Etal Wõt Im Jerbal Aerã Ñan Aerã
“Inaj lelok ñan armij ro oktak eo ñan juõn kajin erreo, bwe ir otemjej ren kir etan Jehovah, bwe ren karejar ñan e aerã ñan aerã.”—ZEPHANIAH 3:9, NW.
1. Ta eo ej walok ilo an jejjet kitien Zephaniah 3:9?
ENAÑIN 6,000 kajin ko rej konono kaki kiõ ibelakin lal. Ijellokin kein, ebar wõr kajjo kain konono in kajin ko. Bõtab, meñe armij ro rej konono kajin ko reoktak jen don einwõt Arabic im Zulu. Bõtab, Anij ear kõmmane juõn men eo emol ekabwilõñlõñ. Ear kõmman bwe armij ro ijoko jabdewõt ren maroñ katak im konono kajin eo juõn wõt im ej make wõt erreo. Menin ej walok ilo kajejjet kitien juõn kallimur kar letok ikijen ri kanan Zephaniah: “Ña [Jehovah Anij] Inaj lelok ñan armij ro oktak eo ñan juõn kajin erreo [ilo nan, “juõn tie erreo,”] bwe ir otemjej ren kir etan Jehovah, bwe ren karejar ñan e aerã ñan aerã.”—Zephaniah 3:9, NW.
2. Ta eo ej “kajin eo erreo,” im ta eo ear kõmmane bwe en maroñ tõbrak?
2 “Kajin eo erreo” ej mol eo kin Anij jej lo ilo Nan eo an, Bible eo. Elaptata ej mol eo kin Ailiñ eo an Anij, eo enaj kokwojarjar etan Jehovah, karreoik kajur bõtata eo an, im bõktok jerammõn ñan armij. (Matu 6:9, 10) Einwõt ke ej kajin eo wõt ilo jitõb erreo ion lal, kajin eo erreo armij in ailiñ ko otemjej im bwij otemjej rej konono. Ej kamaroñ ir ñan air karejar ñan Jehovah “aerã ñan aerã.” Kin meni rej karejar ñan e ilo burukuk ak “kin juõn errã.”—The New English Bible.
Ej Aikwij Ejelok Kalijeklok Ibwiljin Armij ro an Anij
3. Ta eo ej kamaroñ kij ñan ad karejar ñan Jehovah ilo burukuk?
3 Einwõt Christian ro, jej kamolol kin jerbal in karejar eo ej bed ibwiljid. Meñe jej kwalok nan kin news eo emõn kin Ailiñ eo ilo elõñ kajin ko an armij, jej karejar ñan Anij ilo burukuk. (Sam 133:1) Menin emaroñ kinke, jabdewõt ijo jej jokwe ie ilo lal, jej konono juõn kajin erreo ñan nebar Jehovah.
4. Etke ejjab aikwij wõr kalijeklok ibwiljin armij ro an Anij?
4 Ej aikwij ejelok kalijeklok ibwiljin armij ro an Anij. Ri jilek Peter ear kalikar menin ke ear kwalok nan ilo mweo imõn Cornelius juõn officer in ri tarinae Ri Gentile ilo 36 C.E. im ear emmakit ñan an ba: “Emol, ij kili bwe Anij e jab lemnok kin okõtõn armij, a ilo ailiñ otemjej eo ej mijõk E, im jerbal kwojarjar, ej kabuñburuen.” (Jerbal 10:34, 35) Ke menin emol, congregation eo an Christian ejelok jikin ñan kalijeklok, kajenolok jet, ak yokwe wõt jet.
