Emwij Ke Am Bõk “Jitõb Õn Mol”?
“Jema . . . naj lewoj ñõn kom bar juõn Dri Kainemõn, bwe En ber ibemi in drio; Jitõb õn mol.”—JON 14:16, 17.
1. Ta melele eo eaorõk Jesus ear lelok ñan ri kalor ro an ilo awa ko eliktata in an bed ibbeir ilo bo eo ilõñ?
“IROIJ, kwoj ilok ñõn ia?” Eñin kar juõn ian kajitõk ko ri jilek ro an Jesus rar kajitõkin e kake ilo awa ko eliktata in an bed ibbeir ilo bo eo ilõñ ilo Jerusalem. (Jon 13:36) Ke kwelok eo ear wõnmanlok, Jesus ear kejelãik ir bwe kiõ e iten ilok jen ir im jeblak ñan ibben Jemen. (Jon 14:28; 16:28) Ejamin bed ibbeir kiõ ilo kanniek ñan katakin ir im uak kajitõk ko air. Bõtab, ear kamol ñan ir im ba: “Im I naj jar im kajitõk iben Jema, im E naj lewoj ñõn kom bar juõn Dri Kainemõn, bwe En ber ibemi in drio.”—Jon 14:16.
2. Ta eo Jesus ear kallimur bwe enaj jilkinlok ñan ri kalor ro elikin an etal jen ir?
2 Jesus ear kwalok kajjen ri kainemõn eo im kamelele kin ewi wãwen enaj jibañ ri kalor ro an. Ear jiroñ ir: “Im men kein I ar jab ba ñõn kom jen jinoin, bwe I ar ber ibemi. A kiõ Ij ilok ñõn Eo e ar jilkintok Iõ . . . Emõn ñõn kom bwe In ilok: bwe elañe I jab ilok, Dri Kainemõn e jamin iwij ñõn kom; a elañe Ij ilok, I naj jilkinwoj E ñõn kom. . . . A ñe Eo, Jitõb õn mol, Ej itok, E naj tel kom ñõn loan mol otemjej.”—Jon 16:4, 5, 7, 13.
3. (a) Ñããt eo “jitõb õn mol” kar jilkinlok ñan Ri Christian ro jinoin? (b) Ta kar juõn wãwen eo eaorõk jitõb ear einwõt juõn “dri kainemõn” ñan ir?
3 Kallimur in ear jejjet kitien ilo Pentecost 33 C.E., einwõt ri jilek Peter ear kamol: “Anij e ar kejerkakbiji Jisõs in, kim otemjej dri kennan kake. Anij e ar koutiej E kin anbijmaroñõn, im E ar bõk jen Jemen kalimur kin Jitõb Kwojarjar, inem E ar lutõk men in, men eo komij loe im roñjake.” (Jerbal 2:32, 33) Einwõt jenaj loe tokelik, jitõb kwojarjar eo kar lutõke ilo Pentacost ear kõtõbrak elõñ men ko ñan Ri Christian ro jinoin. Ak Jesus ear kallimur bwe “jitõb õn mol” enaj ‘kakememej men otemjej ñõn kom, men ko I ar ba ñõn kom.’ (Jon 14:26) Enaj kamaroñ ir ñan kememej jerbal in kwalok nan eo an Jesus im katak ko ear katakin kaki, im bareinwõt men ko Jesus ear konono kake nan kin nan, im renaj jeje kake. Men in enaj lap an jibañ ri jilek eo eritto John ilo jemlokinlok ebeben eo kein kajuõn C.E. ke ear iten je Gospel eo an. Bwebwenato in ekoba nan in kakabilek eo eaorõk Jesus ear leloke ke ear kajutak Kwojkwoj in Kememej mij eo an.—Jon, chapter 13-17.
4. Ewi wãwen “jitõb õn mol” ear jibañ Christian ri kabit ro jinoin?
4 Jesus ear bareinwõt kallimur ri kalor rein jinoin bwe jitõb eo enaj ‘katakin ir men otemjej” im ‘tel ir ñan loan mol otemjej.’ Jitõb eo enaj jibañ ir ñan melele men ko remũlal ilo Jeje ko im kejbãrok burukuk in lemnak, melele, im karõk ko air. (1 Dri Korint 2:10; Dri Epesõs 4:3) Ilo wãwen in Jitõb kwojarjar ear kamaroñ Ri Christian rein jinoin ñan jerbal einwõt “ri karejar eo etiljek im meletlet” ñan kabwe “ekan ko [ilo jitõb] ilo ien ekkar” ñan kajjojo Ri Christian ri kabit ro.—Matthew 24:45, NW.
