦õn kaloojoj ko. Ejjel̦o̦k pere bwe ke kwaar etal ñan jikin kein im loe etan Jeova ie, kwaar lukkuun m̦õn̦õn̦õ. Kõnke ãt eo etad ej Ri Kõnnaan ro an Jeova, jej lukkuun kaorõke etan Anij ilo ad karejar ñane. Ejjel̦o̦k bar juon kumi in armej ej kõjerbale ãt eo etan Anij joñan wõt kõj. Bõtab, ewõr bar jet men ko raorõk jej aikuj kõm̦m̦ani ijello̦kun ad baj kõjerbale wõt etan. Jej lukkuun jeraam̦m̦an bwe jej bõk ãt in Ri Kõnnaan ro an Jeova. Im kõnke jej bõk ãt in eaorõk, wãween ad mour im kõm̦m̦an rej aikuj bõktok nõbar ñan etan Jeova.

2. Kõnke jej bõk ãt in Ri Kõnnaan ro an Jeova, ta ko jej aikuj kõm̦m̦ani?

² Eaorõk bwe jen kõjerbal etan Anij. Bõtab, ebar wõr men ko jet jej aikuj kõm̦m̦ani ñan ad maroñ kabuñbũruon Anij. Jej aikuj bar l̦oore kien ko an im ‘ilo̦k jãn men ko renana.’ (Sam 34:14) Paul ear ba bwe eaorõk ñan ad kõm̦m̦ane men in ke ear ba: “Ro otemjel̦o̦k rej bõk etan [Jeova] ren ilo̦k jãn jerawiwi.” (Riit 2 Timote 2:19.) Innem kõnke jej ro doon Anij, ewi wãween ad “ilo̦k jãn jerawiwi,” ak ilo̦k jãn men ko renana?

“KOM̦WIN ILO̦K” JÃN MEN KO RENANA

3, 4. Ta eoon eo me epen an jet armej mel̦el̦e kake, im etke?

³ Ilo 2 Timote 2:19, Paul ear kwal̦o̦k kõn “bo̦unteijen epen an Anij.” Im ioon bo̦unteijen in em̦õj je ruo naan in kõjjel̦ã ko. Naan in kõjjel̦ã eo kein kajuon ej ba, “Anij ejel̦ã ro doon.” Naan kein rej itok jãn Bõnbõn 16:5. (Lale katak eo l̦o̦k.) Im naan in kõjjel̦ã eo kein karuo ej ba, “Ro otemjel̦o̦k rej bõk etan [Jeova] ren ilo̦k jãn jerawiwi.” Jet armej epen aer mel̦el̦e kõn naan in kõjjel̦ã in me ej kein karuo. Etke?

⁴ Wãween an kar Paul kõnnaan ej ãinwõt ñe ear bõke naan kein jãn juon iaan eoon ko ilo Jeje ko ilo kajin Hibru. Bõtab, ejjel̦o̦k juon eoon ilo jeje ko ilo kajin Hibru me ej lukkuun jejjet ñan naan ko me Paul ear kõjerbali. Innem, ta eo Paul ear kõnono kake ke ear ba: “Ro otemjel̦o̦k rej bõk etan [Jeova] ren ilo̦k jãn jerawiwi?” Eokwe, jejel̦ã bwe naan in kõjjel̦ã eo kein kajuon ej itok jãn Bõnbõn jebta 16, im ej kõnono kõn iien eo Kora ear jum̦ae Moses im Aron. Ak ta kõn naan in kõjjel̦ã eo kein karuo? Emaroñ ke bar jitõñl̦o̦k ñan ta eo ear wal̦o̦k ilo iien in?

5-7. Ta eo ear wal̦o̦k ilo raan ko an Moses me Paul ear kõnono kake ilo 2 Timote 2:19? (Lale pija eo ilo jinoin katak in.)