5. Etke ebwid ñan bõk kunad ibben ro rej kõmman jenolok ilo congregation eo?
5 Ilo lolok eo an ñan Kingdom Hall eo, juõn ri school in college ear ba: “Ekkã wõt an uan kabuñ ko jen juõn wõt bwij ak jar in armij. . . . Ri Kennan ro an Jehovah rar aolep jijet ibben don im jab ilo an jet jenolok lok iair.” Bõtab, jet ro uan congregation eo ilo Corinth eo etto rar kõmman jenolok jen don. Kinke menin ear kõmman iakwelel, rar jumae an jerbal jitõb kwojarjar eo an Anij, bwe ej kalaplok burukuk im ainemõn. (Dri Galetia 5:22) Elañe jenaj kalaplok jenolok jen don ilo congregation eo, jenaj jerbal nae tel ko an jitõb eo. Kin menin, jen likit ilo kalmenlokjen eo ad nan ko an ri jilek Paul ñan Ri Korint ro: “A ij akwelap ñõn kom, ro jãtiõ, kin etan ar Iroij Jisõs Kraist, bwe komin otemjej konono einwõt juõn, im bwe en ejelok jibil iolapemi; a bwe komin jimor wãppen ilo juõn lemnok im juõn bebe.” (1 Dri Korint 1:10) Paul ear bareinwõt kalikar aorõk in burukuk ilo letter eo an ñan Dri Epesõs ro.—Dri Epesõs 4:1-6, 16.
6, 7. Ta nan in kakabilek eo James ear letok ikijen watõk wõt jet armij bwe remõn, im ewi wãwen an nan ko an jerbal?
6 Jab kalijeklok ien otemjej ej menin aikwij ñan Christian ro. (Dri Rom 2:11) Kinke jet ilo congregation eo ilo ebeben eo kein kajuõn rar kwalok an emõn ibbeir armij ro rar mweie, ri jilek James ear je: “Ro jãtiõ, tõmak ar Iroij Jisõs Kraist, Iroij in aibujuij, en jab ber ibemi ilo ami kabwiloklok mejen armij. Bwe elañe ej dreloñtok iloan imõn kwelok eo ami, juõn armij luko gold ion pein, im eaibujuij nuknuk ko an, im ej dreloñ juõn dri jeramel, im nuknuk ko an re bwiltonon; im komij lale eo ej kõnõk nuknuk ko r’aibujuij, im ba: ‘Kwon jijõt ijin emõn, im kom ba ñõn dri jeramel: ‘Kwon jutak ijien ak jijõt iturin eran neiõ,’ komij jab jibil ilo buruemi ke, im ri ekajet ke lemnok ko renana ibemi, ejjab eindein ke?”—Jemes 2:1-4.
7 Elañe ri mweie ro rejjab tõmak rej kõnak ring gold ko im nuknuk ko raibujuij im rar itok ñan juõn kwelok an Christian im bareinwõt ri jeramel ro rejjab tõmak im ebwiltonon nuknuk ko air, ri mweie ro rej kõmman emõn ñan ir. Rar lelok ñan ir jea ko “ilo juõn jikin emõn,” ak rar jiroñ ri jeramel ro bwe ren jutak ak jijet ion lal iturin neen juõn armij. Ak Anij ilo ejelok kalijeklok ear lelok katok in binmour eo an Jesus ñan Ri mweie im ri jeramel ro jimor. (Job 34:19; 2 Dri Korint 5:14) Inem elañe jej kõnan kamõnõnõik Jehovah im karejar ñan e aerã ñan aerã, jej aikwij jab kwalok ad yokwe jet ak ‘nebar armij ñan tokjen eo ad make.’—Jud 4, 16.
Kejbãrok Jen Alliñũrñũr
8. Ta eo ear walok kin an kar Ri Israel ro alliñũrñũr?
8 Ñan debij wõt burukuk eo ad im etal wõt im bõk buñburu eo an Anij, jej aikwij kanuij lale nan in kakabilek eo an Paul: “Komin kõmõnmõn men otemjej kin ejelok lotan ak akwail.” (Dri Pilippai 2:14, 15) Ri Israel ro rar jab tõmak im kar kanemkwoj ir jen air lokjak jen Ri Egypt rar alliñũrñũr nae Moses im Aaron im meñe Jehovah Anij. Kin wõt menin, aolep maan ro 20 yiõ im rittolok, ijellokin wõt ri tõmak Joshua im Caleb im Ri Livai ro, rar jab deloñlok Enen Kallimur eo ak rar mij iloan wõt 40 yiõ ko in an Israel etal ilo ene jemaden eo. (Bwinbwin 14:2, 3, 26-30; 1 Dri Korint 10:10) Juõn wõnãn eo rar kõllãiki kin wõt alliñũrñũr!
