Liki Jehovah, im Beran Wõt

“Kwon kõtar Jeova, kwon kajur, im buruõm en beran wõt, aet, kwon kõtar Jeova.”​—SAM KO 27:⁠14.

1. Ewi aorõkin kejatdikdik, im ewi wãwen rej kajerbal nan in ilo Jeje ko ilo Bible?

KEJATDIKDIK eo emol ej einwõt juõn meram ejatõltõl. Ej jibañ kij ñan lo lok iman melejoñ ko jej iioni kiõ im jelmaik ilju im jeklaj ilo beran im lañliñ. Jehovah wõt emaroñ letok ñan kij juõn kejatdikdik emol, eo ej kõmmane ikijen Nan in kakõrmol eo an. (2 Timote 3:​16) Ilo mol, nan ko “kejatdikdik,” “ear kejatdikdik” im “ej kejatdikdik” rej walok elõñlok jen 160 alen ilo Bible im rej jimor jitõñlok ñan kijororetok in juõn men emõn im men eo kwoj kõtmene kake.a Kejatdikdik rot in elaplok jen juõn kõnan bajjek, eo ejelok bedbedin ak maroñ eo ñan an jejjet kitien.

2. Ewi wãwen an kar kejatdikdik jelet mour eo an Jesus?

² Ke ear jelmae melejoñ im wãwen ko rebin, Jesus ear jab lemnak wõt kin melejoñ ko ak ear reimanlok ñan ien ko rebed iman im kejatdikdik wõt ilo Jehovah. “Kin lõñliñ ar likit e iman, E ar iñtan ilo drebail, im kejekron jok eo, im E ar jijõt i anbijmaroñõn tron an Anij.” (Dri Hibru 12:⁠2) Kinke ear lemnak wõt kin kejatdikdik eo ñan kamol an jimwe iroij bõtata eo an Jehovah im ñan kokwojarjar Etan, Jesus ear jab jeorlok jen ial in an bokake Anij, jekdon ta eo enaj kar walok ñan e.

3. Ewi wãwen kejatdikdik ej jelet mour eo an ri karejar ro an Anij?

³ King David ear jitõñlok ñan kõtan eo ikõtan kejatdikdik im beran, ilo an ba: “Kwon kõtar Jeova, kwon kajur, im buruõm en beran wõt, aet, kwon kõtar Jeova.” (Sam Ko 27:​14) Elañe jekõnan bwe buruõd en beran, jej aikwij kõmman bwe ien otemjej en alikar kejatdikdik eo ilo lemnak eo ad im buruõd. Ilo ad kõmman men in enaj jibañ kij ñan kajeoñe Jesus ñan ad kwalok beran im kijejeto ñe jej bõk kunad ilo jerbal eo ear lelok ñan ri kalor ro an ñan air kõmmane. (Matu 24:14; 28:​19, 20) Emol, kejatdikdik kar likit ilo Bible eo ibben tõmak im yokwe einwõt juõn kadkad eaorõk me ri karejar ro an Anij rej aikwij kwaloke ilo mour eo air.​—1 Dri Korint 13:⁠13.

Ej ‘Ke Am Kejatrikrik’ Ke?

4. Christian ri kabit ro im ‘sheep ro jet’ mõttair rej reimanlok ñan ta?

⁴ Ewõr juõn ilju emõn ej bed iman armij ro an Anij. Christian ri kabit ro rej kijororetok ien air naj jerbal ibben Christ ilañ, ke ‘sheep ro jet’ rej reimanlok ñan air “mejõl jen kamokoko an wabõnbõn, ñõn iloan anemkwojan in aibujuij an ro nejin Anij.” (Jon 10:16; Dri Rom 8:​19-21; Dri Pilippai 3:​20) “Anemkwojan in aibujuij” ej koba air rõlok jen jerawiwi im tokjen ko an renana. Emol, Jehovah, Eo ej Letok “men in letok emõn im wãppen otemjelok,” enaj lelok ñan ro retiljek an men ko wõt remõntata.​—Jemes 1:17; Aiseia 25:⁠8.