⁵ Detan im Ebairam rar kobal̦o̦k ippãn Kora im erjel ar tõl armej ro ñan jum̦ae Moses. (Bõnbõn 16:1-5) Rar jab kwal̦o̦k kautiej ñan Moses im rar kõjekdo̦o̦n maroñ eo an jãn Anij. Rar kiiõ kauwõtata ñan RiIsrael ro kõnke rein rar jokwe ibwiljier. M̦okta jãn an kar Jeova kaalikkar wõn rũkarejar ro an retiljek, ear lel̦o̦k juon kien epidodo ñan RiIsrael ro.

⁶ Baibõl̦ ej ba: “Jeova ear kõnono ñan Moses im ba, ‘Kwõn kõnono ñan jar eo im ba, “Kom̦win ilo̦k jãn iturin m̦õn Kora, Detan im Ebairam.”’ Im Moses ear jutak im ilo̦k ñan ippãn Detan im Ebairam; im rũtto ro an Israel rar l̦oore. Im ear kõnono ñan jar eo im ba, ‘Kom̦win ilo̦k, ij akwel̦ap ñan kom̦, jãn m̦õko an armej rein renana, im kom̦win jab uññũr jabdewõt iaan men ko aer, ñe kom̦ ab jako ilo jerawiwi ko aer otemjej.’ Ãindein rar ilo̦k jãn iturin m̦õn kõppãd an Kora, Detan im Ebairam, jãn ijoko otemjej.” (Bõnbõn 16:23-27) Innem, Jeova ear ko̦kkure aolep ro rar jum̦ae. Ak ro rar tiljek wõt ñan Anij rar mour. Etke? Kõnke rar “ilo̦k jãn jerawiwi” ke rar ilo̦k im kõjenolo̦k er jãn rijum̦ae ro.

⁷ Ilo 2 Timote 2:19, Paul ear ba naan kein: “Anij ejel̦ã ro doon.” Naan kein an rej itok jãn Bõnbõn 16:5. Im ke ear ba naan kein tok jet, “Ro otemjel̦o̦k rej bõk etan [Jeova] ren ilo̦k jãn jerawiwi,” emaroñ kar kõnono kõn men eo ear wal̦o̦k ilo Bõnbõn 16:23-27. Innem, jemaroñ ba bwe naan in kõjjel̦ã ko ruo ilo 2 Timote 2:19 rej jim̦or jitõñl̦o̦k ñan iien in. Ta eo jej katak jãn eoon in ilo 2 Timote 2:19? Eokwe, jej katak bwe Jeova ej riiti bũruon armej. Ejel̦ã kajjien rũkarejar ro an retiljek, im ej kõtmãne bwe ren kõjenolo̦k er make jãn ro renana.

“KWÕN EL̦L̦O̦K JÃN AKWÃÃL KO REWAAN”

8. Ijello̦kun ad baj kõjerbal wõt etan Anij im pãdwõt ilo eklejia eo, bar ta eo juon jej aikuj kõm̦m̦ane?

⁸ Paul ear bar kwal̦o̦k kõn apañ eo ear wal̦o̦k ilo raan ko an Moses ñan kakeememeje Timote bwe ej aikuj kõjparok kõtaan eo an ippãn Jeova. Ewõr bar juon men me Kũrjin ro rar aikuj kõm̦m̦ane ijello̦kun aer kar baj pãdwõt ilo eklejia eo aer. Ekar bar ãindein ippãn rũkarejar ro retiljek an Anij ilo raan ko an Moses. Ijello̦kun aer kar baj kõjerbal wõt etan Jeova, ekar bar wõr juon men rar aikuj kõm̦m̦ane. Ta in? Ej bwe aolep ro doon Anij me retiljek rej aikuj ilo̦k jãn men ko renana. Ta mel̦el̦ein kar naan in kakapilõklõk eo an Paul ñan Timote? Im ta eo jemaroñ katak jãn naan in kakapilõklõk in?