Jitõb eo Ej Kennan
5. (a) Ta kejatdikdik eo ekãl Jesus ear kalikare ñan ri kalor ro an ilo boñin Nisan 14, 33 C.E.? (b) Ta jerbal eo an jitõb kwojarjar ñan kajejjet kitien kallimur eo an Jesus?
5 Ilo boñin Nisan 14, 33 C.E., Jesus ear jiroñ ri kalor ro an bwe tokelik enaj bõk ir im renaj bed ibben im ibben Jemen ilañ. Ear jiroñ ir: “Ilo imõn Jema elõñ jikin: elañe jab ein drein, I naj kar kennanek kom mokta; bwe Ij ilen kapojõk jikõmi. Im elañe Ij ilem kapojõk jikõmi, I naj bar itok im bõk kom ñõn Iõ: bwe ijo Ij ber ie, bareinwõt komin ber ie.” (Jon 13:36; 14:2, 3) Renaj iroij ibben ilo Ailiñ eo an. (Luk 22:28-30) Ñan air bõk kejatdikdik in kin mour ilañ, rar aikwij “lotak jen Jitõb” einwõt ro nejin Anij ilo jitõb im kabit ir ñan jerbal einwõt king ro im priest ro ibben Christ ilañ.—Jon 3:5-8; 2 Dri Korint 1:21, 22; Taitõs 3:5-7; 1 Piter 1:3, 4; Reveles̃õn 20:6.
6. (a) Ñããt eo kir eo ñan mour ilañ ear ijjino, im jete armij rej bõk kir in? (b) Ro rar bõk kir eo kar baptais ir ilo ta?
6 “Dri bõk mõtõn kir jen lõñ” ear ijjino ilo Pentecost 33 C.E. im einwõt ear jemlok ilo tu-iolapen yiõ ko ilo 1930. (Dri Hibru 3:1) Oran ro jitõb kwojarjar ear seali bwe ren mõttan Israel ilo jitõb ej 144,000, “emwij wiaik ir jen lõl.” (Reveles̃õn 7:4; 14:1-4) Rein kar baptaise ir ilo enbwin jitõb ilo enbwinin Christ, ilo congregation eo an, im ilo an mij. (Dri Rom 6:3; 1 Dri Korint 12:12, 13, 27; Dri Epesõs 1:22, 23) Elikin baptais eo air ilo den im kabit ir kin jitõb kwojarjar, rar deloñ ilo juõn ial in katok, melelen ial in mour ilo tiljek mae ien rej mij.—Dri Rom 6:4, 5.
7. Etke Christian ri kabit ro wõt rej tellokin bõk bread im wine eo ilo ien Kwojkwoj in Kejota eo?
7 Einwõt Ri Israel ro ilo jitõb, Christian ri kabit rein rar bed ilo bujen ekãl kar kõmmane ikõtan Jehovah im “Israel an Anij.” (Dri Galetia 6:16; Jeremiah 31:31-34, NW) Kar kowãppen bujen eo ekãl ikijen bõtõktõkin Christ eo kar katoore. Jesus ear konono kin men in ke ear kajutak Kwojkwoj in mij eo an. Luke ear je: “Im Ej bõk bred im jar, im ruji, im lelok ñõn ir, im ba, Men in enbwiniõ eo lelok kin kom; komin kõmõn men in ilo ememej Iõ. Im ein drein kõp elikin mõña, im ba, Kõp in kalimur eo ekãl ilo draõ eo etorlok kin kom.” (Luk 22:19, 20) Bwen ro uan 144,000 rej bed wõt ion lal, rej ro ejimwe air bõk bread im wine eo ilo Kwojkwoj in mij eo an Christ.
8. Ewi wãwen ri kabit ro rej jelã bwe rar bõk kir eo ñan mour ilañ?
8 Ewi wãwen ri kabit ro rej jelã bwe rar bõk kir eo ñan mour ilañ? Rej bõk ilo alikar kamol eo an jitõb kwojarjar. Ri jilek Paul ear je ñan armij rot rein: “Bwe ro otemjej Jitõb õn Anij ej tel ir, ir ro nejin Anij. . . . Jitõb Ej mõke kennan ñõn ar, bwe kij ro nejin Anij: Im elañe ro nejin, inem dri jolit; dri jolit an Anij, im dri jolit ibben Kraist; elañe jej iñtan iben, bwe jen bareinwõt aibujuij iben.” (Dri Rom 8:14-17) Joñan an kajur kamol in kin jitõb eo ro rej bere jidik bwe rar bõk kir eo ñan mour ilañ remaroñ bõk jemlok eo bwe rar jab bõke, im kin men in ren jab bõk bread im wine eo ilo ien Kwojkwoj eo.
