“Nan in Anij . . . ej Jerbal Wõt”
1 “Nan in Anij ej mour im jerbal wõt,” ri jilek Paul ear je. (Hib. 4:12) Kar ta melelen men in? Nan eo an Anij, ak ennan eo, me jej loe ilo Bible emaroñ lap an jelet armij. Jelãlokjen eo ej bed ilo Bible ewõr kajurin ñan kakõmanmanlok mour an armij. Kainemõn im kejatdikdik eo ej letoke ej kebakelok armij ñan Eo Ej Letok Mour, Jehovah Anij. Ennan eo an emaroñ jibañ ro emol burueir ñan jino air etetal ilo ial eo ej tellok ñan mour indio. Bõtab, ñan lo tokjen kein, jej aikwij kajerbal Bible eo ñe jej kwalok nan ñan ro jet.
2 Konono juõn Eon ilo Jabdewõt Ien Emõntok: Elõñ ri kwalok ro ejeja air kajerbal Bible eo ñe rej kwalok nan. Ej mol ke men in kin yuk? Kinke elõñ armij ejjab lap air ien ñan bwebwenato, bõlen jidik kin jidik kwar bõk manit eo ñan lelok wõt book ak magazine ko ak baj kwalok wõt kin melelen juõn eon. Kimij rejañ aolep ri kwalok ro ñan kate ir ñan read ilo diktata juõn eon jen Bible eo ñe rej kwalok kin news eo emõn, ilo wãwen in rej kõtlok bwe armij eo en lo bwe ennan eo ad emol ej itok jen Nan in Anij.
3 Meñe eiet armij rej kõmman bwe en manit eo air ñan read Bible, ej juõn book armij rej kautieje wõt. Armij ro reboub ekkã air naj bõk jejjo minute ñan roñjake juõn ennan rej readi kajju jen Nan eo an Anij. Ñe rej read juõn eon ekkar ilo juõn jitõb in okmãnãn im rej kameleleiki jidik, kajur in nan eo an Jehovah emaroñ walok ilo juõn tokjen emõn ilo eo ej roñjake. Ak ewi wãwen kwomaroñ kakobaik nan in kabellok ko am ñan am read juõn eon jen Bible eo?
4 Kajeoñ in Kõmman Men in ilo Jerbal in Lelok Magazine: Juõn overseer eo ej ito-itak ej kajerbal ilo keie Jeje ko ñe ej bõk kunan ilo jerbal in lelok magazine. Ej bõk ibben juõn Bible jidikdik ilo bõjo eo an. Elikin an kwalok magazine ko im kamelele ilo tu-kadu kin juõn katak, ej kabellok Bible eo im readi juõn eon me ej errã ibben katak eo. Kwomaroñ kõmman men ilo am baj kajitõk, “Ta eo kwoj lemnak kin kallimur in ej kõketak?” inem wõnmanlok im readi eon eo kwar kãlete.
5 Kõmman bwe en mejenkajjik eo am ñan jake juõn ak ruo eon ko jen Bible eo ibben kajjojo armij ej roñjake yuk. Kajur eo an ej kamakitkit emaroñ kabellok ial eo bwe elõñlok armij remaroñ ruaklok ñan Anij.—Jon 6:44.