9. Ewi wãween an kar ‘akwããl ko rewaan an ro rejajel̦o̦kjen̦’ jelõt Kũrjin ro ilo raan ko an rijjilõk ro?

⁹ Ilo lõta eo an Paul ñan Timote, ear lel̦o̦k juon naan in kakapilõklõk em̦m̦an kõn ewi wãween an ilo̦k jãn men ko renana. Ñan waanjoñak, Paul ej ba ñan Timote bwe enana ñan “akwããl kõn naan” im bwe en “el̦l̦o̦k jãn akwããl ko rewaan.” (Riit 2 Timote 2:14, 16, 23, UBS.) Etke Paul ear ba naan kein? Ej kõnke jet ilo eklejia eo rar jum̦ae katak ko rem̦ool im katakin ro jet kõn katak ko aer rebõd. Im ro jet rar kajeededi jet katak ko im kõm̦m̦an an wõr poktak im akwããl ilowaan eklejia eo. Jet iaan mel̦el̦e ko an rein rar jab kajju jum̦ae katak ko jãn Baibõl̦, bõtab ekar itõn kõm̦m̦an bwe en wõr jepel ilo eklejia eo. Eñin unin Paul ear rõjañ Timote bwe en ‘el̦l̦o̦k jãn akwããl ko rewaan an ro rejajel̦o̦kjen̦.’

10. Ta eo jej aikuj kõm̦m̦ane ñe jej lo ak roñ kõn katak ko an ro rej jum̦ae m̦ool eo?

¹⁰ Ilo raan kein, ejeja ad loe an ro jet ilowaan eklejia eo oktak im jum̦ae katak ko rem̦ool jãn Baibõl̦. Bõtab, jenaaj baj lo ak roñ wõt kõn katak ko an ro rej jum̦ae katak ko rem̦ool jãn Baibõl̦. Jekdo̦o̦n ia eo katak kein rej itok jãne, ak jej aikuj in peek ilo bũruod bwe jen ilo̦k jãni im jab roñjaki. Ejjab em̦m̦an ñan ad kõnnaan ippãn rijum̦ae ro, bõlen ilo Internet ak ilo ad etal im bwebwenato ippãer, ak kõnnaan ippãer ilo bar wãween ko jet. Jemaroñ kõn̦aan kõm̦m̦ane men in kõnke jej l̦õmn̦ak bwe jej jipañ armej rein. Bõtab, ad kõnnaan ippãer ilo jabdewõt iaan wãween kein ej kwal̦o̦k bwe jejjab pokake Anij. Em̦õj an Anij kakien kõj bwe jen el̦l̦o̦k jãn ro rej jum̦ae katak ko rem̦ool im jab kõm̦m̦ao ippãer ñan jidik.

11. (1) Ta eo emaroñ kõm̦m̦an bwe en wõr jepel ilowaan eklejia eo? (2) Im ewi wãween an em̦m̦aan ro rej lale eklejia kõm̦m̦an juon joñak em̦m̦an?

¹¹ Ejjab l̦õmn̦ak ko wõt an ro rej oktak im jum̦ae katak ko rem̦ool ej kõm̦m̦an jepel ilowaan eklejia eo. Ebar wõr men ko jet me remaroñ ko̦kkure an wõr aenõm̦m̦an. Ñan waanjoñak, emaroñ ãinjuon wãween an ro jet l̦õmn̦ak kõn ta menin kam̦õn̦õn̦õ eo me ekkar ñan juon Kũrjin. El̦aññe juon ej kajjioñ iuuni ak booje ro jet ñan l̦oore l̦õmn̦ak eo an kõn kain menin kam̦õn̦õn̦õ rot eo em̦m̦an, men in emaroñ kõm̦m̦an an wõr ‘akwããl ko rewaan an ro rejajel̦o̦kjen̦.’ Ak ta ñe juon ilo eklejia eo ej rõjañ ro jet bwe em̦m̦an juon menin kam̦õn̦õn̦õ me ej rupe kien ko an Anij? Eokwe, em̦m̦aan ro rej lale eklejia rej aikuj kõnnaan ippãn armej in meñe emaroñ l̦õkatip kake. (Sam 11:5; Epesõs 5:3-5, UBS) Bõtab, em̦m̦aan ro rej lale eklejia rej aikuj bar kõjparok bwe ren jab rõjañ ro jet ñan errã ilo l̦õmn̦ak ko aer make. Rej aikuj l̦oore naan in kakapilõklõk in ilo Baibõl̦ me ej ba: “Kom̦win jabõt bwijin Anij ej pãd ippemi, im lale e, . . . kom̦win jab irooj ioon ro me em̦õj likũt e n̦a ippemi, a kom̦win make joñak ñan bwij eo.”​—1 Piter 5:2, 3; Riit 2 Korint 1:24.

