Kwõj ke Keememej?

Kwaar ke lukkuun riiti Naan in Keeañ ko an allõñ ko l̦o̦k? Lale kwõmaroñ ke uwaake kajjitõk kein:

Ñe doulul in an Anij ej lel̦o̦k naanin tõl ko ñan em̦m̦aan ro jeid im jatid, ãinwõt ro rej lol̦o̦k eklejia ko im em̦m̦aan ro rej lale eklejia, ta eo rej aikuj in kõm̦m̦ane?

Rej aikuj m̦õkaj im kõttãik er im pokake. Remaroñ kajjitõk ippãer make kajjitõk kein: Ij ke rõjañ im kõkajoor ro jeiũ im jatũ ilo eklejia eo bwe ren pokake wõt Jeova? Ij ke m̦õkaj im pokake naanin tõl ko jãn doulul in an Jeova?​—w16.11, peij 11.

Ñããt eo Kũrjin ro rem̦ool rar jino pãd ium̦win maroñ eo an Babil̦on El̦ap?

Men in ear wal̦o̦k ãlikin an kar rijjilõk ro mej. Ilo iien in ear ejaak juon kumi in rũtõl ro me armej ro rar ãñinñin er rũkaki. Kabuñ im Kien ko rar ejaake kabuñ an Kũrjin ro rejjab m̦ool, im rar kajjioñ kõm̦m̦an bwe ejjel̦o̦k en m̦õn̦õn̦õ in roñjake Kũrjin ro rem̦ool. Ak ilo kar jinoin 1800 jim̦a ko l̦o̦k ñan 1914, rũkkapit ro rar jino rõl̦o̦k jãn ium̦win maroñ eo an Babil̦on El̦ap.​—w16.11, peij 23-25.

Etke jerbal eo an kar Lefèvre d’Étaples ear lukkuun aorõk?

Ilo 1520 jim̦a eo Lefèvre ear ukote Baibõl̦ eo ilo kajin French bwe ro rettã remaroñ jel̦ã kõn Naanin Anij. Kõn an kar Lefèvre ukote eoon ko ilo Baibõl̦ ilo juon wãween elukkuun alikkar im pidodo ñan mel̦el̦e, men in ear l̦ap an jelõt Martin Luther, William Tyndale, im John Calvin.​—wp16.6, peij 10-12.

Ta oktak eo ikõtaan ‘l̦õmn̦ak kõn men ko an kanniõk’ im ‘l̦õmn̦ak kõn men ko an jetõb’? (Rom 8:6)

Armej eo ej ‘l̦õmn̦ak kõn men ko an kanniõk’ ej l̦õmn̦ak wõt kõn kõn̦aan ko an make me rej wal̦o̦k kõn an jab weeppãn. E eo el̦ap an itoklimo kaki men kein an kanniõk im aolep iien ej kõnnaan kaki. L̦õmn̦ak rot in ej tõll̦o̦k ñan mej. Ak armej eo ej ‘l̦õmn̦ak kõn men ko an jetõb’ ej likũt bwe an karejar ñan Anij en men eo eaorõktata ilo mour eo an. Armej in ej kõtl̦o̦k bwe jetõb kwõjarjar en tõl l̦õmn̦ak eo an im ej kate e ñan l̦õmn̦ak ãinwõt Anij. L̦õmn̦ak rot in ej tõll̦o̦k ñan mour im aenõm̦m̦an.​—w16.12, peij 15-17.

Ta jet iaan wãween ko kwõmaroñ kõm̦m̦ani ñan kadikl̦o̦k am̦ inepata?

Likũt men ko raorõktata bwe ren men ko m̦oktata ilo mour eo am̦, jel̦ã joñan maroñ ko am̦, kõm̦m̦an iien ñan am̦ kakkije jidik kajjojo raan, m̦õn̦õn̦õ kõn menin kõm̦anm̦an ko an Jeova, ettõñ im m̦õn̦õn̦õ kõn men ko rekõjak, keini am̦ kõkajoor ãnbwinnũm̦ ak exercise, im en bwe iien am̦ kiki.​—w16.12, peij 22-23.