Jitõb eo im Sheep Ro Jet
9. Ta kumi ko ruo rej konono kaki ilo Gospel ko im ilo book in Reveles̃õn?
9 Ilo lemnak kin oran Ri Christian ro rej ejaake Israel eo ilo jitõb, Jesus ear konono kin ir einwõt “bwij erik.” Rej deloñ ilo “worwor” in bujen eo ekãl, ilo oktan “sheep ro jet” me ejelok joñan orair, eo Jesus ear ba bwe ej aikwij aini ir bareinwõt. (Luk 12:32; John 10:16, NW) Ro uan sheep ro jet me rej aini ir ilo ien jemlokin naj ejaake “jar elap” ro me renaj deor jen “iñtan eo elap,” kin kejatdikdik eo ñan mour ñan indio ilo juõn paradise ion lal. Ekaitoklimo, vision eo John ear bõke ilo jemlokinlok ebeben eo kein kajuõn C.E. ej kwalok oktak in jar eo elap im 144,000 ro uan Israel eo ilo jitõb. (Reveles̃õn 7:4, 9, 14) Sheep ro jet rej bareinwõt bõk ke jitõb kwojarjar, im elañe rej, ewi wãwen ej jelet mour ko air?
10. Ewi wãwen sheep ro jet rej baptais ir ilo “etan Jema im Nejin im Jitõb Kwojarjar”?
10 Jitõb kwojarjar ej bareinwõt lap an jerbal ilo mour ko an sheep ro jet. Rej kalikar wujleplok eo air ñan Jehovah ilo air baptais “ilo etan Jema im Nejin im Jitõb Kwojarjar.” (Matu 28:19) Rej kile iroij bõtata an Jehovah, kõttãik ir ñan Christ einwõt King im Ri Lomor eo air, im rej bokake tel eo an jitõb an Anij, ak kajur eo ej jerbal, ilo mour ko air. Ran otemjej, rej kajeoñ in kaddeklok “leen jitõb” ilo mour ko air, melelen “yokwe, lõñliñ, ainemõn, meanwõr, joij, lejokmen, tiljek, inemõn, jadõr.”—Dri Galetia 5:22, 23.
11, 12. (a) Ewi wãwen ri kabit ko rej kokwojarjar ir ilo juõn wãwen einjuõn? (b) Ilo wãwen et sheep ro jet rej kokwojarjar ir im kõmman bwe ren erreo?
11 Sheep ro jet rej bareinwõt aikwij kõtlok bwe Nan in Anij im jitõb kwojarjar eo an en karreoik ir. Ri kabit ro ededelok an kokwojarjar ir ilo juõn wãwen einjuõn, ilo an kowãnik im kokwojarjar ir einwõt lio belen Christ. (Jon 17:17; 1 Dri Korint 6:11; Dri Epesõs 5:23-27) Ri kanan Daniel ear konono kin ir einwõt “rekwojarjar ro don Anij Laplap,” ro rej bõk Ailiñ eo iumin “nejin armij,” Christ Jesus. (Daniel 7:13, 14, 18, 27, NW) Mokta, ikijen Moses im Aaron, Jehovah ear keañ ñan ailiñ in Israel: “Bwe Ña Jeova ami Anij: kin men in komin mõke kokwojarjar kom, im komin kwojarjar: bwe Ña I kwojarjar.”—Livitikõs 11:44.
12 Nan eo “sanctification (kokwojarjar)” ej melelen “kilen kokwojarjar, kejebel, ak kajenoloke ñan air jerbal ñan Jehovah Anij; wãwen air bed im kwojarjar ak erreo.” Jen 1938, The Watchtower ear ba bwe Jonadab ro, ak sheep ro jet, “rej aikwij katak bwe wujleplok im kokwojarjar rej men in aikwij an kajjojo armij eo ej erom mõttan jar eo elap im jokwe ion lal.” Ilo vision eo kin jar eo elap, emwij je ilo book in Reveles̃õn, ej konono kake ir einwõt emwij air “kwoli im kamouj nuknuk ko air ilo bõtõktõkin Lam” im einwõt air “korijer ñõn E [Jehovah] ran im boñ ilo tempel eo An.” (Reveles̃õn 7:9, 14, 15) Kin jibañ jen jitõb kwojarjar, sheep ro jet rej kate ir ñan kõtõbar men in aikwij eo an Jehovah ñan air kwojarjar.—2 Dri Korint 7:1.