12, 13. (1) Ewi wãween an Ri Kõnnaan ro an Jeova jel̦ã ta menin kam̦õn̦õn̦õ eo em̦m̦an? (2) Ta eoon ko remaroñ jipañ kõj ñan kõm̦m̦ani pepe ko rem̦m̦an kõn menin kam̦õn̦õn̦õ ko? (3) Ewi wãween an eoon ko ilo pãrokõrããp 12 bar jitõñl̦o̦k ñan men ko jet?

¹² Doulul in ad ejjab etale aolep pija in alwõj ko, mijjin in iukkure ko, bok ko, kab al ko, im kwal̦o̦k ewi wõt iaaer jej aikuj kõjparok kõj jãni. Etke? Kõnke Baibõl̦ ej ba bwe kajjojo armej en katak im kammineneik e make bwe en “maroñ in jel̦ã kajjien em̦m̦an im nana.” (Hibru 5:14) Jemaroñ lale naan in kakapilõklõk ko ilo Baibõl̦ ñan jel̦ã ta menin kam̦õn̦õn̦õ eo em̦m̦an jen kããlõte. Jekdo̦o̦n ta pepe eo jej kõm̦m̦ane ilo mour ko ad, mejãnkajjik eo ad ej ñan lale bwe aolep men ko me jej pepe in kõm̦m̦ani ren “kabuñbũruon Irooj.” (Epesõs 5:10, UBS) Baibõl̦ ej bar ba bwe bõran baam̦le eo ewõr an maroñ ioon kõrã eo pãleen im ajri ro nejin. Kõn men in, emaroñ kõm̦m̦ane juon pepe bwe en ejjel̦o̦k jet kain menin kam̦õn̦õn̦õ ak iukkure ilo m̦weo im̦weer.a (Lale kõmel̦el̦e eo itulal̦.)​—1 Korint 11:3; Epesõs 6:1-4.

¹³ Eoon kein ilõñ remaroñ bar jipañ kõj ñan kõm̦m̦ani pepe ko rem̦m̦an ikijjeen men ko jet jej kõm̦m̦ani ilo mour ko ad. Ñan waanjoñak, kõj kajjojo eoktak wãween ad l̦õmn̦ak jãn doon kõn ewi wãween ad nuknuk im tõrejab. Ebar oktak wãween ad l̦õmn̦ak kõn ta m̦õñã ko jej kañi im ewi wãween ad kõjparok ãjmour eo ad, im bar men ko jet. Jet remaroñ kõn̦aan iuuni ro jet ñan l̦oore l̦õmn̦ak ko aer kõn men kein, im men in emaroñ kõm̦m̦an bwe en wõr inepata im akwããl. Bõtab, el̦aññe kããlõt ko an kajjojo armej ejjab rupe kien ko im naan in kakapilõklõk ko ilo Baibõl̦, ejjel̦o̦k unin ad akwããl kõn ta eo juon Kũrjin ej aikuj kõm̦m̦ane. Baibõl̦ ej ba bwe “rũkarejeran Irooj, en jab akwããl, a en jouj ñan armej otemjej.”​—2 Timote 2:24.