9. Ta eo Miriam ear loe kin an kar alliñũrñũr?
9 Menin ej kwalok kin ta eo emaroñ walok ñan aolepen juõn ailiñ eo ej alliñũrñũr. Ak ta kin kajjojo armij ro rej alliñũrñũr? Eokwe, lio jatin Moses Miriam, koba ibben leo jein Aaron, rar alliñũrñũr: “Jeova e ar konono iben Moses wõt ke? Ear jab konono ibemro bareinwõt ke?” Bwebwenato eo ej kobaiktok: “Jeova e ar roñjake.” (Bwinbwin 12:1, 2) Ta tokjen eo? Miriam, eo ealikar bwe ear tel ilo abõnõnõ in, Anij ear kõttãik e. Ewi wãwen? Ilo an bõk nañinmij in leper eo im kar kabin ñan e bwe en bed wõt ilikin camp eo iumin jiljilimjuõn ran mae ien ear erreo.—Bwinbwin 12:9-15.
10, 11. Alliñũrñũr eo ejelok etale mokta emaroñ walok ilo ta? Wanjoñok.
10 Alliñũrñũr ejjab baj juõn abõnõnõ wõt kin jet kõmman ko rebwid kar kõmmani. Ro ekkã air alliñũrñũr menin ej kõmman menin an tarjen joñan air lemnak kin eñjake ko air make ak wãwen eo rej bed ie jen air ruaklok ñan Anij. Elañe ejelok kejbãrok, menin ej kõmman iakwelel ikõtan ri tõmak ro mõttair im ej kabañ jibadbad ko air ñan karejar ñan Jehovah aerã ñan aerã. Menin ej eindein kinke ri alliñũrñũr ro ien otemjej rej kwalok ainikien abõnõnõ ko air, ilo air tõmak ilo kejatdikdik bwe ro jet renaj errã ibbeir.
11 Ñan wanjoñok, juõn emaroñ notaiki wãwen eo juõn elder ej jerbale ilo mõttan ko kunan ilo congregation eo ak kea kin eddo ko an. Elañe ej roñjake ri abõnõnõ eo, jemaroñ jino lemnak einwõt an lemnak. Mokta jen an ine in jab juburu eo eddek ilo lemnak eo ad, makitkit ko an elder eo emaroñ kar jab kabõnõnõik kij, ak kiõ rej. Ejjabto, ejelok jabdewõt men eo elder eo ej kõmmane enaj jimwe ilo mejed, im kij bareinwõt jemaroñ jino abõnõnõ kin e. Kain mwil rot in ejjab jimwe ilo juõn congregation an armij ro an Jehovah.
12. Ta eo alliñũrñũr emaroñ jelete ilo kõtan jimjera eo ad ibben Anij?
12 Alliñũrñũr nae maan ro eddo eo air ej ñan shepherd bwij eo an Anij emaroñ tellok ñan kajerbal nan ko renana. Alliñũrñũr rot in ak ruruwe emaroñ bõktok nana ioir im emaroñ kokkure im jelet kõtan jimjera eo ad ibben Jehovah. (Exodus 22:28) Ri konono nan ko renana im rejjab ukwelok rejamin bõk air jolet Ailiñ in Anij. (1 Dri Korint 5:11; 6:10) Ri jilek Jude ear jeje kin ri alliñũrñũr ro rar “kejekron kajur in iroij rõn im konono nana nae wuj ko,” ak maan ro rej bõk eddo ilo congregation eo. (Jud 8) Ri alliñũrñũr ro rar jab kabuñburuen Anij, im ilo meletlet jen ellok jen ial eo air enana.