Kõmman Emõn ñan Ro Jatin Christ
13, 14. (a) Ekkar ñan parable eo an Jesus kin sheep im goat ko, lomor eo an sheep ro ej wawa ion ta? (b) Ilo ien in ien jemlokin, ewi wãwen sheep ro jet rar kõmman emõn ñan ro jatin Christ?
13 Jesus ear kalikar kin lukluk eo ebak ikõtan sheep ro jet im bwij edik ilo parable eo kin sheep im goat ko, ekoba ilo kanan eo kin “jemlokin jukjuk im bed eo.” Ilo parable eo, Christ ear kwalok ilo alikar bwe lomor eo an sheep ro jet ej ekkejel ion wãwen air jerbal ñan ri kabit ro, ro ear naetair “ro jãtiõ.” Ear ba: “Inem Kiñ eo e naj ba ñõn ro i anbijmaroñõn, Komin itok kom dri mõnõnõ an Jema, komin jolit ailiñ eo e ar pojõk ñõn kom jen jinoin lõl. . . . Emol Ij ba ñõn kom, Ilo ami kõmõnmõn jabrewõt ñõn juõn ian rein ro jãtiõ eriktata, kom ar kõmõnmõne ñõn Iõ.”—Matu 24:3; 25:31-34, 40.
14 Nan ko “ilo ami kõmõnmõn jabrewõt” ej jitõñlok ñan jerbal ko reyokwe rej kõmmani ñan jurake ro jatin Christ emwij kabit ir kin jitõb kwojarjar, ro me lal eo an Satan ej jerbal ibbeir einwõt ruwamaejet ro, im bareinwõt jolok ir ilo prison. Rar aikwij mõñã, nuknuk, im kejbãrok ejmour eo air. (Matu 25:35, 36, footnote) Ilo ien in ien jemlokin, jen 1914, elõñ ian ri kabit ro rar bed ilo wãwen rot kein. Bwebwenato ko ilo ran kein kin Ri Kennan ro an Jehovah ej kamol bwe rar bõk jibañ jen ro mõttair retiljek, sheep ro jet, ke rein rar emmakit kin jitõb eo.
15, 16. (a) Ilo jerbal ta eo elaptata sheep ro jet rar jibañ ri kabit ro jatin Christ ion lal? (b) Ewi wãwen ri kabit ro rar kwalok air kamolol ñan sheep ro jet?
15 Ri kabit ro jatin Christ ion lal ilo ien in ien jemlokin rar bõk rejetak jen sheep ro jet ñan kajejjet jerbal eo letok in Anij ñan ‘kwalok kin news eo emõn kin Ailiñ eo ibelakin lal kin men in kennan ñan ailiñ otemjelok.’ (Matu 24:14; Jon 14:12) Ke oran ri kabit ro ion lal ej eietlok wõt iumin yiõ ko, oran sheep ro jet kar laplok ñan elõñ million ko. Elõñ ian rein rej jerbal einwõt ri evanjel ro full-time—pioneer im missionary ro—rej kajededlok news eo emõn kin Ailiñ eo ñan “eneo etolok tata i lõl.” (Jerbal 1:8) Ro jet rej bõk kunair ilo jerbal in kwalok nan ilo joñan eo remaroñ im ilo lañliñ rej jurake jerbal in eaorõk ikijen money.
16 Elap an ri kabit ro jatin Christ kamolol kin jurak eo etiljek an sheep ro jet mõttair! Eñjake ko air ear emõn kwalok kake ilo book eo Worldwide Security Under the “Prince of Peace,” letok in class in ri karejar eo ilo 1986. Ej ba: “Jen Bata eo Lal Kein Karuo, jejjet in kitien kanan eo an Jesus kin “jemlokin jukjuk im bed eo’ elaptata an walok kin jerbal eo ‘jar eo elap’ an ‘sheep ro jet’ rej kõmmani . . . Kin men in, elap kamolol ñan ‘jar eo elap’ ibelakin lal jen kajin ko otemjej kin ijo kunair ñan kajejjet kitien kanan eo ilo Matu 24:14!”
‘Ren Jab Wãppen Mõkelok Iair Jen Kij’
17. Ilo wãwen ta eo ro retiljek jen ien ko etto me renaj jerkakbiji ion lal rejamin “wãppen mõkelok iair jen” ri kabit ro?