KÕJPAROK JÃN RO REJ KÕM̦M̦ANI MEN KO RENANA

14. Ta waanjoñak eo Paul ear kwal̦o̦k kake kõn elemen an Kũrjin ro kõjparok er jãn ro rej kõm̦m̦ani men ko renana?

¹⁴ Bar ta wãween eo juon ro doon Anij remaroñ kõm̦m̦ane ñan aer “ilo̦k jãn jerawiwi”? Ej bwe ren kõjparok er jãn aer aetõl ro rej kõm̦m̦ani men ko renana. Ewi wãween an kar Paul waanjoñak kake men in? Eokwe, ãlikin an kar kwal̦o̦k kõn “bo̦unteijen epen an Anij,” ear jeje kõn “juon em̦ el̦ap.” Im ilowaan m̦wiin, ewõr “jãpe” ak kein kõm̦m̦an m̦õñã ko me rar jab baj kõm̦m̦ani jãn “kool̦ im jelba wõt, a ewõr jãpe jãn wõjke im jãn bwidej, jet ñan nõbar im jet ñan jekdo̦o̦n.” (2 Timote 2:20, 21) Ãlikin an kar Paul kwal̦o̦k waanjoñak in, ear rõjañ Kũrjin ro ñan ‘make karreoik’ er jãn ‘jãpe ñan jekdo̦o̦n.’

15, 16. Ta eo jej katak jãn waanjoñak eo an Paul kõn “juon em̦ el̦ap”?

¹⁵ Ta mel̦el̦ein waanjoñak in an Paul? Eokwe, ear kõkkar kõn “juon em̦ el̦ap” ñan eklejia eo an Kũrjin ro, im “jãpe” ko ilowaan m̦weo ñan kajjojo ro uwaan eklejia eo. Ilo juon em̦, ewõr jet kein kõm̦m̦an m̦õñã ko me remaroñ kõm̦m̦an ad nañinmej im jorrããn el̦aññe rettoon. Ñe men in ej wal̦o̦k, armej eo im̦õn m̦weo ej aikuj kõjenolo̦k men ko rettoon jãn men ko rerreo ãinwõt men ko ej kõjerbali ñan kõmat.

¹⁶ Men in ej bar jejjet ñan armej ro an Anij rainin. El̦aññe jekõn̦aan bwe aolepen mour eo ad en erreo, jej aikuj kõjenolo̦k kõj make jãn ro jet ilowaan eklejia eo me rej wõnm̦aanl̦o̦k wõt ilo aer jab l̦oore naan in kakapilõklõk ko an Jeova. (Riit 1 Korint 15:33.) El̦aññe emenin aikuj bwe jen kõjparok kõj jãn ad kõm̦m̦ao ak aetõl ad ippãn jet ilowaan eklejia eo, alikkar bwe el̦apl̦o̦k ad aikuj kõjparok kõj jãn ad aetõl ro ilikin eklejia eo. Unin ad kõm̦m̦ane men in ej kõnke elõñ armej ro me rejjab pãd ilo m̦ool eo rej riarõk m̦weiuk, rejjab pokake jineer im jemãer, rejjab tiljek, rej riab, rej lãj im kowadoñe ro jet. Bareinwõt, rej dike men ko rem̦m̦an, rej etao, im rej yokwe menin kam̦õn̦õn̦õ ko el̦ap jãn aer yokwe Anij.​—2 Timote 3:1-5.

JEOVA EJ KAJERAAM̦M̦AN KÕJ ÑE JEJ TILJEK ÑANE

17. Ta eo RiIsrael ro retiljek rar kõm̦m̦ane ñan lukkuun kaalikkar bwe rar “ilo̦k jãn jerawiwi”?

¹⁷ Ke Jeova ear kakien RiIsrael ro bwe ren “ilo̦k jãn iturin m̦õn Kora, Detan im Ebairam,” RiIsrael ro retiljek “rar ilo̦k” ilo iien eo wõt. (Bõnbõn 16:24, 27) Rar jab aepedped im jaje ta eo ren kõm̦m̦ane ak rar m̦õkaj im kõjenolo̦k er make jãn rijum̦ae ro. Rar “ilo̦k . . . jãn ijoko otemjej.” Ro rar tiljek ñan Jeova rar kaiur im pokake e jãn aolepen bũrueer. Rar lukkuun kaalikkar ilo kõm̦m̦an ko aer bwe rej rejetake Jeova im dike men eo ejjab jim̦we me ear wal̦o̦k. Ta eo jemaroñ katak jãn joñak in kar aer?