13. Etke ejjab aolep abõnõnõ rebwid?
13 Bwebõta, ejjab aolep abõnõnõ rej jab kamõnõnõik Anij. Ear jab kajekdon “lamõj in abõnõnõ eo” kin Sodom im Gomorrah ak ear kajeebeplok jikin kein renana. (Jenesis 18:20, 21; 19:24, 25) Ilo Jerusalem, elikinlok wõt Pentecost eo ilo 33 C.E., “ro dri Grik rej lotan dri Hibru, bwe re jab lale kõra ro air ejoko beleir, ke rej ajej ilo ran otemjej.” Inem, “joñoul im ruo” rar kajimwe wãwen eo ilo air kãlet “jiljilimjuõn maan ro” bwe ren lolorjake “jerbal eo ear menin aikwij” kin ajej mõñã. (Acts 6:1-6, NW) Elder ro rainin rej aikwij jab ‘binej lojilñiir’ jen abõnõnõ ko rekkar. (Jabõn Kennan Ko 21:13) Im jen air notaiki ri tõmak ro mõttair, elder ro rej aikwij kakajur im kalek.—1 Dri Korint 8:1.
14. Ñan kejbãrok jen alliñũrñũr ak ruruwe, ta kadkad eo elaptata jej aikwiji?
14 Kij aolep jej aikwij kejbãrok kij jen alliñũrñũr, bwe jitõbõn abõnõnõ ej jorrãnlok wõt. Juõn lemnak eo einwõt in enaj kabõjrak burukuk eo ad. Jen an eindein, jen ien otemjej kõtlok jitõb kwojarjar eo bwe en kwalok yokwe ilo kij. (Dri Galetia 5:22) Ad bokake ‘kien joij eo kin yokwe’ enaj jibañ kij ñan ad etal wõt im karejar ñan Jehovah aerã ñan aerã.—Jemes 2:8; 1 Dri Korint 13:4-8; 1 Piter 4:8.
Kejbãrok Nae Ruruwe
15. Ewi wãwen am naj kar kwalok oktak eo ikõtan ñidemij im ruruwe?
15 Ke alliñũrñũr emaroñ tellok ñan ñidemij, jej aikwij kejbãrok kin ta eo jej ba. Ñidemij ej bwebwenato bajjek kin armij im jerbal ko air. Bõtab, ruruwe, ej juõn ennan ejjab mol ñan kokkure etan juõn armij. Konono rot in ej ñan ruruwe im ejjab ekkar ñan ankilan Anij. Kin menin Anij ear jiroñ Ri Israel ro: “Kwon jab itoitak einwõt juõn dri ñidemij iolapen armij ro am.”—Livitikõs 19:16.
16. Ta eo Paul ear ba kake kin jet ro rar ñidemij, im ewi wãwen an nan in kakabilek eo an aikwij jelet kij?
16 Ke konono eo ejjab mol emaroñ tellok ñan ruruwe, Paul ear konono nae jet armij ro rar ri ruruwe. Elikin an kwalok kin kõrã ro ejako beleir im rar tellokin bõk jibañ jen congregation eo, ear jitõñlok ñan kõrã ro ejako beleir ro rar katak “im jowõn im etetal bõjik, im ilok ñõn mweiõ moweo, im jab jatoktok wõt, a ñidemij bareinwõt im dri jerbal bata, im reba nan ko re jakkar bõjik.” (1 Timote 5:11-15) Elañe juõn Christian kõrã ej lo bwe ewõr an mõjno ilo kain konono rot eo me emaroñ tellok ñan ruruwe, ej aikwij bõk nan in kakabilek eo an Paul bwe en “jab rurue.” (1 Timote 3:11) Bwebõta, Christian maan ro bareinwõt rej aikwij kejbãrok nae ruruwe eo ej kõmman jorrãn.—Jabõn Kennan Ko 10:19.