5. Ewi wãwen bwe en maroñ ‘ke ad kejatrikrik’?

⁵ Ewi joñan an kejatdikdik eo an Christian jelet mour eo ad? Ilo Dri Rom 15:​13, jej konono: “Im Anij in kejatrikrik En kobrõk kom kin lõñliñ otemjej im ainemõn ilo tõmak, bwe en ke ami kejatrikrik ilo kajur an Jitõb Kwojarjar.” Aet, jemaroñ keidi kejatdikdik, ejjab ñan juõn candle ilo marok, ak ñan meram ko rej romak jen al ilo jibboñ, im ej kobrak mour kin ainemõn, mõnõnõ, unin, im beran. Lale bwe ej ‘ke ad kejatrikrik’ ñe jej tõmak ilo Nan eo an Anij emwij jeje im bõk jitõb kwojarjar eo an. Dri Rom 15:4 ej ba: “Bwe jabrewõt men ko ar jeje mokta, ar jeje ken katakin kij, bwe kij kin kijenmij, im kin ainemõn jen Jeje ko, en or ar kejatrikrik.” Inem kwon kajitõkin yuk make: ‘Ij kõmman ke bwe kejatdikdik eo aõ en mour ilo aõ niknik in katak Bible, im readi ran otemjej? Emakijkij ke aõ jar kin jitõb kwojarjar?’​—Luk 11:⁠13.

6. Bwe en kajur wõt kejatdikdik eo ad, ta eo jej aikwij kejbãrok kij jen e?

⁶ Jesus, Eo ej Joñok eo ad, ear bõk kakajur jen Nan in Anij. Ilo ad lor joñok eo an, jenaj bõprae ad “mõk im kijelok ilo [buruõd].” (Dri Hibru 12:⁠3) Elañe kejatdikdik eo ad me Anij ear letok ej diklok ilo lemnak eo ad im buruõd ak elañe men ko einwõt mweiuk ko ak mejenkajjik ko lor kanniek rej kamad kij, ejjabto tokelik jenaj mejki ilo jitõb im enaj tellok ñan ad luji kajur im beran eo ad ñan mour ekkar ñan kien ko kin mour erreo. Ilo ad bõk lemnak in, emaroñ “rup im mejõljõllok [ad] tõmak.” (1 Timote 1:​19) Ijo turãjet, kejatdikdik eo emol ej kakajurlok tõmak eo ad.

Kejatdikdik​—Eaorõk ñan Tõmak

7. Ilo wãwen et eo kejatdikdik eaorõk ñan tõmak?

⁷ “A tõmak ej einwõt liki kin men ko jej kejatrikrik kij kaki, im rel buruer kin men ko je jab loi,” Bible eo ej ba. (Dri Hibru 11:⁠1) Kin men in, kejatdikdik ejjab juõn kadkad edik aorõkin, ak ej juõn mõttan elap tokjen ñan tõmak. Lemnak kin Abraham. Ekkar ñan lemnak an armij, e im lio belen, Sarah, rar lukkun ritto ñan an maroñ lõñ nejiiro ke Jehovah ear kallimur bwe enaj wõr juõn air ri jolet. (Jenesis 17:​15-17) Ewi wãwen an kar Abraham emmakit? “Eo ke ejoko unin kejatrikrik ej tõmak ilo kejatrikrik, bwe en jemen elõñ dri ailiñ.” (Dri Rom 4:​18) Aet, kejatdikdik eo Anij ear lelok ñan Abraham ear kõmman bwe en wõr bedbed in tõmak eo an bwe enaj wõr juõn nejin. Tokjen men in, tõmak eo an ear kakajurlok kejatdikdik eo an. Men in ear bareinwõt kaberan Abraham im Sarah ñan air illok jen ijo kabijukneir im ro nukiir im jokwe ilo em nuknuk ko ilo juõn ene reruwamaejet ie toan wõt air mour!

8. Ewi wãwen kijenmij ilo tiljek ej kakajur kejatdikdik?

⁸ Abraham ear kakajurlok kejatdikdik eo an ilo an kõmman bwe en jab jeorlok jen an bokake Jehovah, meñe ilo ien ko ear bin ñan an kõmmane. (Jenesis 22:​2, 12) Eindein, ilo ad bokake im kijenmij ilo jerbal eo an Jehovah, jenaj maroñ liki kin jinekjej eo ad. “Kijenmij,” Paul ear je, ej kwalok buñburu iman mejen Anij, im ilo oktan men in ej kwalok kejatdikdik, “im kejatrikrik e jab kajok.” (Dri Rom 5:​4, 5) Eñin unin Paul ear bareinwõt je: “A kim kõnan bwe komin otemjej niknikemi wõt juõn ñõn obrõk in kejatrikrik, aet, ñõn jemlokõn.” (Dri Hibru 6:​11) Lemnak rot in emõn, eo ej wawa ion juõn kõtan ebak ibben Jehovah, emaroñ jibañ kij jelmae jabdewõt abañ ilo beran, im lañliñ.