17 Ilo an konono einwõt juõn ian ri kabit ro im ej jitõñlok ñan maan im kõrã ro retiljek me rar mour mokta jen Christ, ri jilek Paul ear je: “Im rein otemjej, emwij kennan ñõn ir kin air tõmak, r’ar jab bõk men in kalimur eo, im Anij e ar kapojõk ñõn kij jabrewõt men eo emõn jen men ko air, bwe ren jab wãppen mõkelok iair jen kij.” (Dri Hibru 11:35, 39, 40) Ilo ien Millennium eo (Juõn Thousand Yiõ in Iroij eo an Christ), Christ im 144,000 ri kabit ro jatin ilañ renaj jerbal einwõt king im priest ro im ajej ion lal tokjen ko kin katok in binmour eo an Christ ion lal. Kin men in sheep ro jet renaj “wãppen” ilo enbwin im lemnak.—Reveles̃õn 22:1, 2.
18. (a) Ta mol ko ilo Bible rej jibañ sheep ro jet ñan melele kake? (b) Kin kejatdikdik ta eo sheep ro jet rej kõttar an “kwalok ro nejin Anij”?
18 Men kein otemjej ren alikar ilo lemnak an sheep ro jet kin etke Jeje ko an Christian ilo Kajin Greek elap air jitõñlok ñan Christ im ri kabit ro jatin im jerbal eo air elap ñan kajejjet karõk ko an Jehovah. Kin men in sheep ro jet rej watõke bwe juõn jerammõn ñan jurake jabdewõt wãwen ko class in ri kabit ri karejar ro rej kõttar “kwalok ro nejin Anij” ilo Armageddon im ilo ien Juõn Thousand Yiõ in Iroij eo an Christ. Remaroñ reimanlok ñan air “mejõl jen kamokoko an wabõnbõn, ñõn iloan anemkwojan in aibujuij an ro nejin Anij.”—Dri Rom 8:19-21.
Burukuk ilo Jitõb ilo Ien Kwojkwoj in Kejota eo
19. Ta eo “jitõb õn mol” ear kõmmane ñan ri kabit ro im ro mõttair, im ewi wãwen enaj lap air burukuk ilo jotenin March 28?
19 Ilo jar in kajemlok eo an ilo boñin Nisan 14, 33 C.E., Jesus ear kajitõk ilo jar bwe: “Bwe ir otemjej ren juõn; einwõt Kwe, Jema ilo Ña, im Ña ilo Kwe, bwe ir bareinwõt ren ilo Kij; bwe lõl en tõmak bwe Kw’ar jilkintok Iõ.” (Jon 17:20, 21) Kin yokwe, Anij ear jilkinlok Nejin ñan lelok an mour ñan lomoren ri kabit ro im lal in armij ro rej bokake. (1 Jon 2:2) “Jitõb õn mol” ear kaburukuk ro jatin Christ im ro mõttair. Ilo jotenin March 28, elikin tulok in al, class kein ruo jimor renaj kwelok ibben don ñan kememe mij eo an Christ im ñan kalmenlokjen kin aolep men ko Jehovah ear kõmmani ñan ir ikijen katok eo an Nejin ejitenburu ibben, Christ Jesus. Kimij kejatdikdik bwe bed eo air ilo ien in eaorõk naj kakajurlok burukuk eo air im kõkãl bebe eo air ñan wõnmanlok im kõmanmõn ankil an Anij, im ilo wãwen in kamol bwe rej lañliñ in bed ibwiljin ro Jehovah ej yokwe ir.
Ikijen Elij
• Ñããt eo kar jilkinlok “jitõb õn mol” ñan Ri Christian ro jinoin, im ewi wãwen an mol an kar juõn “ri kainemõn”?
• Ewi wãwen ri kabit ro rej jelã bwe rar bõk kir eo ñan mour ilañ?
• Ilo wãwen ta ko jitõb an Anij ej jerbal ion sheep ro jet?
• Ewi wãwen sheep ro jet rar kõmman emõn ñan ro jatin Christ, im etke rejamin “wãppen mõkelok iair jen” ri kabit ro?
[Pija eo ilo peij 27]
“Jitõb õn mol” kar lutõke ion ri kalor ro ilo Pentecost 33 C.E.
[Pija ko ilo peij 29]
Sheep ro jet rar kõmman emõn ñan ro jatin Christ ilo air jurak ir ñan kajejjet jerbal eo letok in Anij ñan kwalok nan