Kabõjrak Ekajet!
17, 18. (a) Ta eo Jesus ear ba kake kin ekajete ro jeid im jatid? (b) Ewi wãwen ad maroñ jerbale nan ko an Jesus kin ekajet?
17 Meñe ejelok jabdewõt armij en jej ruruwe, jemaroñ aikwij kõmman jibadbad ñan bõprae ekajete ro jet. Jesus ear kananaik kain lemnak rot in ke ear ba: “Komin jab ekajet bwe en jab ekajet kom; bwe ilo ekajet eo komij ekajet kake, naj ekajet kom; im ilo joñok eo komij joñok kake, naj bar joñok ñõn kom. Im etke kwoj kalimjek belok erik iloan mejen jeõm im jatõm a jab lemnok kin wijki iloan mejõm? A ekijkan am ba ñõn jeõm im jatõm, ‘In jolok belok erik jen mejõm’; im lo! wijki ej ber iloan mejõm? Kwe dri jela mon, kwon jolok wijki eo jen mejõm mokta; inem kwo naj lolokjen im jolok belok erik jen mejen jeõm im jatõm.”—Matu 7:1-5.
18 Jej aikwij jab lemnak in jibañ ñan baj jolok wõt juõn “wijki” jen mejen jeid im jatid ñan jibañ e ñe maroñ eo ad make ñan kõmman ekajet jimwe ewõr kabañbañ ie ikijen juõn “wijki” ilo nan in kõkkar. Ilo mol, elañe jej lukkun melele kin wãwen an Anij tiriamokake, jenaj jamin itok wõt in ekajete maan im kõrã ro jeid im jatid ilo jitõb. Ewi wãwen ad maroñ jelã kake ir einwõt an Jemed ilañ jelã? Ejelok bwilõñ Jesus ear kakkõl kij bwe jen ‘jab ekajet bwe ren jab ekajet kij’! Juõn jelã eo emol kin jab wãppen eo ad ej aikwij kabõjrak kij jen ad kõmman ekajet ko Anij enaj watõki rejjab jimwe.
Emõjno Ak Menin Nebar
19. En ewi wãwen ad lemnak kin ri tõmak ro mõttad?
19 Elañe jej beek ñan ad karejar ñan Anij aerã ñan aerã ibben ri tõmak ro mõttad, jejamin baj bõprae wõt ekajet. Jenaj tel ilo ad kwalok nebar ñan ir. (Dri Rom 12:10) Ilo mol, jenaj bukõt tokjen eo air, im jab eo ad make, im jenaj lañliñ ilo ad jerbale tokjen ko ñan ir ilo ettã buru. (Jon 13:12-17; 1 Dri Korint 10:24) Ewi wãwen ad maroñ debij wõt juõn lemnak emõn einwõt in? Ilo ad likit ilo lemnak eo ad bwe jabdewõt ri tõmak eaorõk ibben Jehovah im bwe jej aikwiji don, ejja einwõt kajjojo mõttan enbwin eo ej wawa ion ko jet.—1 Dri Korint 12:14-27.
20, 21. Ta melelen nan ko ilo 2 Timote 2:20, 21 ewõr ñan kij?
20 Emol, Christian ro rej jãbi bũdej ko emwij kabbeik ir ñan kejbãrok menin aorõk aibujuij eo. (2 Dri Korint 4:7) Ñan ad kõmmane jerbal in ekwojarjar ñan nebar Jehovah, jej aikwij debij juõn jutak eo ewõr kautiej ie iman mejen im Nejin. Ilo ad bed wõt im erreo ilo kanniek im ilo mour in jitõb jemaroñ bed wõt ilo juõn jãbi eo ewõr kautiej ie ñan an Anij kajerbale. Ikijen menin, Paul ear je: “Ilo juõn im elap e jab jãbi gold im silver wõt, a eor jãbi jen wijki im jen brij, jet ñan nebar im jet ñan jekdon. Inem elañe armij ej mõke karreo e jen men kein, e naj jãbi ñõn nebar, ekwojarjar im ekar ñõn an Iroij kõmõn kake, im pojõk ñõn jerbal remõn otemjej.”—2 Timote 2:20, 21.