“Komin Lõñliñ ilo Kejatrikrik”

9. Ta eo jej aikwij keini ad kõmmane bwe en jibañ kij ñan “lõñliñ ilo kejatrikrik”?

⁹ Kejatdikdik eo ad jen Anij eutiejlok jen jabdewõt men me lal in emaroñ letok. Sam Ko 37:34 ej ba: “Kwon kõtar Jeova im kejbãrok ial eo An, im E naj koutiej yuk in jolit ene eo. Ñe bukwelok ro dri nana kwo naj loe.” Aet, ewõr un emõn ibbed ñan “lõñliñ ilo kejatrikrik.” (Dri Rom 12:​12) Bõtab, ñan ad maroñ kõmmane men in, jej aikwij lemnak wõt kin kejatdikdik eo ad ien otemjej. Kwoj keini ke am kalmenlokjen kin kejatdikdik eo am me ej men in letok jen Anij? Kwomaroñ ke pijaik yuk make ilo Paradise eo, ilo ejmour emõn, ejelok inebata ko, armij ro kwoj yokwe ir rej bed ibelakõm, im kwoj bõk kunam ilo juõn jerbal elap an kajuburu? Kwoj kalmenlokjen ke kin pija ko kin Paradise eo me rej walok ilo book ko ad? Ien kalmenlokjen kein rej einwõt ñe kwoj karreoik window in mweo imõm bwe en emõn am maroñ reilok ñan nabõj. Elañe kwojjab karreoik kilaj in window eo ak jepe bwilõkõn wijki ko ak men in eddek ko rej bed turin window eo, ejjabto men kein renaj binej mejõm jen am maroñ reilok ñan nabõj im lo ilo alikar jikin eo eaibujuij. Inem jenaj mad kin men ko jet. Jen jab kõtlok bwe men in en walok!

10. Ñe jej reimanlok ñan jinekjej eo etke emõn an kwalok kin kõtan eo ad ibben Jehovah?

¹⁰ Ilo mol, yokwe Jehovah ej aikwij un eo elaptata unin ad karejar ñan e. (Mark 12:​30) Bõtab, jej aikwij kijoror wõt in lo jinekjej eo. Emol, Jehovah ej kõtmene bwe jen kõmmane men in! Dri Hibru 11:6 ej ba: “Elañe ejelok tõmak, armij re ban kabuñburuen; bwe eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.” Etke Jehovah ekõnan bwe jen watõk e einwõt Eo ej letok jinekjej eo? Kinke ñe jej kõmmane, jej kwalok bwe jelukkun jelã kajjen Jemed ilañ. Ej juõn eo emmol, im ej yokwe ro nejin. Lemnak kin ewi joñan ad naj kar buromõj im bidodo ad ebwer elañe ear ejelok ‘men ko jej kejatdrikdrik kaki kin ilju eo ad.’​—Jeremiah 29:⁠11.

11. Ewi wãwen kejatdikdik eo letok in Anij ear jibañ Moses ñan an kõmman bebe ko remeletlet?

¹¹ Juõn joñok emõn kin juõn eo ear kalimjek wõt kejatdikdik eo an letok in Anij kar Moses. Einwõt eo “nejin kõra eo nejin Pero,” Moses ear wõr kajur, utiej, im mweiuk otemjej ilo Egypt ñan an maroñ kajerbali. Enaj ke jibadõk men kein, ak karejar ñan Jehovah? Moses ear beran ilo an kãlet ñan an karejar ñan Jehovah. Etke? Kinke ear “lemnok kin jinekjij eo.” (Dri Hibru 11:​24-26) Aet, Moses ear jab kajekdon kejatdikdik eo Jehovah ear likit iman.

12. Etke kejatdikdik eo an Christian ej einwõt juõn helmet?

¹² Ri jilek Paul ear keidi kejatdikdik einwõt juõn helmet. Helmet in kõkkar eo ad ej kejbãrok lemnak ko ad, kamaroñ kij ñan kõmman bebe ko remeletlet, likit men ko raorõk moktata, im kejbãrok tiljek eo ad. (1 Dri Tessalonika 5:⁠8) Kwoj kõnak ke helmet in kõkkar eo am ien otemjej? Elañe aet, inem einwõt Moses im Paul, kwonaj likit kejatdikdik eo am, jab ion “mweiuk ko mweiuk torlok, a kin Anij, eo Ej wujleptok ñõn kij men ko otemjej bwe jen mõnõnõ kake.” Emol, kwoj aikwij beran ñan am karmijete jibadbad ko am make, ak ewõr tokjen am kate yuk! Ilo mol, jejjab kõnan bõk juõn men ediklok aorõkin jen “mour eo emol,” eo ej kõttar ro rej yokwe im likit air kejatdikdik ilo Jehovah.​—1 Timote 6:​17, 19.