Kar bõk Inok bwe en jab lo mej, ewi wãween? (Hi. 11:5)

Anij ear kõm̦m̦an bwe Inok en mej ilo juon wãween me ear jab eñtaan.​—wp17.1, peij 12-13.

Etke eaorõk bwe en ettã wõt bũruod?

Juon eo ettã bũruon ejel̦ã ta ko ejjel̦o̦k an maroñ ñan kõm̦m̦ani ekoba ta ko ejjab tõllo̦kũn ñan an kõm̦m̦ani. Jej aikuj bar keememej bwe kõm̦m̦an ko ad remaroñ jelõt ro jet, im jen jab l̦õmn̦ak bwe jem̦m̦anl̦o̦k jãn ro jet kõnke ewõr ad eddo ilo eklejia eo ak bõlen kõnke ro jej epaake er ewõr aer eddo ilo eklejia eo.​—w17.01, peij 18.

Ta ko rej kam̦ool bwe Anij ear tõl kumi in em̦m̦aan ro ear kããlõt er ñan tõl Kũrjin ro jinoin, ãinwõt an bar tõl Kumi eo Ej Lale Aolep Eklejia ko an Ri Kõnnaan ro an Jeova rainin?

Kõn an jetõb kwõjarjar kar jipañ er, rar maroñ mel̦el̦e kõn katak ko rem̦ool jãn Baibõl̦. Ikijjeen jipañ eo jãn enjel̦ ro, em̦m̦aan rein rar maroñ loloorjake jerbalin kwal̦o̦k naan, im rar atartar ioon Naanin Anij ke rar lel̦o̦k naanin tõl ko. Aolep wãween kein rej bar wal̦o̦k ilo raan kein.​—w17.02, peij 26-28.

Ta eo ej kõm̦m̦an bwe katok in mour eo an Jijej en juon menin letok elukkuun aorõk ñan kõj?

Jen lale 4 men ko rej kõm̦m̦an bwe en lukkuun aorõk juon menin letok: Wõn eo ear lewaj, etke ear lewaj, ta ko ear aikuj kaarmejjeti bwe en lewaj men in, im ne menin lewaj eo am̦ ejejjet ñan men ko kwõj aikuji. Ad l̦õmn̦ak kõn men kein 4 enaaj kal̦apl̦o̦k ad kwal̦o̦k kam̦m̦oolol kõn katok in mour eo an Jijej, eo ej menin letok eo el̦aptata an Anij.​—wp17.2, peij 4-6.

Kũrjin ro remaroñ ke ukote aer l̦õmn̦ak ãlikin aer kõm̦m̦ane juon pepe?

Men ko jaar pepe bwe jenaaj kõm̦m̦ani, jen kõm̦m̦ani. Bõtab, ejjab mel̦el̦ein bwe jejjab aikuj ukote pepe eo em̦õj ad kõm̦m̦ane. Ewõr iien jenaaj aikuj bar etale pepe ko me em̦õj ad kõm̦m̦ani, im ukoti. Ñan waanjoñak, ke Anij ear lo bwe Ri Nineva ro rar oktak, ear ukot l̦õmn̦ak eo an im jab bõktok jorrããn ioer. Jet iien, emaroñ wõr oktak ko rekããl im mel̦el̦e ko rekããl im jemaroñ aikuj bar ukot pepe ko ad.​—w17.03, peij 16-17.

Etke ruruwe elukkuun kauwõtata?

Ñe jej ruruwe im kananaik ro jet men in emaroñ kõm̦m̦an bwe juon apañ en l̦apl̦o̦k. Mekarta ñe men ko jej ba remaroñ jim̦we ak bõd, ñe jej bõk kun̦aad ilo kõnono ko n̦ae ro jet wãween in ejjab maroñ kakõm̦anm̦anl̦o̦k apañ ko.​—w17.04, peij 21.