21 Armij ro rejjab kõmman bwe mwiliir make en errã ibben menin aikwij ko an Anij rej ‘jãbi ko ejabwe kautiej.’ Bõtab, ilo ad jibadõk ial in Anij, jenaj ‘jãbi ko ñan nebar, kokwojarjar, ak jenolok, ñan jerbal eo an Jehovah im bojak ñan jerbal ko otemjej remõn.’ Inem jemaroñ kajitõkin kij make: ‘Ña ij juõn “jãbi in nebar ke”? Emõn ke aõ jelet ri tõmak ro mõtta? Ña ij juõn eo ke ej uan congregation eo im ej jerbal aerã ñan aerã iben ri kabuñ ro mõtta?’
Etal Wõt im Karejar Aerã ñan Aerã
22. Ta eo congregation eo an Christian jemaroñ kõkkar kake ñane?
22 Congregation eo an Christian ej juõn karõk einwõt eo an family. Ewõr juõn mejatoto in yokwe, jibañ, im kamõnõnõ ilo juõn family ñe aolep ro uan rej kabuñ ñan Jehovah. Juõn family emaroñ ejaakin oran armij ro einjuõn kadkadiir jen don, ak aolep ewõr juõn an jikin nebar. Wãwen in ej einlok wõt ilo congregation eo. Meñe kij aolep jej einjuõn jen don—im jab wãppen—Anij ear kebaklok kij ñan e make ikijen Christ. (Jon 6:44; 14:6) Jehovah im Jesus rej yokwe kij, im einwõt juõn family eburukuk, jej lukkun aikwij in kwalok ad yokwe don.—1 Jon 4:7-11.
23. Ta eo jej aikwij kememej im beek ñan ad kõmmane?
23 Congregation eo an Christian im ej einwõt juõn family ej bareinwõt juõn jikin ijo ejimwe ad kõtmene ñan lo tiljek eo emõn ie. Ri jilek Paul ear je: “Inem I kõnan bwe man ren jar ijo ko otemjej im kwotõke peir kwojarjar im ejelok illu ak berre.” (1 Timote 2:8) Kin menin Paul ear kobaik tiljek kin jar ilobwilij “ijo ko otemjej” ijo Christian ro rej kwelok ibben don ie. Maan ro wõt retiljek rej aikwij jutak ilo etan congregation eo ilo jar ilobwilij. Bwebõta, Anij ej kõtmene bwe kij otemjej jen tiljek ñan e im ñan don. (Ekklisiastis 12:13, 14) Kin menin jen beek ñan ad jerbal ibben don ilo errã, einwõt mõttan ko in enbwinin armij. Jen bareinwõt karejar ilo burukuk einwõt mõttan family eo an ri kabuñ ro an Jehovah. Ilõñin men otemjej, jen kememej bwe jej aikwiji don im jenaj lañliñ kin kowãppen im kajerammõn ko an Anij elañe jej etal wõt im karejar ñan Jehovah aerã ñan aerã.
Ewi Wãwen Am Naj Uak?
• Ta eo ej kamaroñ armij ro an Jehovah ñan air karejar ñan e aerã ñan aerã?
• Etke Christian ro rej bõprae kalijeklok?
• Ta eo kwo naj kar ba ebwid kin alliñũrñũr?
• Etke jej aikwij kile im kautiej ri tõmak ro mõttad?
[Pija eo ilo peij 15]
Peter ear kili bwe “Anij e jab lemnok kin okõtõn armij”
[Pija eo ilo peij 16]
Kwo jelã ke etke Anij ear kõttãik Miriam?
[Pija eo ilo peij 18]
Christian ro retiljek rej lañliñ ilo air karejar ñan Jehovah aerã ñan aerã