“I Jamin Likit Yuk”

13. Ta kallimur eo Jehovah ej lelok ñan ri karejar ro an retiljek?

¹³ Armij ro me rej likit air kejatdikdik ion jukjuk im bed in kiõ emol air lemnak kin ilju im jeklaj ilo mijak ke “iñtan ko” rej laplok wõt ilo lal in. (Matu 24:⁠8) Ak ro rej likit air kejatdikdik ilo Jehovah ejelok air mijak. Rej “ber im ejelok an jorran, im e naj jokwõr jen nana.” (Jabõn Kennan Ko 1:​33) Kinke kejatdikdik eo air ejjab bed ilo jukjuk im bed in, rej mõnõnõ in bokake nan in kakabilek in an Paul: “Komin jab arõk dala; komin jokõne kin men ko ami: bwe E ar ba, I jamin likit yuk, im I jamin illok jen kwe in drio.”​—Dri Hibru 13:⁠5.

14. Etke Ri Christian ro rejjab aikwij inebata le jen joñan kin aikwij ko air ilo kanniek?

¹⁴ Nan kein “I jamin” ej kõmman bwe en ejelok ad bere bwe Anij enaj kejbãrok kij. Jesus ear bareinwõt kamol ñan kij kin itoklimo eo eyokwe an Anij, ilo an ba: “A komin bukot mokta ailiñ in Anij, im kwojarjar eo An; im naj koorlok men kein otemjej [aikwij ko ilo kanniek an mour] ñõn kom. Inem komin jab inebata buruemi kin ilju; bwe ilju e naj inebata kin men ko an. Nana ilo ran ej bwe ñõn ran eo.” (Matu 6:​33, 34) Jehovah ejelã bwe ebin ñan ad kijejeto wõt kin Ailiñ eo an im ilo ejja ien eo wõt bõk eddo eo ñan kabwe aikwij ko ad ilo kanniek. Inem jen liki maroñ im kõnan eo an ñan kabwe aikwij ko ad.​—Matu 6:​25-32; 11:​28-30.

15. Ewi wãwen an Ri Christian ro kejbãrok juõn ‘mej emõn’?

¹⁵ Jej kwalok ad liki Jehovah ñe jej kõmman bwe en ‘emõn mejed.’ (Matu 6:​22, 23) Juõn mej emõn ej mol, emõn unin kõmman ko an, im ej anemkwoj jen jitõb in kibbon im ankwonak. Ñe ej emõn mejed ejjab melelen bwe jej kãlet ñan mour einwõt juõn ri jeramel ak ñan jerwane eddo eo ad ñan kabwe aikwij ko ilo kanniek. Jen men in, ej kwalok ‘jimwe’ ak juõn lemnak emõn ke jej likit bwe jerbal eo an Jehovah en moktata ilo ad mour.​—2 Timote 1:⁠7.

16. Etke tõmak im beran rej men in aikwij ñan kejbãrok juõn mej emõn?

¹⁶ Jej aikwij kwalok tõmak im beran ñan kejbãrok juõn mej emõn. Ñan wanjoñok, elañe juõn boss ej akwelap bwe kwon keini am jerbal ilo juõn ien kar karõk ñan an wõr kwelok ko an Christian, kwonaj ke beran in lor men ko am raorõk ilo jitõb? Elañe juõn armij ej bere bwe Jehovah enaj kajejjet kallimur eo An ñan kabwe aikwij ko an ri karejar ro An, inem Satan enaj baj kalaplok wõt ijjibed ko an im armij eo emaroñ bõjrak jen an bed ilo kwelok ko. Aet, elañe ejelok ad tõmak men in emaroñ kõtlok bwe Satan eo en karõk men ko raorõk ilo ad mour, im jab Jehovah. Elap an kaburomõjmõj elañe men in ej walok!​—2 Dri Korint 13:⁠5.