18. Ta eo Paul ear kajjioñ ba ñan Timote ke ear ba bwe en “ko jãn m̦õm̦ ko an likao”?

¹⁸ Kõtaan eo ad ippãn Jeova ej lukkuun aorõk ippãd. Jej aikuj m̦õkaj im kõjparoke bwe en jab jorrããn. Eñin men eo Paul ear kajjioñ ba ñan Timote ke ear ba bwe en “ko jãn m̦õm̦ ko an likao.” (2 Timote 2:22) Timote emaroñ kar 30 jim̦a an iiõ ilo tõre in. Bõtab, men in ej bar jitõñl̦o̦k ñan ro rerũttol̦o̦k kõnke er bareinwõt emaroñ wal̦o̦k kõn̦aan ak “m̦õm̦ ko an likao” ippãer. Innem, Timote ear aikuj “ko” jãn kõn̦aan kein el̦aññe ear iioon juon menin kapo im ewal̦o̦k eñjake kein ippãn. Ear aikuj “ilo̦k jãn jerawiwi.” Jijej ear bar kwal̦o̦k kõn ejja men in wõt ke ear ba, ‘El̦aññe mejam̦ ej l̦õkatipi eok, kwõn itũki im jol̦o̦k jãn eok.’ (Matu 18:9) Kũrjin ro me rekõn̦aan pokake naan in kakapilõklõk in im kõjparok kõtaan eo aer ippãn Anij, rej aikuj m̦õkaj im jum̦ae menin kapo ko im peek ilo bũrueer ñan ilo̦k jãn men kein.

19. Ewi wãween an kar jet Kũrjin kõjparok kõtaan eo aer ippãn Jeova?

¹⁹ Ewi wãween an kar jet Kũrjin kõjparok kõtaan eo aer ippãn Jeova? Eokwe, ro me rekõn ekkadekdek kar m̦okta, rar pepe ñan jab idaak dãnnin arkool̦ ñan jidik. Ro jet me ewõr aer m̦õjn̦o̦ kõn jet men, rar peek ilo bũrueer ñan kõjparok er jãn jabdewõt menin kam̦õn̦õn̦õ ko me remaroñ kairuj eñjake ko aer ñan kõm̦m̦ani men ko renana. (Sam 101:3) Ñan waanjoñak, ewõr juon jeid im jatid em̦m̦aan me m̦okta jãn an kar erom juon Ri Kõnnaan an Jeova, ekõn etal ñan bade ko im tuuj ippãn armej ro me enana m̦antier. Bõtab, ãlikin an kar katak m̦ool eo, ear pepe bwe eban bar tuuj ak eb meñe ilo iien iiãio ko an Ri Kõnnaan ro an Jeova. Etke? Kõnke ejjab kõn̦aan bwe en bar jino wal̦o̦ktok l̦õmn̦ak ko rettoon im kõn̦aan ko renana me em̦õj an ilo̦k jãni. Eokwe, ejjab mel̦el̦ein men in bwe aolep Kũrjin ro rejjab aikuj idaak dãnnin arkool̦, tuuj im eb, ak kõm̦m̦ani men ko jet me ilo m̦ool rejjab nana. Bõtab, kõj aolep jej aikuj lale im kõjparok bwe en jab jorrããn kõtaan eo ad ippãn Jeova.

20. Meñe emaroñ jab pidodo ñan “ilo̦k jãn jerawiwi” ak men ko renana, ta eo ej jipañ im kakajoor kõj?

²⁰ Jej lukkuun jeraam̦m̦an kõn ad bõk ãt in Ri Kõnnaan ro an Jeova. Im kõn an lukkuun aorõk etan Jeova, jej aikuj lale im kõjparok kõm̦m̦an ko ad im wãween ad mour. Jej aikuj “ilo̦k jãn jerawiwi” im ‘ilo̦k jãn men ko renana.’ (Sam 34:14) Ejjab aolep iien epidodo ñan kõm̦m̦ane men in. Bõtab, ad jel̦ã bwe Jeova enaaj aolep iien yokwe “ro doon” im ro rej pokake e, men in ej jipañ im kakajoor kõj.​—2 Timote 2:19; riit 2 Kronikel 16:9.