“Kõtar Jeova”

17. Ro rej liki Jehovah rej jerammõn ilo wãwen et kiõ?

¹⁷ Jeje ko ilo Bible ekkã air kwalok bwe ro rej likit air kejatdikdik im liki ilo Jehovah rejamin jerata. (Jabõn Kennan Ko 3:​5, 6; Jeremiah 17:⁠7) Emol, jet ien remaroñ aikwij juburu kin diklok in men ko, ak rej watõk men in juõn men in katok edik ñe keidi ibben jerammõn ko renaj bõki tokelik. Ilo wãwen in rej kwalok bwe rej “kõtar Jeova” im liki bwe eliktata enaj lelok ñan ro retiljek an, aolep kajitõk ko rewãnik an burueir. (Sam Ko 37:​4, 34) Kin men in, emol air mõnõnõ kiõ. “Kejatrikrik an ro dru wãnik, e naj men in mõnõnõ; a kõtõmene an ro dri nana, e naj joko.”​—Jabõn Kennan Ko 10:⁠28.

18, 19. (a) Ta kallimur eo Jehovah ear letok ñan kij? (b) Ewi wãwen ad kõmman bwe Jehovah en bed ‘i anbwijmaroñid’?

¹⁸ Ñe juõn ladik jidikdik ej jibwe pein jemen im etetal, ej eñjake an jokane. Ejja wãwen dein ñe jej etetal ibben Jemed ilañ. “Kwon jab mijõk,” Jehovah ear ba ñan Israel, “bwe Ña ibõm. . . . I naj jibõñ yuk. . . . Bwe Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.”​—Aiseia 41:​10, 13.

¹⁹ Ñe jej pijaik ilo lemnak eo ad an Jehovah jibwe pein juõn armij, men in elap an kwalok an yokwe! “I ar likit Jeova imaõ ien otemjej,” David ear je. “Kin An ber i anbijmaroñio I jamin makõtkit.” (Sam Ko 16:⁠8) Ewi wãwen jej kõmman bwe Jehovah en bed ‘i anbwijmaroñid’? Jemaroñ kõmmane ilo ruo wãwen ko. Juõn, ñe jej kõtlok bwe Nan eo an en tel kij ilo aolep wãwen ko ilo mour eo ad; im ruo, ñe jej kalimjek wõt jinekjej eo Jehovah ear likit imad. Ri jeje sam Asaph ear al: “Ña ij ibõm ien otemjej; Kw’ar drebij anbijmaroñiõ. Kwo naj bakajen aõ ial kin Am bebe, im tokelik bõk iõ ñõn aibujuij.” (Sam Ko 73:​23, 24) Kin kallimur in ibbed, jemaroñ jelmae ilju im jeklaj kin liki.

“Ebaktok Kõtlok Kom”

20, 21. Ta ilju eo ej bed iman ro rej kõttar ak likit air kejatdikdik ilo Jehovah?

²⁰ Ñe ej motlok kajjojo ran, elaplok an aorõk ad kõmman bwe Jehovah en bed i anbwijmaroñid. Ejjabto, ijjino kin jeebeplok eo an kabuñ ko rewan, lal eo an Satan enaj iion juõn eñtan einwõt ejañin kar iione mokta. (Matu 24:​21) Lelñoñ enaj kabol armij ro ejelok air tõmak. Ak, ilo ejja ien eo wõt, ri karejar ro reberan an Jehovah renaj lañliñ ilo kejatdikdik eo air! “A ñe men kein re jino in walok,” Jesus ear ba, “inem komin reiliñlok im jer: bwe ebaktok kõtlok kom.”​—Luk 21:⁠28.

²¹ Kin men in jen lañliñ kin kejatdikdik eo ad letok in Anij im jab kõtlok bwe men in kamad ko an Satan ren mone ak kabo kij. Ilo ejja ien eo wõt, jen kate kij ñan kaddeklok ad tõmak, yokwe, im mijak Anij. Ilo ad kõmman men in, jenaj beran in bokake Jehovah iumin jabdewõt wãwen ko im bareinwõt ñan jumae Devil eo. (Jemes 4:​7, 8) Aet, “komin bin im buruemi ren beran, kom otemjej komij kejatrikrik kom ilo Jeova.”​—Sam Ko 31:⁠24.

[Kamelele ko itulal]

Kwomaroñ Ke Uak?

• Ilo wãwen et kejatdikdik eo an Jesus ear jibañ e bwe en beran?

• Ewi wãwen tõmak ej ekkeijaklok ñan kejatdikdik?

• Ewi wãwen kejatdikdik im tõmak remaroñ kõmman bwe juõn Ri Christian en beran in likit men ko raorõk moktata ilo mour eo an?

• Etke ro rej “kõtar Jeova” remaroñ reimanlok ñan ilju im jeklaj ilo liki?

[Pija eo ilo peij 20]

Meñe kwoj dik ak ritto, kwomaroñ ke pijaik yuk ilo Paradise eo?